Luk 12

Jizɔs atumbwɛ ayɛghɛnɛv anav atogh na vɛ karuyi ɛn atsunuv iyɔr gha

(Matiyo 10.26,27)

1Ukpɛ ungumɔ isum iyɔro iti-atan puwɛ iti-atan puwɛ tsɛng igamber, ungwen vɛru inyarin arend. Jizɔs avand agɛma kɔ ayɛghɛnɛv anav atumbwɛ avo utogh na, “Kɔrun ayom ghu ɔyis#12.1 Ɔyis Uvǝwɛ ukwagh ungwen amba nungwan kɔ mgom ta mu mɔr sɛ vɛ ghɛ ubrɛd mɔ. Ufarasi, ungwen angwe utsun iyɔr. 2Ukwagh angwe ungune vɛ aku ta ade ibughun gha, kwagh angwe ungwen angwe uyɛr ta vɛ ade ghi ifɔn gha. 3Hanamɔ kwagh ungwen uram kɔ ghi imiye aduwe kɔ ghu uso, iyu ungwen vɛ ram kɔ umamu ɛr vɛ kong kɔ ghu uha#12.3 Uha Iyɔr Ujus vɛ maayi atumbɛ avo uhav unav vɛru sambɛrayi. Ungwen ɔr uravun atirɛn ghu ovu sɛ aravayi. .

4“Akar aam, kachiyan iyɔr amban amba wan iyɔr; ta vɛ kaa ɛr kwagh ugen usɔrun gha. 5Kpa mtɛs un ɔr ungwen uchiyan, chiyan Aonz ungwen angwe ikɔw ungwen awuwan ashigh aker kɔ uzu. Ukɔng, un ne uchiyan.

6“Ayashuwa atan ne amba ton ghu ukobo ahar gha? Kas ɛnmɔ, Aonz aguwen mɔ uvo umɔm gha. 7Ɛn un, iweng ichiye iyon ingi a ɔɔr kɔ ghi itogh. Kachiyan gha; un umbun itiyo ikaa ghu ayashuwav tsɛng.

8“Mɛ ɔɔrun ukɔng, ɔr ungwen arumun na un angwe uwam han ghu utar iyɔro, Uwan Ɔro arumun na ɔr ungumɔ ku uwam kɔ ishigh Vudugɛr anav Aonz. 9Ne ɔr ungwen atsɔmum han ghi ishigh iyɔro mɛ tsɔm un kɔ ishi Vudugɛr anav Aonz. 10Hanamɔ ɔr ungwen aram ibɛgh ghu Uwan Ɔro Uwan Ɔro a guwe ukwagh ube una, ɔr ungwen ahoo Ajingɛjing una Aonz, Aonz a guwe ukwagh ube una gha.

11“Ɔ ɛn vɛ wa un ijir kɔ ataanɛv kɔ atumbɛ izwangnɛn Ujus kas ator ghɛ iyɔr tunen ajir. Kpa ka waniko mɔ uparen imɛnɛgh ikonov ghɛ mɔ uramen gha, 12Itiyo ikaa Ajingɛjing una Aonz atɛs un aram angan uramen kpɛ ungumɔ.”

Jizɔs atumbwɛ iyɔr utogh ghi ifum ɔ ɛrɛn

13Ne ɔr ugen kɔ atɛ iyɔr amban vɛru hen tsɛng mɔ akaa na, “Ɔr tɛsɛn, kaa uwanomgban uwam hin abur usu utir uwas hin anam ukar uwam.”

14Jizɔs arumun, “Ukwarǝm, kɛ ana awam utom utunɛn un ajir zan ɔr burun usu wono?” 15Ne akaa avo na, “Ɛnɛn! Ukɔrun ayom ghi ifum ɔ ɛrɛn. Umuwa ɔr angwe kɛ urun ghɛ akaa tsɛng gha.”

16Ne Jizɔs atuwa avo ikaan ingin. “Ɔr usu ugen a ɛr ikɔr kɔ inya ingin ihɔm ne asunda tsɛng. 17A umbur kɔ ghi isima na, ‘Nan mɛ ɛr? Mgwe ahiye ungwen mpɛnda akaa angan msunda man gha.’ 18Ne akaa na, ‘Mfɔ ukwagh ungwen mɛ ɛr! Mbuu uda amban mɛ ma mɔ mɛ ma ataanɛv agenɛv. Ta iyan ikuma ingin mɛ pɛnda akaa angan mɛ sunda amem ghɛ akaa aam agen. 19Ta mɛ kaa imɛnɛgh ikagh na, mɛm, ya ma hin uya utar “Mgwe ghɛ akaa ayan tsɛng angan akumam ghɛ anyom ghɛ anyom.” ’

20“Kpa Aonz akaa ghu un na, ‘Uwɛ ɔr ranen ukwagh! Ukpo imiye ingin nyan. Ta kɛ ana aya usu ungwen uwa iyɔr ghɛ awɛ mana?’

