Yowani 12

Mariya âkaba Yesu emarashi kwa bihando

(Mat 26:6-13; Mar 14:3-9)

1Mango kwábaa kwashiba suku ndatu elusuku lukulu lwe'Pasaka* luíke, Yesu era kuya mwa musi we'Betaniya. Mwo'yu musi, mu Lasaro ábaa atúla, ola Yesu ômwolaa. 2Áikire'mo, bera kumushèera ebiryo, na Marata iwábaaa wéulira'bi ebandu. Lasaro nai, ábaa àli mwa ba bábaa bálya ala'uma na Yesu.

3Chasinda, Mariya era kutola chimbi cha litere cha marashi ma chichiro chinene busese. Amu marashi, mábaa makúnganyisibwe mwa bwaso bwe'muchi we'narito oshâo. Era kumakaba Yesu kwa bihando, chasinda era kutangirisa ámahangula ne'mviri sai. Ebumba bwa'mu marashi, bwera kwêhula mwa nyumba yoshi.

4Yuta Isikariyota, muuma mwa banafunzi* ba Yesu ola wábaa ungámurenganya, era kwire áteta mbu: 5«Chi chátumaa mano marashi mátausibwa? Si maana mahatu ma tinari,#12:5 maana mahatu ma tinari: bwábaa buteya bwa kwêmba emukosi kwa mwaka woshi. mu màngafire chasiya maábirwe ebakene?» 6Átetaa bacha, atá bushi ábaa àlaire kwa bakene, si bushi ábaa atúla mwisi. Kanji oku iwéndee wálanga ehao, éndee áchitorera kwa buteya bwa béndee bábika'mo.

7Si Yesu era kuteta mbu: «Muchirékeraa ono mukasi! Aírire bacha bushi ne'kukunganya elusuku lwe'kutabwa kwanyi. 8Abu bakene, bakánaba nenyu esuku soshi, si nyono ndákabe nenyu esuku soshi!»

Elwango lwe'kwîta Lasaro nai

9Luamba lunene lwa Bayuta bera kûmva emwasi kwa Yesu àli eBetaniya. Bushi no'ku, bera kuya'yi. Batáyaa'yi kulola ku Yesu yeine, si bábaa báhonda balóle ku Lasaro nai ola Yesu ômwolaa. 10Rero, ebakulu-kulu be'bakuhanyi* bera kwire báíra elwango lwe'kwîta Lasaro nai, 11bushi iwátumaa Bayuta banene báchikula kubo, na bêmerera Yesu mwa michima yabo.

Yesu êngirira mwa musi we'Yerusalemu

(Mat 21:1-11; Mar 11:1-11; Luk 19:28-40)

12Ábere mwe'i mishangya, eluamba lwe'bandu ba báikaa mwa musi we'Yerusalemu kwa lusuku lukulu lwe'Pasaka*, bera kûmva emwasi kwa Yesu nai àli mwa njira áya eYerusalemu. 13Bushi no'ku, bera kutolanga emangarara na bátenga mwa musi báye kumuhuukasa. Bera kuenda báteta na murenge munene mbu:

«Hosana! #12:13 Hosana: Mwa Chieburaniya, hosana kukuteta mbu wíree wátununula. Somaa Saburi 86:2, Yeremiya 31:7.

Ono wěshire kwe'sina lya Enawetu iwàahanyirwe!»#12:13 Somaa Saburi 118:25-26.

Kanji i'na Mwami we'Baisiraeli!

14Yesu era kubuana chana cha punda, na ékala ku'chi, kukulikana ngo'kwa Maanjiko Mabuya-buya matúla màtechire mbu:

15«Mu'besha mwa musi we'Sayuni, mùtobaaa!

Mulólaa! eMwami wenyu ěshire,

ékese kwa chana che'punda.»#12:15 Somaa Sakariya 9:9.

