Matayo 5

Yesu ákangirisa ebandu kwa ndulungu

(Luk 6:20-23)

1Mango Yesu álolaa kwa luamba lwe'bandu, era kwérukira kwa ndulungu. Ábere era ékalaa, ebanafunzi* bai bera kuchifunda ofu nai. 2Era kutangirisa ábakangirisa mbu:

3«Bǎhanyirwe ba bèshi kwa bàli bakene be'muchima,

bushi eBwami bo'kwa nguba* bùli bwabo.

4Bǎhanyirwe ba bàli mwa malira,

bushi Ongo angábasesa emuchima.

5Bǎhanyirwe ba batúla barembu,

bushi bangêresibwa echio kuba mwandu.

6Bǎhanyirwe ba batúsa ebusinya ne'châmi che'kuíra bya bìtungenene era muhondo sa Ongo,

bushi Ongo angábeucha.

7Bǎhanyirwe ba bénde báfira ebanji ebonjo,

bushi nabo Ongo angábafira bonjo.

8Bǎhanyirwe ba batúsa emuchima ola ùkomisibwe*,

bushi bakálola ku'Ongo.

9Bǎhanyirwe ba bénde báreta ebôlo,

bushi bangérikibwa bana ba Ongo.

10Bǎhanyirwe ba bálibusibwa bushi bénde báira bya bìtungenene era muhondo sa Ongo,

bushi eBwami bo'kwa nguba bùli bwabo.

11«Muáhanyirwe emango ebandu bénde ba bákamba na kubalibusa na kubasinga chira mwasi mubi bushi nanyi. 12Mundaa mwámowa na kuchiterera busese, bushi Ongo ábabikirire lwêmbo lunene kwa nguba. Kuno'ku ku'banálibusaa ebarebi* ba bábahondoreraa.»

Emunyu ne'bulangare bwe'butala

(Mar 9:50; Luk 14:34-35)

13«Mwabo mùli nga munyu we'butala. Rero akaba emunyu àngaesa ebuloke bwai, chi bàngabika'mo kanji ahúbe kuloka? Oyu munyu, àtachete mufa asibya si anêra wa kusheshibwa era butala, chasinda ánakandangwa ne'bandu.

14«Mwabo mùli bulangare bwe'butala. Emusi ola uímbirwe kwa ndulungu, àtangachibisha.

15«Kanji kutáli mundu ola ùngakoresa etara chasinda ánalifunyikira echitonga. Si énde ábika'li kwa kakondo chasiya lilómekere ebandu boshi ba bàli mwa nyumba. 16Kuno'ku kwe'bulangare bwenyu bwémire kunde bwálomekera ebandu, chasiya bénde bálola kwa myanya yenyu ibuya, nabo bénde bátonga Eho wenyu ola ulí kwa nguba.»

Yesu ákangirisa era luulu se'Mwaso wa Musa

17«Muténdaa mwáanyisa mbu naíkire kuhandula eMwaso wa Musa, nesi emyasi era yátetwaa ne'barebi. Ndaíkire bushi nyibíhandule, si naíkire chasiya ebi byoshi bibérere. 18Kubinali, nábabura kwa buéndera enguba ne'butala bikába bìchiri'o, kutáli chiro na ka erufu kauma nesi chitamukiro chiuma che'Mwaso cha chikákulibwa, kuikira byoshi bibérere. 19Bushi no'ku mwo'yu Mwaso, chira mundu woshi ola ungákena emuomba* ola ùseneke'ko nga mueke kurenza irikabo, chasinda ánakangirisa ebanji mbu nabo bàukenaa, oyu mundu i'ukába mueke mwa Bwami bo'kwa nguba. Si ola ukátunda'o na kuukangirisa ebanji mbu nabo bendaa báutunda, oyola i'ukába mukulu-kulu mwa Bwami bo'kwa nguba. 20Rero nábabura kwa akaba muténjire mwáira bya bìtungenene era muhondo sa Ongo kurenza eBafarisayo* ne'bakangirisi be'Mwaso*, mùtakêngirire chiro na hicha mwa Bwami bo'kwa nguba.»

Yesu ákangirisa era luulu se'kusinana

(Luk 12:57-59)

21«Mwòmvaa kwa bahokulu benyu báburwaa mbu: ‹Uténdaa wêta.#5:21 Somaa Kutenga 20:13. Bushi emundu ola wèchire mulikabo, ěmire kuchinjibusibwa.›

22«Si nyono nábabura kwa akaba emundu àngasinanyira munyakabo, oyu mundu ěmire kuchinjibusibwa. Kanji ola ùngakamba munyakabo mbu: ‹Ùli mbuta!›, nai ěmire kuchinjibusibwa mwa Karubanda ketu. No'la wábura munyakabo mbu: ‹Ùli musire!›, oyola nai ěmire kuumwa mwa muliro we'suku ne'mango!

23«Rero, akaba ùngaba wáya kutula Ongo kwa kahaha ke'mitulo*, na wákengera kwa munyakenyu akwéte ku'mwasi murebe, 24urékaa tanga ei mitulo* yao era muhondo se'kahaha, wánaya kwômvikana nai. Chasinda, wánere wábaha kwâna ei mitulo yao.

25«Kanji akaba mundu murebe àngaba àkusitakire, wǒmvikanaa nai fuba mango muchiri mwa njira ye'kuya era muhondo se'baishi be'manja. Bítabere bacha, oyu mundu angákwana era mwe'baishi be'manja, nabo banákubika mwa mino se'basula, chasinda nabo bánakuuma mwa buroko. 26Kubinali, nábabura kwa ùtangatenga mwo'bu buroko akaba ùtasa kuonga emwinda woshi!»

