Mariko 14

Elwango lwe'kwîta Yesu

(Mat 26:1-5; Luk 22:1-2; Yow 11:45-53)

1Kwábaa kweshiba suku ebiri, elusuku lukulu lwe'Pasaka*, ne'lwe'mikati era ìtali mu chachu* siíke. Ebakulu-kulu be'bakuhanyi* ala'uma ne'bakangirisi be'Mwaso*, bera kuhonda kute bàngasimba Yesu kwa bubisho-bisho, chasiya bàmwîte. 2Si bábaa báteta mbu: «Tùtamusimbaa elusuku lukulu, kungesha kuba lwayo lunene mwa bandu.»

Mukasi muuma âkaba Yesu emarashi

(Mat 26:6-13; Yow 12:1-8)

3Mango Yesu ábaa era àli mwa musi we'Betaniya, era kwêngirira mwa mwa mulume muuma mbu i'Simoni. Oyu Simoni, ábaa mubenzi-benzi. Ábere Yesu era álya, kwera kuulukira mukasi muuma éte mulangi ola wábaa ukúnganyisibwe mu'koi lya lìkomire. Mwo'yu mulangi, mwábaa mùli marashi ma chichiro chinene. Amu marashi, mábaa makúnganyisibwe mwa bwaso bwe'muchi we'narito, kanji mábaa màtahoonganyisibwe. Chasinda, ola mukasi kuna kufuna etwe lyo'la mulangi, na átangirisa âkaba Yesu emarashi kwe'twe.

4Bandu bauma mwa ba bábaa bàli aola, bera kuáya busese. Bera kutangirisa bábusanya mbu: «Chi chatúmire bákumbya mano marashi bacha? 5Si màngafire tinari maana mahatu,#14:5 tinari maana mahatu: Bwábaa buteya bwa kwêmba emukosi mwaka wa mutenga. chasinda, bánasiabira ebakene!» Bushi no'ku, bera kukaliira oyu mukasi busese.

6Si Yesu era kubabusa mbu: «Chi chátuma mwálibusa ono mukasi bacha? Muchimurekeraa, bushi mabuya mano anyíkorere. 7Ebakene, bakánaéndekera kuba mwa kachi-kachi kenyu esuku soshi. Kanji mùnganabaasa ebihangi byoshi bya muhónjire. Si nyono, ndákabe nenyu esuku soshi. 8Rero, ono mukasi aírire ngo'kwa abáa ànganaala, bushi aakábire emarashi kwa mubiri wanyi tanga kwa kukunganya ekutabwa kwanyi. 9Kubinali, nábabura kwa mwa butala boshi, mu chira chisiki cha bakénde báhubanganya mwe'Mwasi Mubuya-buya, bakénde báhambala era luulu se'mwasi ola ono mukasi aírire. Bushi no'ku, ebandu batákamwebirire.»

Yuta Isikariyota áhonda kute angárenganya Yesu

(Mat 26:14-16; Luk 22:3-6)

10Era nyuma se'bi, Yuta Isikariyota, muuma mwa ndumwa* ekumi ne'biri sa Yesu, era kuya era mwe'bakulu-kulu be'bakuhanyi* abêrese Yesu. 11Abu bakulu-kulu be'bakuhanyi bômvire bacha, bera kumowa busese. Bera kumuláanya mbu bangámweresa buteya. Yuta era kwire átangirisa áhonda ebihangi bìkomire bya àngabêresa'mu Yesu.

Yesu álya ePasaka ala'uma ne'banafunzi bai

(Mat 26:17-30; Luk 22:7-23; Yow 13:21-30; 1 Bakor 11:23-25)

12Elusuku lubere-bere lwe'suku sikulu se'mikati era itáli mu chachu* lwera kuika. Olu lusuku, lu béndee bátenda mwe'mbuli se'kulya kwa Pasaka*. Ebanafunzi* ba Yesu bera kumubusa mbu: «Enawetu, ngai'u wáhonda túye kukukunganyisa ebiryo bye'Pasaka*?»

13Yesu kukwera kutuma banafunzi* bai babiri, era kubabura mbu: «Muyáa mwa musi, mungábuana mulume muuma ola wète ereya lya meshi. Oyu mulume, mumúkulikiraa. 14Ne'nyumba era àngêngirira'mo, mubúraa ena'i mbu: ‹eMukangirisi àbusise mbu ngai'u echumba chai chìri cha angálira mwe'linye lye'Pasaka* ala'uma ne'banafunzi* bai?› 15Oyu ena ei nyumba àngábalosa chumba chiuma chinene cho'kwa ngangamo. Mwe'chi chumba, mungábuana ebindu byoshi byakúnganyisibwe mira. Rero mwe'i nyumba mu mungátukunganyisa ebiryo bye'Pasaka*.»

