San Lucas 12

Sínaꞌa Jesús nda ítaꞌan xiꞌin ra ya ná ïkan nda tá íkan nda fariseo

1Káꞌan nda saa xiꞌin ra ta saa ndi̱kaya naꞌa, kuaꞌa ni mil ku na ndi̱kaya, iin chíndaꞌa taꞌan mií na. Ta saa xa̱á Jesús káꞌan ra xiꞌin nda ítaꞌan xiꞌin ra, káchi ra saa:

―Kuenta ni koo ndo, koto ïkan ndo tá íkan nda fariseo. Saa chi nda ikán ta yáꞌa ni uvi yuꞌu nda, tá káa uxan iya ya kée xiꞌin uxan xita vaꞌa, saa íin nda. 2Ta ndiꞌi ñaꞌa ya íyo sêꞌe ta küvi koo sêꞌe ya ndiꞌi saa kivi, sundi vaxi kivi ta ndituvi ndiꞌi xaꞌa ya. Nda iin ya köo sêꞌe nuu naꞌa, ndituvi ndiꞌi ya nuu na kuni na. 3Yakan kua ndiꞌi ya káꞌan ndo nuu naá ta ndituvi ndiꞌi ya nuu yéꞌe̱ ya kuni naꞌa, saa tu ndiꞌi ya káꞌan yaá ndo xaꞌa soꞌo na ini veꞌe ndo, ta vaxi kivi ndaa naꞌa xiní veꞌe kaꞌan koꞌó na ya kuni soꞌo ndiꞌi naꞌa ―káchi Jesús xiꞌin nda ítaꞌan xiꞌin ra.

Ndisaa Ndioxi ku ra xíniñuꞌu yo ku íꞌvi yo nuu

(Mt. 10:26-31)

4Saa ndi̱kaꞌan ka Jesús, káchi ra saa:

―Ndóꞌo̱ nda ítaꞌan xiꞌin i, ku ïꞌvi ndo nuu na xáꞌni ndìì, saa chi ikin kuñu mií va xáꞌni na, sundi küchiñu na sindiꞌi xaꞌa na ya vaꞌa ndo. 5Ta vaꞌa ná kaꞌan i xiꞌin ndo ya kundaa ini ndo unku na xíniñuꞌu ndo ku íꞌvi ndo nuu: Ndioxi ku ra xíniñuꞌu ndo ku íꞌvi ndo nuu, saa chi kúu mií ra ichí kaꞌni ra ndóꞌo̱ ta saa taan ra ndóꞌo̱ ndaya. Ra ikán ku ra ku íꞌvi ndo kuni ndo ―káchi Jesús xiꞌin na.

6Saa ndi̱kaꞌan ka ra, káchi ra saa:

―Xíni mií ndo, sàà vali kiti xíko na ta núu ni yaꞌvi ri, uꞌun ndaa ri xíko na uvi xuꞌun, köo ndáa yaꞌvi mií ri, káchi na. Ni saa va, ta kíꞌin ni Ndioxi kuenta xiꞌin ri, köo ndíndoso ini ra xaꞌa ri. 7Saa tu ndóꞌo̱ va, ndáa yaꞌvi ni ka ndóꞌo̱ nuu Ndioxi chi nda ixi xiní ndo ta xíni ra ndisaa ku ya. Yakan köo xíniñuꞌu ndo ku iꞌvi ndo, saa chi ndáa yaꞌvi ni ka ndóꞌo̱ va nuu sàà vali ―káchi Jesús xiꞌin na.

Ná kükaꞌan nuu yo ndituꞌun yo xaꞌa Jesús

(Mt. 10:32-33; 12:32; 10:19-20)

8Saa ndi̱kaꞌan ka Jesús xiꞌin na, káchi ra saa:

―Ndiꞌi na köo kúkaꞌan nuu xíni yeꞌe ra kúu Taa ra xa̱a ñuu ivi yóꞌó, ta ni yeꞌe ta kaꞌan i xaꞌa na nuu na tatun Ndioxi. 9Sundi ndá na kúkaꞌan nuu xíni na yeꞌe nuu naꞌa, ta saa tu yeꞌe va kukaꞌan nuu i kuni i na nuu tatun Ndioxi.

10’Tá ndá naꞌa kánaꞌa xaꞌa yeꞌe ra kúu Taa ra xa̱a ñuu ivi yóꞌó ta xaa kaꞌnu va ini Ndioxi xaꞌa na. Sundi tá tu kánaꞌa na xaꞌa Tachi I̱í Ndioxi ta xäa kaꞌnu ini ra xaꞌa na ―káchi Jesús.

