Yowani 18

Yesu ásimbwa

(Mat 26:47-56; Mar 14:43-50; Luk 22:47-53)

1Mango Yesu ábaa era amálaa kuteta ei myasi, era kutenga aola ala'uma ne'banafunzi* bai. Bera kuhabuka ekabanda ke'Kiteroni. Báikire kwa mushirirya wako, bera kwêngirira mwi'hwa liuma lya michi. 2Eri'hwa, Yuta ola wámurenganyaa, ábaa àlîshi, bushi chira mango Yesu ne'banafunzi* bai bábaa bénde bábuanana aola.

3Chasinda oyu Yuta, era kuya mwe'ri ehwa àli na chikembe cha basula ala'uma ne'balanzi ba bábaa bàtumirwe ne'bakulu-kulu be'bakuhanyi* ne'Bafarisayo*. Abu bandu, bábaa bàkoresise ematara, ne'bimore, béte ne'bindu bye'kulwa nabi.

4Yesu bushi ábaa aményire mira emyasi yoshi era ingámuikira, era kuchifunda ofu na'bu basula, na ábabusa mbu: «Nde i'mwáhonda?» 5Nabo mbu: «Yesu we'Nasareti.»

Yesu era kubabura mbu: «Nyono ono.» Yuta nai, iwámurenganyaa ábaa eménze ala'uma na'bu basula. 6Mango Yesu áburaa abu bandu mbu: «Nyono ono», unao-unao bera kuenda chinyuma-nyuma, kuna kukumbaalanga.

7Yesu era kubabusa kanji mbu: «Nde i'mwáhonda?» Nabo kanji mbu: «Yesu we'Nasareti.»

8Yesu nai mbu: «Nàbabwirire mira kwa nyono ono. Na akaba nyi mwáhonda, murékaa bano nyìri nabo bàchiendere.»

9Byábaa bacha, chasiya echinwa chibérere cha Yesu ábaa átechire mira mbu: «Mwa báwanyêresaa, ndàesise chiro na muuma mubo.»#18:9 Somaa Yowani 6:39; 17:12.

10Simoni Petero ábaa éte bômbo. Era kubuhohola mwa lupota, kuna kuisha ekutu lye'kaungu* ke'mukulu-kulu we'bakuhanyi*. Aku kaungu*, esina lyai iwábaa Maliko.

11Si Yesu era kubura Petero mbu: «Hùbyaa ebômbo bwao mwa lupota! Ùteshi kwa byěmire nyirénge mwa malibuko ma Tata ábaa ányikunganyisise mira?»

Yesu áika era muhondo se'mukulu-kulu Ana

12Cha chikembe che'basula, ne'mukulu-kulu wabo, ala'uma na'ba balanzi be'bakulu-kulu be'Bayuta, kuna kusimba Yesu, na bámusalinga. 13Bera kumweka tanga era mwe'mukulu-kulu mbu i'Anasi#18:13 Anasi: Ábaa atúla mukulu-kulu we'bakuhanyi. Rero, bera kubika unji mundu akóle mwe'twe lyai. Kanji ábaa atúsa etunda linene mwa chio. , sesala wa Kayafa. Oyu Kayafa, iwábaa mukulu-kulu we'bakuhanyi* mwo'yu mwaka. 14Kanji iwêresaa ebakulu-kulu be'Bayuta eano kwa byěmire kube mundu muuma ola ungáfira elubaa lwabo loshi. #18:14 Somaa Yowani 11:49-50.

Petero áchǎkana Yesu

(Mat 26:69-70; Mar 14:66-68; Luk 22:55-57)

15Simoni Petero ala'uma na unji mwanafunzi* bábaa bàkulikire Yesu katola nyuma. Oyu unji mwanafunzi*, bushi ábaa eshíbwe ne'mukulu-kulu we'bakuhanyi*, era kwêngirira na Yesu mwa chikali cho'yu mukulu-kulu. 16Si Petero yeke era kwîmanga era butala ofu ne'lwisi. Echera chera kutuma mulikabo, ola wábaa wìshibwe ne'mukulu-kulu we'bakuhanyi* áuluka era mbuwa. Era kuhambala ne'mukasi ola wábaa wálanga elwisi lwe'chikali. Oyu mukasi, kukwera kwêngisa Petero.

17Chasinda oyu mukasi era kubusa Petero mbu: «Nau utá muuma mwa banafunzi* bo'no mundu?» Petero era kumwǎkula mbu: «Nânga, nyono nda mwanfunzi wo'yu mundu.»

18Rero, bushi mwe'si suku embeo yábaa yáhuunda busese, etuungu* ne'balanzi bábaa bàkoresise muliro, bákalukala kuo bànêmenze. Petero nai ábaa eménze ala'uma nabo, ákalukala.

Yesu átongana era muhundo se'mukulu-kulu we'bakuhanyi

(Mat 26:59-66; Mar 14:55-64; Luk 22:66-71)

19Era nyuma se'bi, emukulu-kulu we'bakuhanyi*, era kutangirisa ábusa Yesu era luulu se'banafunzi* bai, ne'ra luulu se'myasi era ábaa énjire ákangirisa ebandu.

20Yesu era kumwǎkula mbu: «Nabáa nénjire nákangirisa ebandu boshi changanama mwa mashenge* mabo, anabe no'mwa chibua che'Luhu lwa Ongo*. No'mu mu eBayuta boshi bénde bábuanana. Kanji kutáli chiro na mwasi asibya ola nàtetaa mwa bubisho-bisho. 21Rero, chátuma wányibusa? Ebandu ba babáa bénjire bômvirisa emysi era nabáa nénjire nábabura bu ùngabusise, bushi bu bàîshi kubuya.»

