San Juan 17

Káꞌan Jesús xiꞌin Ndioxi xaꞌa nda ítaꞌan xiꞌin ra

1Tá sindiꞌi Jesús ndi̱kaꞌan ra tuꞌun ikán, saa nda̱niꞌi nuu ra ndi̱koto ra nuu ndivi, ta saa ndi̱kaꞌan ra xiꞌin Ndioxi káchi ra saa:

―Tata Iva i Ndioxi, vitin ti̱ndaa kivi ya xaa kaꞌnu un yeꞌe kúu Seꞌe un, ta saa yeꞌe xaa kaꞌnu ni i yóꞌo̱. 2Chi yóꞌo̱ ku ra ta̱xi ichí ndaꞌa i xaꞌa ndiꞌi na ñuu ivi na ta̱xi un ndaꞌa i yóꞌó, ya ná taxi i ichí ndaꞌa na kutaku na ndiꞌi saa kivi. 3Ta ya kutaku na ndiꞌi saa ichí kua kúni kachi ya ná kuni vaꞌa na ini un, chi iin yóꞌo̱ ku Ndioxi ra ndaa ni xiꞌin Jesucristo, ra ti̱ꞌvi un vaxi ñuu ivi yóꞌó.

4’Ta chi̱nuu vaꞌa ni i ya toꞌo un nuu ndiꞌi na ñuu ivi, ta vitin si̱xinu ndiꞌi i chiñu ya ta̱xi un ndaꞌa i xaa súvi i. 5Tata Iva i Ndioxi, vitin xaa kaꞌnu un yeꞌe, taxi un koo i xiín un nuu luvi ni ndi̱xiyo i xiꞌin un yachi tá täꞌan xikoo ñuu ivi yóꞌó.

6’Ivi na ndi̱kaxin un ta̱xi un ndaꞌa i ta si̱naꞌa i yóꞌo̱ nuu na. Na ndíkun yóꞌo̱ ku na, ta ta̱xi un na ndaꞌa i. Ta xáa súvi ndiꞌi na tuꞌun un ya ndi̱kaꞌan i xiꞌin na. 7Ta vitin xa kúndaa ini na ndiꞌi ñaꞌa ta̱xi un ndaꞌa i ta nuu mií un ke̱e ndiꞌi ya. 8Ta̱xi i tuꞌun un ndaꞌa na ya ta̱xi un ndaꞌa i, ta vaꞌa ni ndi̱kiꞌin na ya. Ta ku̱ndaa ini na ya ndixa kua ke̱e i nuu un, ta kándixa na yóꞌo̱ ku ra ti̱ꞌvi yeꞌe vaxi i.

9’Yakan xíkan i ya mani nuu un xaꞌa na. Köo káꞌan i xiꞌin un xaꞌa na ñuu ivi. Ndisaa xaꞌa na ta̱xi un ndaꞌa i káꞌan i xaꞌa xiꞌin un, chi kuenta mií un ku na. 10Ta ndiꞌi na ndíkun yeꞌe kuenta un ku na, saa tu na ndíkun yóꞌo̱ va kúu na kuenta i, ta xáa kaꞌnu ni na yeꞌe.

11’Tata, Iva i Ndioxi, ra i̱í, yeꞌe ta köo ka i koo ñuu ivi yóꞌó, sundi na ndíkun yeꞌe ta ndoo na koo na yóꞌó, yakan xíkan ni i ya mani nuu un xaꞌa na. Kundaa ni un na xiꞌin ndee kúu mií kivi un ta saa ná nduu na iin tá kuꞌva íin mií yo. 12Tá ndi̱xiyo i ñuu ivi yóꞌó xiꞌin na ta xi̱ndaa i na ta̱xi un ndaꞌa i, xi̱ndaa i na xiꞌin ndee kúu mií kivi un. Ta nda iin na köo ndi̱kindaa na ndaꞌa i. Iindaa ra xa íyo tuꞌun xaꞌa ndiꞌi xaꞌa ku ra ndi̱ꞌi xaꞌa, saa ndi̱xinu ya káꞌan tuꞌun Ndioxi ya ta̱a na xinaꞌa.

