पेरेरित 15
15
येरुसलेमको सभा
1केइ समयपाछु केइ मानिसहान यहुदिया इलाकाभि एन्टिओखियामा आवाइ बिस्वासि दाजिभाइहान्के यस्के सिखाए लाग्वाइ, “मोसाइ देलो धर्म नियम अनुसार खतना नाहोख्नि ताहान्इ उदार पाएनासक्ताओ।”#लेबि १२:३; पेरेरित १५:७; १०:१-४३ 2तब पावल र बारनाबासको उनहान्सिन जारे ज तर्क बितर्क र भनाभन होखिक्। उथिको दाजिभाइहान्इ पावल र बारनाबास र अरुहान्के पनि इ कुराको फइसलाको लागि पेरेरितहान र अगुवाहान्ठुँ येरुसलेम सहर जाएके छान्वाइ।
3उसिगर्ते बिस्वासि दाजिभाइहान्इ उनहान्के उथिभि बिदा देहाइ। उनहान फोनिके र सामरिया इलाकाभि जितिहिगर्ते अरु जातहान्इ पर्भुके गर्हन गर्लो सभइ कुरा उनहान्के नाम्रोसिन सुनावाइ। इ खबरइ उथिको दाजिभाइहान जारे ज खुसि होख्वाइ। 4जब उनहान येरुसलेम आइपुग्वाइ, तब उनहान्के मन्डलिको सभइ, पेरेरित र एल्डरहान्इ स्वागत गर्वाइ। परमेस्वरइ उनहान्सिन गर्लो सभइ धन्दाको बारेमा उनहान्इ उथि कहाइ। 5तब फरिसि दलको कत्का बिस्वास गर्लाहारहान्इ ठेढाइकनि कहाइ, “अरुजातहान्को खतना होखे र उनहान्के मोसाको धर्म नियम पालन गरे आग्या देहे खाचो बाटि।”
6एख्रो बारेमा सोच बिचार गरेके पेरेरितहान र अगुवाहान बट्टेहाइ। 7जारे ज धेरे जुग भनाभन होख्लोपाछु पतरुस ठेडाइक र उनहान्के कहिक्, “दाजिभाइ हो, ताहान्के थाहे बाटि, धेरे समय पहिलि कस्के परमेस्वरइ मोरो मुखभि अरु जातहान्इ सुसमाचारको बचन सुनुस् र बिस्वास गरुस् कहि ताहान्को माझोभि मर्हाइ छान्लोरहिक।#पेरेरित १०:१-४३ 8हिर्दको बोलि जान्लाहार परमेस्वरइ हाम्राइ जस्ने पबित्र आत्मा दिहिक्, ओस्ने ज ओंइ अरु जातहान्के पनि पबित्र आत्मा दिहिकनि उनहान्के आफ्नो जातको मानिसहान बनाइक् कलार कुरा हाम्राइ देखाइक।#पेरेरित २:४; १०:४४ 9परमेस्वरइ यहुदि र अरु जातहान्मा भेदभाब नागरिक्, तर उनहान्इ पर्भुमा बिस्वास गर्लो कारनइ उनहान्को हिर्दय सुद्द पारिक। 10उसिगर्ते अरु जातको बिस्वासिहान्को काधमा इ जुवा बोके लगाइकनि क्यारे परमेस्वरको इच्छाको बिरोध गर्ताओ? इ जुवा न त हाम्रो बुबा-पुर्खाइ न त हामिइ बोके सक्हुँ। 11ओस्नो नागर्हुँ, उनहान जस्ने ज हामि पनि येसु पर्भुको अनुग्रहइ बाच्लाटाहुँ कलार कुरामा हामि बिस्वास गर्ताहुँ।”
