पेरेरित 25
25
फेस्तसको आघु पावलको मुद्दा
1जब फेस्तस बड्को हाकिम होखिकनि आफनो इलाकामा आइक, तब तिन दिनपाछु कइसरिया सहरभि येरुसलेम जाइक्। 2उथि मुख्य पुजारिहान र यहुदिहान्को मुख्य मानिसहान्इ पावलको बिरुधमा दोस लगावाइ, 3अनि उनहान्इ पावलको मुद्दाको फइसला गरे येरुसलेम आने दे कहि फेस्तससिन बिन्ति गर्वाइ। क्यारेकनि पावलके उनहान्इ बाटेमा ज मारे योजना बनालो रहाइ। 4तर फेस्तसइ पावल कइसरियाको झ्यालखानामा थुनेलाटि, र आफि पनि छिट्टे गेलार इच्छा होख्लो कुरा गरिक्। 5ओंइ कहिक्, “उसिगर्ते ताहानमध्यको नेताहान उथि मोरोसिन जाउस्, र ओइ मानिसइ केइ बिगार्लो होछ कनि ओख्राइ दोस लगाउस्।”
6अनि फेस्तस उनहान्को माझोमा आठ दस दिनकते धेरे नाबिसि कइसरिया सहर फर्किक्, र ओख्रे आर्कना दिन फइसला गर्लार ठउँमा बिसिकनि ओंइ पावलके आने हुकुम दिहिक्। 7उ आउलोपाछु येरुसलेमभि आउलो यहुदिहान चारेउपट्टि ठेढावाइ, र पावलको बिरुधमा अनेक थरिको ननाम्रो दोस लगावाइ, तर उनहान्इ दोसको सबुत देहे नासक्वाइ। 8तर पावलइ आफ्नो पछमा बोल्तिहि कहिक्, “मइ यहुदिहान्को धर्म नियमको बिरुधमा, मन्दिरको बिरुधमा, रोमि बड्को राजाको बिरुधमा केइ अपराध नागर्लाटिन।”
9तर फेस्तसइ यहुदिहान्के खुसि बनाएके लागि पावलके कहिक्, “क्या तइ येरुसलेममा जाइकनि उथि मोरो आघु इ कुराको बारेमा फइसला होखुस् कहि इच्छा बाट्यास?”
10तर पावलइ कहिक्, “मइ रोमि बड्को राजाको फइसला गर्लार ठउँ आघु ठेडाइधार्लाटिन, र मोरो मुद्दाको फइसला पनि एइथि ज होखेपर्ताइ। मइ यहुदिहान्के केइ ननाम्रो नागर्लाटिन, जुन तोर्हाइ नाम्रोसिन थाहा बाटि। 11यदि मइ अपराधि हो, र मरे पर्लार केइ धन्दा गर्लाटिन कनि मइ मरे नाडराइतिन। तर यहुदिहान्इ मोरो बिरुधमा लगालो दोसहान सत्य नाटि कनि मर्हाइ उनहान्को हातमा कुनुहि सुम्पे नासक्तात्। रोमि बड्को राजाके मोरो मुद्दाको फइसला होखुस कहि बिन्ति गर्तिन।”
12तब फेस्तसइ सल्लाहाकारहान्सिन सल्लाहा गरिकनि पावलके कहिक्, “तइ रोमि बड्को राजाठुँ बिन्ति गरेर, उसिगर्ते तोर्हाइ ओइथि ज पठाइदेतिन।”
राजा अग्रिपाससिन फेस्तसको सल्लाहा