16Abu banafunzi* babiri bera kunachiuma báya mwa musi. Bera kunabúana ebindu byoshi byàkunganyisibwe mira ngo'kwa Yesu ànababuraa. Bera kutangirisa báteka ebiryo bye'Pasaka*.

17Mango lwábaa lwera luolo-olo, Yesu era kuika ala'uma ne'ndumwa* sai ekumi ne'biri. 18Ábere bera bálya, Yesu era kubabura mbu: «Kubinali, nábabura kwa muuma mu mwabo ola nálya nai angányirenganya.»

19Ebanafunzi* bômvire bacha, bera kusibuka busese, na bátangirisa bámubusa muuma-muuma: «Eri nyono?» 20Yesu nai mbu: «Análi muuma mwa kachi-kachi kenyu kwa munáli ekumi na babiri, ola wátobesa mu'mbare nguma nanyi. 21Nyi Mwana we'Mundu nyingêchibwa, kukulikana no'kwa Maanjiko Mabuya-buya matúla matechire era luulu sanyi. Si buanya kwa mundu ola ungányirenganya. Oyu mundu, kungakomire àtangabuchirwe!»

22Ábere bera bálya, Yesu era kutola emukati na áteta mbu akoko era mwa Ongo. Era kuishanga muo, na êresa'o ebanafunzi* bai. Era kuteta mbu: «Mutólaa, onola i'mubiri wanyi.» 23Chasinda, era kutola ne'ngumbu, era kutonga Ongo, na áberesa'i. Boshi bera kumwa kui. 24Yesu era kubabura mbu: «Enera i'mikira yanyi, mikira ye'chilaano* era ingásheshekala bushi na bandu banene. 25Kubinali, nábabura kwa ndákachimwe tifai*, kuikira elusuku lwa nyikámwa'i buyayaya mwa Bwami bwa Ongo*.»

26Ábere bera bamálaa kwîmba enyimbo se'kutonga Ongo, bera kwérukira kwa ndulungu ye'Miseituni.#14:26 eBayuta mango béndee bámala kulya ebiryo bye'Pasaka*, béndee bêmba Saburi 115-118.

Yesu áteta kwa Petero àngáchǎkana'i

(Mat 26:31-35; Luk 22:31-34; Yow 13:36-38)

27Chasinda, Yesu era kwire ábura ebanafunzi* bai mbu: «Muboshi mungányirekerera, bushi byǎnjikirwe mbu:

‹Nyingêta emungere,

ne'mbuli singáhandabana.›#14:27 Somaa Sakariya 13:7.

28«Si chiro bacha, mango nyingômwoka, nyingábahondorera eKalilaya.»

29Petero era kumubura mbu: «Waliya! Chiro àngaba mbu ebanji boshi bangákurekerera, si nyono ndákurekerere chiro na hicha!»

30Yesu nai mbu: «Kubinali, nákubura kwa mwo'buno butufu, era muhondo se'luasi kubika kabiri, ungába wàchǎkana nyono kahatu.»

31Si Petero era kunaendekera áteta mwa kulaisa mbu: «Akaba binyěmire kufira ala'uma nao, nànêmerere. Si ekukunana ku ndàngakunana chiro na hicha!» Ne'banji boshi nabo, bera kunateta bacha.

Yesu éma Ongo eKetesemane

(Mat 26:36-46; Luk 22:39-46)

32Era nyuma se'bi, Yesu ne'banafunzi* bai bera kuika mu'chisiki chiuma cha chěrikirwe mbu Ketesemane. Era kubabura mbu: «Mwǐkalaa anola tanga, nyíye kwéma Ongo.» 33Era kuenda na Petero, na Yakobo, na Yowani. Era kutangirisa áata businane bunene na kulibuka busese mwa muchima. 34Era kubabura mbu: «Buno businane bwáhonda kunyita. Rero, mubéraa anola, mùtaonjiraa.»

