Nuk 9
9
Jisɛs ayighi Asɔgba abɛ
1Jisɛs ayighi anɛ wobo ka abá ka ɛkan ɛjɛ akɛ abɔɔ neyɔ ni ɛgɨgha ajɛ ɛfɨna ɛtab anɛ ka ɛyám biku biku. 2Ka atom abɔɔ si ama kpaŋ ɛtono Ɛsɔwɔ, afɨna atab anɛ ka ayám. 3Atɔ abɔɔ si, “Ba krɛ fɨne jiku ka nɛjɛn nni, jiku na ka ɛjom nɛyɔ, ɛbam, ɛjonɛnɛghɛ, akpugha, ɛnimɛ ji ɛyaŋa bɛji. 4Njo yiku yi ákɛ war si ɛjɔn, ba ra kaa fa tɛtɛ ɛtam ka ɛjɨbɛ ji. 5Ka ɛjɨbɛ jiku ji ɛtɛnɛ na war, ba kom nsise ka atá ayɨrɛ ba wuru, ɛsika ɛtɨŋɔ ɛbibi abɔɔ.” 6Asɔgba nya atam nɛjɛn, anɛmmɛ bɛjɨbɛ, akpaŋa nnɔbɔ ɛteb atub ɛtono Ɛsɔwɔ, ka ayighi anɛ ayám.
7Ka Ɛrɔd yɔ ajɔnɔ Nton ka Ganini ama yɔk ngana nsɔnɔ nɛgam ni Jisɛs ka Asɔgba ayɛ áne: netem ɛburɛ atubsi árɛ gbɛrɛ nɛgana nnɛ yɔ Jisɛs ajɔnɔ. Abembem anɛ asi áre Jɔn yɔ ami ru ka ɛnam; 8ka bantiŋi, asi Ɛnaija ami fɛnɛ, bantiŋi asi nnɛ ɛwi ka Asɔgba Ɛsɔwɔ ba ami kpɔkpɔ yɔ ami nyimi ka ɛnam ama nem nsɔn. 9Ka Ɛrɔd abɔmɔ ɛnɛ si, mi tɔɔ akibɛ ɛsi Jɔn, nnda nkpɛ yɔk jɛɛ ntubɛ? Ɛneɛ asɛb si ayɛ Jisɛs.
Jisɛs akɛ anɛ ɛgɔr nɛtan ka ɛrɔn ɛjonɛnɨghɛ
10Ka Asɔgba ayɛ akru ama tɔɛ kpakpa nsɔn ya abɔɔ ami nem. Akɔ abɔɔ ka nɛbrɛ́ amu ka ɛmɛɛ Bɛtsaida. 11Abembem anɛ ba agbɛrɛ atɔŋɛ. Yɛ akpere abɔɔ, afɨna akpɨne abɔɔ atub Ɛtono Ɛsɔwɔ, afɨna nem bɛji ɛkoro anɛ ba abɛnɛ ayám.
12Ka ndena nɛgo, Asɔgba wobo ka abaa ama kɔŋɛ si “Tɔɔ ɛbɨŋɔ nji ɛsama amu ka bɛjɨbɛ bi ekpere mfa ama sɛb afom bi akaa, ɛsika atɨma ayɛ ɛjonɛnɛghɛ anɛ si mfom bi ɛre na jiku ɛrem.”
13Ka yɛ atɔɔ abɔɔ si, “War ba kɛɛ abɔɔ ɛjonɛnɨghɛ.”
Abɔɔ akpɛɛ si “War ɛkpe ngbaa brɛd ɛrɔn ka nnyam anab ɛbaa kantiŋ, ɛrena na ɛmughu ɛma goó ɛjonɛnɨghɛ ji ɛbeŋe abembem anɛ mba” 14Atubsi, anɛ asisi ɛgɔr nɛtan ka ɛrɔn.