13केइ दिनपाछु राजा अग्रिपास र ओख्रो बहिनेक बरनिकि फेस्तसके स्वागत गरे कइसरिया सहरमा आवाइ। 14उनहान उथि धेरे दिन बिस्लोपाछु फेस्तसइ पावलको मुद्दाको बारेमा यस्के कहिक्, “फेलिक्सइ झ्यालखानामा थुनिकनि गेलो एउटा मानिस इथि बाटि। 15जब मइ येरुसलेममा रहिन, तब मुख्य पुजारिहान र यहुदि अगुवाहान्इ एइ मानिसको बिरुधमा दोस लगाइकनि दन्ड देहे पर्ताइ कहि बिन्ति गर्लो रहाइ। 16दोसिके दोस लगालाहारसिन मुखामुख नाभेटाइ, र आफ्नो बिरुधमा लाग्लो दोसको बारेमा बोले मउका नादिहिकनि कुन्हुँ मानिसके ओसिहि सुम्पिदेलार रोमिहान्को चलन नाटि कहि मइ उनहान्के जबाफ दिहिन। 17जब उनहान बट्टिकनि मइसिन इथि आवाइ, मइ ढिलो नागरिकनि अर्कना दिन फइसला गर्लार ठउँमा बिसिकनि ओख्राइ आने हुकुम दिहिन। 18तब दोस लगालारहान उठिकनि दोस लगाए लाग्वाइ, मइ सोच्लो जस्ने ओख्रो बिरोधमा केइ ननाम्रो कुराहान्को दोस उनहान्इ लगाए नासक्वाइ। 19तर उनहान्को झगडा चाँहि उनहान्के धर्मको बारेमा र मरि सक्लो येसुको बारेमा होछ, जख्राइ पावलइ अझइ जिउते बाटि कहि जिद्दि गर्तरहिक। 20उसिगर्ते इ कुराको छानबिन गर्लार कुरामा मइ अलमल्ल पर्लो कारनइ इ कुराको बारेमा छलफल गरे येरुसलेममा जाए ओख्रो इच्छा बाटि कि नाटि कहि ओख्राइ मइ सुध्याइन। 21तर पावलइ रोमि बड्को राजाठुँ फइसला नाहोखुनज्यालसम्म झ्यालखानामा ज धारो कहि बिन्ति गर्लोइ ओख्राइ रोमि बड्को राजाठुँ नापठाउनज्यालसम्म ओख्राइ रुङि धारो कहि हुकुम दिहिन।”
22तब अग्रिपासइ फेस्तसके कहिक्, “इ मानिसको बोलि मइ आफिइ सुने पाउनि पनि होख्लारिहिक्।”
अनि ओंइ कहिक्, “तइ काल्हेक सुन्तेर।”
23अर्कना दिन अग्रिपास र बरनिकि धाक लगाले सेनापतिहान र सहरको बड्को मानिसहान्सिन सभाभवनमा पिस्वाइ। अनि फेस्तसको हुकुममा पावलके उथि आन्वाइ। 24अनि फेस्तसइ कहिक्, “राजा अग्रिपास र हामिसिन इथि सभइ बट्हेलो सज्जन मानिस हो, ताहान्इ इ मानिसके देख्ताओ, जख्रो बारेमा सभइ यहुदिहान्इ ‘इ मानिस आब बाचेके लाएकको नाटि’ कहि चिच्याइले येरुसलेममा र इथि पनि मइसिन बिन्ति गर्लो रहाइ। 25तर मिर्तु दन्डको सजाए पाए पर्लाहार एइ केइ गर्लो मइ नाभेटाइन र एइ आफि पनि बड्को राजाठुँ बिन्ति गर्लो कारनइ मइ एख्राइ पठालाहार पक्का गरिन। 26तर एख्रो बारेमा मइ रोमि बड्को राजाके लेखे खास कुरा केइ नाटि। उसिगर्ते मइ एख्राइ ताहान्को आघु, र खास गरिकनि हे राजा अग्रिपास, तोरो सामुन्ने आन्लाटिन, र हामिइ एख्रो जाँच बुझ गरिसक्लोपाछु सायद मइ केइ लेखे कुरा पाउतिन। 27क्यारेकनि कइदिको बिरुधमा केइ दोस नाकहिकनि ओख्राइ बड्को राजाठुँ पठाए मर्हाइ नाम्रो नालागिक।”
Currently Selected:
पेरेरित 25: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
