San Juan 16

1Saa ndi̱kaꞌan ka Jesús káchi ra saa:

―Ndiꞌi ya yóꞌó ndi̱kaꞌan i xiꞌin ndo ya ná ndïko koo ini ndo ya kuaꞌan ndo ichí i. 2Chi vaxi kivi ta tava ndaꞌa na chiñu naꞌnu nuu na judío ndóꞌo̱ ini veꞌe ñuꞌu sinagoga. Ta saa ni kuni na kaꞌni na ndóꞌo̱, saa chi tá íkan na saa xiꞌin ndo ta vaꞌa ni xáa súvi na ya kúni Ndioxi, kaꞌán na. 3Saa ikan na xiꞌin ndo, saa chi täꞌan kuni na yeꞌe, ni Iva i ta köo xíni na ra. 4Xa káꞌan kuee i xiꞌin ndo, tá ti̱ndaa kivi xa̱á kúu saa ta ndikaꞌán ini ndo xaꞌa ya xa ndi̱kaꞌan i xiꞌin ndo.

Chiñu ya íkan Tachi I̱í Ndioxi

―Ta köo ndi̱kaꞌan i ya yóꞌó xiꞌin ndo tá núnu̱ú saa chi íyo i xiꞌin ndo. 5Sundi vitin ta ndiko koo i kuꞌun i nuu ra ti̱ꞌvi yeꞌe vaxi i, ta nda iin ndo köo ndákan tuꞌun yeꞌe míí chí kuꞌun i. 6Ta ndóꞌo̱, suvi ndo ndi̱kava ini ku ndo xaꞌa ya ndi̱kaꞌan i xiꞌin ndo. 7Sundi ya ndaa káꞌan i xiꞌin ndo, tá ná kuꞌun i ta vaꞌa ni ka kee ndo. Chi tá ná küꞌun i ta kïxi Tachi I̱í Ndioxi chindee ya ndóꞌo̱, sindiko ya ini ndo. Tá ná kuꞌun i ta tiꞌvi i ya kixi ya. 8Tá ná kixi ya ta sixinu ya ini na ñuu ivi yóꞌó ya íyo kuachi na, saa sinaꞌa ya na ya íyo iin ichí ndaku ni, ta kaꞌan ya xiꞌin na ya xaa nani Ndioxi kuachi xiꞌin na. 9Chindee ya na kundaa ini na, ya íyo kuachi na xaꞌa ya köo xíin na kandixa na yeꞌe. 10Saa chindee ya na kundaa ini na xaꞌa ichí ra ya kúu ya ichí ndaku. Saa chi yeꞌe ta ndiko koo i kuꞌun i nuu Iva i, ta ndóꞌo̱ ta küni ka ndo yeꞌe. 11Ta suvi mií ya chindee na kundaa ini na saa chi xa ndi̱taꞌnda xaꞌa kiti nǎꞌa, kiti ínuu nuu ndiꞌi tachi nduvaꞌa, ri xáꞌnda nuu na ñuu ivi yóꞌó, ndi̱taꞌnda xaꞌa ri ya ndiꞌi xaꞌa ri.

12’Ta íyo kuaꞌa ni ka ya kaꞌan i xiꞌin ndo, sundi vitin ta kündee ini ndo xiꞌin ya tá ná kaꞌan i xiꞌin ndo. 13Tá ná kixi Tachi I̱í Ndioxi saa chindee ya ndóꞌo̱ kaꞌan ya xiꞌin ndo unkua ku ya ndaa, ta sinaꞌa teꞌe ya ndóꞌo̱ ndá kuꞌva kundikun ndo ichí ya ndaa. Ta ya sinaꞌa ya ndóꞌo̱ ta süvi kuenta mií ya kua kaꞌan ya xiꞌin ndo, sundi kaꞌan ya xiꞌin ndo xaꞌa tuꞌun ya xíni soꞌo ya káꞌan Ndioxi. Ta saa ndituꞌun ya xiꞌin ndo xaꞌa ndiꞌi ya kuu kivi vaxi. 14Ta chinuu sukun ni ya ya toꞌo i, saa chi ndituꞌun ya xiꞌin ndo xaꞌa ya kúu kuenta yeꞌe. 15Ndiꞌi ya kúu mií Iva i Ndioxi ta kuenta mií i ku ndiꞌi ya, yakan kua káꞌan i xiꞌin ndo ndituꞌun ya xiꞌin ndo xaꞌa ya kúu kuenta yeꞌe.

Vitin kúsuchi ini ndo, ta sindiꞌi kusini ni ndo

16Chi tixin soo uvi ndaa kivi ta küni ka ndo yeꞌe. Tá ndi̱yaꞌa uvi ndaa kivi, saa kuni tuku ndo yeꞌe, saa chi yeꞌe ta kuꞌun i nuu Iva i ―káchi Jesús xiꞌin nda.

17Saa ndi̱kaꞌan sava nda ítaꞌan xiꞌin ra, káchi nda saa:

―¿Ta unkua kúni kaꞌan ya ndi̱kaꞌan ra xiꞌin yo? Tixin uvi ndaa kivi küni ka yo ra, ta yaꞌa uvi ndaa kivi saa kuni tuku yo ra. Chi ndiko koo ra kuꞌun ra nuu Iva ra. 18¿Ta unkua kúni kaꞌan ya: “tixin uvi ndaa kivi”? Köo kúndaa ini yo ya káꞌan ra xiꞌin yo ―káchi nda.

