San Marcos 3
3
Taa ra ndi̱ndichi ndaꞌa
(Mt. 12:9-14; Lc. 6:6-11)
1Saa ku̱u, ta ndi̱xaa Jesús ndi̱kiꞌvi tuku ra ini veꞌe ñuꞌu sinagoga, ta ikán ndíkaa iin taa, ra ndi̱ndichi iin ndaꞌa. 2Saa xínani ka vi nda fariseo Jesús án sindaꞌa ñaꞌa ra kivi i̱í ya ndíkundee na, chi tá ná ikan ra saa ta niꞌi nda ichí taxi nda kuachi xaꞌa ra. 3Ñaa ndi̱kaꞌan Jesús xiꞌin ra ndi̱ndichi ndaꞌa ikán, káchi ra saa:
Kuándikoo ndikundichi un maꞌñu ñaa ―káchi ra xiꞌin ra.
4Sindiꞌi saa ndi̱ndakan tuꞌun Jesús nda, káchi ra saa:
―¿Unkua káꞌan ley Ndioxi xaꞌa kivi i̱í ya ndíkundee yo? ¿Ndá ñaꞌa kua kúu mií yo ichí ikan yo? ¿Án ya vaꞌa án ya väꞌa xíniñuꞌu yo ikan yo? ¿Án yo sindiꞌi xaꞌa ku yo naꞌa, án na sikaku yo ku na? ¿Unkua káchi ndóꞌo̱ xaꞌa kivi i̱í? ―káchi ra xiꞌin nda.
Tá ndi̱kaꞌan ra saa, ta nda iin nda köo ndi̱kuiin yuꞌu ra. 5Saa ndi̱saa ni Jesús ndi̱koto ra nuu nda ndóo ikán, ta ku̱chiꞌña ka vi ini ra, chi tuun ni nima nda. Saa ndi̱kaꞌan ra xiꞌin ra ndi̱ndichi ndaꞌa ikán, káchi ra saa:
Sindikaa ndaꞌa un ―káchi ra xiꞌin ra.
Saa si̱ndikaa ra ndaꞌa ra. Tá si̱ndikaa soꞌva ra ya, ta ndikun ndu̱vaꞌa ya. 6Saa tá ka̱na koo nda fariseo ini veꞌe ñuꞌu ikán, ta xa̱á nda chítaꞌan tuꞌun nda xiꞌin nda partido ra Herodes ya kaꞌni nda Jesús.
Kuaꞌa ka vi naꞌa ndi̱kitaꞌan yuꞌu nduta ñûꞌu Galilea
7Saa ke̱e Jesús kuaꞌan ra chí yuꞌu nduta ñûꞌu xiꞌin nda ítaꞌan xiꞌin ra, ta kuaꞌá ka vi na ke̱e ndiꞌi ni kúu ñuu estado Galilea kuaꞌan sata ra. 8Tá ku̱ndaa ini na ya kuaꞌa ni yatuꞌun íkan Jesús, ta saa ka̱na koo tu na ñuu Jerusalén xiꞌin na inka ñuu suvi mií estado Judea xiꞌin na estado Idumea tin na ndóo inka ñaꞌñu yuꞌu nduta ita Jordán, ndi̱xaa tu na ndóo yati ñuu Tiro xiꞌin na ñuu Sidón va. 9Xaꞌa ya kuaꞌa ni naꞌa ndi̱xaa, yakan ndi̱kaꞌan Jesús xiꞌin nda ítaꞌan xiꞌin ra ya ná koo ndúvi nda xiꞌin iin itun barco nuu ndaa ra kaꞌan ra xiꞌin na, ya ná chïndaꞌa ni ñaꞌa na. 10Kuaꞌa ka vi naꞌa si̱ndaꞌa ra, yakan ndiꞌi na kúꞌvi ta ndakua iin chíndaꞌa taꞌan mií na ya kúni na tindaa ñaꞌa na, ta saa nduvaꞌa na ikan ra.
