Matayo 26

Elwango lwe'kusimba Yesu

(Mar 14:1-2; Luk 22:1-2; Yow 11:45-53)

1Mango Yesu ábaa era àmalaa kuteta ei myasi yoshi, era kubura ebanafunzi* bai mbu: 2«Si mwìshi kwa era nyuma sa suku ebiri, elusuku lukulu lwe'Pasaka* lungáika. Muményereraa kwa nyi Mwana we'Mundu nyingânyibwa chasiya nyimányikibwe kwa musalaba.»

3Ebakulu-kulu be'bakuhanyi*, ne'bashamuka be'Bayuta, bera kubuanana mwa mwe'mukulu-kulu we'bakuhanyi* mbu i'Kayafa. 4Mwo'lu lubuanano bera kuya lwango lwa kusimba Yesu kwa bubisho-bisho, chasiya bàmwîte. 5Si bera kuteta mbu: «Tùtamusimbaa elusuku lukulu lwe'Pasaka*, kungesha kuba lwayo lunene mwa bandu.»

Mukasi muuma âkaba Yesu emarashi

(Mar 14:3-9; Yow 12:1-8)

6Ábere Yesu era àli mwa musi we'Betaniya, era kwêngira mwa mwa mulume muuma mbu i'Simoni. Oyu Simoni ábaa mubenzi-benzi. 7Mango bábaa bera bálya, mukasi muuma era kuchifunda ofu na Yesu. Oyu mukasi, ábaa éte mulangi wa marashi ma chichiro chinene busese.#26:7 Oyu mulangi ábaa àkunganyisibwe mwe'koi lya bénde bérika mbu alabasita. Era kumakaba Yesu kwe'twe. 8Ebanafunzi* bai bálolire bacha, bera kuyongwa busese, na bátangirisa báchitetembya mbu: «Ebase! Chi chatúmire ono mukasi áesa mano marashi bacha? 9Si mabáa màngausibwe ku chichiro chinene ne'buteya bwa màngafire, bùngaasise ebakene!»

10Obu buyongwa bwabo, Yesu era kubumenyerera. Bushi no'ku, era kubabusa mbu: «Chi chátuma mwálibusa ono mukasi bacha? Si mabuya mano anyíkorere! 11Ebakene bakánaba nenyu esuku soshi, si nyono ndákabe nenyu esuku soshi. 12Ono mukasi anyâkabire mano marashi, bushi ne'kukunganya ekutabwa kwanyi. 13Kubinali, nábabura kwa mwa butala boshi, mu chira chisiki cha bakénde báhubanganya mwe'Mwasi Mubuya-buya, bakénde báhambala era luulu se'mwasi ola ono mukasi àirire. Bushi no'ku, ono mukasi akénde ákengerwa.»

Yuta áhonda kurenganya Yesu

(Mar 14:10-11; Luk 22:3-6)

14Mwe'si suku, muuma mwa banafunzi* ekumi na babiri ba Yesu mbu i'Yuta Isikariyota, era kuya era mwe'bakulu-kulu we'bakuhanyi. 15Era kubabusa mbu: «Chi mùnganyêresa, akaba nyìngabawa Yesu?» Bera kumweresa bikoroto mahatu bya buteya.#26:15 Mwa Bayuta, bikoroto mahatu bwábaa buteya bwa kuonga ekaungu ka ngaafu yetáa. Somaa Kutenga 21:32. 16Kutengera amu mango, Yuta era kutangirisa áhonda kute àngabawa Yesu.

Yesu álya ePasaka ala'uma ne'banafunzi bai

(Mar 14:12-26; Luk 22:7-23; Yow 13:21-30; 1 Bakor 11:23-25)

17Mango elusuku lubere lwe'suku sikulu se'mikati era itáli mu chachu* lwáikaa, ebanafunzi* ba Yesu bera kumuíkira na bámubusa mbu: «Enawetu, ngai u'wáhonda túye ku kukunganyisisa ebiryo bye'Pasaka*?» 18Nai mbu: «Muyáa mwa musi, #26:18 Oyu musi, àli emusi we'Yerusalemu. ala mwa mundu murebe. Oyu mundu, mungámubura mbu: ‹eMukangirisi wetu àtechire mbu ebihangi bya abáa álanga bìri ofu. Rero, angálira ebiryo bye'Pasaka* mwa mwao ala'uma ne'banafunzi* bai.›» 19Abu banafunzi* bera kunáira ngo'kwa Yesu ànababuraa, bera kukunganya ebiryo bye'Pasaka*.

