Matayo 13

Emuanyi we'muinzi

(Mar 4:1-9; Luk 8:4-8)

1Mwo'lu lusuku, Yesu era kutenga mwa nyumba na áya kwíkala kwa musike se'nyanja, chaisya akángirise ebandu. 2Bandu banene busese bera kumusungula. Bushi no'ku, era kwérukira mwa bwato ne'kala'mo. Abu bandu nabo, bera kushiba bèmenze kwa musike se'nyanja.

3Era kubakangirisa myasi inene mwa mianyi. Era kubabura mbu: «Kwábaa muinzi muuma ola wáyaa kuinga embuto mwe'hwa lyai. 4Ábere era áinga ei mbuto, siuma sera kutowera kwa musike se'njira. Emilonge yera kuika na yálya'si. 5Esinji, sera kutowera mwa makoi ala ábaa atáli lutaka lunene. Esi mbuto, sera kumera fuba bushi elutaka lwábaa lùkeire. 6Si mango esuba lyákolaa, lyera kwócha ei myaka, na yôma bushi emisi-misi yábaa ìtasimikire mwa chitaka. 7Esinji mbuto, sera kutowera mwa myaka era yète mawa. Ei myaka yète mawa mango yákulaa, yera kufundeeresa'si. 8Si esinji seke, sera kutowera mwa lutaka lwa lùkomire, sera kwêka ebifuma. Siuma sera kwêka eyana, ne'sinji chiratu, ne'sinji mahatu. 9Ola wète matwi me'kûmva, ǒmvaa!»

Cha chátumaa Yesu énde áteta mwa mianyi

(Mar 4:10-12; Luk 8:9-10)

10Era nyuma se'bi, ebanafunzi* ba Yesu bera kumuikira na bámubusa mbu: «eWaliya! Chi chénjire chátuma wáteta ne'bandu mwa mianyi?» 11Nai mbu: «Mwabo mwábonyire emuisha we'kumenyerera emyasi ìbishirwe yo'mwa Bwami bo'kwa nguba. Si ebanji beke, batábonaa'o. 12Bushi emundu ola wète kandu, iwénde wêresibwa ekanji, ánere áata binene. Si ola utéte kandu yeke, angányaibwa ne'ka àchirembaa kuata. 13Rero, echera chi chénjire chátuma náteta nabo mwa mianyi. Bushi abu bandu, chiro àngaba mbu bénjire bátumbikisa si bàtalola, kanji bénjire bômvirisa si bàtômva, batánamenyerera. 14Bushi no'ku, emyasi era Isaya árebaa yàberere kubo. Bacha ku átetaa:

‹Ekûmva, mukénde mwômva, si mutákamenyerere chiro na hicha.

Ne'kutumbikisa, mukénde mwátumbikisa, si mutákalole chiro na hicha.

15Bushi bano bandu baírire emichima yabo kuba isibu,

basíbise ematwi mabo,

bánasibya ne'meho mabo,

chasiya bàtalolaa, bàtanômvaa,

nesi bàtanyialukiraa.

Bushi akaba bànganyiálukirire, nyìngabalamise.› #13:14-15 Somaa Isaya 6:9-10.

16«Si mwabo, mwaáhanyirwe bushi emeho menyu málola ne'matwi menyu mômva! 17Kubinali, nábabura kwa kuli barebi* banene na bandu banene ba bábaa batúla bàtunjire Ongo, báhondaa balóle kwe'ne'myasi muséne'ko, si chiro bákailola'ko. Kanji báhondaa bǒmve kui, si chiro bákayumva'ko.

Yesu áanulula emuanyi we'muinzi

(Mar 4:13-20; Luk 8:11-15)

18«Mwíraa mwômvirisa kwo'yu muanyi we'muinzi àtechire: 19Embuto sa sátoweraa kwa musike se'njira, sihúhanyisibwe ne'bandu ba bénde bômva eChinwa che'Bwami bwa Ongo*, si bàtamenyerera'chi. Chasinda, eMusimu ánaika ánakula'chi mwa michima yabo. 20Ne'sinji sa sátoweraa mwa makoi, sihúhanyisibwe ne'bandu ba bénde bômva eChinwa cha Ongo, unao-unao bánangirira'chi na lumoo lunene. 21Si echi Chinwa chìtasimika mwa michima yabo. Mango bénde bálola kwa malae, nesi bálibuka bushi ne'Chinwa cha Ongo, unao-unao bánareka ebwemeresi bwabo. 22Ne'sinji mbuto sa sátoweraa mwa mawa, sihúhanyisibwe ne'bandu ba bénde bômva eChinwa cha Ongo. Si emianyo yo'muno butala, ne'kusima kuhumira ebuare, byénde byáfundeeresa echi Chinwa mwa michima yabo. Bushi no'ku, chìteka bifuma. 23Ne'sinji sa sátoweraa mwa lutaka lwa lùkomire seke, sihúhanyisibwe ne'bandu ba bénde bômva eChinwa cha Ongo na kumenyerera'chi. Chasinda, echi Chinwa chánêka ebifuma mwa michima yabo. Bauma, bánêka bifuma eyana, ne'banji chiratu, ne'banji mahatu.»

