Matayo 20

Emuanyi we'bakosi bo'mwe'hwa lye'misabibu

1eBwami bo'kwa nguba buhúhanyisibwe no'no muanyi: «Kwábaa mundu muuma ola wábaa wète ehwa lya misabibu*. Oyu mundu, era kuchiuma lumbuli-mbuli áya kuhonda bandu ba kukola mwe'ri ehwa lyai. 2Era kulaana nabo kwa angénde êmba chira mundu chikoroto chiuma cha buteya bwa tinari #20:2 Chikoroto chiuma cha buteya bwa tinari: Chábaa cha kwêmba emukosi ku mubisi muuma. ku lusuku luuma. Chasinda, era kubatuma mwe'hwa lyai.

3«Ábere mwa saa ehatu se'mishangya-shangya, era kuhuba kuchiuma. Era kulola ku banji bandu bàli mwa nama busira mulimo asibya. 4Era kubabura mbu: ‹Nenyu muyáa kukola mwe'hwa lyanyi lye'misabibu*, nyingábemba ngo'kwa biněmire.› 5Chasinda, bera kuchiuma.

«Ábere esuba limenzi, kanji era kuchiuma na átuma banji bandu mwe'hwa lyai. Mango sábaa sera saa mwenda sa mushi, era kunahuba kuira bacha.

6«Ábere mwa saa ekumi na nguma se'luolo-olo, kanji era kuchiuma, era kulola ku banji bandu bàli mwa nama. Era kubabusa mbu: ‹Ewashe! Chi chitúmire mwámala emureerere woshi anola busira mulimo asibya?› 7Nabo mbu: ‹Bushi kutáli mundu ola wàtwêresise mulimo.› Nai mbu: ‹Nenyu, muyáa kukola mwe'hwa lyanyi.›

8«Ábere lwera luolo-olo, oyu ene'hwa era kubura emwemangisi we'mulimo wai mbu: ‹Wǎmaalaa ebakosi, wánêresa chira mundu elwai lwêmbo. No'mwa kubèmba, utángiriraa kwa basinda-sinda, wánasinjira kwa babere-bere.› 9Ba bakosi ba bêngiriraa mwa mulimo mwa saa ekumi na nguma se'luolo-olo, bera kuika. Chira muuma era kubona chikoroto chiuma cha buteya.

10«Ba bábatangirisaa emulimo emishangya-shangya nabo, bera kuika. Bera kuchichinga mbu beke bangêresibwa mwango munene. Si nabo, chira mundu era kunabona chikoroto chiuma cha buteya oshâo.

11«Ábere bera bàbonaa olu lwêmbo, bera kuata buyongwa bunene bushi na ene'hwa mwa kuteta mbu: 12‹Era! Bano bakosi wera wanásindaa kubika mwa mulimo, si saa nguma ibanákolire oshâo! Rero, kute ùngabêmba kuuma netu, no'ku twatámire twákola emurerere woshi kwe'suba lìkaliire bacha?›»

13«Si ene'hwa era kwǎkula muuma mubo mbu: ‹E mwira wanyi, ndàkukangire! Si twalánaa kwa ungákorera chikoroto chiuma cha buteya! 14Rero, tòlaa elwêmbo lwao, unáende! Byànyisimisaa nyeine kwêresa emukosi ola wasíndaa kuika elwêmbo lwa lunáli nge'lwao. 15Weke waányisise mbu ndéte ebuashi bwe'kukoresa ebikulo byanyi ngo'kwa nyináhonjire? Nesi, wafíre mufula bushi nyìri mundu mubuya?›»

16Yesu era kuteta kanji mbu: «Kubinali, ba bàli basinda-sinda bakába babere-bere. Na ba bàli babere-bere, bakába basinda-sinda.»