20Mango lwábaa lwera luolo-olo, Yesu era kwíkala álya ebiryo ala'uma ne'banafunzi* bai ekumi na babiri. 21Ábere bera bálya, era kubabura mbu: «Kubinali, nábabura kwa muuma mu mwabo angányirenganya.» 22Oyu mwasi, era kusibusa ebanafunzi* busese. Bushi no'ku, chira muuma era kutangirisa ámubusa mbu: «Enawetu! Eri nyono!» 23Yesu nai mbu: «Ola wátobesa ala'uma nanyi, i'ungányirenganya. 24Nyi Mwana we'Mundu nyingáfa, kukulikana no'kwa byǎnjikirwe era luulu sanyi. Si buanya kwa mundu ola ungányirenganya! Oyu mundu, kungakomire àtangabuchirwe!»#26:24 Somaa Saburi 22; Isaya 53.

25Yuta iwámurenganyaa, nai era kubusa mbu: «Mukangirisi! Eri nyono?» Yesu nai mbu: «Weine wàtechire!»

26Mango bábaa banáchiri bálya, Yesu era kutola emukati, era kuteta mbu akoko era mwa Ongo. Era kuishanga muo, era kwêresa'o ebanafunzi* bai. Chasinda, era kubabura mbu: «Mutólaa ono mukati mulye'o, bushi àli emubiri wanyi.» 27Era nyuma se'bi, era kutola engubu, era kuteta mbu akoko era mwa Ongo. Era kuberesa'i na ábabura mbu: «Mumwáa muboshi, 28bushi enera ìri emikira yanyi, ya kulosa echilaano* cha Ongo áiraa ne'lubaa lwai. Ei mikira, ingásheshekala kwa kununula bandu banene, chasiya babábalirwe ebibi byabo. 29Nábabura kwa kutengera lwarero ndákachimwe tifai, kuikira elusuku lwa tukámwa etifai iyayaya mwa Bwami bwa Tata.»

30Ábere bera bèmbaa,#26:30 eBayuta mango béndee bámala kulya ebiryo bye'Pasaka*, béndee bêmba eSaburi 113-118. bera kuya kwa ndulungu ye'Miseituni.

Yesu áteta kwa Petero angámunana

(Mar 14:27-31; Luk 22:31-34; Yow 13:36-38)

31Chasinda, Yesu era kubura ebanafunzi* bai mbu: «Mwo'buno butufu, muboshi mungányirékerera. Bushi byǎnjikirwe mbu:

‹Nyingêta emungere we'mbuli,

ne'buso bwe'si mbuli, bungáhandabana.› #26:31 Somaa Sakariya 13:7. 32Si chiro bacha, mango nyingômwoka, nyingábahóndorera eKalilaya.»

33Petero era kumubura mbu: «Chiro àngaba mbu ebanji boshi bangákureka, nyono ndákureke chiro na hicha!»

34Yesu nai mbu: «Kubinali, nákubura kwa mwo'buno butufu, era muhondo se'luasi kubika, ungába wàchǎkana nyono kahatu.»

35Petero nai mbu: «Akaba binyěmire kufira ala'uma nao, nemérere. Si ekukunana ku ndàngakunana chiro na hicha!» Ebanji banafunzi* boshi nabo, bera kunáteta bacha.

Yesu éma Ongo eKetesemane

(Mar 14:32-42; Luk 2:39-46)

36Era nyuma se'bi, Yesu ne'banafunzi* bai bera kuya mu chisiki chiuma cha chěrikirwe mbu Ketesemane. Báikire'mo, Yesu era kubabura mbu: «Mwǐkalaa tanga anola, kuno náya wála kwéma Ongo.» 37Yesu era kuenda na Petero na baala ba Sebetayo babiri. Era kuata businane ne'bwenge bwera kumusungulira. 38Bushi no'ku, era kubabura mbu: «Buno businane bwáhonda kunyita. Rero, mubéraa anola, mùtaonjiraa.»

39Chasinda, era kuchifunda era muhondo hicha, era kufukama, ebuso bwai bwera kuikira kwanachitaka. Era kutangirisa éma Ongo mbu: «Tata! Akaba bìngaalikana, ene ngumbu ya mano malibuko, ùnyiímiraa'i! Si chiro bacha, bìtabaa ngo'kwa náhonda, si ekuhonda kwao ku kunábaa.»