12तब सभामा सभइ लाभि बिस्वाइ, अनि पावल र बारनाबासइ अरु जातहान्को माझोमा परमेस्वरइ उनहानभि गर्लो चिन्हहान र अचम्मको धन्दाहान्को बारेमा सुनावाइ र उनहान्इ ध्यान लगाइकनि सुन्वाइ। 13उनहान बोलिसक्लोपाछु याकुबइ यस्के कहिक्, “दाजिभाइहान हो, मोरो कुरा सुनो, 14परमेस्वरइ आफ्ने नाउँको लागि अरु जातहानभि छानिकनि ‘आफ्ने मानिस बनाउ’ कहिकनि उनहान्के दया गरिक् कलार कुरा सिमोन पतरुसइ कलोरहिक। 15इ कुरासिन अगमबक्ताको बचन पनि मिल्ताइ, एस्के लेखेलाटि,
16“‘इ कुरा होखिसक्लोपाछु मइ फर्कतिन,
र दाउदको भत्कलो दरबार फेरि बनातिन।#१५:१६ दाउदको भत्कलो दरबार फेरि बनातिन दाउदको भत्कलो दरबार फेरि बनातिन कलो “दाउदको राज्ये भत्केताइ, तर पाछा फेरि बनाहेताइ” अथवा इजराएलिहान बेबिलोनमा लेघ्घिकनि बिस्लोपाछु जारे ज कमजोर होख्वाइ, तर आफ्नो देस फर्किकनि आउलोपाछु बलियो होख्तात्।
भत्कलो ठउँहान्के मइ फेरि बनाइदेतिन,
र ओख्राइ फेरि खडा गरातिन।#आमोस ९:११-१२
17र बाकि मानिसहान्इ परमपर्भुके खोजे सकुस्, मतलब अरु जातको मानिसहान्इ पनि,
जख्राइ मइ आफ्ने मानिस होखे बलालाटिन,
18इ बोलि परमपर्भुइ कताइ, जुनइ धेरे बर्स पहिलिभि इ बोलिहान कहिसक्लो रहिक्, जुन पहिलिभि जान्हेलो रहिक्।’
19“उसिगर्ते मोरो बिचार एइ हो कि परमेस्वरपट्टि फर्कलार अरु जातको मानिसहान्के हामि दुख नादिहुँ, 20बरु ओख्रो साटो इ कुरा चिट्ठिमा लेखिदिहुँ, मुर्तिके चढाइकनि असुद्द होख्लो चिजभि, बेभिचार गर्लार धन्दाभि, घेच्रो दाबिकनि मार्लो जनावरको मासु र रकतभि दुसिहि बिसे।#प्रस्थान ३४:१५-१७; लेबि १७:१०-१६; १८:६-२३ 21क्यारेकनि आघुको पुर्खाभि ज सहरेपिच्छे मोसाको धर्म नियमको प्रचार होखिधार्लाटि, इ हरेक सभाघरमा हरेक बार्नामा पढ्ढेतिहि बाटि।”
अरु जातको बिस्वासिहान्के सभाको चिट्ठि
22तब पेरेरितहान, एल्डरहान र बिस्वासि दाजिभाइहान्सिन मिलिकनि आफ्नो माझोभि मानिसहान्के छानिकनि पावल र बारनाबाससिन एन्टिओखियामा पठाए नाम्रो ठान्वाइ र बारसाबास कलार यहुदा र सिलासके छान्वाइ। पर्भुमा बिस्वास गर्लार सभइ दाजिभाइहान मध्यमा उ दुइ भाइ अगुवा रहाइ। 23र उनहान्को हातमा उनहान्इ इ चिट्ठि पठावाइ, “एन्टियोखिया, सिरिया र किलिकियामा बिस्लाहार अरु जातको बिस्वासि दाजिभाइहान्के, पेरेरितहान र एल्डरहान्को बिन्ति बाटि। 24हाम्रो माझोभि गेलो कुन्हुँ कुन्हुँ मानिसहान्इ गलत सिछा दिहिकनि ताहान्को मन छट्पटि बनाइकनि ताहान्के कत्हेक कुरामा दुख देलाटाइ कलार कुरा हामिइ सुन्लाटाहुँ। तर हामिइ उ मानिसहान्के पठालो नाहो।” 