Yɛ afɨna atɔ ɛkan ɛjɛ si, “Nɔŋɔ abɔɔ ajɔn anɛ atan abaá ka wobo ka ɛbɨŋɔ ka ɛbɨŋɔ jiku.” 15Nden yi Asɔgba ami nem na, 16Jisɛs akɔ ngbáa brɛd ɛrɔn nyi ka nnyam anab ɛbaá, atab amar ka nebo, akak sam, abɛk agbaa brɛd nya akɛɛ́ anɛ ba ɛkan ɛjɛ si abaŋa anɛ kpakpa. 17Anɛ ba kprɔb anɛɛ̀ tɛtɛ ayuru, ka Asɔgba ayɛ afɨna akpo arurughu ka abik ya asasaa afɨna soón ɛtaa wobo ka ɛbaa.
Pita ajibi Nɛgana nnɛ yɔ Jisɛs áre, si áre Nninagha
18Ka nden yi Jisɛs ajɔnɔ kantiŋ akɨgha njɔm, ɛkan ɛjɛ ɛjɔnɔ ka nɛ: yɛ abɔmɔ abɔɔ si, “Anɛ ara rɨgha si mmɛ nde yɛnɛ?”
19Abɔɔ akpɛɛ́ si, Jɔn Nwuru anɛ anab; bantiŋi asi, Ɛnaija; baga asi, ɔré nnɛ ɛwi ka agbɔghamba Asɔgba Ɛsɔwɔ ya ami nyimi aru ka ɛnam.
20Ka yɛ akpeghe abɔmɔ, “Ka war ɛrɨgha si mmɛ ndé yɛɛ?” Pita akpɛɛ si, “Kɨras yɔ Ɛsɔwɔ amitom.”
21Ka Jisɛs atuú abɔɔ atɔŋ si árɛ nem nnɛ yɔku agbɛrɛ. 22Afɨna atɔɔ́ abɔɔ si, “Mmɛ mɔanɛ yɔɔ, yɔ Ɛsɔwɔ ató nɛtom, si ma yɛ nɛyiri ka mba mba yiku, abakogho ɛjibɛ, atona ba ɛjɔɔ Ɛsɔwɔ, ka ba yɛna ɛjighi ba Jus atɛnɛm ka áyonom, ka mfɨna nyimi ka ɛnumu afo asaa.”
23Ka atɔɔ́ anɛ kpakpa si “Nnɛ yɔku arɨgha na si atɔɔŋɔm, atán ntera bɛji ɛbɛ, atán ntera nsɔn ɛyiŋ, atama nɛyiri ka ɛsi ɛjɨŋa nden nden yiku, ka atɔɔŋɔm. 24Atubsi, nnɛ yɔ anɔghɔ si ánagha ɛnɛ ɛtanɛtan: ka nɛɛ yɔ akɛm na nekpen ɛnɛ, abɛbɛn nekpen. 25Atubsi, bɨgha ɛjom ɛjɔnɔ nsiŋ ka nɛbɛnɛ nsɔn ɛyiŋ, wɔ mfɔnɔ ɔkpɔ ka amar Ɛsɔwɔ? 26Atubsi, nnɛ yɔku yɔ arɨmɛ tɔŋɔ, yɔ ntɔrɔ ɛyɨŋa ɛfɨne nsɔ́n, Mɔanɛ yɔ Ɛsɔwɔ ató si ama nagha ɛyiŋ ɛtɨmɛ ɛfɨnɛ nsɔ́n ka nden yi abɨgha ka nɛgam ɛnɛ, ka bi Nsɛ, ka bi afɔfɔm ba asɔn ateb abɛ. 27Ka ntɔ war ɛdidɨghɛ, bantiŋi ba áyim mfa akpɔghɔm ka ayɛ ɛton Ɛsɔwɔ.”