11Saa ndi̱kaꞌan ka ra xiꞌin na, káchi ra saa:

―Tá ndá naꞌa táxi kuachi xaꞌa ndo nuu na naꞌnu veꞌe ñuꞌu sinagoga án nuu na chiñu ñuu ndo, ta kündiꞌi ini ndo xaꞌa tuꞌun ya kaꞌan ndo xiꞌin na, 12saa chi suvi mií Tachi I̱í Ndioxi kua taxi tuꞌun ndaꞌa ndo kaꞌan ndo xiꞌin na ―káchi Jesús.

Tuꞌun ndíchi xaꞌa ra kuika ra kiꞌvi

13Saa ku̱u ta ndi̱kaꞌan iin taa ra ndíkaa tañu ndiꞌi na ndóo xíni soꞌo ya káꞌan Jesús, káchi ra saa:

―Tata Maestro, kaꞌan loꞌo xiꞌin ñani i ná nditaꞌvi ra ñaꞌa iva siꞌí nde xiꞌin i ―káchi ra xiꞌin Jesús.

14Saa ndi̱kuiin Jesús káꞌan ra xiꞌin ra, káchi ra saa:

― Yóꞌo̱ ra káꞌan ñaa, ¿ndachu káꞌan un saa xiꞌin i? ¿Án yeꞌe ku ra ndítaꞌvi ñaꞌa xiꞌin na, túvi un? Süvi ra chiñu ku i, ni süvi juez ku i yakan nditaꞌvi i ñaꞌa xiꞌin ndo ―káchi ra.

15Ta saa ndi̱kaꞌan ra xiꞌin na ndóo ikán, káchi ra saa:

―Kuenta ni koo ndo, kütoo ndo koo kuaꞌa ni ñaꞌa ndo, saa chi süvi xaꞌa ya íyo kuaꞌa ni ñaꞌa nuu naꞌa kua kuchiñu na kutaku na ―káchi ra xiꞌin na.

16Ta saa xa̱á ra káꞌan ra iin tuꞌun ndíchi ya sínaꞌa ñaꞌa ra, káchi ra saa:

―Saa ndo̱ꞌo iin ra kuika, vaꞌa ka vi kée ra xiꞌin ñaꞌa ra ya chíꞌi ra. 17Ñaa ndi̱kunduꞌu ra xa̱á ndíkani ini ra, káchi ra saa: “¿Unkua ikan yo? ¿Mií chivaꞌa yo ñaꞌa yo?, káꞌán ra. 18Saa ndi̱kani ini ra: “Xíni va yo unkua ikan yo, kani ndiꞌi yo yaka vali ta sikuaꞌa yo yaka naꞌnu vaꞌa. Ikan chivaꞌa yo nuni yo, saa chivaꞌa ndiꞌi yo ñaꞌa ya kúu mií yo. 19Tá ndiꞌi kaꞌan yo xiꞌin mií yo: Kuaꞌa ni ñaꞌa yo íyo, nani ya yóꞌó kuxi yo, naꞌa ni va kuxi yo ya. Ta xäa chiñu ka yo, ná ndikundee yo, ná kuxi yo tin ná koꞌo yo, ta ná kusini va yo, chi xa kuaꞌa ni ñaꞌa yo íyo, kachi yo xiꞌin mií yo”, káꞌán ra kuika ikán. 20Ta saa ndi̱kaꞌan Ndioxi xiꞌin ra, káchi ra saa: “Yóꞌo̱ kíꞌvi ku yóꞌo̱, ñûu vitin kuvi un, ta ndiꞌi ñaꞌa ya kúu mií un ya vaꞌa inka va na koo ya”, káchi Ndioxi xiꞌin ra. Soꞌva káchi tuꞌun ndíchi yóꞌó ―káchi Jesús xiꞌin na.

21Ñaa ndi̱kaꞌan ka ra xiꞌin na káchi ra saa:

―Tá ndo̱ꞌo ra kuika ikán, saa kundoꞌo ndiꞌi na chívaꞌa ni ya kuika kúu mií na, chi nuu Ndioxi ta ndaꞌvi ni va na ―káchi Jesús.