21“Mɔ ne ghɛru ghu hanamɔ ɔr ungwen atungnun usu abɛr ta aka vong kɔ akaa Aonz gha.”

Jizɔs awa ayɛghɛnɛv anav ayom na vɛ ber ase kɔ ghɛ Aonz ghu mɛza iyɔr avov

(Matiyo 6.25-34)

22Ne Jizɔs akaa ayɛghɛnɛv anav na, “Ne mɔ mɛ ɔɔr un, karun mɛza iyɔr ghu umuwa uwon gha, ghu ukwagh ungwen uyan; zan kɔ inyam iyɔro, akond angan uwan. 23Umuwa ɔro ahɛmba ukwagh uyan, inyam iyɔro ihɛmba akond. 24Ɛn sɛ inon. Ingi rɔɔn gha ingi sudan gha ingi utav ghɛ uhuwa gha, kpa Aonz akosun iyi. Umbun itiyo ikaa uhɛmban inon! 25Mɛza iyɔr avonov abe asoor umuwa uwono? 26Ɔ ɛn mɛza iyɔr uwon abe ɛr kwagh keb ungumɔ gha, kine uzan iyɔr ghu akaa agene?

27“Ɛn sɛ mɔ akos utoho anga vesen. Anga a ɛrɛn utom gha anga ɛrɛn akond avo gha, kas Salmon ghu utorov unav akond ana ashiya ase abiye ikos utoho gha. 28Ɔ ɛn Ku mɔ ne Aonz awaiko shisha ghi ikos utoho, ingine irun nyan ta kpɛr vɛ sɔng ghu uzu, aka ken ken Aonz awa un akond gha, un ananɛv isima ibɛrɛn kɛbɛyi?

29“Ka umburun ukwagh ungwen uyan sɛ uman gha. Ka waniko ghɛ akaa angumɔ gha. 30Iyɔr amban afɔ Aonz gha, amba kɛrɛn akaa angumɔ. Utir won afɔ na ukwagh agba un ghɛ akaa angumɔ. 31Kpa kɛrɛn utorov unav Aonz tegh-tegh, ta Aonz ana un akaa angan amem.

32“Karun ghu utsɛrɛnɛv gha, iyɔng irara, ghɛshiya Utir uwon unan un utorov unav. 33To usu uwow kond inarigh hun una achanɛv. Ru ghɛ akpaa akosun inarigh angan anga ichingnyɛ gha, ku mɔ ne usu uwon kɔisa apas gha, uyi abe ayi gha imɔng ibɛ ivihi gha. 34Hɔ usu uwow angwe, hen ne isima iyow ghi irun.

Wa iyɔr Uwun angwe ghi ivan

35“Wa iyɔr kɔ utom ɔ ɛrɛn uturka uwow uka piriyi gha. 36Run ɛn itomov amban amba ghi ikɛghɛn uwun uvo na ahire kɔ aza itungnun ghi ɔz mɔ, amba asen ikɛghɛn na vɛ adumbɛ uwun uvo uhunza Kɛsmɛ kpɛ ungwen akɛma uhunza. 37Ibɛrɛn iru ghi itomov amban vɛ wa iyɔr ikɛghɛn uwun uvo mɔ ahire. Mɛ kaa un ukɔng, uwun uvo wa akond uyɔro akaa ghɛ avo na tɛman, ava abur avo ukwagh uyan! 38Ɔ ɛn ava atɛ imiye gha ava ikirɛ uso. Hanamɔ kpɛ ungwen ava ana itomov anav mɛnɛn amban vɛ wa iyɔr mɔ. 39Ne fɔn na: Uwun achiya ade afɔ kpɛ ungwen ayiv vɛ va, hin arumun na vɛ hɛmb un itumbɛ gha. 40Un kpa wan iyɔr; ɛr Uwan Ɔro ava kpɛ ungwen ubɛrɛn ase gha.”

