Matayo 25

Emuanyi we'banyere ekumi

1Rero, eBwami bo'kwa nguba bukáhuhanyisibwa na muanyi wa banyere ekumi. Abu banyere bátolaa ematara mabo báya kulinjira muya mulume. 2Batano mubo sábaa mbuta, ne'banji batano bábaa béte bwenge. 3Esi mbuta, sera kutola ematara mabo busira kwéka ebitoroli bye'kubika'mo. 4Si ba bábaa bète bwenge beke, bera kutola ematara mabo, na kwêka ebitoroli. 5Oyu muya mulume bushi ne'kwêrisa, ba banyere ekumi boshi bera kusindaana na báonjira.

6Ábere kachi-kachi ka butufu, emurenge era kûmvikana mbu: «Muya mulume ěshire! Muyáa kumuhúukasa!» 7Unao-unao, ba banyere boshi bera kusuka, na bátangirisa bákunganya ematara mabo.

8«Sa mbuta, sera kubura ba bábaa bète bwenge mbu: ‹Mutwêresaa kwa bitoroli byenyu, bushi ematara metu máhonda kusima.› 9Si nabo mbu: ‹Nânga! Bine bitoroli twéte, bìtangatulumirira tuboshi. Muyáa era mwe'bachimbusi, muchiúlire ebyenyu.›

10«Ábere sa mbuta sináchiri sáya kuula ebitoroli, ola muya mulume kuna kuika. Ba banyere batano ba bábaa bàchikunganyise mira, bera kwêngirira mwa linye lye'buya ala'uma nai. Chasinda, elwisi lwera kuchingibwa.

11«Era nyuma se'bi, sa mbuta nasi sera kuika. Sera kutangirisa sálakanga mbu: ‹Enawetu! Enawetu! Ùtuchunguliraa!› 12Si muya mulume era kubǎkula mbu: ‹Nábabura kanangana kwa ndàbêshi!›»

13Chasinjire, Yesu era kuhuba kuteta mbu: «Rero, muchilanga-langaa, bushi mùteshi elusuku nesi echihangi nyikáfuluka.

Emuanyi we'bakosi bahatu

(Luk 19:11-27)

14«eBwami bo'kwa nguba, tùngabuhuhanya na muanyi wa mundu muuma ola wábaa wáhonda kubalama. Oyu mundu, era kwâmaala ebakosi bai na ábarekera ebikulo byai mbu ba bíkoresaa. 15Era kwêresa mukosi muuma talanda etano, #25:15 Somaa 18:24. eunji ebiri, ne'unji, talanda nguma. Oyu mundu, áiraa bacha kukulikana ne'misi ya chira mukosi. Chasinda, era kubalama.

16«Unao-unao, emukosi ola wêresibwaa talanda etano, era kuya kuchimbula mu'si. Era kuinguka sinji etano. 17Ola wêresibwaa talanda ebiri, nai era kuya kuchimbula mu'si. Era kuinguka sinji ebiri. 18Si ola wêresibwaa talanda nguma, yeke era kuya kuchima fumbi, na ábisha'mo era talanda ye'nawabo.

19«Ábere kwàrenga suku sinene, oyu enawabo era kufuluka. Era kwâmaala ebakosi bai bamúbure kute bàkoresaa ebikulo byai. 20Emukosi ola wêresibwaa talanda etano era kureta muinguke wa sinji etano. Era kuteta mbu: ‹Ewaliya, wányirekeraa talanda etano, rero ulólaa, sinji etano sine naíngukire.›

21«Enawabo nai mbu: ‹Nechi! Ùli mukosi mubuya, kanji ùtanali mukongobanya! Waírire kubuya! Rero bushi ùtabaa mukongobanya kwa bikulo bieke, nyingére nákuira mwimangisi wa bikulo binene. Bushi no'ku, wíraa wábaha, umówe ala'uma nanyi!›

22«Ola wêresibwaa talanda ebiri, nai era kuika. Era kuteta mbu: ‹eWaliya! Wányirekeraa talanda ebiri, rero ulólaa sinji ebiri sine naíngukire.›

23«Enawabo nai mbu: ‹Nechi! Ùli mukosi mubuya, kanji ùtanali mukongobanya! Waírire kubuya! Rero bushi ùtabaa mukongobanya kwa bikulo bieke, nyingére nákuira mwimangisi wa bikulo binene. Bushi no'ku, wíree wábaha, umówe ala'uma nanyi!›

24«Chasinjire, ola wêresibwaa talanda nguma, nai era kuika. Era kuteta mbu: ‹eWaliya, nyìshi kwa utúla mulume musibu, woyo ùli nga mundu ola wénde wáshebula bya àtaingaa, na kulunda-lunda bya àtahandabanyaa. 25Bushi no'ku, nera kwôbaa, na náya kubisha etalanda yao mwa chitaka. Rero, era talanda yao iyêne.›