Yesu áteta ebwakahatu era luulu se'kufa ne'kwômoka kwai

(Mar 10:32-34; Luk 18:31-34)

17Lusuku luuma, Yesu ábaa àli mwa njira ye'kwérukira mwa musi we'Yerusalemu. Era kutola ebanafunzi* bai ekumi na babiri na ábeka ala musike. Era kubabura mbu: 18«Muményaa! Twabo bano twáhonda kwérukira mwa musi we'Yerusalemu. Mwo'yu musi, nyi Mwana we'Mundu nyingânyibwa mwa mino se'bakulu-kulu be'bakuhanyi, ne'bakangirisi be'Mwaso*. Abu bandu, bangányichinjibusa chasiya nyǐchibwe. 19Kanji bangányana mwa mino se'bandu ba bàteshi Ongo, nabo bangányishekera na kunyipunda busese mwa tuchi. Chasinda, bangányimanyika kwa musalaba. Si elusuku lwa kahatu, nyingômwoka.»

Muka Sebetayo émera ebaala ebukulu-kulu

(Mar 10:35-45)

20Era nyuma se'bi, muka Sebetayo ala'uma na baala báikiraa Yesu. Wamukasi era kukoma emafi era muhondo sa Yesu ámwěma mwasi muuma. 21Yesu era kumubusa mbu: «Ewashe, chi wáhonda?» Nai mbu: «Mango ungába mwa bwami bwao, wěmereraa kwa bano baala banyi babiri, bu bangékala ofu nau. Muuma kwa lunda lwe'malyo, ne'unji kwa lwe'marembe.»

22Yesu nai mbu: «Ebi mwénjire mwányěma, mùtabîshi. Mùngaala kumwa engumbu ye'malibuko era nyingámwa?» Nabo mbu: «Nechi, tùngaala.»

23Yesu era kubabura mbu: «Kubinali, ei ngumbu mùnganamwa'i! Si, ekwikasa ebandu kwa lunda lwanyi lwe'malyo, nesi lwe'marembe, bìtanyêrekere. Ba bakékala mwe'bi bisiki, Tata yeine ábakunganyisise'bi mira.»

24Mango abu banji banafunzi* ekumi bômvaa bacha, bera kuyongwa busese bushi na'bu bana babiri ba Sebetayo.

25Bushi no'ku, Yesu kukwera kwâmaala ebanafunzi* boshi ala'uma, na ábabura mbu: «Mwìshi kwa mwa bandu be'sinji mbaa, ebami bénde bêmangira ebandu kwa misi. Ne'bakulu-kulu babo, bénde bábalibusa. 26Si biténdaa byába bacha mwa kachi-kachi kenyu. Muményaa kwa ola wáhonda kuba mukulu-kulu mu mwabo, ěmire kuba muanda wenyu. 27Kanji ola wáhonda kuba mubere-bere mu mwabo, kwěmire énde ábakorera. 28Bushi nyi Mwana we'Mundu ndábahaa chasiya bénde bányikorera, si nábahaa kwa kunde nákorera ebanji na kwâna ekalamo kanyi, chasiya nyinúnule bandu banene.»

Yesu álamya bauta babiri

(Mar 10:46-52; Luk 18:35-43)

29Ábere Yesu ne'banafunzi* bai bera bátenga mwa musi we'Yeriko, bandu banene busese bera kumukulikira.

30Kwa musike se'njira, kwábaa kwékese bauta babiri. Abu bauta, mango bômvaa kwa Yesu iwárenga, bera kuchilakangira mbu: «Enawetu, Mwenyi Tauti! Utúfiraa bonjo!»

31Mango ebandu bômvaa bacha, bera kubakaliira mbu basíraa. Si abu bauta, bera kunaendekera bálakanga mbu: «Enawetu, Mwenyi Tauti! Utúfiraa bonjo!»

32Yesu era kwire êmanga na âmaala'bo. Era kubabusa mbu: «Ewashe! Chi mwáhonda nyìbairire?» 33Nabo mbu: «Enawetu, twáhonda emeho metu masíbukale.» 34Yesu era kubafira bonjo, era kubauma kwa meho, unao-unao emeho mabo kuna kusibukala. Chasinjire, nabo bera kumukulikira.

Currently Selected:

Matayo 20: tbt

Highlight

Copy