पेरेरित 22
22
1“दाजिभाइ र बुबा हो, ताहान्को आघु मइ आफिके बचाएके लागि बोल्तिहि बाटिन आब सुनो।” 2पावलइ हिब्रु भासामा बोल्लो सुनिकनि उनहान अझइ लाभि बिस्वाइ।
3पावलइ कहिक्, “मइ किलिकियाको टार्सस सहरमा जर्मलो एउटा यहुदि हो, तर एइ येरुसलेम सहरमा हुर्कलो हो। र गमलिएलठुँ पढिकनि हाम्रो पुर्खाको धर्मसास्त्रको ठिक ठिक सिछा मइ पाउलाटिन। आज ताहान परमेस्वरपट्टि जत्का उत्साहित बाटो, मइ पनि ओत्तिके उत्साहित रहिन।#पेरेरित ५:३४-३९ 4पर्भुको बाटमा लाग्लो मानिसहान्के मरुनज्याल सतातरहिन, अनि बेटा र बेटि दोहइके छोपिकनि झ्यालखानामा थुने लगातरहिन।#पेरेरित ८:३; २६:९-११ 5बड्को पुजारि र सभइ माहासभाभि पनि मइ कहे लाग्लो इ सत्य हो कहिकनि कहे सक्तात्। उनहान्को तर्फभि मइ दमस्कसमा बिस्लार यहुदि दाजिभाइहान्को नाउँमा लेखेलो चिट्ठि मर्हाइ दिहिक्। ओइ चिट्ठि लिहिकनि उथि होख्लो बिस्वासिहान्के छोपिकनि येरुसलेममा आनिकनि सजाए देहेके दमस्कसमा गेलो रहिन।”
पावल आफि फेर्हेलो बारेमा
(पेरेरित ९:१-१९; २६:१२-१८)
6जब मइ यात्रा गर्तिहि दमस्कस नजिक आइ पुग्ते मझानोको लगभग १२ बज्लो रहिक्, एक्कासि आकासभि एउटा बड्को ज्योति मोरो चारेउपट्टि चम्किक्, 7र मइ भुइमा उन्डिन, अनि मर्हाइ एस्नो कहिधार्लो एउटा आवाज सुनिन, “साउल, ए साउल, तइ क्यारे मर्हाइ सतातेर?” 8अनि मइ सुध्याइन, “हे पर्भु तइ कुन्को हो?” अनि ओंइ मर्हाइ कहिक्, “नासरतको येसु हो, जख्राइ तइ सतातिहिबाटेर।” 9उथि मइसिन जत्का जना रहाइ, उनहान्इ ज्योति त देख्वाइ, तर मइसिन बोल्लारको बोलि चाहिँ नाबुझ्वाइ। 10मइ कहिन, “हे पर्भु, आब क्या गरु?” अनि पर्भुइ मर्हाइ कहिक्, “उठहइ, दमस्कसमा जा, र तइ गरेपर्लाहार तोक्लो धन्दाहान तोर्हाइ कहेताइ।” 11ज्योतिको चमकइ गर्ते मइ केइ देखे नासकिन, उसिगर्ते मइसिन होख्लारहान्इ हातइ छोपिकनि डोर्याले मर्हाइ दमस्कसमा पुगावाइ।
12“हननिया कलार एक जना धर्म नियमअनुसार चल्लार धर्मि मानिस जुनइ दमस्कसमा बिस्लार सभइ यहुदिहान्भि आदर पाउलो रहिक्, 13उ मइठुँ आइक, र मोरो छेउमा ठेढाइकनि कहिक्, ‘भाइ साउल, देखे सक्लार होखइ।’ र ओइबेरा मोरो आँखि खुलिक अनि मइ ओख्राइ देखिन। 14अनि ओंइ कहिक्, ‘हाम्रो बुबा पुर्खाको परमेस्वरइ ओख्रो इच्छा जाने, र धर्मि सेबक येसुके देखे र ओख्रो मुखभि बोलि सुने तोर्हाइ छान्लाटि। 15क्यारेकनि तइ ज्या देखेर र सुनेर, तइ सभइ मानिसहान्को आघु ओख्रो साछि होख्तेर। 16आब क्यारे ढिलो गर्तेर? उठहइ, र बप्तिस्मा लेहइ, अनि येसुके बिस्वास गरिकनि तोरो पापहान्भि पबित्र होखइ।’
