Luk 6

Jɪsɔs gbalɛ shingɛ ɛfongɔ ɛragɛ ɛku Aju

(Matiyu 12.1-8; Mak 2.23-28)

1Ɛfong ɛragɛ ɛku Aju, Jisɔs jɔ shingɛ gɔ ɛgbɛ akǝl ashak. Batɔtɔnɔ ɛbɛ jɔ ya ashak akǝl jɔ foro gɔ abɔ li.

2Afarasi nyandige kim babɛ Jisɔs rɛ, “Jɛn ji wangɛ batɔtɔnɔ ɛba nkpe lime ji njang ɛnyarɛ tɔngɔ rɛ ɛkǝjɔ lim gɔ ɛfong ɛragɛ ɛku Aju?”

3Jisɔs kim fangɛ bɔ rɛ, “Wan nkǝ longalong ji Defid lime nɔ ɔji yɛ na anɛ ɛbɛ njal yamɛ bɔ a? 4Ayɛlɛ gɔ ɛtak gɛ Ɛshɔwɔ, tab ɛbrɛd ji bɔ folo ka Ɛshɔwɔ, li, tɔb fagɛ ka anɛ ɛbɛ. Njang ɛnyarɛ tɔngɔ rɛ nɛ awɔngawɔngɔ ki li ɛbrɛd jiɔ shingim njɔmanjɔm Ɛshɔwɔ.”

5Jisɔs kɔrɔɛshi ntɔng rɛ, “Mɔna Nlolom wɔ le Nshɔ nfɔnɔ ɛfong ɛragɛ ɛku Aju.”

Jisɔs lime nɛ nɔ lɔngɔ ɛbɔ nɔb ɛfongɔ ɛragɛ ɛku Aju

(Matiyu 12.9-14; Mak 3.1-6)

6Gɔ ɛfong ɛragɛ ɛku Aju bǝgɔ Jisɔs jɛ gɔ ɛtak ji Aju kpejɔ wanɛ na a jɔ teb, bɛlɛ nlolom awɔng nɔ jɔlɔ ɔ nɔ ɛbɔblom milɔng. 7Batetebe ajang a Mosis bandige na Afarasi jɔ babɛ, rɛ bɔ nyen rɛjɔlarɛ akpe lime nɛ ɛyam ɛfong ɛragɛ ɛku Aju, nɔngɔ ji bɔ le shɛb ɛjom ji bɔ le lagɛ. 8Wɔ Jisɔs gbɛgbɛrɛ ji bɔ jɔ kɛrɛ, akim tɔngɔ nlolom nɔnu nɔ lɔngɔ ɛbɔ rɛ, “Ba biyimi aa gɔ ɛshishɔng.” Nlolom nɔnu mɛlɛ biyimi. 9Jisɔs kim tɔngɔ Afarasi na batetebe ajang a Mosis rɛ, “Nbab wan: ɛjom aji njang ɛnyarɛ tɔngɔ rɛ war lim ɛfong ɛragɛ ɛku Aju, ɛlime ɛbnɔbɔ afi ɛlime ɛbe? Ɛtarɛ ɛbkpene nɛ afi rangɛ ɛbkpene nɛ?” 10A kɛbɛ bɔngɔ bɔ anɛ kpɛk kpɛ, kim tɔngɔ nlolom nɔnu rɛ, “Tannɛ ɛbɔ ba.” Atanɛ ɛbɔ, ɛbɔ ɛbɛ fɛrɛ nɔb na wogowogo. 11Bɔ rag ntem bɔmɔ aju akpɔgɔ na atɛm lagɛ naji bɔ rɛlim Jisɔs.

Jisɔs Jagɛ akpɛlɛ ɛnye ɛwobo anɛ abal

(Matiyu 10.1-4; Mak 3.13-19)

12Ɛfong abɔng, Jisɔs tamɛ gɔ ɛwɔng rɛ ashɔng kagɛ ɛrɔ, a sha gɔ atu nyaa kpɛk kpɛ jɔ kagɛ ɛrɔ ka Ɛshɔwɔ. 13Ɔji fonfo ɛkparɛ nɔ, a lɔngɔ batɔtɔnɔ ɛbɛ tu ɛnɛ jag bɔ ɛwobo anɛ abal, ba alɔngɔ bɔ rɛ akpɛlɛ: 14Sayimɔn (nɔ akayɛ mbing rɛ Pita) na minyen ɛwɛ Anduru, na Jɛmshi, na Jɔn, na Filip, na Batolomi, 15na Matiyu, na Tɔmɔs, na Jɛmshi mɔn a Afayɔs, na Sayimɔn (nɔ bɔ jɔ lɔngɛ rɛ Salot)#6.15 Salot, nɛ nɔ kpejɔ tongo mfam, nɔ kpe ɛkɔrɔ ka mfam ɛnye., 16na Juda mɔn a Jɛmshi, na Judas Ɛshikarɔd, nɔ gongɔ Jisɔs.