25उसिगर्ते हामि सभइ गर्लो सहमति अनुसार कत्का मानिसहान्के छानिकनि उनहान्के हाम्रो प्यारो बारनाबास र पावल साङ्हे ताहान्ठुँ पठाए हाम्राइ नाम्रो लागिक। 26बारनाबास र पावलइ चाहिँ हाम्रो पर्भु येसु खिरिस्टको सेवाको लागि आफ्नो जिउ अप्ठ्यारोमा पार्लो रहाइ। 27एइ दुइजनासिन हामिइ यहुदा र सिलासके पनि पठालाटाहुँ। उनहान्इ ओइ कुरा मुखइ ज कइदेतात्। 28पबित्र आत्मा र हाम्राइ इ कुरा नाम्रो लागिक, कि इ तरको खाचोको कुरा बाहेक अरु धेरे भारि ताहान्के बोकाए नाहोख्ताइ। 29ताहान मुर्तिके चढाइकनि असुद्द होख्लो चिजभि, घेच्रो दाबिकनि मार्लो जनावरको मासु, रकतभि र बेभिचार गर्लार धन्दाभि दुसिहि बिसे। एस्नो कुराभि दुसिहि बिस्नि ताहान्को नाम्रो होख्ताइ। छुट्टि।
30बिदाबारि होखिसक्लोपाछु उनहान एन्टिओखियामा गेहाइ, र मन्डलिको दाजिभाइहान्के बट्याइकनि ओइ चिट्ठि देहाइ। 31चिट्ठिमा होख्लो अर्तिको कुरा पढकिकनि उनहान खुसि होख्वाइ। 32यहुदा र सिलास आफिहान पनि अगमबक्ता होख्लो कारनइ बिस्वासि दाजिभाइहान्के धेरे बचनभि अर्ति दिहिकनि उनहान्को बिस्वासके बलियो बनावाइ। 33उनहान केइ दिन रहिसक्लोपाछु, उथिको बिस्वासि दाजिभाइहान्इ इनहान्के पठालाहारहान्ठुँ नाम्रोसिन जाहेउ कहिकनि फेरि पठावाइ। 34[तर सिलासके ओइथि बिसे नाम्रो लागिक।]
35पावल र बारनाबास चाहिँ अरु धेरेजनासिन मिलिकनि सिछा देतिहि र पर्भुको बचन प्रचार गर्तिहि एन्टिओखियामा बिस्वाइ।
पावल र बारनाबास छुट्हेलो
36केइ दिनपाछु पावलइ बारनाबासके कहिक्, “आब हामि परमेस्वरको बचन प्रचार गर्लो सभइ सहरहान्मा फर्किकनि जाहुँ। उथि होख्लो पर्भुमा बिस्वास गर्लार दाजिभाइहान कस्नो बाटाइ, चाहुँ।” 37बारनाबासइ मर्कुस कलार युहन्नाके साङ्हे लेगे बिचार गरिक्। 38तर पावलइ चाहिँ मर्कुसके साङ्हे लेगे नाम्रो नासम्झिक क्यारेकनि उ पामफिलियाभि छुट्हिकनि गेलो रहिक्, र उनहान साङ्हे धन्दामा नागेलो रहिक्।#पेरेरित १३:१३ 39ओइ कुरामा पावल र बारनाबासको एस्नो भनाभन होखिक कि उनहान दोहइ छुट्टेहाइ। बारनाबासइ मर्कुसके लिहिकनि साइप्रसपट्टि गिहिक, 40तर पावलइ सिलासके छानिक, उथिको बिस्वासि दाजिभाइहान्इ पावल र सिलासके नाम्रो होखुस् कहिकनि परमेस्वरसिन पर्थना गरि सुम्पिदेहाइ अनि दोहइ उथिभि गेहाइ। 41मन्डलिहान्को दाजिभाइहान्के बिस्वासमा बलियो बनातिहि पावलइ सिरिया र किलिकिया इलाकाहान्को यात्रा गरिक्।
Currently Selected:
पेरेरित 15: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