Emuanyi we'bichi bibi

24Yesu era kuisha unji muanyi muuma mbu: «eBwami bo'kwa nguba buhúhanyisibwe na mundu muuma ola wáingaa mbuto ibuya mwe'hwa lyai. 25Si lusuku luuma butufu mango ebandu boshi bábaa bàonjire mira, emurenda wai era kuika kuinga ebichi bibi mwa bulo, chasinda era kuchiendera. 26Ábere obu bulo bwaméra na kwéta, ebi bichi bibi nabi, byera kulorekana'ko.

27«Ebakosi be'ne'hwa, bera kuya kumubusa mbu: ‹eWaliya, si mbuto ibuya itwàingaa mwe'hwa lyao? Rero, ebi bichi bibi ngai u'byàtengire?› 28Nai mbu: ‹Murenda iwaírire bacha.› Bera kuhuba kumubusa mbu: ‹Eri wáhonda túye kubikulisanga?› 29Nai mbu: ‹Nânga! Akaba mùngaya kubikulisa, kuli mango mungábikulisanga ala'uma ne'bulo. 30Bushi no'ku, murékaa byoshi bikúlire ala'uma, kuikira mwa suku se'kushebula. Mwe'si suku mu nyingábura ebandu be'kushebula mbu: "Mukúlisangaa tanga ebichi, mwánamina'bi tukanda-tukanda chasiya bíye kwóchibwa. Chasinda, mwánalunda-lunda ebulo mwánabika'bo mwa nguli yanyi."›»

Emuanyi we'kafuma ke'haratali

(Mar 4:30-32; Luk 13:18-19)

31Yesu era kubaishira unji muanyi muuma mbu: «eBwami bo'kwa nguba buhúhanyisibwe na kafuma kaeke ke'haratali ka mundu muuma átolaa na áya kukainga mwe'hwa lyai. 32Aku kafuma, ku katúla kaeke kurenza etunji twoshi. Si mango kénde kámera kénde káhuba muchi munene kurenza einji myaka yoshi yo'mwe'hwa, kuikira echihangi emilonge yénde yáika kuimba ematu kwa matabi mao.»

Emuanyi we'chachu

(Luk 13:20-21)

33Kanji Yesu era kuisha unji muanyi muuma mbu: «eBwami bo'kwa nguba buhúhwanyisibwe na chachu* cha mukasi muuma átolaa. Echi chachu*, era kuhoonganya'chi mu'biyanga bihatu binenene bya shano ya bulo, kuikira chera kuimbya ei shano yoshi.»

34Ei myasi yoshi Yesu áburaa'i eluamba lwe'bandu mwa mianyi. Ábaa aténjire ábabura mwasi asibya busira kubaishira muanyi. 35Ábaa énjire áira bacha, chasiya echinwa chibérere, cha chátetwaa ne'murebi* mbu:

«Nyingénde náteta nabo mwa mianyi,

nyingábafulira ne'myasi era yábaa ìbishirwe kutengera ekubumbwa kwe'butala.»#13:35 Somaa Saburi 78:2.