19Saa ku̱ndaa ini Jesús ya kúni ndakan tuꞌun ñaꞌa nda ítaꞌan xiꞌin ra. Saa ndi̱kaꞌan ra xiꞌin nda, káchi ra saa:

―¿Án kúni ndo kundaa ini ndo xaꞌa tuꞌun ya ndi̱kaꞌan i xiꞌin ndo: Siloꞌo kivi ta küni ka ndo yeꞌe ta sindiꞌi saa kuni tuku ndo yeꞌe?, káchi i. ¿Án xaꞌa ya ndi̱kaꞌan i xiꞌin ndo ndákan tuꞌun taꞌan ndo xaꞌa? 20Ya ndaa káꞌan i xiꞌin ndo, kusuchi ni ini ndo, ta kuaku ndo, ta na ñuu ivi yóꞌó ta kusini ni na. Vani kúsuchi ni ini ndo ta süvi ndiꞌi saa ichí koo ndo saa, chi ya kúsuchi ini ndo, ta nama i ya nduu ya kúsini ni ndo. 21Tá kúu iin ñaꞌá tá ku̱yati kaku seꞌe yá, ta uꞌvi ni xáꞌnda ya saa chi xa ti̱ndaa hora ya kaku seꞌe yá, sundi tá ndiꞌi ka̱ku ya loꞌo ikán ta ni köo ñúꞌu ka ini yá ndá kuꞌva kúꞌvi xáꞌnda ya, xaꞌa ya kúsini ni yá chi ka̱ku seꞌe yá. 22Ta saa ndóꞌo̱, vitin ta kúsuchi ni ini ndo, sundi ndiko koo tuku i koto i ndóꞌo̱, ta saa kusini ni ndo ndiꞌi saa ichí, ta nda iin naꞌa küchiñu kindaa ya kúsini ndo.

23’Tá ná tindaa kivi ikán ta nda iin ka ya ndäkan tuꞌun ndo yeꞌe. Ta ya ndaa káꞌan i xiꞌin ndo, tá ndá ya ndúku ndo nuu Iva i Ndioxi tixin kivi yeꞌe ta taxi ndiꞌi ra ya ndaꞌa ndo. 24Nda kivi vitin ta nda iin ñaꞌa täꞌan nduku ndo nuu ra tixin kivi yeꞌe. Nduku ndo ya nuu ra ta taxi ra ya ndaꞌa ndo, ta saa kua ndixa ni ka kusini ndo.

Ta xa ku̱chiñu Jesús nuu kiti nǎꞌa kiti xáꞌnda chiñu nuu na ñuu ivi yóꞌó

25’Nda kivi vitin káꞌan i xiꞌin ndo xaꞌa tuꞌun ndíchi, sundi vaxi kivi ta käꞌan ka i saa xiꞌin ndo, kaꞌan teꞌe i xiꞌin ndo xaꞌa Iva i. 26Ta kivi ikán ta vaꞌa kaꞌan mií ndo xiꞌin ra nduku ndo ya nuu ra tixin kivi yeꞌe, ta yeꞌe köo xíniñuꞌu ka i nduku i ya mani nuu ra xaꞌa ndo. 27Saa chi Iva i ta kúꞌvi ni ini ra xíni ra ndóꞌo̱, saa chi kúꞌvi ni ini ndo xíni ndo yeꞌe, ta kándixa ndo yeꞌe ya ke̱e i nuu ra. 28Nuu Iva i ke̱e i vaxi i ñuu ivi yóꞌó, ta vitin sindoo i ñuu ivi yóꞌó ta ndiko koo tuku i kuꞌun i nuu ra ―káchi Jesús xiꞌin nda.

29Saa ndi̱kuiin nda káchi nda saa:

―Vitin ta köo xíniñuꞌu ka un inka tuꞌun ya sinaꞌa un ndeꞌe. Káꞌan teꞌe un xiꞌin nde. 30Vitin kúndaa ini nde, xa xíni vaꞌa un xaꞌa ndiꞌi ñaꞌa, yakan köo xíniñuꞌu un ndakan tuꞌun na yóꞌo̱. Xaꞌa ya ñaa kua kándixa nde ya ti̱ꞌvi Ndioxi yóꞌo̱ vaxi un ñuu ivi yóꞌó ―káchi nda xiꞌin ra.

31Saa ndi̱kuiin Jesús káꞌan ra xiꞌin nda.

―¿Án nda vitin vi kándixa ndo yeꞌe? 32Ta kama ni tindaa hora, siloꞌo ni kúmani ta kuita niꞌnu ndiꞌi ndo kuꞌun ndo, ta sindoo ndaꞌa ndo yeꞌe. Sundi yeꞌe ta köo íyo mií i, chi Iva i ta íyo ra xiꞌin i. 33Soꞌva káꞌan i xiꞌin ndo ya ná kündiꞌi ini ndo, ta tuun ni kundikun ndo yeꞌe saa koo vaꞌa ni ini ndo. Saa chi kixi ni tindoꞌo nuu ndo ñuu ivi yóꞌó, sundi kundaa ni ini ndo kuni ndo yeꞌe, saa chi yeꞌe ta xa ku̱chiñu i xa̱a kanaa i ñuu ivi yóꞌó ―káchi Jesús.

Currently Selected:

San Juan 16: xta

Highlight

Copy