Nuk 13

Yaŋa nɛwɛmɛ kasɔŋ ɛrɛkpɔ ɛtan

1Anɛ bantiŋi ba ajɔnɔ fa atɔɛ atub anɛ ba Ganini ba Panet ató anɛ ba akpakaŋ abɛ si ama yon, ka ara kɔŋɔ abɔɔ áyon ka njoa njɔm ɛsika ara ajɔm Ɛsɔwɔ. 2Jisɛs akpɛ abɔɔ si, “Ɛkɨnoamar si anɛ ba Ganini mba ba áyono ka nɛyiri na ane abibia nsɔn aga anɛ ba árɛ yon? 3Na saŋ, ka war titi ɛrena yaŋa netem ɛgɔ abibia nsɔn, ɛtɨmɛ kpɔkpɔ 4Kasɛ ɛkɨnoamar si anɛ nɛko ka asaa ba njo agbɔɔ ayón ka Sinom abɨbi agá anɛ baga ka Jɛrusanɛm? 5Na saŋ, ka ɛrena yaŋa nɛwɛmɛ war kprɔb ɛtɨmɛ kpɔkpɔ.”

6Afɨna atub nɛgana si, “Nnɛ ábɨmɔ ɛte ji ɛ́rɛ ka akaab ka ɛgbɛ ɛjɛ, ka nden yi amuu si ama bɔŋ ára yɛɛ si ɛrɛ kaab. 7Ára tɔɔ mbaba ɛgbɛ si ‘Mmi ba mfa ka nnya ɛsaa ya asiŋisiŋ si mma mbɔŋ akab ɛte nji, ka nkab yiku ndɛyɛ. Gbak tub, ɔja ka arɔg arɔg; ɛjɔnɔ fa ɛkɔ mfom ka nɛfa?’

8“Ka mbaba ɛgbɛ akpɛɛ si, ‘Nnɨŋɔ ɛkpɛgara ka nya ɛyi, Ntaa, mmɛ mmbu nsise nsibi, nkak nsɔn yi ka ɛneɛ anɔb. 9Ɛkaba na akab nnya wɔɔ, ɛnɔnɔb, ka ɛrena kaab, ɛgbak ɛtub.’ ”

Jisɛs ataba maŋka yɔ akpukɔŋ ka ɛyaam ka Ɛfo-Ɛsiayɔ

10Jesus ará kpɨne ka Ɛkɔnɔ ba Jus ka Ɛfo-Ɛsiayɔ. 11Ka maŋka ɛwi ajɔnɔ fa yɔ ɛbibi ɛtughu ɛmiɛ bo ɛyaam ka nya nɛko ka ɛsaa; akpunkɔŋ ji ami nɔk si ɛtini árɛ maa. 12Ka nden yi Jisɛs ayɛɛ, abiŋɛ atɔɛ si, “Maŋka, mmia yighi ka ɛyaam mbi” 13Akɔ abɔanyɛ akono maŋka nyɔ, fifa fifa njam atini, ára jam nɛkɨgha Ɛsɔwɔ sam.

14Ka nton ɛkɔnɔ Jus asak netem si ɛgbɔnaŋ ka Jisɛs ane bɛji ɛkoro nnɛ ɛyam ka Ɛfo-Ɛsiayɔ, ɛtɔŋɔ fa yɛ atɔ anɛ ba ájɔnɔ fa si, “Ɛkpe afo asɨghasa ya ɛre ne ntom, ba ba nem beji ɛkoro war ka afo nya, ka ɛfonjɔm bi ɛrɛ ɛsiayɔ saŋ.”

15Ka Nton akpɛɛ si “War ba ɛrɨgha nkam ɛnem mkam! War saŋ ka ɛwi ɛwi ɛrɛ́ fɔŋɔ ɛfɔŋ ka ɛbon ɛbrɛ ɛton abɔɔ ɛma kɛɛ anab ka Ɛfo-Ɛsiayɔ? 16Ka ɛrɛ nɔb si ɛfɔŋɔ maŋka nyɔ ka Ɛfo-Ɛsiayɔ, mɔ Ebragham yɔ Nton-ajɛ amiɛ tugu ka nya nɛko ka ɛsaa ka ɛyaam?”

17Nsɔn afɨne anɛ ba ɛjiŋ ka ntɔrɔ yi arɨgha; ka abembem anɛ baga ayɛbɛ netem ka atiŋa nsɔn ya ami nem.