Jisɔs lima anɛ gbalɛgbalɛ nɔb

(Matiyu 4.23-25)

17Ɔji Jisɔs badɛ gɔ ɛwɔng na akpɛlɛ ɛnye, abi yimi gɔ ɛji ji le shɛl. Ɛblɔngɔ batɔtɔnɔ ɛbɛ gbalɛgbalɛ jɔlɔ ɔ. Ɛblɔng anɛ gbalɛgbalɛ lɔngɔ gɔ ɛbjabɛ judiya kpɛk kpɛ, tabɛ gɔ Jɛrushɛlɛm, ring Tyre na Sidɔn ba le gɔ nkpɛya aya; 18Bɔ ba rɛ bɔ bowogɛ afɛrɛ lim bɔ ayam. Anɛ ba abi atɔgɔ jɔ fige bɔ ayɔ atɔb lim bɔ nɔb. 19Anɛ kpɛk kpɛ jɔ nɔgɔ rɛ bɔ lagɛ abɔ, teb ɛkɔ ji jɔ lɔngɛ gɔ ngɔbjing jɔ lime bɔ nɔb ayam.

Ɛyɛbɛbtem na ndɔn

(Matiyu 5.1-12)

20Jisɔs lɔngɔ batɔtɔnɔ ɛbɛ tɔng bɔ rɛ,

“Ɛyɛbɛbtem jɔl ka wan ba le akpak;

Teb Ɛtol Ɛshɔwɔ le ka wan!

21Ɛyɛbɛbtem jɔl ka wan ba njal nkpe yamɛ wan anu;

Teb wan nkpe wɔngɔ!

Ɛyɛbɛbtem jɔl ka wan ba nkpe lingɛ anu;

Teb wan nkpe wɔlɔ ashɔl!

22“Ɛyɛbɛbtem jɔl ka wan ba nkpiya anɛ rag, bɔ ten wan, sho wan, rɛ wan abi anɛ, kpɛk kpɛ teb Mɔna Nlolom! 23Ɛyɛbɛbtem jɔl ka wan jiɔ rɛlim, wan ban gɛrɛ, teb njijɔg a ntoro kpe shege wan gɔ ɛjabɛ ɛtol Ɛshɔwɔ. Teb nɔwɔ ba nshɔjanɛ bankol lime ba atinge ateb Ɛshɔwɔ abɛmɛ nshɔl nyaa.

24“Ndɔn le jɔl ka wan ba le afanga anɛ anu;

Teb wan nli ɛnɔb ɛjanɛ anu!

25Ndɔn le jɔl ka wan ba kpe nshɔl alɛgɛ anu;

Teb wan nle yam ajal!

Ndɔn le jɔl ka wan ba kpe wɔlɔ ashɔl anu;

Teb wan nkpe kangɛ nku nling a aling!

26Ndɔn le jɔl ka wan ɔji anɛ kpɛk kpɛ kpe gamɛ wan ɛnɔ;

Teb nɔwɔ abǝkolo bɔ jɔ tɔb bungɔ nshɔl nyiɔ lagɛ ba kime afangɛ atinge ateb.

Bɛl ɛbkɔrɔ ka anɛ ba ɛjang

(Matiyu 5.38-48; 7.12)

27“Wɔ ntɔng wan ba kpim wogo: nɔngɔ nɛ ɛjang ɛwa kɔra, lim ɛbnɔbɔ ka anɛ ba akǝjɔlabɔ kɔr, 28folo anɛ ba kpa shogo, wɔ kagɛ ɛrɔ ka anɛ ba kpa kagɛ ɛrɛm. 29Rɛjɔlarɛ nɛ ruma gɔ ɛkpɔgɔ abɔng, shingɛ ɛkpɔgɔ bǝgɔ kayɛ fufɔ; rɛjɔlarɛ nɛ kɔ ɛlamɛ njam ɛja, kayɛ ɛlamɛ atang ɛja kpɛlɛ. 30Nɛ awɔngawɔngɔ nɔ rɛlɛma ɛjom kayɛ, wɔ nɛ nɔ rɛ kɔ ɛjom ɛja, kɛ tɔng rɛ afɛrɛ tu ka. 31Lim ka anɛ naji ashɛbɛ rɛ bɔ tɔb lim ka.