16Mwe'chi chihangi, ebanafunzi* ba Yesu bábaa bàtasa kumenyereraa ei myasi yoshi. Si mango Ongo érusaa Yesu mwe'tunda lyai, bera kwire bákengera kwa kasi ei myasi yábaa yáanjikirwe era luulu sai mwa Maanjiko Mabuya-buya. Rero, kuno'ku ku bánamukoreraa.

17-18Cha chátumaa bandu banene báya kuhuukasa Yesu bacha, bushi bábaa bòmvire mira kwa iwômwolaa Lasaro mwa kunamubura mbu àtengaa mwa shinda. Na ba báchiloreraa kwe'chi chisomerano, bu bábaa bàfulirire ebandu kwo'yu mwasi mira.

19Bushi no'ku, eBafarisayo* kukwera kuburana mbu: «Ewashe! Mùtasene kwa kutáli cha mùngachiira? Si muséne kwa bandu boshi kumushémba kubamushemba!»

Yesu áteta era luulu se'kufa kwai

20Mwa'bu bandu ba báyaa kwêra Ongo eYerusalemu kwa lusuku lukulu lwe'Pasaka*, mwábaa mùli Bakiriki bauma. 21Abu Bakiriki, bera kuikira Firipo, mwesha mwa musi we'Betesaita, mwa chio che'Kalilaya. Bera kumubura mbu: «eWaliya! Twáhonda tulóle ku Yesu.»

22Ei myasi, Firipo nai era kuya kuibura Andereya. Chasinda kwa banáli babiri, nabo bera kuya kuibura Yesu. 23Yesu era kubǎkula mbu: «Rero echihangi chaíkire mira, cha nyono nyi Mwana we'Mundu* nyingérusibwa mwe'tunda! 24Kubinali, nábabura kwa enjimi ye'bulo, akaba ìtangatowera mwa lutaka na yáfa, eri ingánaendekera kushiba njimi oshâo. Si akaba ìngafira'mo, aola yera ìngeka bifuma binene.

25«Ola ùsimire ekalamo kai akáesa'ko. Si ola ukákahomba mango àchiri muno butala, yeke akálanga'ko kwa kubona ekalamo ke'suku ne'mango. 26Akaba emundu áhonda ábe muanda wanyi, byěmire anyíkulikire. Ne'chisiki cha nyingába'mo, mu nai angánaba. Na akaba emundu ànganyikorera, kuika Tata anámwerese etunda.

27«Rero, ebwenge bwanyísungulire. Chi nyitétaa? Nyěmaa Tata ànyinunule mwa myasi era yáhonda kunyiíkira mwe'chine chihangi? Nânga! Si ei myasi, iyátumaa nábaha! 28Rero Tata, uíraa esina lyao litóngwe!»

Unao-unao, emurenge kuna kutenga kwa nguba, ola wábaa wáteta mbu: «Nàtongire'li mira! Kanji nyinganálitonga!»

29Ebandu ba bábaa bàli aola, mango bômvaa kwo'yu murenge, bauma bera kutangirisa báteta mbu: «Murasano oyola.» Si ebanji beke mbu: «Malaika* iwera kuba áhambala nai!»

30Si Yesu era kubabura mbu: «Oyu murenge àtomvikere bushi nanyi, si bushi nenyu. 31Rero echihangi cha Ongo che'kuchinjibusa ebandu bobuno butala chaíkire mira. Ne'mwami wabo#12:31 mwami wabo: i'Wamusimu*. nai, kumuuma ku Ongo angámuuma era mbuwa. 32Na mango nyingěrusibwa nátenga muno butala, mu mango nyingáira ebandu boshi babáhe era mwanyi.» 33Cha chátumaa Yesu átetaa bacha, kwábaa kubalosa kwa angáfa.

34Abu bandu, bera kumwǎkula mbu: «eMwaso atúla àtukangirise mbu Kirisito* akánaendekera kuba'o esuku ne'mango! Rero, kute wera ùngateta kanji mbu eMwana we'Mundu* ěmire ěrusibwe átenga muno butala? No'yu Mwana we'Mundu*, iwera nde?»