26«Enawabo nai mbu: ‹ùli mukosi mubi, kanji unáli ndambaara! Ewashe, wabáa wìshi kwa nénde náshebula bya ndàingaa, no'kwa nénde nalunda-lunda bya ndàhandabanyaa! 27Chi cheraa chátuma útanyibikira ebikulo byanyi mwa nyumba era bénde bálangira mwe'buteya, chasiya mango nyingáfuluka, nyibítorere'mo ala'uma ne'muinguke wabi?› 28Chasinda era kuteta mbu: ‹Mumunyáaa ei talanda, mwánêresa'i ono wète talanda ekumi. 29Bushi ola wète iwénde wánêresibwa, ánere ába mwa muako. Si ola utéte kandu, akányaibwa ne'ka achírembaa kuata. 30Kanji, oyu mukosi utéte mufa asibya, mumuúma era butala mwa musimya. Na mwo'yu musimya, ebandu bakálira na kulola kwa kasibu.›»

Ebuchinjibusi bwe'bandu

31«Mango nyi Mwana we'Mundu nyikábaha mwa bulangare bwanyi ala'uma ne'bamalaika* boshi, nyikékala kwa ndebe yanyi ye'Bwami. 32Ebandu boshi bakábuanana era muhondo sanyi, nanyi nyikálikanya'bo mu bikembe bibiri ngo'kwa emungere énde álikanya embuli ne'mbene. 33Nyikábika embuli kwa lunda lwanyi lwe'malyo, ne'mbene kwa lwe'marembe.

34«Chasinda, nyikábura ba bakába bàli kwa lunda lwanyi lwe'malyo mbu: ‹Mubáhaa, mu mwáahanyirwe na Tata, mwěngirire mwa Bwami bwa ábakunganyisaa kutengera ekubumbwa kwe'butala. 35Bushi mango nábaa náfa ebusinya, mwera kunyeresa ebiryo, na mango nábaa náfa echâmi, mwera kunyeresa ebye'kumwa, na mango nábaa nyìri muenyi, mwera kunyihúukasa. 36Kanji mango nábaa naínyire eluchimba, mwera kunyeresa'lo, na mango nábaa nyìri mulwala, mwera kunyiasa, na mango nábaa nyìri mwa buroko, mwera kuya kunyitàngula.›

37«Chasinda abu bábaa bàtunjire Ongo bakányǎkula mbu: ‹Enawetu! Mango'chi twákulolaa'ko wáfa businya twera kukweresa ebiryo, nesi mango'chi wábaa wáfa châmi, twera kukweresa ebye'kumwa? 38Na mango'chi wábaa ùli muenyi, twera kukuhuukasa? Nesi mango'chi wáinaa eluchimba, twera ku'kweresa'lo? 39Na mango'chi twákulolaa'ko wálaka, nesi ùli mwa buroko, twera kuya kukutangula?›

40«Oyu mwami akábǎkula mbu: ‹Kubinali, nábabura kwa ebi byoshi, mango mwéndee mwábikoreraa ola ulí mueke mwa bano banyaketu, muményereraa kwa nyi mwéndee mwákorera'bi.›

41«Chasinda, abu bakába bàli kwa lunda lwanyi lwe'marembe, beke nyikábabura mbu: ‹Muténgaa mwa meho manyi, mu Ongo átakire! Muyáa mwa muliro ola utákasime esuku ne'mango. Oyu muliro, ákunganyisibwe mira bushi na Wamusimu ne'bamalaika* bai! 42Bushi mango nábaa náfa ebusinya, chiro mukányeresa ebiryo, na mango nábaa náfa châmi, chiro mukányeresa ebye'kumwa, 43na mango nábaa nyìri muenyi, chiro mukányihúukasa, na mango náinaa eluchimba, chiro mukányeresa'lo. Kanji mango nábaa nyìri mulwala, na mango nábaa nyìri mwa buroko, chiro mukáya kunyitàngula.›

44«Nabo bakámubusa mbu: ‹Enawetu! Mangochi twákulolaa'ko wáfa businya, nesi wáfa châmi, nesi ùli muenyi, nesi waínyire eluchimba, nesi ùli mulwala, nesi ùli mwa buroko, chiro tukáika kukuasa?›

45«Nanyi nyikábǎkula mbu: ‹Kubinali, nábabura kwa ebi byoshi, mango muténdee mwábikorera ola ulí mueke mwa bano banyaketu, muményereraa kwa atá nyi mwéndee mwábiirira.›

46«Chasinda, abu bandu bakáya mwa buchinjibusi bwe'suku ne'mango. Si ba bàtunjire Ongo beke, bakáya mwa kalamo ke'suku ne'mango.»

Currently Selected:

Matayo 25: tbt

Highlight

Copy