40Yesu era kuhuba ala arékaa ebanafunzi* bai, era kubabuana bàonjire. Era kwire ábura Petero mbu: «Ewashe, kute mwanáfunjirwe kuima etulo chiro na saa nguma? 41Rero, mùtachionjiraa mwéme Ongo, mungesha kwêngirira mwa miereko, bushi emuchima asímikire, si emubiri aínyire emisi.»

42Yesu era kubareka kanji, era kuya kwéma Ongo ebwakabiri mbu: «E Tata! Akaba ene ngumbu ye'malibuko ìtanganyirengera busira kumwa'i, rero ekuhonda kwao ku kunábaa!»

43Ábere era àhubaa ala banafunzi* bai bábaa bàli, era kubabuana kanji bàonjire, bushi etulo twábaa tùli tunene mwa meho mabo. 44Bushi no'ku, era kuhuba kubareka na áya kwéma Ongo ebwakahatu. Era kunahubirira amu memo.

45Chasinda, era kuhuba ala ebabnafunzi bai bábaa bàli, era kubabura mbu: «Ewashe, munáchiri muonjire mwátamuka? Rero, mulólaa! Ebihangi byaíkire mira! Nyi Mwana we'Mundu nyingânyibwa mwa mino se'bandu be'mabi. 46Mubatuka tuénde! Ola ungányana, yono wera ùli ofu!»

Yesu ásimbwa

(Mar 14:43-50; Luk 22:47-53; Yow 18:3-12)

47Ábere Yesu anáchiri áteta, Yuta, muuma mwa banafunzi* bai ekumi na babiri era kuika. Oyu Yuta, ábaa àli na bandu banene ba bábaa bète emwombo ne'ngonyi mwa mino. Abu bandu boshi, bábaa bàtumirwe ne'bakulu-kulu be'bakuhanyi, ne'bashamuka be'Bayuta. 48Yuta, iwáyaa kwâna Yesu, ábaa àbalosise mira echimenyeso cha angákoresa. Echi chimenyeso kwábaa kuteta mbu: «Ola nyingôbera eri i'yôyu, mwánamusimba!»

49Unao-unao, Yuta era kuchifunda ofu na Yesu. Era kumubura mbu: «Mukangirisi, nàkulamusise!» Chasinda, era kumuobera. 50Si Yesu era kumubura mbu: «E mwira wanyi! Cha chakúrechire, uíraa'chi.» Ba bandu kuna kusimba Yesu.

51Mwo'lu, mundu muuma mwa ba bábaa bàli na Yesu, era kuhohola ebômbo bwai, kuna kubuhuta ekaungu* ke'mukulu-kulu we'bakuhanyi*, na ámuisha ekutu. 52Si Yesu era kumubura mbu: «Fùlusaa ebômbo bwao mwa lupota. Bushi chira mundu ola wénde wálwa ne'bômbo, nai mwa bômbo mu akánêchibwa! 53Mwabo mùteshi kwa nyingéma Tata mbu anyíasaa, na unano-unano anányitumire bamalaika* banene ku'bikembe ekumi na bibiri? #26:53 Ebi bikembe ekumi na bibiri byábaa bìngaata basula ba bàngaika ku byumbi malinda na babiri. 54Si akaba ànganyítumira'bo, rero kute kwe'Maanjiko Mabuya-buya mangáberera? Amu Maanjiko, matúla màtechire mbu ene myasi yoshi, byěmire inábe bacha!»

55Chasinda, Yesu era kubusa abu bandu mbu: «Chi chatúmire mwányibahira ne'mwômbo ne'ngonyi, nga bandu ba báya kusimba chihumusi? Si chira lusuku nabáa nénjire náreerera mwa Luhu lwa Ongo* nákangirisa ebandu, si chiro mukányisimba. 56Bine byoshi byabére, chasiya emyasi yoshi ibérere era barebi bátetaa mwa Maanjiko Mabuya-buya.»

Chasinda, ebanafunzi* bai boshi bera kumureka na báchihaira.

