Nuk 17
17
Jisɛs akpine atub nɛ ne abibia nsɔn, ɛkɨnoamar, ka nɛtom nnɛ nnɛ
1Jisɛs atɔ ɛkan ɛjɛ: “Nsɔnɔ nɛgara ɛrɛba ba ka ɛjɔnɔ ɛbibi ɛkɛ nnɛ yɔku yɔ ane nsɔn nyi ɛba. 2Ka ɛnɔbɔ nɛkinɛ abɔɔ nnubua nɛtan atub ka aya ɛga abɔɔ nɛ ne abɔnsɛ agbɔ ka nɛgara. 3Ba baaba ninɨrɛ.
“Arena yi ɛkɨno ɛja ji nnom, si ji ŋkaa agbɔ nɛgara ɛna, yama; ka amɨna yaŋa, tam sɨghɛ. 4Aragasi agbɔa nkpɛnɛ ɛsimma ka ɛfo, afɨna ama gɔra nkpɛnɛ ɛsimma si ‘Mmi yaŋa,’ ɔtɨmɛ ɔsighɛ” 5Asɔgba abɛ atɔɛ si Ntaa, kpɛnɛ war ɛkɨnoamar! 6Ntaa akpɛ, “Ɛkpe na ɛkɨnoamar ji ɛwiri na ka mogha nduk. Mok ya awiri aga nduk, ɔmama ɔtɔ ntakpa ɛte nji ka arɔg si, ‘Ɛmɛnɛ ɛma mɛɛ ka aya,’ ɛtimɛ ɛjɔn ka ɔrɨgha.
7“Kɔ si nnɛ ɛwi ka ɛbɨŋɔ ɛja akpe mɔanjo yɔ abɨmɔ ɛgbɛ ka yɔntiŋi ababa ɛjɔɔ. Yɛ atɔtɔ mɔanjo nyɔ yɔ kru ɛgbɛ si, ‘Ba ba jɔn nji ɔnɛ ɛjonɛnɛghɛ?’ 8Yɛ atɔghɔm mɛtɔ si, ‘Naam ɛjonɛnɛghɛ ɛjɨŋa ɔkɛm ka wɔ otoŋo bɛji ɔjɔnɔ brim mmɛ ntɨghɔ nɛ ka mɨna kan wɔ ɔnɛ ka ɔwɔ jija?’ 9Nsɛnjo akɨgha kak mɔanjo sam ka nden yi yɛ ane ji atɔɛ si anem? 10Ɛtɨmɛ ɛre ɛkɛ war titi si, ɛmɨna nem kpakpa ji atɔ war si ɛnem, ɛrɨgha si, ‘War ɛre abɔanjo ba árɛsi; ɛtɨmɛ nem ji ka ane.’ ”
Jisɛs atab anɛ wobo ká ábini
11Ɛfobi, ɛsika Jisɛs ára mu Jɛrusanɛm, asiŋi ka ɛfaba Sameriya ka Ganini. 12Ɛsika akpere ɛjibɛ ɛjɨi, anɛ wobo ba ayá abini akɔŋɛ. Áyimi dɨghadɨgha 13abéŋe “Jisɛs, Ntaa, bri war ɛkpɔghɔsi!” 14Ɛsika Jisɛs ayɛ abɔɔ, arag si, “Ba sɔŋ tɔŋɔ ba Jus ka ba ɛjɔɔ Ɛsɔwɔ bɛji ɛbrɛ ka ɛre.” Ɛsika amu, abini akan. 15Ɛwii ka ɛbɨŋɔ abɔɔ átɨma ayɛ nna ka bɛji ɛgbinɛ fɔm, afɛnɛ frifri, ka ayighi Ɛsɔwɔ gbogbo. 16Agbɔ anɔŋɔ ka atá Jisɛs, akɨghɛ sam ka ji ane akɛɛ, yɛ aru Sameriya 17Jisɛs abɔmɔ, “Árɛ jɔn anɛ wobo ba bɛji ɛkoro abɔɔ? Baga asimawobo ma? 18Nnɛ yɔku arɛ fɛnɛ ama yighi Ɛsɔwɔ ɛrɛsiŋ yɔmfa yɔ áre njɛnannɛ?” 19Ka akpeghe atɔɛ, “Tam sɔŋ; ɛkɨno amar ɛja ɛmi nem bɛji ɛkora.”