Ndáa Ndioxi ndiꞌi na kúu seꞌe ra

(Mt. 6:25-34)

22Sindiꞌi ikán ndi̱kaꞌan Jesús xiꞌin nda ítaꞌan xiꞌin ra, káchi ra saa:

―Kündiꞌi ini ndo xaꞌa ya kutaku ndo, ni ya kuxi ndo, ni xaꞌa tikoto kundixi ndo, kündiꞌi ini ndo. 23Chi ya kutaku yo kua ndáa yaꞌvi ni nuu ñaꞌa xíxi yo, saa tu ikin kuñu yo kua ndáa yaꞌvi ni ka nuu toto ndíxi yo. 24Koto ndo ndá kuꞌva íyo tikaka, ni köo chíꞌi ri, ni köo síkee ri, ta ni köo yaka ri nuu ndúvaꞌa ñaꞌa ri, ta saa ni xíxi ri chi suvi Ndioxi ku ra táxi ñaꞌa xíxi ri. Ta saa ndóꞌo̱, chi ndáa yaꞌvi ni ka ndóꞌo̱ va nuu kiti sàà. 25Vani ndinuni ná kundiꞌi ini ndo, ¿unkua niꞌi vi ndo xaꞌa ya ndíꞌi ni ini ndo ya kúni ni ndo kuaꞌnu súkun ka ndo? 26Tá tu köo kúchiñu ndo ikan ndo iin chiñu loꞌo ni taꞌan ya yóꞌó, ta ¿ndachu ndíꞌi ni ini ndo xaꞌa ndá ka ñaꞌa ya xíniñuꞌu ndo?

27’Koto ndo ndá kuꞌva xáꞌnu ita, ni köo xáa chiñu ya ta ni köo síkuaꞌa ya toto ya ta saa ni luvi ni íin ya, chi Ndioxi ku ra ndása luvi ya. Ya ndaa káꞌan i xiꞌin ndo, ni ra rey Salomón ta kuika ni ndi̱xiyo ra, luvi ni ndi̱xiyo tikoto xi̱ndixi ra, sundi luvi ni ka va ita nuu tikoto xi̱ndixi ra rey ikán. 28Ta Ndioxi ku ra síkundixi ita ikán, vani loꞌo ni va kivi íyo ya, chi sava ya iin kivi ndíndika ya ta inka kivi xa ndóko ndiꞌi va ya, saa kuakee ya xíxi ya. Ndisaa ka vi ndóꞌo̱, sikundixi ra ndóꞌo̱. Ta ¿ndachu loꞌo ni ndáa ini ndo ra? 29Kündiꞌi ini ndo xaꞌa ñaꞌa kuxi ndo án nduta koꞌo ndo án ndá ka ñaꞌa xíniñuꞌu ndo, kündiꞌi ini ndo xaꞌa nda iin ya. 30Saa chi ya yóꞌó ku ñaꞌa ya ndíꞌi ni ini na köo xíni Ndioxi xaꞌa. Sundi ndóꞌo̱, na kúu seꞌe Ndioxi, ta xa xíni mií va Iva ndo ndá ñaꞌa kua xíniñuꞌu ndo. 31Ta vaꞌa ndikundee ni ndo nduku ndo ichí nuu xáꞌnda chiñu Ndioxi, saa kua taxi ndiꞌi ra ñaꞌa ya kúmani nuu ndo ndaꞌa ndo ―káchi Jesús xiꞌin nda ítaꞌan xiꞌin ra.

Chïkaa ndo nima ndo xiꞌin ya kuika

(Mt. 6:19-21)

32Saa ndi̱kaꞌan ka Jesús, káchi ra saa:

―Ndóꞌo̱ ndíkun sata i ta ku ïꞌvi ndo chi tá íyo iin tiꞌvi levo vali sana i saa íin ndo. Ta kúsini ni va Ndioxi taxi ra koo ndo xiꞌin ra nuu xáꞌnda chiñu ra. 33Xiko ndo ñaꞌa kúu mií ndo, saa taxi ndo xuꞌun ndaꞌa na ndaꞌvi. Kundiꞌi ini ndo chivaꞌa ndo ñaꞌa ndo ini ñaꞌa ya köo ndíꞌi xaꞌa íyo nuu ndivi ni na kuiꞌna küchiñu sikuiꞌna ya, ni tikixin küchiñu ri sindiꞌi xaꞌa ri ya. 34Chi nuu chívaꞌa ndo ñaꞌa ya kúu mií ndo, ikán koo tu nima va ndo ―káchi Jesús xiꞌin nda.

