YouVersion Logo
Search Icon

पेरेरित 2

2
पबित्‌र आत्‍मा आउलो
1जब पेन्‍तिकोसको चाडको दिन आइक, येसुमा बिस्‍वास गर्‌लारहान सभइ एक्‍के ठउँमा बट्‍हेलो रहाइ।#लेबि २३:१५-२१; ब्यवस्‍था १६:९-११ 2ओइबेरा स्‍वर्‌गभि एक्‍कासि बड्‍को बतासको आधि जस्‍ने एउटा आवाज आइक, र उनहान बिस्‍लो पुरे घर गुन्‍जिहिक। 3अनि आगिको जोजाहानजस्‍ने उनहान्‍ठुँ देखा परिक्, र ओइ आगिको जोजा भाग भाग होखिकनि हरेकउप्‍रो बिसिक। 4अनि उनहान सभइ पबित्‌र आत्‍माइ पुरे भर्‌रेहाइ, र पबित्‌र आत्‍माइ उनहान्‍के बोले लगालो अनुसार अरु भासामा बोले लाग्‍वाइ।
5ओइबेरा सन्‍सारमा होख्‍लो हरेक देसको धर्‌मि यहुदिहान येरुसलेम सहरमा बिस्‍लोरहाइ। 6तब इ आवाज सुनिकनि भिड बट्‍हिक। मानिसहान अकमक्‍क पर्‌वाइ, क्‍यारेकनिसिन हरेकइ एस्‍नो सुन्‍वाइ, इनहान्‍इ त हाम्‍रे ज भासामा बोलिधार्‌लाटाइ। 7उनहान जारे ज छक्‍क परिकनि कहे लाग्‍वाइ, “क्‍या इ बोल्‍लार मानिसहान सभइ गालिलिहान नाहो र? 8कस्‍के त इनहान्‍इ हाम्‍रो आफ्‍ने भासामा बोलिधार्‌लो सुन्‍तिहि बाट्‍हुँ? 9हामिचाहिँ पार्‌थिहान, मादिहान, एलामिहान, मेसोपोटामियाको, यहुदियाको, कापाडोकियाको, पोन्‍टसको, र एसियाको 10अनि फिर्‌गियाको, पामफिलियाको, मिस्‍रदेसको, कुरेनिमा पर्‌लाहार लिबियाको इलाकाहान, रोम सहर, 11केरेट ठुठिको मानिसहान र अरबिहान पनि बाट्‍हुँ। चाहे हामि यहुदि बाट्‍हुँ वा यहुदि धर्‌म मान्‍लाहार अरु जातको मानिस बाट्‍हुँ, इनहान्‍इ परमेस्‍वरइ गर्‌लो बड्‌को धन्‍दाहान्‍को बारेमा बोल्‍लो हाम्‍रे आफ्‍नो भासामा सुन्‍तिहि बाट्‍हुँ।” 12एस्‍के छक्‍क र अलमल्‍ल परिकनि उनहान्‍इ एक आर्‌कोके सुध्‍यावाइ, “एख्‍रो अर्‌थ क्‍या हो?”
13तर कत्‍का जनाइ खिसि गर्‌तिहि कहाइ, “इनहान त गुरियो जाँड खाइकनि मात्‍लाटाइ।”
पतरुसको उपदेस
14पतरुस एघार जना पेरेरितहान्‍सिन ठेढाइक् र बड्‍को स्‍वरमा भिडके कहिक्, “ए यहुदि साखा हो, र येरुसलेममा सभइ बिस्‍लारहान हो, इथिन क्‍या होख्‍लो हो ताहान्‍के कतिन, मोरो बोलि ध्‍यान लगाइकनि सुनो। 15ताहान्‍इ सोच्‍लो जस्‍ने इ मानिसहान जाँडइ मात्‍लो नाहो। क्‍यारेकनिसिन आन्‍हा त बेहानोको नउ मात्‍रे बज्‍लाटि। 16तर आन्‍हा होख्‍लो कुरा योएल अगमबक्‍ताइ कहेलो ओइ बचन पुरा होख्‍लाटि,
17“‘अन्‍तिम दिनहानमा एस्‍नो होख्‍ताइ कहि परमेस्‍वरइ कताइ,
मइ मोरो आत्‍मा सभइ मानिसहानमा पर्‌सस्‍त मात्‍रामा पठातिन।
र ताहान्‍को छउनाहान र छउनिहान्‍इ अगमबाडि बोल्‍तात्,
ताहान्‍को तनहेयारिहान्‍इ दर्‌सन देख्‍तात्,
र बुढोपाखाहान्‍इ सपना देख्‍तात्।#योएल २:२८-३२