35Chasinda, era kuchifunda era muhondo hicha, na áchihunda kwa chitaka. Era kutangirisa éma Ongo mbu akaba bìngaalikana, ebi bihangi bye'malibuko, bìtamuikiraa. 36Era kuteta mbu: «Aba,#14:36 Aba: kukuteta mbu "Tata". Tata, era mwao byoshi byénde byáalikana. Ei ngumbu ye'malibuko, ùnyiímiraa'i. Si chiro bacha, ekuhonda kwao ku kunábaa, si atá ekuhonda kwanyi.»

37Chasinda, Yesu era kuhuba ala banafunzi* bai bábaa bàli, era kubuana bàonjire. Era kwire ábura Petero mbu: «Era Simoni! Wàonjire? Wanáfunjirwe kuima etulo chiro na saa nguma? 38Rero mùtachionjiraa, mwéme Ongo, mungesha kwêngirira mwa miereko. Bushi emuchima asímikire, si emubiri aínyire misi!»

39Yesu era kubareka kanji, era kuya kwéma Ongo mwa kuhubirira ei myasi. 40Ábere áhuba kanji ala banafunzi* bai bábaa bàli, era kubabuana kanji bàonjire, bushi emeho mabo mábaa masítoire bushi ne'tulo. Bera kwire báina cha bàngamwakula.

41Mango Yesu áhubaa kufuluka ebwakahatu ala ebanafunzi* bábaa bàli, era kubabura mbu: «Ewashe, munáchiri muonjire mwátamuka? Oshâo! Rero ebihangi byaíkire. Nyi Mwana we'Mundu banyânyire mira mwa mino se'bandu be'mabi. 42Mubatukaa tuénde! Mulólaa ola wányana, yono wera ulí ofu!»

Yesu ásimbwa

(Mat 26:47-56; Luk 22:47-53; Yow 18:3-12)

43Ábere Yesu anáchiri áteta, unao-unao, Yuta muuma mwa ndumwa* ekumi ne'biri sa Yesu, kuna kupamukira. Ábaa àli na bandu banene ba bábaa bète emômbo ne'tuchi mwa mino. Abu bandu, bábaa bàtumirwe ne'bakulu-kulu be'bakuhanyi*, ne'bakangirisi be'Mwaso*, ne'bashamuka be'Bayuta*. 44Yuta ábaa àbalosise mira kute angárengenya Yesu. Era kubabura mbu: «Ola nyingáobera, eri i'yoyu. Mumusímbaa, mumwêke mùmulangire kubuya.»

45Mango Yuta áikaa ala Yesu ábaa àli, unao-unao kuna kuchifunda ofu nai na ámubura mbu: «Mukangirisi!» Chasinda, era kumuobera. 46Abu bandu, kuna kusimba Yesu na bámumina. 47Si muuma mwa ba bábaa bàli aola, kuna kuhohola ebômbo bwai, kuna kuisha ekutu lye'kaungu* ke'mukulu-kulu we'bakuhanyi*.

48Yesu kukwera kubabusa mbu: «Chi chatúmire mwáika kunyisimba mwéte emômbo ne'tuchi nga bandu ba báya kusimba chihumusi? 49Chira lusuku, nabáa nénjire nába ala'uma nenyu mwa Luhu lwa Ongo* nábakangirisa, si chiro mukányisimba. Si ene myasi yàbere, chasiya bya bitúla byǎnjikirwe mwa Maanjiko Mabuya-buya bibérere.»

50Unao-unao, ebanafunzi* bai boshi kuna kumureka na báchihaira.

51Mutabana muuma ábaa áenda àkulikire Yesu, àchihukire ka ngwaya. Oyu mutabana, ba bandu bera kuereka kumusimba, 52si era kuhunukala kuna kubarekera ka ke'ngwaya, kuna kuchiuma áenda áhaa butambara.

Yesu átongana era muhondo se'Karubanda ke'Bayuta

(Mat 26:57-68; Luk 22:54-55, 63-71; Yow 18:13-14, 19-24)

53Abu bandu, bera kwêka Yesu ala mwe'mukulu-kulu we'bakuhanyi*. Aola, u'ebakulu-kulu be'bakuhanyi boshi, ne'bashamuka be'Bayuta* ala'uma ne'bakangirisi be'Mwaso* bábaa babúananyire. 54Petero ábaa áenda àkulikira Yesu marerere, kuikira era kunêngirira mwa chibuwa che'nyumba ye'mukulu-kulu we'bakuhanyi*. Era kwekala ala'uma ne'balanzi, ákalukala kwa muliro.