11Naꞌa na kúu mií tachi nduvaꞌa, tá xi̱ni na Jesús, ta xa̱á na síkusiti na nuu ra, iin ndáꞌi koꞌo na íkan mií tachi nduvaꞌa ikán, saa káꞌan na:
―¡Yóꞌo̱ kú Seꞌe Ndioxi! ―káchi na xiꞌin ra.
12Saa ndee ni ndi̱kaꞌan Jesús xiꞌin ya xa̱ꞌnda chiñu ra nuu ya, ya ná käꞌan ya xaꞌa ra nuu chútu naꞌa, ya kúu ra Seꞌe Ndioxi.
Ndíkaxin Jesús uxi uvi taa nda tiꞌvi ra kuꞌun xaa chiñu nda nuu ra
(Mt. 10:1-4; Lc. 6:12-16)
13Sindiꞌi saa ka̱na Jesús nda kúni mií ra ya kaka nda chiñu nuu ra, saa ndi̱kiꞌin ra kuaꞌan ra xiꞌin nda iku. 14Ta saa ndi̱kaxin ra uxi uvi taa tañu ndiꞌi nda ndóo ikán, ya kaka tuun nda xiꞌin ra. Ta saa tiꞌvi ra nda kuꞌun nda kaꞌan ndoso nda tuꞌun Ndioxi xiꞌin naꞌa. 15Ta ta̱xi ra ichí ndaꞌa nda sindaꞌa nda na kúꞌvi, saa tava nda tachi nduvaꞌa ya kúu mií naꞌa. 16Ya yóꞌó ku kivi uxi uvi saa nda ikán: Iin ra náni Simón ta chi̱nuu Jesús inka kivi väꞌa ra náni ra Pedro, 17inka ra náni Jacobo xiꞌin ra Juan ñani ra, seꞌe iin ra náni Zebedeo ku uvi saa nda ikán, ta chi̱nuu ra kivi nda ikán Boanerges, tuꞌun ikán kúni kachi ya: Seꞌe Taxan saa chi ndee ni káꞌan nda, tá ndáꞌi savi saa káꞌan nda. 18Inka ra náni Andrés, inka ra náni Felipe, inka ra náni Bartolomé, inka ra náni Mateo, inka ra náni Tomás, inka ra náni Jacobo, seꞌe ra Alfeo, inka ra náni Tadeo, inka ra náni Simón ra xi̱ndikaa xiꞌin na partido náni Cananeo, 19xiꞌin inka ra náni Judas Iscariote, ra ndi̱xiko vata Jesús sindiꞌi.
Káꞌan na xaꞌa Jesús ya kúu mií ra ndee tachi nduvaꞌa
(Mt. 12:22-32; Lc. 11:14-23)
Sindiꞌi ta ndi̱keta Jesús ini iin veꞌe xiꞌin nda ítaꞌan xiꞌin ra. 20Saa ndi̱kitaꞌan tuku naꞌa, kuaꞌa ka vi ku na ndi̱kitaꞌan nuu ra, nda nuu kuxi ra xiꞌin nda ítaꞌan xiꞌin ra küvi. 21Tá ku̱ndaa ini na veꞌe Jesús xaꞌa ra, ta saa ke̱e na kuaꞌan na ndikiꞌin ñaꞌa na, saa chi ra ndu̱kiꞌvi ku ra, káchi naꞌa xaꞌa ra.
22Saa káꞌan tu nda maestro, nda sínaꞌa ley Ndioxi ya ta̱a ra Moisés, nda ke̱e ñuu Jerusalén, kánaꞌa nda xaꞌa Jesús, káchi nda saa:
―Ndee kiti Beelzebú, kiti nǎꞌa ínuu nuu ndiꞌi tachi nduvaꞌa, ndee ri ikán kua kúu mií ra táva ra tachi nduvaꞌa kúu mií naꞌa ―káchi nda.
