Mikolo ye'ndumwa 1

Yesu álaanya endumwa sai eMuchima Mubuya-buya

1Waliya Teofiri, mwa chitabo chanyi chibere-bere,#1:1 Echitabo chanyi chibere-bere: chìri echitabo cha Luka. Kanji anola, Luka yeine iwáanjikira Teofile. Somaa Luka 1:1-4. nàkuanjikiraa era luulu se'byoshi bya Yesu aíraa na kukangirisa kutengera mango àtangirisaa emulimo wai, 2kuikira elusuku lwérusibwaa kwa nguba. Ne'ra muhondo ěrusibwe'ko, abáa erésise endumwa sa álondolaa emiomba* kurengera ebuashi bwe'Muchima Mubuya-buya. 3Esi ndumwa, abáa énjire áchikangana era siri ku njira sinene era nyuma se'kufa kwai, kwa kusilósa kwa omwókire. Suku mane si aíraa énjire ápamukira kwe'si ndumwa na kunde ásihambalira kwa myasi era yèrekere eBwami bwa Ongo*.

4Lusuku luuma mango ábaa àbuananyire nabo, era kubachichika mbu: «Mùtafuraa kutenga mwo'no musi we'Yerusalemu, mulínjire cha chiraane Tata ábawaa, cha mwéndee mwômva nábabura. 5Mwìshi kwa Yowani mwa meshi mu éndee ábatisa ebandu. Si mu suku sieke, mubeke mungábatisibwa kwa Muchima Mubuya-buya.»

Yesu érusibwa kwa nguba

6Mango Yesu ábaa àli mwa lubuanano ne'ndumwa sai, sera kumubusa mbu: «Enawetu, utúburaa akaba mwa kano kabiri mu ungáhuba kualulira eBaisiraeli ebwami bwabo.» 7Era kubǎkula mbu: «Ekumenyerera ebihangi nesi ebyanda, kutabêrekere! Tata yeine iwábikunganyise mira mwa buashi bwai. 8Si mwabo, mango eMuchima Mubuya-buya angábandaalira, Ongo angábawa ebuashi. Bushi no'ku, mungére mwába babei banyi mwa musi we'Yerusalemu, no'mwa chio choshi che'Yuteya, ne'che'Samariya, kunaikira no'kwa businda-sinda bwe'butala.»

9Ábere era amálaa kuteta ebyera, nabo banáchiri bámutumbikisa, Ongo era kumwěrusa mwa chanya mwánameho mabo. Chiro bákachimulola'ko bushi ne'lumbumbu. 10Mango bábaa banáchiri bátumbikisa mwa chanya mu Yesu ábaa érukira, unao-unao, balume babiri bera kupamukira era muhondo sabo. Abu balume, bábaa běmbese njimba sa silángere. 11Bera kubusa esi ndumwa mbu: «Emu besha Kalilaya, chi chitúmire mwêmanga bacha ne'kutumbikisa kwa nguba? Kwo'yu Yesu era kunérusibwa kwa nguba mwa meho menyu, ku akánahuba kufuluka.»

Endumwa sálondola Matiya mwe'twe lya Yuta

12Era nyuma se'bi, endumwa sera kwire sátenga kwa ndulungu ye'Miseituni. Ei ndulungu itúla ku chilometere chiuma ne'musi we'Yerusalemu.#1:12 Ei ndulungu yéndee yámera kwe'michi ye'miseituni. Yábaa ìri ku luendo lwa lùngairwa elusuku lwe'Sabato*, bushi lwánabaa luendo lueke lwa chimbi cha saa nguma. 13Mango báikaa mwa musi, bera kwérukira mwa chumba cho'kwa ngangamo mwa nyumba era béndee bábuanana'mo. Babano bu bábaa bàli'mo: Petero, na Yowani, na Yakobo, na Andereya, na Firipo, na Tomasi, na Baritolomayo, na Matayo, na Yakobo mwenyi Alufayo, na Simoni wo'mwa chikembe che'Baselote,#1:13 Ebaselote chìri chikembe cha bandu ba bábaa batáhonda kwekala mwa bucha. Bushi no'ku, akaba kulwa, bábaa banêmerere kulwa. na Yuta mwenyi Yakobo. 14Abu boshi bábaa batúla mwa buuma na kuata bushiru mwa kwéma Ongo. Mwa kachi-kachi kabo mwábaa mutúla na bakasi bauma, na Mariya nyina wa Yesu, na balumuna ba Yesu.

15Mwe'si suku, lusuku luuma bemeresi ba bàngaika ku eyana na makunyabiri bábaa bàli mu lubuanano. Petero era kwîmanga mwa kachi-kachi kabo, na átangirisa ábura'bo mbu: 16«E banyaketu, kwabáa kunémire bya Muchima Mubuya-buya átetaa era luulu sa Yuta mwa Maanjiko Mabuya-buya, kurengera ebunu bwa Tauti binábe! Oyu Yuta, iwàhondoreraa engabo sa sayáa kusimba Yesu,#1:16 Somaa Saburi 41:10. 17kanji anábaa muuma wo'mwa luamba lwetu mwo'no mulimo wa Ongo.»

18«Rero ebikulo bya àbonaa mwa kukola amu mabi, era kuula mwe'hwa. Àba mweri'hwa mu ánakumbaliraa kafuli-bwêmbe na áchiberekera. Emyungo ye'bula bwai, yoshi yera kuhandabana. 19Besha Yerusalemu boshi bera kunômva kwo'yu mwasi. Bushi no'ku, bera kwěrika eri'hwa mwe'teta lyabo mbu Hakelitama kukuteta mbu Ehwa lye'mikira.»

20Petero era kunaendekera áteta mbu: «Bushi bacha ku bitúla byǎnjikirwe mwa chitabo cha Saburi mbu:

«‹Enyumba yai bushi ináshibaa muhaka,

bushi kutanabaa na mundu ola ukásimbula mui.#1:20 Somaa Saburi 69:26.›

Kanji byǎnjkirwe mbu:

‹Ne'mulimo àataa, kwémire unji mundu atóle'o.›#1:20 Somaa Saburi 109:8.

21-22«Rero, kwémire unji mundu muuma ola ungénde wátuasa kuhubanganyisa ebandu kwa Enawetu Yesu ômwokire. Oyu mundu, kwémire ábe muuma mwa ba béndee bákulikana netu ebihangi byoshi, mango twabáa tùli ala'uma na Enawetu Yesu, kutengera mango àbatisibwaa na Yowani, kuikira elusuku lwa àtengaa mwa kachi-kachi ketu érusibwa kwa nguba.»

23Ebemeresi bera kwire bâna masina ma bandu babiri: Yosefu ola béndee bérika mbu i'Barisaba kanji ibásulaa esina lya Yusuto, ne'wa kabiri iwábaa Matiya. 24-25Chasinda, bera kwéma Ongo mbu: «Enawetu, woyo u'utúla wìshi cha chìri mwa muchima wa chira mundu. Rero, oku Yuta aíre era ábaa ànganaire, ùtulósaa mwa bano balume babiri nde iwalóndwere kwa kukola emulimo we'kuba ndumwa mwe'twe lyo'yu Yuta.» 26Chasinjire, bera kuběshera echoore. Cha choore, kuna kusimba Matiya. Oyu Matiya, era kubikwa mwa luamba lwe'ndumwa ekumi na nguma.

Currently Selected:

Mikolo ye'ndumwa 1: tbt

Highlight

Copy