22Muuma mwa balanzi ola wábaa wèmenze ofu na Yesu, ômvire bacha, kuna kumumaasa, na áteta mbu: «Ku wěmire kwǎkula emukulu-kulu we'bakuhanyi* bacha?»

23Yesu nai mbu: «Akaba nàtechire bulio, ulósaa'bo. Si akaba nàtechire kubuya, chi chera chátuma wányimaasa?» 24Anasi kukwera kutuma Yesu anáchiri àminyirwe, era mwa Kayafa, i'mukulu-kulu we'bakuhanyi*.

Petero áchǎkana Yesu kanji

(Mat 26:71-75; Mar 14:69-72; Luk 22:58-62)

25Mwe'bi bihangi, Simoni Petero ábaa anáchiri emenze aola ákalukala kwa muliro. Ebandu kukwera kumubusa kanji mbu: «Eri nao utá muuma mwa banafunzi* bo'no mundu?» Petero era kuchiakana kanji mbu: «Nânga, nyono nda muuma nabo.»

26Aola ábaa àli kaungu* kauma ke'mukulu-kulu we'bakuhanyi*. Aku kaungu*, ábaa munyakabo wo'la Petero áishaa ekutu. Nai era kubusa Petero mbu: «Era! Kasi atá únalolaa'ko mango mwabáa mùli na Yesu mwe'hwa lye'michi?» 27Si Petero era kuchǎkana kanji. Unao-unao, elwaasi kuna kubika.

Yesu átongana era muhondo sa Pilato

(Mat 27:1-2; Mar 15:1-5; Luk 23:1-5)

28Ábere lwera lumbuli-mbuli, ebakulu-kulu be'Bayuta bera kukula Yesu ala mwa Kayafa, na bámweka mwa nyumba ye'Muroma Pilato, iwábaa mukulu-kulu we'chio. Si beke chiro bákêngirira'mo bushi batáhondaa kuchǎka esinga,#18:28 Kuchǎka esinga: Mwa Bayuta, mango ebandu béndee bêngirira mwa nyumba ye'ba bàteshi Ongo, béndee bába nga ba bàchâkire esinga. echera chìngatumire balikabo bábanga mbu bàtalyaa kwa biryo bye'Pasaka*.

29Bushi no'ku, Pilato kukwera kubabuana era mbua. Era kubabusa mbu: «Myasi ichiye iyatúmire mwásitaka ono mundu?» 30Nabo mbu: «Ono mundu átabaa mukosi wa mabi, tutàngamurechire ene ùli.»

31Pilato era kubabura mbu: «Mubeine mùmwêkaa múye kumuchinjibusa kukulikana no'kwa emwaso wenyu atúla àtechire.» Nabo mbu: «Tubano, tutéte eloso lwe'kuteta mbu emundu ěchibwaa.»

32Byábaa bacha, chasiya cha chinwa Yesu ábaa átechire mira chibérere, kwa kulosa kwa angáfa. #18:32 eBayuta mwa kwîta ebandu be'mabi béndee bábaumanga emakoi. Si abu bandu be'mabi, eBaroma beke béndee bêta'bo mwa kubamanyika kwa musalaba. Rero bushi eBaroma bu bêtaa Yesu, mwo'lu era kutakirwa bushi netu, mwa kumanyikibwa kwa muchi, ngo'kwa bitúla byǎnjikirwe mwa chitabo che'Bukengere bwe'mwaso 21:22-23.

33Chasinda, Pilato era kuhuba mwa nyumba. Era kwâmala Yesu na ámubusa mbu: «Woyo umwami we'Bayuta?» 34Yesu nai mbu: «Oyu mwasi wanyíbusise, eri àtengire mwa mianyisa yao, nesi banji bandu bu bakúburaa'o era luulu sanyi?»

35Pilato nai mbu: «Nyono ndatúla Muyuta! Si ebandu bo'mwa lubaa lwao ne'bakulu-kulu be'bakuhanyi*, bu bàkwânyire mwa mino sanyi! Chi waírire kasi?» 36Yesu nai mbu: «eBwami bwanyi butá bwo'muno butala. Bùngabere bwo'muno butala, ebaanda banyi bànganyilwirire chasiya ndàanyibwaa mwa mino sa bano Bayuta. Si eBwami bwanyi, butá bwo'muno butala.»

37Pilato kukwera kubusa Yesu kanji mbu: «Kukuteta mbu ùli mwami?»

Yesu nai mbu: «Si weine wàtechire mira mbu nyìri mwami! Nábutwaa na kubaha muno butala, chasiya nyínde náteta bya nyìshi era luulu se'myasi ye'kanangana. Chira mundu woshi ola utúla mwa myasi ye'kanangana, énde ányumvirisa.»

38Pilato era kumubusa mbu: «Ei myasi ye'kanangana i'yera ichiye?»

Pilato âna eloso lwe'kwîta Yesu

(Mat 27:15-31; Mar 15:6-20; Luk 23:13-25)

Mango Pilato ábaa era àtetaa ei myasi, era kuhuba kuuluka era butala, na ábura eBayuta mbu: «Nyono, ndaséne ku chiro na chinwa chisibya cha chìngatuma náchinjibusa ono mundu. 39Si kukulikana ne'myanya yenyu, nénde nábaboorera mundu muuma wa buroko chira lusuku lukulu lwe'Pasaka*. Rero, mwáhonda nyibáboorere emwami we'Bayuta?»

40Unao-unao, bera kutangirisa bálakanga na murenge munene mbu: «Nânga, tutáhonda oyu mundu, si utúbooreraa Baraba!» No'ku oyu Baraba, chábaa chihumusi.

Currently Selected:

Yowani 18: tbt

Highlight

Copy