18हो, ओइ दिनमा मोरो सेवा गर्‌लाहार बेटा र बेटिहान दोहइमा
मइ मोरो आत्‍मा पठाइदेतिन,
अनि उनहान्‍इ अगमबाडि बोल्‍तात्।
19उप्‍रो आकासमा मइ छक्‍क बनालार धन्‍दाहान गर्‌तिन
र तर धर्‌तिमा चिन्‍हहान देखातिन,
रकत, आगि र धुवाँको बद्‌रि देखापर्‌ताइ।
20परमपर्‌भुको बड्‍को र अचम्‍मको फइसला गर्‌लार दिन आएकते आघु,
घामइ उज्‍यालो देहे छाड्‍लो जस्‍ने अन्‍धार होख्‍ताइ,
र जोनो रकत जस्‍ने रक्‍तारोमा फेर्‌हेताइ।
21र जुन जुनइ परमपर्‌भुको नाउँ लेतात्, उनहान्‍इ उदार पाउतात्।’
22“इजराएलिहान हो, इ कुरा सुनो, परमेस्‍वरइ येसुभि ताहान्‍को माझोमा सक्‍तिसालि धन्‍दाहान, अचम्‍मको धन्‍दाहान र चिन्‍हहान देखालो त ताहान्‍के थाहे बाटि। इ चिन्‍हहानभि परमेस्‍वरइ नासरतको येसुके आफिइ ज पठालो हो कहि सबुत दिहिक्। 23परमेस्‍वरइ पक्‍का गर्‌लो योजना र पहिलिहि थाहा होख्‍लो अनुसार छोपेलो ओइ येसुके ताहान्‍इ दुस्‍ट मानिसहान्‍को हातभि कुरुसमा झुन्‍डयाइकनि मारो।#मति २७:३५; मर्‌कुस १५:२४; लुका २३:३३; युहन्‍ना १९:१८ 24तर परमेस्‍वरइ येसुके मिर्‌तुको दुखभि छुटाइकनि मर्‌लोभि जिउते बनाइक्। क्‍यारेकनिसिन उ मिर्‌तुको अधिनमा रहे सम्‍भब नारहिक्।#मति २८:५-६; मर्‌कुस १६:६; लुका २४:५ 25दाउद राजाइ येसुको बारेमा एस्‍के कलो रहिक्,
“‘मइ पर्‌भुके सधइ मोरो आघु देखिन,
क्‍यारेकनिसिन मइ नाडगमगाउ कहिकनि उ मोरो दाहिन्‍यापट्‌टि बाटि।#भजनसङग्‌रह १६:८-११
26उसिगर्‌ते मइ हिर्‌दयभि आनन्‍द बाटिन,
र खुसिइ तोरो पर्‌सम्‍सा गर्‌तिन।
मोरो जिउमा मइ मर्‌नि पनि फेरि जिउते होख्‍लार आसमा जिउताइ।
27क्‍यारेकनिसिन तइ मर्‌हाइ मर्‌लो मानिसहान्‍को ठउँमा नाछाड्‍तेर,
र तइ आफ्‍नो पबित्‌र मानिसको जिउ चिहानमा सेराए नादेतेर।
28तइ मर्‌हाइ जिबनको बाट देखाइदेहेर,
तइ मोरो नजिक रतेखेरि मइ जारे ज खुसिइ रमाइतिन।’
29“हे दाजिभाइहान हो, हाम्‍रो पुर्‌खा दाउदको बारेमा मइ ताहान्‍के पक्‍कासिन कहे सक्‍तिन, उ मरिक र गड्‌काहिक, अनि ओख्‍रो चिहान आज सम्‍म पनि बाटि। 30तर दाउद अगमबक्‍ता होख्‍लो कारनइ, ओख्‍राइ थाहा रहिक् कि ओख्‍रे सन्‍तानभि उ जस्‍ने राजा बनाताइ कहि परमेस्‍वरइ ओख्‍रोसिन कसम खइलो रहिक्।#भजनसङग्‌रह १३२:११; २ समुएल ७:१२-१३ 31पहिलिहि ज इ थाहा पाइकनि दाउदइ खिरिस्‍ट मर्‌लो पाछु जिउते होख्‍लारको बारेमा कहिक्,
“‘उ चिहानमा नाछाड्‍हिक,
अनि ओख्‍रो जिउ पनि नासेराइक।’