23Saa ku̱ndaa ini Jesús, ta ñaa ka̱na ra nda, káꞌan ra xiꞌin nda iin tuꞌun ndíchi, káchi ra saa:
―¿Án kúchiñu kiti Satanás, kiti nǎꞌa, síndiꞌi xaꞌa taꞌan mií ri, túvi ndo? 24Tá kúu iin ñuu chee tá ná kani taꞌan na xiꞌin taꞌan mií na, ta küchiñu na koo vaꞌa na xiꞌin taꞌan na. 25Ni iin veꞌe tá ná kani taꞌan na xiꞌin taꞌan mií na, ta küchiñu na kundoo vaꞌa na xiꞌin taꞌan na, síndiꞌi xaꞌa taꞌan mií va na. 26Tá íyo ndiꞌi ya yóꞌó, saa íyo tu kiti nǎꞌa va. Tá ná kani taꞌan mií ri xiꞌin taꞌan ri, ta táꞌvi taꞌan mií va ri ta kama ni va ndiꞌi xaꞌa chiñu ri, chi síndiꞌi xiꞌin taꞌan mií va ri.
27’Nda iin naꞌa küchiñu kiꞌvi sikuiꞌna veꞌe iin taa, tá tu ndee ni ra. Sundi xíniñuꞌu taa tiin ñaꞌa ra, katun ñaꞌa ra, ta saa kuchiñu ra kiꞌvi ra veꞌe ra, tava ra ñaꞌa kúu mií ra, ta kuꞌva saa kua i̱kan yeꞌe xiꞌin kiti nǎꞌa ―káchi Jesús xiꞌin nda.
28Saa ndi̱kaꞌan ka ra, káchi ra saa:
―Ta yeꞌe kúni i ná kundaa teꞌe ni ini ndo xaꞌa ya káꞌan i xiꞌin ndo, chi Ndioxi ta xaa kaꞌnu ini ra xaꞌa ndiꞌi kúu kuachi ya íkan na ñuu ivi xiꞌin xaꞌa ndiꞌi ya väꞌa káꞌan na xaꞌa ra. 29Sundi na kánaꞌa xaꞌa Tachi I̱í ra, ta nda iin tiempo xäa kaꞌnu ini ra xaꞌa kuachi na, ndiꞌi saa tiempo koo kuachi na nuu ra ―káchi Jesús.
30Tuꞌun yóꞌó ndi̱kaꞌan Jesús xiꞌin nda maestro ikán, chi káꞌan nda xaꞌa ra ya kúu mií ra tachi nduvaꞌa.
Siꞌí Jesús xiꞌin nda ñani ra
(Mt. 12:46-50; Lc. 8:19-21)
31Saa kúu ta ndi̱xaa siꞌí Jesús xiꞌin nda ñani ra, ndi̱xaa na ndúku na ra. Xaꞌa ya köo ndíkuvi kiꞌvi na ini veꞌe saa ndi̱ndoo na ndíta na keꞌe. Ñaa ti̱ꞌvi na chiñu kuaꞌan nuu ra, ya kána na ra. 32Ta ndi̱kaꞌan na ndóo nuu ra ikán xiꞌin ra, káchi na saa:
―Xa̱a nana un xiꞌin nda ñani un ndúku na yóꞌo̱, keꞌe yóꞌó ndíta na ―káchi na xiꞌin ra.
33Saa ndi̱kuiin ra, káꞌan ra:
―¿Án xíni ndo unku na ku siꞌí i xiꞌin ñani i? ―káchi ra.
34Ñaa ndi̱koto ra nuu ndiꞌi na ndóo nuu ra, ta ndi̱kaꞌan ra, káchi ra saa:
―Na yóꞌó ku siꞌí i xiꞌin ñani i. 35Saa chi ndiꞌi na íkan ya kúni Iva i Ndioxi, ta na yóꞌó ku siꞌí i xiꞌin ñani i ―káchi Jesús.
Currently Selected:
San Marcos 3: xta
Highlight
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.
