लुका 18
18
बिधुवा र न्यायधिस
1येसुइ चेलाहान्के सधइ पर्थना गर्हेउ, र चिन्ता झिन्लेहेउ कहि बुझाए एउटा उखान कहिक्, 2“कुन्हुँ एउटा सहरमा परमेस्वरको डर नामान्लार र मानिसहान्को वास्ता पनि नागर्लार एउटा न्यायधिस रहिक्। 3ओइ सहरमा एउटा बिधुवा पनि रहिक्। उ न्यायधिसठुँ आइधार्तरहिक् र कतरहिक्, ‘मइसिन झगडा गर्लार बिरोधिको आघु मोरे पट्टि ज फइसला गर्दे।’ 4उ केइ दिन सम्म त नामानिक। तर पाछा मनमने कहे लागिक्, ‘मइ परमेस्वरको डर पनि नामान्तिन्, र मानिसहान्को वास्ता पनि नागर्तिन्। 5इ बिधुवाइ जारे ज कहिक्। एख्रो फइसला गर्देहे परिक्। नत्र आइकनि मोरो फइसला गर्दे कहिकनि दिक्क पार्ताइ!’”
6अनि पर्भुइ कहिक्, “उ ननाम्रो न्यायधिसके सम्झेउ। 7ओस्ने दिनरात परमेस्वरके पुकारलार मानिसहान्को ओइ फइसला नागर्ताइ र? क्या आफ्नो मानिसहान्के सहयोग गरे ढिलो गर्ताइ र? 8मइ ताहान्के कतिन, ओइ छिट्टे ज उनहान्को फइसला गर्देताइ। तर मानिसको छउना आउते क्या ओइ धर्तिमा बिस्वास भेटाताइ र?”
फरिसि र कर उठालाहारको उखान
9आफिके मात्रे धर्मि र भरोसा गर्लार अरुहान्के चाहि हेला गर्लारहान्के येसुइ एउटा उखान कहिक्, 10“फरिसि र कर उठालाहार दुइ जना मानिस पर्थना गरे मन्दिरमा गेहाइ। 11फरिसिइ ठेढाइकनि यस्के पर्थना गरिक्, ‘परमेस्वर मइ तोर्हाइ धन्येबाद गर्तिन। क्यारेकनिसिन मइ अरु मानिसजस्ने लोभि, फटाहा नाटिन् मइ बेभिचार नागर्लाटिन। मइ इ कर उठालाहार जस्ने पनि नाटिन्। 12मइ हप्तामा दुइ पल्ट उपास बिस्तिन र मइ कमालो सभइ चिजको दसाङ्स देतिन।’ 13तर कर उठालाहार मानिस दुस्सिहि ठेढाइकनि स्वर्गपट्टि चाहे आट पनि नागरि आफ्ने छाति पिट्ले कहिक्, ‘हे परमेस्वर, मइ पापिके दया गर्हइ।’” 14अनि येसुइ कहिक्, “इ फरिसि कते कर उठालाहार परमेस्वरको आघु धर्मि होखिकनि घर गिहिक। उसिगर्ते आफि बड्को होखे खोज्लारहान सभइ बिर्झिन होख्तात्। आफिके बिर्झिन बनालारहान बड्को होख्तात्।”#मति २३:१२; लुका १४:११
येसु र मसिनो बच्चाहान
(मति १९:१३-१५; मर्कुस १०:१३-१६)
15मानिसहान्इ आफ्नो बच्चाहान्को उप्रो येसुइ हात धरिकनि आसिस देउस् कहिकनि ओख्रोठुँ आन्वाइ। इ देखिकनि चेलाहान्इ उनहान्के हप्कावाइ। 16तर येसुइ बच्चाहान्के बोलाइकनि कहिक्, “बच्चाहान्के मोरोठुँ आए देहेउ, इनहान्के झिन रोक्हेउ क्यारेकनिसिन परमेस्वरको राज्ये एस्नेहान्को हो। 17साच्चि मइ ताहान्के कतिन, इ बच्चाहान जस्ने परमेस्वरको राज्येके गर्हन नागर्नि, उ कुन्हुँ रितिइ पनि ओइ भित्र पिसे नापाउताइ।”
धनि मानिस
(मति १९:१६-३०; मर्कुस १०:१७-३१)
18एउटा सासकइ येसुके सुध्याइक्, “नाम्रो गुरु, मइ कन्हुँ नासकेलार जिबन पाए क्या गरे पर्ताइ?”