Nɛgam ka ɛgon
28Ɛnumu afo anɨghanɛ, Jisɛs akɔ Pita, Jɔn ka Jems amu ka ɛgon si ama kak njɔm 29Ɛsika ara kak njɔm, ɛsiamar ɛjɛ ɛyaŋa, nsɔn yi ayɔbɔ ɛbar kɛtiŋi tiŋi ɛfɨnɛ ya na ka ngonó nsan. 30Ákpɛ bribri, ara yɛɛ anɛ abá, Mosɛs ka Ɛnaija ka abara bɛ nimɛ arɨgha ntɔrɔ ka nɛ. 31Arɨgha atub nɛku ɛnɛ ni akpi ma kpɔ ka Jɛrusanɛm. 32Amar ara yɛbɛ Pita ka anɛba ajɔnɔ ka nɛ, ka nden yi ányimi, ayɛɛ nɛyɨgha ni Jisɛs ara ya, ka anɛ abaaba ayim ka nɛ. 33Nden yi anɛba ájimɛ nɛtɨmɛ asig Jisɛs, Pita atɔɛ si “Ntaa, ɛnɔnɔb yi ɛbá na mfa. Nɔŋɔ war ɛsi ɛkpikpa bɛsaa, ɛkia ɛjɨi, ɛkɛ Mosɛs ɛjɨi, Ɛnaija akru kɔ jika” (arɛ gbɛrɛ ji arɨgha rag na.)
34Ɛsika akpɨgha rɨgha na, ɛrɨbɛ ka nɛbo ɛmi bɨno abɔɔ. Nɛyɛɛ ni Asɔgba ba ayɛ ɛrɨbɛ ji ɛbɨno anɛba abaa, mfom akub abɔɔ. 35Ábeeŋe aru ka nɛbo si, “Mɔɔ ɛwɨŋa yɔ mmi yighi yɔ nna: ba yoŋo atɔŋ kɛɛ” 36Ɛsika ntɔrɔ nyi agɔɔ, ara yɛɛ Jisɛs kantiŋ. Nnɛ nnɛ yɔku ara bɨno nnyɔ, árɛ tɔ nnɛ yɔku titi ɛjom ji abɔɔ ayɛɛ.
Jisɛs atab mgbɔgha mgbigbɔghɔ
37Ɛtɔŋɔ ɛfo, ka nden yi abɔɔ asɨnɛ ka ɛgon, ntakpa ɛbɔŋo ɛma kɔŋɛ. 38Nnɛ ɛwi ka ɛbɔŋɔ abeŋe, “Nkpikpɨne, nagha mɔɔ ɛwɨŋa, si mkpe yɛ kantiŋ. 39Ajɛ amiɛ bom mgbigbɔghɔ yi ɛre neɛ agbɔ atiri nyɔn nyɔn nyɔ́n ka mfán ka nnyɔ ka abeŋe. Ɛkpɛɛ yon atubsi ɛrɛ jɔnɔ tɛtɛ ka ɛsighɛ abɔɔ. 40Ngɔrɔ́ ɛkan ɛja si atabɛ ka árɛ maa.”
41War ɛre bɨgha nɛgana anɛ yi ɛrɛ jɔnɔ ɛkɨno netem ka nɛyɔ Ɛsɔwɔ. “Nkaa ɛrab mbaa naŋ ka ɛgbɛrɛm? Ba ŋga ka mɔɔ ɛwa.”
42Ɛsika mɔɔ nyɔ aboo si abá, ɛjɛ bi ɛfɨnɛ tubɛ ka nsise ka ngbigbɔghɔ. Jisɛs akáma nnjɛ nyi, bɛji ɛkoro mɔɔ nnyɔ ka akɔɛ akɛ nsɛ. 43Nɛgana nɛyɔ ni Ɛsɔwɔ atɨŋɔ ɛkpɔ anɛ kpakpa bɛji.
Ɛsika anɛ akpɨgha arɨgha atub ngana nsɔn yi yɛ ane, yɛ akpeghe atɔ ɛkan ɛjɛ si, 44“Ba yoŋɔ atɔŋ ka ji mkpi war tɔɔ: anɛ akpi ma agoro Mɔanɛ yɔ Ɛsɔwɔ ató akɛ anɛ ba ɛjiŋ” 45Ka ji arɨgha ɛrɛ jibi anɛ ba ɛkan ɛjɛ. Árɨgha ka ɛkak ka ɛkak kasɔŋ abɔɔ árɛ gbɛrɛ, ka mfom ára kubu abɔɔ árɛ sab abɔmɛ.