Xíniñuꞌu yo koo tuꞌva yo ná ndiko koo Jesús

35Saa ku̱u ta ndi̱kaꞌan ka Jesús, káchi ra saa:

―Kundixi ndo tikoto ndo, ta koo tuꞌva ndo tuun ndo ñu̱ꞌu̱. 36Tá kuꞌva íyo nda moso, saa koo ndo kundoo ndo kundatun ndo yeꞌe. Chi iin moso ta íyo tuꞌva ra ndátun ra kana ñaꞌa xitoꞌo ra ya kuna ra yeꞌe nuu xitoꞌo ra ndiko koo ra kuaꞌan ra nuu viko tíndaꞌa. 37Vaꞌa ni kee na moso na íkan saa, na köo kíxi, na ndátun ndakua xaa xitoꞌo na kani ndaꞌa ra yeꞌe, saa kuna na nuu ra ndiꞌvi ra. Saa tá ná kuni ra ndóo na ndátun ñaꞌa na, ta kusini ni ra xiꞌin na, nda xaa vií ra ñaꞌa kandita ra nuu mesa ra kuxi na. 38Vaꞌa ni kee na íkan tá íkan moso, na ndátun xaa xitoꞌo na sava ñûu án xa vaxi túvi. 39Saa ikan tu iin taa ra xíin veꞌe ikán va, tá tu xíni ra ndá hora kua kiꞌvi ra kuiꞌna sikuiꞌna ra veꞌe ra, ta koo tuꞌva va ra kundaa ñaꞌa ra, täxi ra kiꞌvi ra kuiꞌna sikuiꞌna ra veꞌe ra. 40Saa tu ndóꞌo̱ va, kundoo tuꞌva ndo kundatun ndo yeꞌe kúu Taa ra xa̱a ñuu ivi yóꞌó, chi iin naá ini ndo ndiko koo i iin kivi ―káchi Jesús xiꞌin na.

Ra moso kama xiꞌin ra moso xúxan

(Mt. 24:45-51)

41Saa ku̱u ta ndi̱kaꞌan ra Simón Pedro xiꞌin Jesús ndákan tuꞌun ñaꞌa ra, káchi ra saa:

―Tata, ¿án ndisaa xiꞌin ndeꞌe ndi̱kaꞌan un tuꞌun ndíchi ikán án nda ndiꞌi va na ndi̱kaꞌan un ya xiꞌin? ―káchi ra xiꞌin Jesús.

42Saa ndi̱kaꞌan Jesús xiꞌin ra, káchi ra saa:

―Iin ra moso, ra ndíso chiñu xiꞌin ñaꞌa xitoꞌo ra, ra ndaa ni ini ta ni xitoꞌo ra köo xíka ini ra xíni ñaꞌa ra, táxi ndiꞌi ra ñaꞌa kúu mií ra ndaꞌa moso ra. Ndáa ndiꞌi moso ra ñaꞌa ra, saa táxi ra ñaꞌa xitoꞌo ra xíxi ndiꞌi na xáa chiñu xiꞌin xitoꞌo ra.

43’Ta vaꞌa ni kee ra moso ikán chi ná ndiko koo xitoꞌo ra, kuni ra xáa chiñu ni ra, ta kusini ni ra xiꞌin ra. 44Tá tu xi̱ni ra vaꞌa ni xáa chiñu moso ra, ta chinuu ñaꞌa ra ndikunuu ka ra ni̱nù ikán xitoꞌo ra. 45Sundi tá tu ná ndikani ini ra moso ikán, kachi ra saa: “Ndïko koo yachi xitoꞌo yo”, ná kachi ra. Ta saa xa̱á ra xaa nduvaꞌa ra xiꞌin nda taa tin ná ñaꞌa xáa chiñu nuu xitoꞌo ra, ta xa̱á ra kuxi ra tin koꞌo ra iin xíni mií ra. 46Ta ni köo xíka ini ra ya ndiko koo yachi xitoꞌo ra. Tá ná ndikoo koo xitoꞌo ra, ta xaa nduvaꞌa ni ra xiꞌin ra. Tava ñaꞌa ra kuꞌun ra xiꞌin na väꞌa, na köo ndaa ini. 47Ta ndixa ni sindoꞌo ñaꞌa xitoꞌo ra moso ikán ra, saa chi xa xíni ra ini xitoꞌo ra ta köo ndi̱xiyo nduvi ra ndikiꞌin ra xitoꞌo ra, xaꞌa ya i̱kan ra saa ta ndee ni sitixuꞌvi ñaꞌa xitoꞌo ra. 48Sundi tá íyo iin ra moso, ta köo xíni ra ini xitoꞌo ra unkua kúni ra ikan ra, ta loꞌo ni va ndoꞌo ra xaa xitoꞌo ra. Saa ndiꞌi ndóꞌo̱, tá tu kuaꞌa ni ya vaꞌa táxi Ndioxi ndaꞌa ndo ta kuaꞌa ni ya vaꞌa nduku ra nuu ndo. Tá tu kuaꞌa ni ya kúndaa ini ndo xaꞌa ra ta kuaꞌa ni ya nduku ra nuu ndo ―káchi Jesús xiꞌin na.

