पेरेरित 20
20
पावल माकेडोनिया र गिरिस इलाकामा
1जब एफिसस सहरमा हुलदङ्गा थाम्मिहिक पावलइ बिस्वासिहान्के बोलाइक, र उनहान्के हउसला दिहिक्, अनि उनहान्सिन बिदा होखिकनि माकेडोनिया इलाकापट्टि लागिक। 2र उथिको ठउँ ठउँमा जाइकनि बिस्वासिहान्के धेरे हउसला दिहिक् र उ गिरिस इलाकामा गिहिक। 3पावल उथि तिन महिनासम्म बिसिक। उ पानि जाहाजभि सिरिया इलाकापट्टि जाए खोज्लो बेरामा केइ यहुदिहान्इ ओख्राइ मार्लार योजना बनालाटाइ कहि थाहा पाइक। उसिगर्ते पावल माकेडोनिया इलाका होख्ले फर्कलार पक्का गरिक्। 4तब बेरिया सहरमा बिस्लार पुरसको छउना सोपातोर्स, थेसलोनिके सहरभि अरिस्ताखर्स र सिकन्दस, डर्बि सहरको गायस र तिमोथि र एसिया इलाकाको तुखिकस र तोर्फिमस ओख्रोसिन गेहाइ। 5उनहान आघु ज पुगिकनि हाम्राइ तोर्आस सहरमा पर्खिधार्लो रहाइ। 6तर हामि अखमिरि रोटिको चाडपाछु फिलिपि सहरभि पानि जाहाजमा चढिकनि पाच दिनमा तोर्आस सहरमा उनहान्ठुँ पुग्हुँ र उथि सात दिनसम्म बिस्हुँ।
मर्लो तन्हेयारि छउडा जिउते होख्लो
7जब हप्ताको पहिलि दिनमा हामि बिस्वासिहान्सिन पर्भु भोज खाए एक ठउँमा बट्टेहुँ, तब पावल अर्कना दिन गेलार इच्छा गर्लो कारनइ उनहान्सिन आद्धा रातसम्म सिखाइधारिक। 8हामि बट्टेलो उप्रो तल्लाको कोठामा धेरे ढेब्रिहान जरिधार्लो रहिक्। 9उथि युटिकस नाउँ होख्लो एउटा तन्हेयारि छउडा झ्यालमा बिस्लो रहिक्। पावलइ धेरे बेरसम्म सिखाइधार्ते उ छउडा निन्द्राइ झुले लागिक, र मस्त निन्द्रामा परिकनि तिन तल्लाभि भुइमा खसिक। ओख्राइ उठाए जिते उ मरिसक्लो होछ। 10तब पावल तर आइक र घोप्टो परिकनि ओख्राइ अङ्गला मारिक र कहिक्, “चिन्ता झिन गर्हेउ, क्यारेकनिसिन इ नामर्लाटि।” 11अनि पावल फर्किकनि उप्रो कोठामा जाइक् र सभइ जना मिलिकनि पर्भु भोज खावाइ। बेहानि नाहोखुन्ज्यालसम्म उनहान्सिन कुराकानि गरिक् र उथिभि जाइक्। 12अनि बिस्वासिहान्इ उ तन्हेयारि छउडाके जिउते अवस्थामा घर पुगाइदेहाइ र उनहान जारे खुसि होख्वाइ क्यारेकनि उ मर्लोभि फेरि जिउते होख्लो रहिक्।
पावल आफ्नो साखाहान्सिन तोर्आसभि मिलेटस सहरमा गेलो
13पावलके छाडिकनि हामि पानि जाहाजभि पहिलि अस्सोस सहरमा गिहि। पावल अस्सोस सहरसम्म भोइकनि जाए र उथिभि मात्रे पानि जाहाज चढ्लार बिचार गर्लो रहिक्। 14जब ओंइ हाम्राइ अस्सोसमा भेटिक, तब हामि ओख्राइ पानि जाहाजमा चढाहुँ, अनि मितिलेने सहरमा आहुँ। 15उथिभि पानि जाहाजमा चढिकनि अर्कना दिन खियस ठुठिको छेउमा आइपुग्हुँ र तिन दिनमा सामोस ठुठिमा आइपुग्हुँ। आर्को दिन मिलेटस सहरमा आइपुग्हुँ। 16एसिया इलाका नाबिस्लार बिचारइ पावल एफिसस सहर नापिसिकनि गेलार पक्का गरिक्। क्यारेकनिसिन सकेसम्म पेन्तिकोस चाडको दिनमा येरुसलेममा ज पुगे आतुरि गर्लो रहिक्।
एफिससको मन्डलिको अगुवाहान्के हउसला दिहिकनि पावल बिदा होखिक