Yesu ákangirisa era luulu se'kubanda ekiri

27«Mwòmvaa kwa byátetwaa mbu: ‹Uténdaa wábanda ekiri.›#5:27 Somaa Kutenga 20:14.

28«Si nyono nábabura kwa akaba emulume àngatumbikisa emukasi kwa kuchifisa'i, eri àbanjire ekiri no'yu mukasi mwa muchima wai. 29Eliho lyao lye'malyo akaba lìngatuma wêngirira mwa mabi, wǒmolaa'li, wánaliuma burerere. Bushi kukomire kuesa chitera chao chiuma, emubiri wao woshi wakúumibwa mwa muliro we'suku ne'mango. 30Kanji akaba ekuboko kwao kwe'malyo kùngatuma wêngirira mwa mabi, uíshaa'ko, wánauma'ko burerere. Bushi kukomire kuesa chitera chao chiuma, emubiri wao woshi wakúumibwa mwa muliro we'suku ne'mango.»

Yesu ákangirisa era luulu se'kuulusa emukasi

(Mat 19:9; Mar 10:11-12; Luk 16:18)

31«Mwòmvaa kanji kwa byátetwaa mbu: ‹Akaba emulume àngaulusa mukai, àmwêresaa emaruba me'kurekana.›#5:31 Somaa Bukengere 24:1. 32Si nyono nábabura kwa akaba emulume àngaulusa mukai ku unji mwasi ola utá wakúbanda ekiri, oyu mukasi ákahuba kuhweribwa, eri oyu mulume wamúulusaa àmuirire kuba mubanzi we'kiri. Kanji emulume ola ùngahwera emukasi wàulusibwaa ne'ba, eri nai àbanjire ekiri.»

Yesu ákangirisa era luulu se'kulaisa

33«Mwòmvaa kanji kwa bahokulu benyu báburwaa mbu: ‹Muténdaa mwálaisisa ebisha, si mwěmire kunde mwáira bya mwaláisaa era muhondo sa Enawetu.›#5:33 Somaa Balawi 19:12.

34«Si nyono nábabura kwa muténdaa mwálaisa chiro na hicha. Mùtalaisaa kwe'sina lye'nguba, bushi i'ndebe ye'Bwami bwa Ongo*. 35Kanji muténdaa mwálaisa kwe'sina lye'butala, bushi chi chiri nga chisiki cha Ongo énde átamusisa kwe'maulu mai. Muténdaa mwálaisa no'kwe'sina lye'musi we'Yerusalemu, bushi i'utúla musi we'Mwami mukulu-kulu. 36Kanji uténdaa wálaisa no'kwa etwe lyao, bushi ùtangaala kuhubya chiro na lufiri lwao luuma lúbe lumvi nesi lwerafulu. 37Bushi no'ku, akaba mùngemeresanya ku'mwasi murebe, munêmereraa'o. Na akaba mùnganana oyu mwasi, kunábaa kunana'o, bushi akaba mùngatalika inji myasi kwe'i, eri yátengera era mwa Wamusimu.»

Yesu ákangirisa era luulu se'kuchifúna

(Luk 6:29-30)

38«Mwòmvaa kwa byátetwaa mbu: ‹Liho kwa liho, na lino kwa lino.›#5:38 Somaa Kutenga 21:24; Balawi 24:20; Bukengere 19:21.

39«Si nyono nábabura kwa akaba emundu angabákorera mabi, mùtachifúnaa. Na akaba àngakumasisa kwe'tama lye'malyo, umúbindulira ne'lye'marembe. 40Kanji akaba emundu àngahonda kukusitaka chasiya àkunyae efuremo yao, ùmurekeraa ne'kochi. 41Na akaba emundu àngakwêsa emusio wai kwa misi mbu umwêkeraa'o ku'chilometere chiuma,#5:41 Ebasula be'Baroma béndee básimba ebandu na kubesa emisio kwa misi. ùmuisisaa'o ku'bibiri. 42Akaba emundu àngakwema kandu karebe, umwêresaa'ko. Na akaba àngakwema mwinda, ùtamwîmaa'o.»

Yesu ákangirisa era luulu se'kusima ebarenda

(Luk 6:27-28, 32-36)

43«Mwòmvaa kanji kwa byátetwaa mbu: ‹Úndaa wásima emwalungu wao.#5:43 Somaa Balawi 19:18. Si ebarenda benyu beke, mundaa mwábahomba.›

44«Si nyono nábabura kwa mundaa mwásima ebarenda benyu, na kunde mwémera ba bábalibusa. 45Mukáira ebyera, mungába bana b'Eho wenyu ola ulí kwa nguba. Bushi yeke, énde ákosa esuba lyai kwa bandu babi ne'babuya. Kanji énde átosa emvula kwa bandu ba bàtungenene ne'ba bàtatungenene era muhondo sai. 46Rero, akaba mùngende mwánasima ba batúla babásimire oshâo, lwêmbo luchiye mùngabona era mwa Ongo? Si ebafuchisi be'mbarata nabo, bénde banáira bacha! 47Na akaba mùngende mwánakesa ba bàli banyakenyu oshâo, chi mungába mwaírire cha chìrenzise ebanji? Si ba bàteshi Ongo nabo, bénde bánakesa banyakabo! 48Rero, mubáa bandu ba bàtungenene ngo'kwa Eho wenyu ola ulí kwa nguba atúla àtungenene.»

Currently Selected:

Matayo 5: tbt

Highlight

Copy