Yesu áanulula emuanyi we'bichi bibi

36Era nyuma se'bi, Yesu era kureka eluamba lwe'bandu, na êngirira mwa nyumba. Ebanafunzi* bai bera kuya kumubura mbu: «Waliya! Ola muanyi we'bichi bibi bya byábaa bìri mwe'hwa, ùtuanululiraa'o.» 37Yesu nai mbu: «Oyu wáingaa embuto sibuya, àli nyono nyi Mwana we'Mundu. 38Ne'hwa, bùli ebutala. Ne'si mbuto sibuya, sihúhanyisibwe ne'bandu bo'mwa Bwami bwa Ongo*. Ne'bi bichi bibi, bihúhanyisibwe ne'bandu ba Wamusimu. 39Ne'murenda ola wáikaa kuinga ebi bichi bibi, àli Wamusimu. Ne'kushebula, kuhuhanyisibwe ne'businda bwe'butala. Ne'bandu be'kushebula, bahúhanyisibwe ne'bamalaika*. 40Rero, ngo'kwa ebichi bibi byénde byákulisibwa chasiya byǒchibwe mwa muliro, ku'bikánaba bacha kwa businda bwe'butala. 41Bushi nyi Mwana we'Mundu nyikátuma ebamalaika* banyi mwa Bwami bwanyi, báye kulunda-lunda ebandu boshi ba bénde báshiirisa ebanji mwa mabi ala'uma ne'banji boshi ba bénde bákola emabi. 42Chasinda abu bandu babi, ebamalaika* bakáuma'bo mwa marunga me'muliro. #13:42 Somaa Tanyeri 3:6. Na mwo'yu muliro, bakálira na kulola kwa kasibu. 43Si ebandu babuya beke, bakába bálangala nge'suba #13:43 Somaa Tanyeri 12:3. mwa Bwami bwe'She wabo. Ola wète ematwi, ǒmvaa!»

Emuanyi we'bindu bye'chichiro chinene

44«eBwami bo'kwa nguba, buhúhanyisibwe na bikulo bya byábaa bìbishirwe mwe'hwa. Ebi bikulo, mundu muuma era kubuula'bi, unao-unao era kuhuba kubisha'bi. Oyu mundu, era kumwowa busese, na áya kuusa ebindu byai byoshi, chasinda era kuula eri ehwa.

45«eBwami bo'kwa nguba buhúhanyisibwe kanji na muchimbusi muuma ola wábaa wáhonda kuya kuula makoi ma chichiro chinene. 46Mango álolaa ku'koi liuma lya chichiro chinene, era kuya kuusa ebindu byai byoshi na áula'li.»

Emuanyi we'kasira

47«eBwami bo'kwa nguba kanji buhúhanyisibwe na kasira ka balobi bauma báumaa mwa nyanja, kera kusimba chira mulala we'fi. 48Mango kábaa kehwíre, abu balobi bera kukakululira kwa musike se'nyanja. Chasinda, bera kwékala na bátangirisa bálondola efi. Bera kubika sa sábaa sikomire mwa bitonga, ne'sa sábaa sìbiire, bera kusikabulira. 49Rero, ku'bikánaba bacha kwa businda bwe'butala. Ebamalaika* bakábaha kulikanya ebandu babi ne'babuya. 50Bakáuma ebandu babi mwa marunga me'muliro. Na mwo'yu muliro, bakálola kwa kasibu.»

Emuanyi we'bindu biyayaya ne'byo'kwa mira

51Yesu era kubusa ebanafunzi* bai mbu: «Ewashe, eri mwomvíre ei myasi yoshi?» Nabo mbu: «Eee, twômvire.»

52Chasinda, era kubabura mbu: «Rero, chira mukangirisi we'mwaso ola ulí mwanafunzi* mwa Bwami bo'kwa nguba, ahúhanyisibwe ne'na nyumba, ola wénde wákula ebindu biyayaya ne'byo'kwa mira mwa buare bwai.»

Besha Nasareti bákena Yesu

(Mar 6:1-6; Luk 4:16-30)

53Mango Yesu ábaa era àmalaa kuisha ei mianyi yoshi, era kutenga mwe'chi chisiki, 54era kuya mwa musi ola ákuliraa'mo. Áikire'mo, era kutangirisa ákangirisa ebandu mwa bushenge bwabo.

Abu bandu, bera kusanwa na bátangirisa bábusanya mbu: «Ono mundu, ngai'u àkulire buno bwenge, ne'bine bisomerano byoshi? 55Onola kasi atá imuala wo'la murenga wénde wákunganya ebindu mwa mbao? Na Mariya atá i'nyina? Na Yakobo, na Yosefu, na Simoni, na Yuta, atá bu banyakabo? 56Na baliwabo boshi, si tutúla ala'uma nabo kuno! Rero, ene myasi yoshi, ngai'u àkulire'i?» 57Echera chera kutuma bátamwêmerera.

Si Yesu era kubabura mbu: «Emurebi* atúsa etunda mwa bisiki byoshi, si mwa musi wabo no'mwa ngumo yabo, énde ákenyibwa.»

58Rero, bushi besha Nasareti bánanaa mbu bàtangemerera, Yesu nai chiro ákaira bisomerano binene eyera.

Currently Selected:

Matayo 13: tbt

Highlight

Copy