पावलके ब्यारेकमा आन्लो
17“येरुसलेममा फर्किकनि आउलोपाछु मन्दिरमा पर्थना गरिरते मइ दर्सन देखिन। 18ओंइ मर्हाइ इसि कहिधार्लो मइ सुनिन, ‘छिटो गरिकनि येरुसलेमभि निस्किघाल, क्यारेकनि मोरो बारेमा तइ देलो गबाहि इथिको मानिसहान्इ सुइकार नागर्तात्।’ 19मइ कहिन, ‘पर्भु, मइ हरेक सभाघरमा जाइकनि तोरोमा बिस्वास गर्लारहान्के झ्यालखानामा घाल्लो र कुटपिट गर्लो इनहान सभइके थाहे बाटि। 20तोरो साछि देलाहार स्तिफनसके मार्ते मइ आफि पनि नजिके ठेढाइकनि ओइ हत्यामा सहमत होखि, ओख्राइ मार्लारहान्को लुगा रुङिकनि बिस्लो रहिन।’”#पेरेरित ७:५७ 21“तब पर्भुइ मर्हाइ कहिक्, ‘जा, क्यारेकनि मइ तोर्हाइ अरु जातको मानिसहान्ठुँ दुसि दुसिसम्म पठातिन।’”
22उनहान्इ पावलको बोलि एत्केसम्म मात्रे सुन्वाइ, र इसि कतिहिँ उनहान बड्को सोरमा चिच्याए लाग्वाइ, “एख्राइ मारे ज पर्ताइ। इ मानिसके जिउते छाडे नाहोख्ताइ!” 23उनहान आफ्नो पच्छेउराहान हुर्याइकनि धुलो उडाले चिच्याए लाग्वाइ। 24इ देखिकनि रोमि सेनापतिइ कहिक्, “ओख्रो बिरुधमा यहुदिहान क्यारे एस्के चिच्याइधार्लाटाइ कहि थाहा पाएके लागि ओख्राइ ब्यारेकभित्र आनिकनि कोर्राइ पिटिकनि जाँचिहुस्, कहिकनि हुकुम गरिक्।” 25जब उनहान्इ पावलके कोर्राइ पिटे छालाको डोराइ बाध्वाइ, तब पावलइ नजिके ठेढाइधार्लो कप्तानके सुध्याइक्, “क्या रोमि नागरिक र दोस नाभेटालो मानिसके कोर्राइ पिटे रोमि कानुनइ ताहान्के देताइ?”
26कप्तानइ इ सुन्लोपाछु सेनापतिठुँ जाइकनि एस्के कहिक्, “तइ क्या गरे आट्लाटेर? क्यारेकनि इ मानिस त रोमि नागरिक होछ।”
27तब सेनापति आइकनि पावलके सुध्याइक्, “मर्हाइ कहि, क्या तइ रोमि नागरिक हो?”
ओंइ कहिक्, “अ।”
28सेनापतिइ जबाफ दिहिक्, “मइ त रोमि नागरिक हक पाए धेरे पइसा तिरिकनि किन्लो हो।”
पावलइ कहिक्, “तर मइ त जर्मले रोमि हो।”
29तब ओख्राइ जाँच गरे तयार होख्लारहान सभइ तुरुन्ते हटिकनि गेहाइ, र पावल एउटा रोमि नागरिक होछ कहि थाहा पाइकनि सेनापति पनि डराइक, क्यारेकनि ओंइ पावलके बाध्लो रहिक्।
पावल माहासभाको आघु
30तर अर्कना दिन यहुदिहान्इ पावलके खास क्या कारनइ दोस लगालो रहाइ ओइबुझे बिचारइ सेनापतिइ ओख्राइ फुकालिदिहिक, र सभइ मुख्य पुजारिहान र माहासभाके बट्टेहे आग्या गरिक्, अनि पावलके तर आनिकनि उनहान्को आघु ठेडावाइ।
Currently Selected:
पेरेरित 22: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