17हामि मिलेटस सहरमा आइपुगिसक्लोपाछु पावलइ एफिसस सहरको मन्डलिको अगुवाहान्के बोलाए मानिस पठाइक्। 18जब उनहान आइपुग्वाइ तब पावलइ उनहान्के कहिक्, “ताहान्के थाहे बाटि, जुन दिनभि मइ एसिया इलाकामा आइन उ दिनभि मोरो बानि बेहोरा चाल चलन कस्नो बाटि ताहान्इ जान्ताओ। 19मइ कन्हुँ आफिके बड्को नाठानि आँसु बगातिहि यहुदिहान्इ घरि घरि दुख दिहिकनि मारे खोज्ते पनि पर्भुको सेवा गरिन्। 20ताहान्को साहेता होख्लार कुरा ताहान्को आघु घोसडा गरे र घर घरमा जाइकनि सभइको आघु ताहान्के सिछा देहे मइ पाछु नाहटिन। 21यहुदिहान र अरु जातहान्के आफ्नो आफ्नो पाप मानिकनि परमेस्वरपट्टि फर्केउ र हाम्रो पर्भु येसु खिरिस्टउप्रो बिस्वास गरो कलार कुराको मइ गबाहि देलाटिन। 22आन्हा मइ पबित्र आत्माइ कलो बोलि मानिकनि यरुसलेमपट्टि जितिहि बाटिन, उथि मर्हाइ क्या क्या होख्लार हो मइ केइ नाजान्तिन।” 23तर मर्हाइ एत्का थाहा बाटि, कि भबिस्यमा सतावट र झ्यालखानाको दुख भोगे पर्ताइ कहि पबित्र आत्माइ मर्हाइ हरेक सहरमा चेतावनि देलाटि। 24तर ज्या परि आउनि पनि मर्हाइ केइ मतलब नाटि। मोरो इच्छा एत्के हो कि पर्भुइ देलो एउटा धन्दा पुरा गरे सकु। उ धन्दा क्या हो कनि परमेस्वरइ मानिसहान्के अनुग्रह गर्लाटि कलार कुराको सुसमाचार प्रचार गर्लार हो।#२ तिमोथि ४:७
25अब चाहो, मइ जान्तिन कि ताहानमध्य जख्राइ जख्राइ मइ परमेस्वरको राज्येको पर्चार गर्तिहि भोइन, आब ताहान्इ मोरो मुख फेरि कन्हुँ नादेख्ताओ। 26उसिगर्ते आज मइ ताहान्के गबाहि देतिन, यदि परमेस्वरको दन्ड ताहानमा पर्निसिन, ताहान आफि ज जिम्मा लेहे पर्ताइ, उ दोस मर्हाइ नालाग्ताइ। 27क्यारेकनिसिन मइ परमेस्वरको सभइ योजना ताहान्के सुनाए पाछु नाहटिन। 28उसिगर्ते ताहान आफ्नो र आफ्नो सभइ बगालको हेरचाहा गरो। पबित्र आत्माइ ताहान्के बगालको चरुवा बनालो हो। क्यारेकनि परमेस्वरइ आफ्नो छउनाको रगतभि उनहान्के किन्लो हो। 29क्यारेकनिसिन मर्हाइ थाहा बाटि, मइ इथिभि गेलोपाछु गलत कुरा सिखालार मानिसहान ताहान्को माझोमा आइकनि बिस्वासिहान्के नास गर्तात् जस्ने डर लाग्दो बोवासोहान पिसिकनि बगालके नास गर्ताइ। 30र ताहान्के माझोभि गलत कुरा सिखालार मानिसहान निस्कतात्। जुनइ बिस्वासिहान्के झुक्याइकनि आफ्नो पाछु लेग्तात्। 31उसिगर्ते होसियार होख्हेउ, मइ तिन बर्ससम्म दिन रात आँसु बघातिहि ताहान्के चेतावनि दिहिधार्लो कुरा सम्झेउ।
32“आब मइ ताहान्के परमेस्वरको हातमा सुम्पिदेतिन र ओंइ हाम्राइ कलो ओख्रो अनुगर्हको बचनको भरमा बिस्हेउ कहि कतिन। उसिगर्ते परमेस्वरइ बिस्वासमा ताहान्के बलियो र आफ्नो मानिसहान्के आसिसको हकवाला बनाताइ। 33मइ कुनुहुँ मानिसको सोनो, चादि अथवा लुगाको लोभ नागरिन। 34ताहान आफि जान्ताओ कि मइ आफ्ने हातइ मेहनत गरिकनि आफिके र मोरोसिन होख्लारके चाहेलार चिज जुटाइन। 35सभइ कुरामा मेहनत गर्नि खाचोमा पर्लो मानिसहान्के साहेता गरे सक्हेताइ कलार नमुना ताहान्के मइ देखालाटिन। पर्भु येसुको बचन याद गरो, कस्के ओंइ आफिइ कलाटि, ‘लेहेमा कते देहेमा धेरे आसिस बाटि।’”
36यत्का कहिकनि पावल घुडा टेकिक र उनहान सभइसिन पर्थना गरिक्। 37उनहान सभइ जना बेस्के रउतिहि ओख्राइ अङ्गला मार्तिहि चुम्मा खावाइ। 38मोरो मुख फेरि कन्हुँ नादेख्ताओ कहि पावलइ कलो कुरामा उनहान जारे सोक गर्वाइ। अनि उनहान्इ पावलके पानि जाहाजमा पुगावाइ।
Currently Selected:
पेरेरित 20: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