Xaꞌa Jesús kua táꞌvi taꞌan naꞌa

(Mt. 10:34-36)

49Saa ndi̱kaꞌan ka Jesús, káchi ra saa:

―Yeꞌe, tá káa iin taa ra ndíkaꞌmi ñu̱ꞌu̱ saa káa ya íkan i xa̱a i ñuu ivi yóꞌó. ¡Ta kúni ni i ná ndikoko kii ya! 50Ndíkani ni ini i xaꞌa ya ndee ni kundoꞌo i, ta xaꞌa ya ikán kua nduu i tá káa ra chíchi nuu Ndioxi. Ta nda vitin ta ndíꞌi ni ini i ndátun i nda kivi ná xinu koo tiempo ya kuu saa. 51Ta ndóꞌo̱, ndíkani ini ndo xaꞌa i ya vaxi i sikitaꞌan vií i na ñuu ivi yóꞌó, káꞌan ndo, ta süvi saa íyo ya, chi yeꞌe vaxi taꞌvi ndóꞌo̱ va ku i. 52Chi nda kivi vitin xiꞌin ndiꞌi ka kivi ya vaxi ta süvi iin yuꞌu koo ndo xiꞌin taꞌan ndo, saa chi tá tu íyo uꞌun na iin veꞌe ta taꞌvi taꞌan na, uni na kiꞌin sata yeꞌe ta uvi na kïꞌin sata i, án sana uvi na kiꞌin sata i ta uni na kïꞌin sata i. 53Iin taa ra íyo seꞌe taa, ta kanitaꞌan ra xiꞌin seꞌe taa ra, saa tu iin ra loꞌo seꞌe taa ra kanitaꞌan ra xiꞌin iva ra. Saa ñaꞌa yá íyo seꞌe síꞌi kani taꞌan yá xiꞌin seꞌe síꞌi yá, ta saa ikan tu seꞌe síꞌi va yá, kanitaꞌan yá xiꞌin siꞌí yá. Saa ná íyo xanu ta kanitaꞌan ná xiꞌin xanu ná, ta saa tu ná íxanu va kanitaꞌan ná xiꞌin siso ná ―káchi Jesús.

Ya yóꞌó ku ya seña xíto yo

(Mt. 16:1-4; Mr. 8:11-13)

54Ta saa ndi̱kaꞌan ka Jesús xiꞌin na ikán, káchi ra saa:

―Ndóꞌo̱, tá xíti ndo vaxi viko chí nuu kéta ñu̱ꞌu ta káꞌan ndo: “Kuun savi vitin”, káchi ndo, ta saa ndixa xíyo ya. 55Tá xíni ndo vaxi tachi chí sur ta káꞌan ndo: “Niꞌni ni koo”, káchi ndo, ta saa ndixa xíyo ya. 56Ndóꞌo̱ uvi yuꞌu ku ndo, tá kúndaa ini ndo unkua íkan vikó nuu ndivi tin kúndaa ini ndo unkua íkan ñuꞌú tá kúun savi. Tá ndixa xíni ni ndo ta ¿ndachu köo kúndaa ini ndo xiꞌin seña ya íkan i xiꞌin ndo? ―káchi Jesús xiꞌin na.

Ná kindoo mani yo xiꞌin na sáa ini xíni yoo

(Mt. 5:25-26)

57Saa ndi̱kaꞌan ka ra xiꞌin na káchi ra saa:

―Án vaꞌa ná xaa nani mií ndo kuachi ndóꞌo ndo xiꞌin taꞌan ndo. Vaꞌa ikan ndo ya xiꞌin ya ndaa. 58Tá íyo iin taa ra táxi kuachi xaꞌa ndo nuu na chiñu, ta kama ka xaa nani ndo kuachi ndo xiꞌin ra tá xíka ndo kuaꞌan ndo ichí, tá täꞌan kuꞌun ra xiꞌin ndo veꞌe chiñu, süvi ka vi ya kuꞌun ra xiꞌin ndo nuu na juez, ta na ikán nditaxi na ndóꞌo̱ ndaꞌa na policía, saa kiꞌin na ndóꞌo̱ taan na veꞌe kàà. 59Ta këe yachi ndo ikán na, nda kivi ná chaꞌvi ndiꞌi ndo xaꞌa ya väꞌa i̱kan ndo, saa tava na ndóꞌo̱ ―káchi Jesús xiꞌin na.

Currently Selected:

San Lucas 12: xta

Highlight

Copy