18Ɛtɔŋɔ fa yɛ arag si “Ɛton Ɛsɔwɔ ɛfɔŋɔ jɛɛ? Mfá ŋgara ka bɨgha ɛjom? 19Ɛre nna ka mɔg akɔŋɔdɔr yi nnɛ abɨmɔ ka ɛgbɛ ejɛ; ɛme ram tɛtɛ ɛyaŋa ntakpa ɛte yi nsisɔk ɛrɛ sighi bɛjo ka ája.”

20Akpɛ bɔmɔ, “Ngara jɛɛ ka ɛton Ɛsɔwɔ? 21Ɛre nna ka ɛjom ji ara kɨgha ka brɛd kasɔŋ átoó ji maŋka akɔɔ aburu ka ɛbembem ábughu tɛtɛ ɛyɛnnɛ ka mgba nyi ɛneɛ atoó.”

Nnyama mbu

22Ka Jisɛs ajen ka asisɔk ka bɛjibɛ akpɨne anɛ ɛsika ára mu ka Jɛrusanɛm 23Nnɛ ɛwi abɔmɛ si, “Ntaa, ɛjɨgha anɛ kantiŋ ba áfɔrɔ?”

Átɔ abɔɔ, 24Ba nyɔghɔ war ɛnam ka nnyama mbu bi si abembem anɛ anɔghɔnɔk si anam ka amam. 25Mfɔna njo amɨna tam ama gbaŋa mbu bi, ɔsa ka nina ɔra gbak mbu ka ɔgɔrɔ si, “Ntaa, jibi mbu kɛɛ war.”

“Ka yɛ akpɛa si, ‘War nnyim ka mma mgbɛrɛ mfom bi ɛru.’

26“Nden nyi ɔrɔ rɨgha si, ‘Ɛjɔnɔ na ka na, ka ɛwɔghɔ ka na, ka nden yi ɔra kpɨne anɛ ntɔrɔ Ɛsɔwɔ ka asisɔk ayɨrɛ.’

27“Ka yɛ ákpɛ si, ‘Nntɔa si, war nnyim ka mma mgbɛrɛ mfom bi ɛru. Ruum ka ɛsiamar, ba anea abibia nsɔn!’

28“Ɛren ka nɛyiri ɛjɔjɔn ɛmina yɛɛ Ebragham, Asik, ka Jekɔb kpɛnɛ ka Asɔgba Ɛsɔwɔ ka ajik ka ɛton ɛbɛ, ára yighi war atub ka nina. 29Anɛ aru ka ɛja jiku jiku ka ɛyiŋ aba ama kɔ nji abɔɔ ka ɛyighi ji ɛtono Ɛsɔwɔ. 30Nsiaa, abembem anɛ ba ákɨnɛjam ayáŋa agbɔghɔmba, ka agbɔghɔmba ayáŋa akɨnɛjam.”

Ɛya nɛtem Jisɛs ɛkɛ Jɛrusanɛm

31Fifa fifa ba Farasi bantiŋi amu ama kɔŋɔ Jisɛs atɔɛ si “Ru ka ɛjibɛ nji sɔŋ ka mfom bintiŋi si Ɛrɔd asɛbɛ si ayona.”

32Yɛ atɔ abɔɔ si, “Ba sɔŋ tɔ ɛkponya ji, ‘Mkpɨgha nkama abibia atughu ka nne beji ɛkoro anɛ ɛnɛ ka ɛwana, ka ɛnumu afo asaa yɔ nkɨnɛ ka nɛtom ni nda nne.’ 33Ɛru naŋ naŋ, mkpigha ne ɛnɛ ka ɛwana ka afo abaa, ka ɛdidɨghɛ ɛsɔgba Ɛsɔwɔ jiku ɛkpɔghɔm ji ɛrɛ jɔn ka Jɛrusanɛm!

34“Jɛrusanɛm, Jɛrusanɛm, war ɛre yono asɔgba Ɛsɔwɔ, ɛtubu anɛ ba Ɛsɔwɔ atoo akɛ war ataan, ɛrɛ kɔrɔm si ntuu abɔɔ ba nkak ka akpɔŋkpɔŋ nna ka nkɔk ára bɨno abɔɔ ɛbɛ ka ɔrɨmɛ tama. 35Ɔyɛyɛ, ɛjibɛ ɛja ɛmi gbɔ. Ntɔa si mɔkpimɛ yɛɛ tɛtɛ ɔrag si ‘Ɛnɔnɔb ɛkɛ nnɛ yɔ abaa ka mbiŋa Ntaa.’ ”

Currently Selected:

Nuk 13: NDD-011

Highlight

Copy