Jisɛs akpɨne atub ɛton Ɛsɔwɔ ji ɛkpi ba
20Nden ɛyi, yi ba Farasi abɔmɛ nden yi ɛton Ɛsɔwɔ ɛbɨgha, Jisɛs akpɛ abɔɔ si, “Nɛbɨgha ɛton Ɛsɔwɔ ɛrem ɛjom ji ayɛ ka ámar, 21ka anɛ amam arag si, ‘Yigha jijɛ ŋga kasɛ yigha jijɛ ga’ atubsi ɛton Ɛsɔwɔ ɛre mfa ka nɛwɛmɛ ɛnɨrɛ.” 22Ka atɔ ɛkan ɛjɛ, “Nden arɨgha bɨgha yi ɛfana war si ɛyɛ ɛfo Mɔanɛ yɔ Ɛsɔwɔ akɨno, ka yɛm. 23Anɛ átɔ war tɔɔ si, ‘Yigha yɛ ga!’ Yintiŋi, ‘Yigha yɛ ŋga!’ Ba krɛ ɛbɛ ɛtɔɔŋɔ abɔɔ. 24Atubsi ɛfo bi Mɔanɛ yɔ Ɛsɔwɔ akɨno ɛjɔnɔ nna ka nsan, ya atɨgha amɔnɔ nɛbo kprɔb, jam ka nkɔ ɛyii asi ka nkɨnɛsi. 25Ka yɛ ágbɔghɔmba áyɛ nɛyiri ka ɛtiŋitiŋi ka ɛyiŋ nji ɛtɛnɛ.
26“Ɛsika ɛjɔnɔ ka ndena Noa, na yɔ ɛtɨma ɛjɔn ka afoa Mɔanɛ yɔ Ɛsɔwɔ akɨno afɛ̀nɛ̀. 27Anɛ ára nɛghɛ ka áwɔghɔ, ka ane mban tɛtɛ ɛsi ɛfo bi Noa animɛ ka ɛgbaa. Ka nyɛ́n aba ama nsɔn abɔɔ kprɔb.
28“Ɛtɨmɛ ɛjɔn na ka ɛfo Nɔt. Ánɛ ára nɛ ka áwɔghɔ, ágo ka agóro, ábɨmɔ ka ásɨghi. 29Ka ɛfo bi Nɔt áru ka Sodom, ngon ka atana nsan aru ka bɛsɔ nna ka anab ara nɨgha, ama yon abɔɔ kprɔb.
30“Ɛtɨmɛ ɛjɔn na ka ɛfo bi Ɛsɔwɔ ájibi Mɔanɛ yɔ yɛ akɨno. 31Ka ɛfo bifa nnɛ yɔku yɔ nɛbɛnɛ ɛnɛ ɛre ka naa njo yɛ akomo ka nɛbɨno árɛ mu si ama kɔ nsɔn ɛyɛ. Áraga si nnɛ yɔ áre ka ɛgbɛ árɛ fɛnɛ si ama kɔ ɛjom jiku. 32Ba gbɔnter ji ɛru ɛkɛ ŋkaa Nɔt.#17:32 Ŋkaa NɔtAyaŋa nɛtan akaŋ ka nden yi árɛ yɔk nɛnɛ Ɛsɔwɔ 33Nnɛ yɔku yɔ anɨghɔ si abába nekpen ɛnɛ ɛtanɛtan, ka nnɛ yɔ asighi abɔ ka nekpen ɛnɛ akɛ Ɛsɔwɔ, yɛ yɔ abɛnɛ nekpen. 34Ba yoŋo atɔŋ, ka ɛnokon ji anɛ abaa anɔŋɔ ka ɛsimi ɛjii; ntono ɛwii asa ɛwii. 35Abakaa abaa ára gɔg nsɔn ka mfo bi, ntono ɛwii asa ɛwii 36Abanom abaa ajɔnɔ ka ɛgbɛ; nkɨghɔ ɛwii yɔga ásaa.”
37“Ntaa, ka faŋ?” Abɔɔ abɔmɔ.
Jisɛs akpɛ abɔɔ si, “Mfom bi nkuannɛ anɔŋ, fa yɔ atɛrɛ ára gbaa.”
Currently Selected:
Nuk 17: NDD-011
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