32“एइ येसुके परमेस्‍वरइ जिउते बनाइक्। इ कुराको हामि सभइ गबाहि बाट्‌हुँ। 33अनि ओख्‍राइ बड्‍को बनाइकनि परमेस्‍वरइ आफ्‍नो दाहिन्‍यापट्‌टि धारिक, र आफ्‍नो बाचा अनुसार ओख्‍राइ पबित्‌र आत्‍मा दिहिक्। पर्‌भु येसुइ ओइ पबित्‌र आत्‍माके आब हाम्‍राइ देलाटि। र जुन कुरा ताहान्‍इ देखिधार्‌लाटो र सुनिधार्‌लाटो, उ कुरा पबित्‌र आत्‍माभि होख्‍लो हो। 34-35दाउद त स्‍वर्‌गमा नाचढिक, तर ओंइ आफि कलाटि,
‘परमपर्‌भुइ मोरो पर्‌भुके कहिक्,
जबसम्‍म मइ तोरो दुस्‍मन्‍के तोरो गोडको पइतला तर नापर्‌तिन,
तबसम्‍म तइ मोरो दाहिन्‍या हातपट्‍टि बिस।’#भजनसङग्‌रह ११०:१
36“उसिगर्‌ते इजराएलको सभइ मानिसहान हो, इ कुरा पक्‍का बुझेपर्‌ताइ, येसुके जख्‍राइ ताहान्‍इ कुरुसमा झुन्‍डयाओ, परमेस्‍वरइ ओख्‍राइ पर्‌भु र खिरिस्‍ट बनाइक्।”
37जब इ कुरा सुन्‍वाइ तब उनहान्‍को मन रोइक, अनि उनहान्‍इ पतरुस र अरु पेरेरितहान्‍के सुध्‍यावाइ, “ए दाजिभाइहान हो, आब हामि क्‍या गरे त?”
38पतरुसइ उनहान्‍के कहिक्, “आफ्‍नो आफ्‍नो पाप मानिकनि परमेस्‍वरपट्‌टि मन फर्‌काओ, र ताहान सभइ जनाइ पाप माफको लागि येसु खिरिस्‍टको नाउँमा ताहान हरेकइ बप्‍तिस्‍मा लेहो, अनि ताहान्‍इ परमेस्‍वरइ देलो बरदान पबित्‌र आत्‍मा पाउताओ। 39क्‍यारेकनि बाचा ताहान्‍को लागि, ताहान्‍को सन्‍तानको लागि र दुसि रलो सभइको लागि हो, हरेक जख्‍राइ पर्‌भु हाम्‍रो परमेस्‍वरइ बलाताइ।”
40पतरुसइ अरु धेरे कुराहानभि उनहान्‍के चेतावनि दिहिक्, र सम्‍झातिहि कहिधार्‌लो रहिक्, “इ दुस्‍ट पुर्‌खाको आउलाहार दन्‍डभि ताहान्‍इ आफिके बचाहेउ।” 41तब जुन जुनइ ओख्‍रो बोलि बिस्‍वास गर्‌वाइ उनहान्‍इ बप्‍तिस्‍मा लेहाइ, ओइदिनमा लगभग तिन हजार मानिसहान उनहानमा थपेहाइ। 42र उनहान पेरेरितहान्‍सिन सिख्‍लार, सङ्‍गति गर्‌लार, पर्‌भु भोजमा भाग लेलाहार र पर्‌थनामा लगातार लागिधार्‌तरहाइ।
पर्‌भु येसुमा बिस्‍वास गर्‌लारहान्‍को रहनसहन
43पेरेरितहान्‍भि धेरे अचम्‍मको धन्‍दा र चिन्‍हहान होख्‍लो देखिकनि हरेकइ धेरे आदर गर्‌वाइ। 44बिस्‍वास गर्‌लारहान सधइ बट्‍टेतरहाइ, र सभइ थोक उनहान्‍को सझ्‍या रहिक्।#पेरेरित ४:३२-३५ 45र उनहान्‍इ आफ्‍नो सम्‍पति र चिजबिज बेचिकनि जख्‍राइ जख्‍राइ ज्‍या ज्‍या चिजको खाचो पर्‌तरहिक् उ सभइके बाडिदेतरहाइ। 46उनहान एके मनको होखिकनि दिन दिनके मन्‍दिरमा बट्‌टेत रहाइ, र घर घरमा भोज गर्‌तरहाइ, र उनहान खुसि र सुद्‍द हिर्‌दयइ मिलिजुलि खइतरहाइ, 47र परमेस्‍वरको पर्‌सम्‍सा गर्‌तरहाइ। मानिसहान्‍इ पनि उनहान्‍के मन परातरहाइ। उदार पाउलारहान्‍के पर्‌भुइ दिन दिनके उनहान्‍को समुहमा थपिदेतरहिक्।

Highlight

Share

Copy

None

Want to have your highlights saved across all your devices? Sign up or sign in