46Asɔgba ajam nɛfaba atɛm atub nnɛ yɔ ajɔnɔ ka ɛsi. 47Ɛsika Jisɛs até nkater abɔɔ, abiŋ ma mɔnsɛ ayimɛ ka ngbaŋa. 48Ka atɔ abɔɔ, si “Nnɛ yɔku yɔ akpere, afɨna anagha mɔnsɛ nna ka mbiŋ ɛyɨŋa, ákperé mmɛ, ka nnɛ yɔ akperem, atɨma akperé nnɛ yɔ atóm. Atubsi, nnɛ yɔ war ɛbri si awiri wiri yɔ agáa faŋ.”
49Jɔn abɔmɛ si, “Ntaa, ɛyɛ nɛɛ yɔ ara kama ajɛ ka mbiŋ ɛya, ɛnɔk si ɛgbaŋɛ atubsi áyɔbɔm ka ɛbɔŋɔ ɛjɨrɛ.”
50“Ba krɛ yɛ gbaŋa, atubsi nnɛ yɔku yɔ árɛ jɔn nnɛ ɛjiŋ ɛwa áyim ka na.”
Ɛjɨbɛ Samariya ɛtɛn Jisɛs
51Ɛsika nden kpere yi Jisɛs akpi kru ka bɛsɔ, yɛ atoŋo bɛji ɛsika amughu Jɛrusanɛm. 52Atom ba ateb ateb si agbɔ mbaa ka ɛjɨbɛ ji ka Sameriya ama toŋo mfom anɔŋɛ; 53ka anɛba ɛjibɛ ji atɛnɛ atubsi agbɛrɛ si asiŋi amu Jɛrusanɛm. 54Nden yi ɛkan ɛjɛ, Jems ka Jɔn, ayɛɛ ɛnyɛɛ ji, abɔɔ abɔmɔ, “Ntaa, ɛtom ngono bɛso ɛma rɔbɔ abɔɔ?” 55Jisɛs akpeghe áyama abɔɔ si naŋ ka arɨgha na. 56Ka atam ka Asɔgba ayɛ amu ka ɛjibɛ jintiŋi.
Ji ɔnee ka ɔtɔɔŋɔ Jisɛs
57Ɛsika amughu na ka mbaa, nnɛ atɔɛ si “Mkpi nam ɛkan ɛja nnda tɔŋa ka mfom mfom biku bi ɔmuu.”
58Jisɛs akpɛɛ si, “Akponya akpe abe ya ara kaa, nsisɔk abɛn bɛjo abɔɔ, ka Mɔanɛ yɔ Ɛsɔwɔ atɔ́ nɛtom akpem mfom bi akaa.”
59Ara kpeghe atɔ nnɛ yɔntiŋi, “Tɔŋɔm”.
Nnɛ nyɔ ara tɔɛ si, “Ntaa, nɔŋɔ mmu ma ntɨghɔ sam nsɔjɨŋa.” 60Jisɛs atɔɛ si, “Nɔŋɔ akuanɛ asam bɛji abɔɔ, ka wɔ sɔŋ tebe anɛ ɛtono Ɛsɔwɔ.”
61Nnɛ yɔntiŋi atɨma atɔ Jisɛs si “Ntɔŋa tɔŋɔ, ka nɨŋɔ mma ntɨghɔ kag anɛ ɛbɨŋa nnyɔ.”
62Jisɛs afaŋɛ si “Nnɛ yɔku yɔ afɨne ɛro si abɔmɔ ɛgbɛ ka akpeghe abri ka njam amam anem nɛwɛmɛ ni ɛton Ɛsɔwɔ ɛsɛbɛ.”
Currently Selected:
Nuk 9: NDD-011
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