35Yesu nai mbu: «Ola wárechire ebulangare, àchiri mwa kachi-kachi kenyu ku bihangi bieke oshâo. Rero, ne'bihangi bya muchiri mwéte obu bulangare, mundaa mwáenda mubo, emusimya angesha kubahukira. Bushi akaba emundu áenda mwa musimya, àtamenya era áya. 36Oku ola wárechire ebulangare anáchiri mwa kachi-kachi kenyu, mu mwêmereraa mwa michima yenyu, kuikira múbe bandu be'bulangare.»

Mango Yesu ábaa era àmalaa kuteta ei myasi, era kubareka na áya kuchibisha abu bandu.

Bayuta bauma bánana kwêmerera Yesu

37Chiro angaba mbu Yesu áiraa bisomerano binene era muhondo se'bandu, chiro bákanamwemerera mwa michima yabo. 38Byábaa bacha, chasiya ene myasi ibérere, era murebi* Isaya átetaa mbu:

«Enawetu! Nde ola weméreraa emyasi era twàtetaa?

Si boshi banálolaa kwa buashi bwao?»#12:38 Somaa Isaya 53:1.

39Echera chi chátumaa abu bandu bátaala kwêmerera Yesu mwa michima yabo, kukulikana ne'ne myasi Isaya átetaa kanji mbu:

40«Ongo àbauchise,

chasiya baténdaa bálola.

Abákongobanyise ne'bwenge,

chasiya bàtamenyereraa.

Akaba bìtangabere bacha,

kuli mango bànganyialukirire,

nanyi nyìngabalamise.»#12:40 Somaa Isaya 6:10.

41Isaya átetaa ei myasi, bushi álolaa kwa bulangare bwa Kirisito*, na era áteta era luulu sai.

42Si chiro bacha, banene mwa bakulu-kulu be'Bayuta, bera kwêmerera Yesu mwa michima yabo. Si baténdee bálosa changanama kwa bàmwêmerere, bushi béndee bôbaa eBafarisayo* bangesha kubakolokanya mwa mashenge* mabo. 43Bushi beke bábaa batúla basímire kunde bátongibwa ne'bandu wa kutongibwa na Ongo.

Ba bàtatunda emyasi ya Yesu bakáchinjibusibwa

44Chasinda, Yesu era kwire áteta na murenge munene mbu: «Ola wànyêmerere mwa muchima wai, atá nyêmerere nyeine oshâo, si emérere no'la wányitumaa. 45Ne'mango ànyilolire'ko, eri alólire na kwo'la wányitumaa. 46Nyono náikire muno butala nga mundu ola wàrechire ebulangare. Rero, ola wànyêmerere àtangachiba mwa musimya.

47«Si akaba emundu àngaba omvíre emyasi yanyi, kanji anáne ekuilánga mwa muchima wai, atá nyi nyingámuchinjibusa. Bushi ndaíkire muno butala kwa kuchinjibusa ebandu, si náikire'mo, chasiya nyìbanunule. 48Si chiro bacha, akaba emundu ánganyinana, anáne ne'myasi yanyi, éte ola ungámuchinjibusa. Bushi kwa lusuku lwe'businda, ei myasi nákangirisaa ebandu íikanamuchinjibusa. 49Bushi ei myasi, ndátetaa'i kwa kuhonda kwanyi nyeine, si kwa kuhonda kwa Tata ola wányitumaa. Kanji iwányiburaa bya nyěmire kunde nákangirisa. 50Kanji nyinéshi kwa Mwaso wai iwénde wáreta ekalamo ke'suku ne'mango. Bushi no'ku, chira mwasi woshi ola nénjire náteta, nénjire náteta'o kukulikana no'kwa Tata ánanyiburaa mbu nyitétaa.»

Currently Selected:

Yowani 12: tbt

Highlight

Copy