Yesu átongana era muhondo se'Karubanda ke'Bayuta

(Mar 14:53-65; Luk 22:54-55, 63-71; Yow 18:13-14, 19-24)

57Abu bandu, mango bábaa bera basímbaa Yesu, bera kumweka era mwe'mukulu-kulu we'bakuhanyi* mbu i'Kayafa. Ebakangirisi be'Mwaso*, ne'bashamuka be'Bayuta bábaa babúanayire'yi. 58Si Petero era kukulikira Yesu katola nyuma. Nai era kwêngira mwa chikali che'mukulu-kulu we'bakuhanyi*. Era kwekala mwa chibuwa ala'uma ne'balanzi, chasiya alóle era emyasi ya Yesu ingásinjira.

59Abu bakulu-kulu be'bakuhanyi, ne'bashamuka boshi be'Karubanda ke'Bayuta*, bera kuhonda myasi ya bisha era bàngemangira'ko chasiya běte Yesu. 60Bandu banene bera kuika kumusinga myasi, si chiro bacha, bera kunaina cha bàngemangira'ko chasiya bàmwîte.

Chasinjire, bandu babiri bera kuika 61na báteta mbu: «Ono mundu àtetaa mbu angáhandula eLuhu lwa Ongo* na kuhuba kuluímba ku suku ehatu.»

62Emukulu-kulu we'bakuhanyi* kukwera kwîmanga na ábusa Yesu mbu: «Ewashe, ùtǎkwire chiro na mwasi asibya kwe'bi byoshi bano bandu bàkusitakire'ko?» 63Si Yesu chiro ákamwǎkula kandu. Oyu mukulu-kulu we'bakuhanyi*, era kuhuba kumubura mbu: «Nákwěma kwe'sina lya Ongo we'kalamo, ùtulaisisaa akaba woyo u'Kirisito*, Mwenyi Ongo.» 64Yesu era kumwǎkula mbu: «Weine wàtechire mira! Rero, nábabura muboshi kwa kutengera lwarero, mungálola kwa nyi Mwana we'Mundu nyěkese kwa lunda lwe'malyo ma Ongo we'buashi. Kanji mungálola kwa nábaha nátenga kwa nguba mwa lumbumbu.»

65Oyu mukulu-kulu we'bakuhanyi* ômvire bacha, kuna kuchiberengangira kwe'njimba. Era kuteta mbu: «Ono mundu akámbire Ongo! Bunji bubeyi buchiye bwa tuchíri twáhonda? Si mwera kuchumvira mubeine kwa ákamba Ongo! 66Rero kute musene?» Nabo mbu: «Ěmire kwîchibwa!»

67Mwo'lu, bauma bera kutangirisa bámuchiranga'ko era buso, na kumuhutanga ebifundo. Ne'banji bera kumumáasanga, 68na kumubura mbu: «Era Kirisito*, rèbaa nde iwàkuhuchire!»

Petero ánana Yesu

(Mar 14:66-72; Luk 22:56-62; Yow 18:15-18, 25-27)

69Mwe'chi chihangi, Petero ábaa ékese mwa chibuwa. Muandakasi muuma era kuchifunda ofu nai. Era kumubura mbu: «Nao, wabáa ùli ala'uma na Yesu, mwesha Kalilaya.» 70Si Petero era kunana era muhondo se'bandu boshi ba bábaa bàli aola, era kuteta mbu: «Eu mukasi! Ebi wáhonda kuteta, ndàbîshi!»

71Era nyuma se'bi, Petero era kutenga aola, era kuya kwa chiso che'chikali. Unji muandakasi muuma nai, era kumulola'ko, era kubura ebandu ba bábaa bàli aola mbu: «Ono mundu, abáa àli ala'uma na Yesu we'Nasareti.» 72Si Petero era kuhuba kunana mbu: «Naláisise kwa ndèshi oyu mundu!»

73Era nyuma hicha, abu bandu ba bábaa beménze aola, bera kuchifunda ofu na Petero, na bámubura mbu: «Kanangana unáli muuma wabo, bushi emitetere yao ináchilósise!» 74Chasinjire, Petero era kutangirisa áteta mbu: «Akaba náfula bisha, nyífe shambyo! Naláisise kwo'yu mundu ndàmwîshi!» Unao-unao, eluasi kuna kubika.

75Petero era kwire ákengera emyasi Yesu àmuburaa mbu: «Era muhondo eluasi lubíke, ungába wànyinana kahatu.» Bushi no'ku, era kuuluka era butala, na átangirisa álira na businane bunene.

Currently Selected:

Matayo 26: tbt

Highlight

Copy