55Abu bakulu-kulu be'bakuhanyi ala'uma ne'banji bakulu-kulu boshi bo'mwa Karubanda ke'Bayuta*, bábaa báhonda echinwa cha bàngemangira'ko chasiya béchise Yesu. Si bera kuina'chi. 56Bandu banene bera kunde bámusinga myasi ya bisha, si ei myasi yabo bábaa baténjire báiteta kuuma.

57Chasinjire, bauma mubo bera kwîmanga, na bátangirisa bámusindaira myasi ya bisha mbu: 58«Ono mundu, twàchûmviraa tubeine kwa áteta mbu: ‹Luno Luhu lwa Ongo*, lwáimbwaa ne'bandu. Nyono, nyingáhandula'lo ne'ra nyuma sa suku ehatu, nánaimba elunji lwa lungába lùtaimbirwe ne'bandu.›»

59Si chiro bacha, ei emyasi yabo bábaa baténjire báiteta kuuma.

60Emukulu-kulu we'bakuhanyi* kukwera kubatuka mwa kachikakachi ke'bandu na ábusa Yesu mbu: «Ei myasi yoshi bano bandu bàkusitakirire, ùtanǎkwire chiro na kandu kasibya ku'i?» 61Si Yesu era kuchisirira, chiro ákamwǎkula kandu.

Oyu mukulu-kulu era kuhuba kumubusa mbu: «Eri woyo u'Kirisito*, Mwana wa Ongo ola twénde twáahanyisa?» 62Yesu nai mbu: «Eee i'nyono! Mungálola kwa nyi Mwana we'Mundu nyěkese kwa lunda lwe'malyo ma Ongo we'buashi. Kanji mungálola kwa nátenga kwa nguba mwa lumbumbu.»

63Si mango oyu mukulu-kulu we'bakuhanyi* ômvaa bacha, kuna kuchiberengangira kwe'njimba. #14:63 kuchiberengangira kwe'njimba: Mwa Bayuta ekuchiberengangira kwe'njimba kwábaa kulosa kwa mundu àli mwa chiriyo, nesi àsibukire nesi àfire bute. Anola, emukulu-kulu we'bakuhanyi* ábaa áhonda kulosa kwa Yesu àkambire Ongo. Era kuteta mbu: «Rero, bubei buchiye bwa tuchíri twáhonda bushi no'nu mundu? 64Si mubeine mwàchûmvirire mira kwa ákamba Ongo. Kute musene?»

Ebandu boshi, bera kuteta mbu ěmire kwîchibwa.

65Bauma mwa'bu bandu, bera kutangirisa báchira ku Yesu. Bera kumuhukira ebuso, chasinda bera kumumáasanga na kumubura mbu: «Rero, rèbaa nde iwàkumaasise!» Ebasula nabo, bera kumutola na bátangirisa bámumaasanga.

Petero ánana Yesu

(Mat 26:69-75; Luk 22:56-62; Yow 18:15-18, 25-27)

66Mango Petero ábaa anáchiri era masina mwa chibuwa che'chikali, muandakasi muuma we'mukulu-kulu we'bakuhanyi* era kuika ala ábaa àli. 67Era kulola ku Petero ákalukala kwa muliro. Oyu muandakasi, era kumutumbikisa na ámubura mbu: «Nao wabáa ùli ala'uma na Yesu, mwesha Nasareti.» 68Si Petero era kunana, na áteta mbu: «Ei myasi wáhonda kuteta ndaíshi, kanji ndànaimenyerere.» Chasinda, Petero era kuuluka na áya kwa chiso che'chikali. Unao-unao, eluasi kuna kubika.

69Oyu muandakasi mango álolaa kanji kwa Petero emenze kwe'chi chiso, era kubura ebandu bábaa bàli aola mbu: «Ono mundu, àli muuma mubo!» 70Si Petero kanji era kunana.

Era nyuma hicha, abu bandu nabo bera kubura Petero mbu: «Kubinali, unáli muuma mubo, bushi nao ùli mwesha Kalilaya!» 71Bushi no'ku, Petero era kutangirisa áchǎkana na kulaisa busese mbu: «Ono mundu mwénjire mwâmaana, naláisise kwa ndàmwîshi. Rero, akaba náfula bisha, nyífe shambyo!»

72Unao-unao, eluasi kuna kubika ebwakabiri. Petero kukwera kukengera era myasi Yesu àmuburaa mbu: «Era muhondo se'luasi kubika kabiri, ungába wànyinana kahatu.» Petero kuna kutangirisa álira.

Currently Selected:

Mariko 14: tbt

Highlight

Copy