13’Sundi vitin ta ndiko koo i xaa i nuu un, tá íyo ka i ñuu ivi yóꞌó xiꞌin na, ta ndítuꞌun i tuꞌun yóꞌó xiꞌin na ya ná kuni soꞌo na, ta kusini ni na tá kuꞌva kúsini ni yo. 14Ta̱xi i tuꞌun un ndaꞌa na, yakan kua kúndasi nuu na ñuu ivi yóꞌó xíni ñaꞌa na, chi süvi kuenta na ñuu ivi yóꞌó ku na, ni mií i ta süvi kuenta na ñuu ivi ku i. 15Ta köo xíkan i ya mani nuu un, ya tava un na kee na tañu na ñuu ivi yóꞌó, ya xikan i nuu un kua, kundaa ni un na nuu ya väꞌa. 16Süvi kuenta na ñuu ivi yóꞌó ku na, ni mií i ta süvi kuenta na ñuu ivi ku i. 17Tuꞌun un ta ya ndaa kua, yakan chindee un na ná nduu na ivi, na i̱í, ta ná ndikundikun na yóꞌo̱ xiꞌin ndiꞌi ni kúu nima na. 18Tá kuꞌva íyo chiñu ya ti̱ꞌvi un yeꞌe vaxi i xaa súvi i ñuu ivi yóꞌó, kuꞌva saa íyo chiñu tíꞌvi i na yóꞌó kuꞌun na xaa súvi na ñuu ivi. 19Xa ndi̱taxi ndiꞌi i mií i ndaꞌa un ya xaa súvi i ya kúni un, ta saa na ndíkun yeꞌe ná nditaxi ndiꞌi na mií na ya xaa súvi na ya kúni un tixin ya ndaa ni kúu mií un.

20’Ta süvi ndisaa xaꞌa na ndíkun sata i xíkan i ya mani nuu un xaꞌa, xíkan tu i ya mani nuu un xaꞌa na kandixa tuꞌun un ya kaꞌan na yóꞌó xaꞌa i, 21ya ná kutaꞌan vaꞌa na xiꞌin taꞌan na, tá kuꞌva íyo mií yo xiꞌin taꞌan yo Iva mani. Ta saa iin yuꞌu ná koo na xiꞌin yo, saa kundaa ini na ñuu ivi ya ti̱ꞌvi un yeꞌe vaxi i. 22Ya vaꞌa ni ta̱xi un un ndaꞌa i kua ta̱xi i ndaꞌa na ya ná kuu na iin yuꞌu xiꞌin yo, tá kuꞌva íyo mií yo xiꞌin taꞌan yo iin yuꞌu ku yo xiꞌin taꞌan yo. 23Yeꞌe ku ra íyo xiꞌin na yóꞌó, ta yóꞌo̱ ku un íyo xiꞌin yeꞌe, yakan vaꞌa ni nduu na iin yuꞌu xiꞌin taꞌan na, ta saa kua kundaa ini na ñuu ivi yóꞌó, ya ti̱ꞌvi un yeꞌe vaxi i. Ta kuni na ya kúꞌvi ni ini un xíni un na ndíkun yeꞌe, tá kuꞌva kúꞌvi ini un xíni un yeꞌe, saa kúꞌvi ini un xíni un na.

24’Tata Iva yo, na ta̱xi un ndaꞌa i ndíkun yeꞌe, ta kúni i ná koo na xiꞌin i nuu ndivi nuu koo i. Saa kuni na ndiꞌi ya vaꞌa, ya luvi ta̱xi un ndaꞌa i, saa chi yóꞌo̱ ta kúꞌvi ni ini un xíni un yeꞌe, nda tá täꞌan xikoo xaꞌa ñuu ivi yóꞌó vi kúꞌvi ni ini un xíni un yeꞌe. 25Tata Iva yo, ra vaꞌa, ra ndaa ni kuu mií un. Na ndíkun ñuu ivi yóꞌó ta köo xíni na yóꞌo̱, sundi yeꞌe ta xíni i yóꞌo̱, ta na ndíkun yeꞌe xa xíni na yóꞌo̱ ku ra ti̱ꞌvi yeꞌe vaxi i. 26Ta xa si̱naꞌa i na yóꞌó xaꞌa ndee kúu mií kivi un saa sinaꞌa ka i na. Íkan i saa ya ná koo ni ya kúꞌvi ini un xiꞌin na, tá kuꞌva kúꞌvi ni ini un xíni un yeꞌe, saa íkan tu yeꞌe va xiꞌin na, koo i xiꞌin na ―káchi Jesús ndi̱kaꞌan ra xiꞌin Ndioxi.

Currently Selected:

San Juan 17: xta

Highlight

Copy