19येसुइ ओख्राइ कहिक्, “क्यारे मर्हाइ नाम्रो कतेर? परमेस्वर बाहेक नाम्रो कुन्हुँ नाटि। 20परमेस्वरको आग्या तोर्हाइ थाहा ज बाटि: बेभिचार नागरे, मानिस नामारे, नाचोराए, नाफटाए अनि आमा बुबाके आदर गरे।” #प्रस्थान २०:१२-१६; ब्यवस्था ५:१६-२०
21ओइ मानिसइ जबाफ दिहिक्, “इ सभइ आग्या त मइ तन्नेरिभि मान्तिहि आउलाटिन।”
22इ सुनिकनि येसुइ ओख्राइ कहिक्, “तइ अझइ एउटा धन्दा गरे बाकि बाटि। तइसिन होख्लो सभइ चिज बेचिकनि पइसा गरिबहान्के देहेस् र तइ स्वर्गमा धन भेटतेर। अनि आइ, र मोरो पाछु लागेस्।” 23इ बोलि सुनिकनि ओख्राइ धेरे दुख लाग्याक्, क्यारेकनिसिन ओइ धेरे धनि रहिक्।
24ओख्राइ दुख लाग्लो देखिकनि येसुइ कहिक्, “धनिहान्के परमेस्वरको राज्ये भित्र घुस्टे धेरे अप्ठ्यारो बाटि। 25धनि मानिसके परमेस्वरको राज्येमा घुस्टे कते त बरु सिउको दुलोमा उँटके छिरे सझिलो बाटि।”
26इ सुनलारहान्इ सुध्यावाइ, “उसिकनि कुनि मुक्ति पाए सक्ताइ त?”
27तब येसुइ कहिक्, “इ मानिसहान्इ गरे नासक्लार धन्दा होख्नि पनि परमेस्वरइ चाहि गरे सक्ताइ।”
28अनि पतरुसइ कहिक्, “हामिइ आफ्नो घर छाडिकनि तोर्हाइ पछ्यालाटाहुँ।”
29येसुइ उनहान्के कहिक्, “साच्चि मइ ताहान्के कतिन, जुनइ परमेस्वरको राज्येको लागि आफ्नो आमा बुबा, दाजिभइया, जाहान, छउनाछउनि र घर छाड्लाहारइ 30एइ जुनिमा उ कते धेरे भेटाताइ र आउलाहार जुनिमा चाहि कन्हुँ नासकेलार जिबन पाउताइ।”
येसुइ फेरि आफि मर्लारको बारेमा कताइ
(मति २०:१७-१९; मर्कुस १०:३२-३४)
31येसुइ बार जना चेलाहान्के एक ठउँरिमा लेगिकनि कहिक्, “आब सुन्हेउ हामि येरुसलेम जितिहि बाट्हुँ, मानिसको छउनाको बारेमा अगमबक्ताइ लेख्लो सभइ बोलि पुरा होख्ताइ। 32ओख्राइ अरु जातहान्को हातमा छोपाइ देतात्। उनहान्इ ओख्राइ गिल्ला गर्तात्, थुक्तात् र बेजत गर्तात्। 33उनहान्इ ओख्राइ कोर्राइ पिट्तात् र मार्तात् तर तिन दिनमा उ फेरि मर्लोभि जिउते होख्ताइ।”
34तर येसुइ इ क्याको बारेमा कलो हो चेलाहान्इ केइपनि बुझे नासक्वाइ। क्यारेकनिसिन इ बोलि झिन बुझुस् कहिकनि ढाकेलो रहिक्।
येसुइ अन्ध्राके देखे सक्लार बनाइक्
(मति २०:२९-३४; मर्कुस १०:४६-५२)
35येसु यरिहो सहरमा पुगे लाग्ते एउटा अन्ध्रा बाटको छेउमा बिसिकनि भिख मागि धार्लो रहिक्। 36मानिसहान्को भिड नजिककेभि जाइ धार्लो सुनिकनि ओइ “क्या होख्तिहि बाटि?” कहिकनि सुध्याइक्।
37अनि उनहान्इ ओख्राइ कहाइ, “नासरतको येसु जितिहि बाटि।”
38तब अन्ध्राइ चिच्याइतिहि कहिक्, “येसु, दाउदको छउना, मर्हाइ दया गर्हइ।”
39आघु आघु गेलारहान्इ लाभि रहे कहिकनि हप्कावाइ। तर झन बेस्के चिच्याइतिहि कहिक्, “हे दाउदको छउना, मर्हाइ दया गर्हइ।”
40अनि येसु अढिक्, र अन्ध्रा मानिसके आफिठुँ आने कहिक्, उ अन्ध्राके नजिक आन्वाइ। येसुइ ओख्राइ सुध्याइक्, 41“तइ क्या चाहातेर? मइ तोरो लागि क्या गर्दिउ?”
ओइ कहिक्, “पर्भु, मर्हाइ आँखि देखे सक्लार बनाइदे।”
42तब येसुइ ओख्राइ कहिक्, “तइ आँखि देखे सक्लार होखिघाल। तोरो बिस्वासइ गर्ते तइ सन्चो होखेर।”
43अनि उ तुरुन्ते आँखि देख्लार होखिक्, र परमेस्वरको पर्सम्सा गर्ले येसुको पाछु लागिक्। इ देखिकनि सभइ मानिसहान्इ पनि परमेस्वरको पर्सम्सा गर्वाइ।
Currently Selected:
लुका 18: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
