Matayo 28

Ekwômoka kwa Yesu

(Mar 16:1-10; Luk 24:1-12; Yow 20:1-10)

1Elusuku lwe'Sabato*, lwera kurenga. Ábere mwe'i mishangya lumbuli-mbuli lwa lwe'inga, Mariya we'Makatala ala'uma no'la unji Mariya, bera kuya kutangula eshinda. 2Unao-unao, mwa chio mwera kurenga musisi munene. Mwo'lu, malaika* muuma wa Enawetu era kwândaala átenga kwa nguba, era kuchifunda ofu ne'shinda. Era kufumira lye'koi era musike, na ékala kuli. 3Oyu malaika* ábaa álangala busese nga kalimya-limya, ne'njimba sai, sábaa sálangala pe-pe-pe. 4Ba balanzi bálolire bacha, bera kwôbabaa busese, na bátangirisa bákukumana kuikira ebihangi bába nga bafu.

5Oyu malaika* era kubura abu bakasi mbu: «Mùtobaa, bushi nyìshi kwa mwàbahire kuhonda Yesu, ola bàmanyikaa kwa musalaba. 6Àtachiri anola! Omwókire kukulikana no'kwa ábaa àtechire mira. Mubáhaa muchilorere ala babáa bamúonjisise. 7Rero mwiree mwáenda fuba kubura ebanafunzi* bai mbu omwókire, àbahondorere mira eKalilaya. Eyera, yi'bangámulorera'ko. Ebyera binábaa náhonda nyibábure!»

8Mwe'chi chihangi chine'chi, abu bakasi bera kutenga kwa shinda báfa buba, si bábaa bámowa busese. Bera kulibita báya kufulira ebanafunzi* ba Yesu kwo'yu mwasi.

9Unao-unao, Yesu era kubapamukira'ko na ábalamusa mbu: «Bwachere!» Nabo bera kuchifunda ofu nai, bera kumuata kwa bihando mwa kumwèra. 10Chasinda, Yesu era kubabura mbu: «Mùtobaa! Muyáa kubura banyaketu kwa bànyibuanaa eKalilaya. Eyera yi'bangányilórera'ko.»

Ebalanzi báfula emwasi we'bisha

11Ábere abu bakasi banáchiri mwa njira, basula bauma mwa ba bábaa bálanga eshinda bera kuya mwa musi. #28:11 mwa musi: eYerusalemu Bera kubalikisisa ebakulu-kulu be'bakuhanyi emyasi yoshi era yàbere. 12Bushi no'ku, abu bakulu-kulu bera kubuanana ala'uma ne'bashamuka be'Bayuta na báya lwango. Bera kwêresa abu basula buteya bunene, 13na kubabura mbu: «Mwabo, mungáteta mbu: ‹Ebanafunzi* bai baíkaa kumwiba mwa butufu mango twabáa twàonjire.› 14Emukulu-kulu Pilato nai ákômva kwo'no mwasi, tubeine tungámubanda'ko. Bikába bacha, oyu mwasi atáchibáretere bwaka.»

15Ba basula bera kunátola obu buteya. Bera kunáira ngo'kwa bánaburwaa. Oyu mwasi, era kunahandabana mwa Bayuta kuikira lwarero.

Yesu átuma ebanafunzi bai mwa mulimo

(Mar 16:14-18; Luk 24:36-49; Yow 20:19-23; Mar 1:6-8)

16Era nyuma se'bi, ebanafunzi* ekumi na muuma ba Yesu, bera kuya eKalilaya. Bera kwérukira kwa ndulungu era Yesu ábaa ábalosise mira. 17Mango bámulolaa'ko, bera kufukama era muhondo sai. Si bauma mubo, chiro bákaíka bêmerera.

18Chasinjire, Yesu era kuchifunda ofu nabo, era kubabura mbu: «Nêrésibwe ebuashi boshi kwa nguba no'kwa butala. 19Bushi no'ku, muénderaa ebandu be'mbaa soshi, chasiya bábe banafunzi* banyi. Mundaa mwábatisa'bo kwe'sina lya Tata, ne'lye'Mwana, ne'lye'Muchima Mubuya-buya. 20Mundaa mwákangirisa'bo kunde báira emyasi yoshi era nabáburaa. Kanji muményereraa kwa nyikánaendekera kuba ala'uma nenyu kuikira kwa businda bwe'butala.»

Currently Selected:

Matayo 28: tbt

Highlight

Copy