41Pita apine Jizɔs na, “Uwun, ikaan ingin utuwa man kɛ ghu ɔsu, hin kɛ ghi iyɔr amɛmɛ?”

42Ne Uwun arumun na, “Kɛ ana ne angwe ɛn ɔr utom ungwen abɛr isima ta afɔ ayom, un ne uwun una abɛr un na ɛnɛnyi ghi itomov agenɛv ghɛ unan avo ukwagh uyan. 43Ibɛrɛn iru ghu ɔr utom ungwen uwun una ahire ta ɛn na angwe ghi ɛrɛn mɔ. 44Mkaa un ukɔng, uwun hun abɛr ɔr utom mɔ na a ɛnɛyi un usu una umem. 45Ne ɔ ɛn ɔr utom ungumɔ akaa kɔ-isima ina na, ‘Uwun ashiyi kɔ uzend,’ ta anɔr igbiren itomov agenɛv akasɛv ghɛ anombos, uyan ukwagh uyan ghɛ uman masɔrum umbun makar un iyɔr. 46Uwun ɔr utom hun ahire ukpɛ ungwen abɛr isima gha ghɛ ukpɛ ungwen awa iyɔr gha, ana un ichan tsɛng abɛr un kɔ ihiye ghɛ amban vɛ abɛr isima gha.

47“Ɔ ɛn ɔr utom ungwen afɔ ukwagh ungwen uwun una aker, ta aka wa iyɔr ghi ɛrɛn ukwagh ungwen uwun una aker gha, uwun una agbire un tsɛma-tsɛma. 48Ne ɔr utom ungwen afɔ gha sɛ a ɛr ukwagh ungwen uwun una aker gha vɛ gbire un keb. Kɔ ɔr utom ungwen vɛ ana tsɛng, vɛ aker tsɛng hɔ ghu un; Kɔ ɔr utom ungwen vɛ ahumba inan tsɛng, vɛ ahumba ikeren tsɛng ghɛ ana.

Urɛhɛ Jizɔs uva ghɛ ipavɛn kɔ ghi iyɔr

(Matiyo 10.34-36)

49“Mva kan utar iwan uzu, mtɛm na hin uru ghi ihiyan! 50Kpa mɛ ya ichan mɛ kpo tegh-tegh, akam izam iyɔr shisha kpem ghɛ a ɛr. 51Ɔ ɛn na mva kan ghu utar ghi nan makunu? Inga, mva ghu mpav kɔ iyɔr! 52Hiye nyan mpav aru kɔ itsombur iyɔr atan, atar atsɔn ahar, ahar atsɔn atar. 53Utir atsɔn uwan wan atsɔn utir; ungɔ atsɔn uwan na ukwas uwan ukwas atsɔn ungɔ; ungɔ kem atsɔn ukwas uwan una ukwas uwan una atsɔn ungɔ kem.”

Jizɔs a ɔɔr iyɔr na vɛ wa iyɔr ukwagh ungwe aa ɛr

(Matiyo 16.2,3)

54Jizɔs agɛma kɔ isum iyɔro akaa na, “Ɔ ɛn akugh ihiye ikun upav ames, ukaan na, ‘Uvǝra una’ ghɛ ɛru mɔ. 55Ɔ ɛn ahumbwɛ ava upav kɔ ghi itiyo, ukaan na, ‘Ɛr ghɛ hiya iyɔr.’ Mɔ ne ghɛru. 56Atsun iyɔr! Ufɔn akav angan han inyan ghɛ kɔisa. Ghɛ ɛr nan ta uku fɔn akaa angan anga ghi ɛrɛn hanagen gha?

57“Kine umbu pɛvɛn ufɔn ukɔng ɛn utiren ghɛ awɛ gha? 58Ɔ ɛn ungwe izan kɔ atoh ijiri ghɛ ɔr itsɔn uwow, bɛɛn iyɔng mɔ ghi ihang tegh-tegh su biyen kɔ ijir. Gha, ɔr hun ana uwɛ kɔ ɔr ijiri, ɔr ijiri ana uwɛ kɔ ɔr ukangatsar, ɔr ukangatsar awa uwɛ kɔ ghu ugadi. 59Mɛ ɔɔr un, vɛ de uwɛ gha sa una ube umbumɔ umwem ukobo umɔm ashi gha.”

Currently Selected:

Luk 12: UTA

Highlight

Copy