32“Rɛjɔlarɛ akpe ɛbkɔrɔ na anɛ ba akpe kɔrɔ bɔ baba, jɛn ji liwang a bɛl ɛbfolo? Anɛ ba abi afɛm fufɔ tɔb kpe ɛbkɔrɔ ka anɛ ba bɔ kpe kɔrɔ bɔ! 33Arɛ lim ɛbnɔbɔ ka anɛ ba lime ɛbnɔbɔ ka, jɛn ji lijɔl nshingɛ ɛnya? Anɛ ba abi afɛm fufɔ kpejɔ lim nɔ! 34Arɛ bɔng anɛ nshɔl ba wɔ tire rɛ bɔ kpe fɛrɛ tu ka, jɛn ji liwang a bɛl ɛbfolo? Anɛ ba abi afɛm fufɔ kpejɔ tɔb bɔng anɛ ba abi afɛm nshɔl, tɔb shɛb rɛ bɔ fɛrɛ tu ka bɔ kpɛk kpɛ! 35Rɛ jɔl nɔ! Bɛl ɛbkɔrɔ ka anɛ ba ɛjang ɛba wɔ lim ɛbnɔbɔ ka bɔ; bɔng bɔ nshɔl kǝ shɛb ɛjom ajingajingɛ gɔ nfɛrɛ. Ɔwɔ a le bɛl njijɔg a ntoro, nfɛrɛ jɔl abɔnɔ Ndɛ nɔ Gbalɛ Shing. Teb rɛ yɛ kpe ɛbnɔbɔ ka anɛ ba nfung na anɛ ba abi ntem. 36Bɛl ɛbteme ndɔn na Nshɔja kpe ɛbteme ndɔn.

Kǝ lam wan anɛ

(Matiyu 7.1-5)

37“Kǝ lam wan anɛ, nɔngɔ Ɛshɔwɔ kǝ tɔb lam wan; kǝ kim ɛbe ka anɛ nɔngɔ Ɛshɔwɔ kǝ tɔb kim ɛbe ka wan; tam ka anɛ nɔngɔ Ɛshɔwɔ tɔb tam ka. 38Ka anɛ, nɔngɔ Ɛshɔwɔ tɔb ka. Gɔ ɛlɔgɔlɔgɔ, arɛ lim ɛblɔgɔ gbalɛgbalɛ ka anɛ, nɔwɔ Ɛshɔwɔ kpetɔb lim gbalɛgbalɛ ka ror fad. Ɛjom ji a kɔ nɔ garɛ ɛjom ka anɛ nɔwɔ Ɛshɔwɔ kpe tɔb kɔ garɛ ka.”

39Jisɔs tobo ɛbganɛ niya tɔng bɔ rɛ, “Nlagamar anying nim jɔ teb ntɛm mbang; A rɛ lim nɔ bɔ anɛ abalabal kpe gbɔgɔ yɛl gɔ ɛbing. 40Mɔn na nwɛr nim jɔ gbal shingɛ ntetebe ɛwɛ; wɔ mɔn a nwɛr awɔngawɔngɔ, nɔ kpele nɔbɔnɔbɔ gbɛrɛ, kpe jɔlɔ na ntetebe ɛwɛ.

41“Jɛn ji wangɛ a kpe bɔngɔ gɔ ɛbshak ni wɔb minɛ gɔ ɛmar, atɛn ɛnyenɛ ɛkute ji wɔb wɔfɔnɔ gɔ ɛmar? 42Rɛnan wɔ aletɔng minɛ, ‘Rɛ minɛya, nɔngɔ mɛ yɛga ɛbshak gɔ ɛmar,’ ɔji wɔ le kimal nyen ɛkute ji wɔb wɔfɔnɔ gɔ ɛmar. Wan anɛ ba ɛshimar njam bal! Gbɔmbang yɛge ɛkute ji wɔba gɔ ɛmar, nɔngɔ wɔ nyen nɔbɔnɔbɔ mal yɛge ɛbshak gɔ ɛmarɛ minɛ.

Ɛte na akab nya kpejɔ kab

(Matiyu 7.16-20; 12.33-35)

43“Ɛtinge ɛte lim ji kpejɔ kab abi akab, ɛbi ɛte fufɔ lim ji kpejɔ kab atinge akab. 44Ɛte fig ajingajingɛ bɔ kpejɔ lingɛ gɔ akab nya kpejɔ kab; Anɛ nim jɔ fɔgɔ nkpongɔ gɔ abingong, wɔ bɔ le fɔgɔ nju gɔ amanɛ nyɔ. 45Ɛtinge nɛ kpejɔ lim atinge nshɔl nya liyɛ gɔ ɛbtem; ɛbi nɛ kpejɔ lim abi nshɔl nya liyɛ gɔ ɛbtem. Teb rɛ nshɔl nyi wɔb nɛ gɔ ɛbtem nyanu nya nyɔ kpejɔ bung.

Shi ɛtak ɛja gɔ ɛkparr tal

(Matiyu 7.24-27)

46“Jɛn ji wangɛ akpim lɔngɔ rɛ, ‘Nshɔ, Nshɔ,’ ɔji akle ɛlimɛ ji mɛ tɔngɔ nɔ? 47Nɛ awɔngawɔngɔ nɔ ba gɔ gamɛ ɛji bǝ wongo atong gɔ alom ɛnyamɛ fɛrɛ lim naji fomo nɔ, nkpɛ tebe ɛbɛmɛ nɛ nɔ alinɔ. 48Ale na nlolom nɔ, shi ɛtak, akpa ndi rerabɛ shɛrɛ nab ɛtak ɛnye gɔ ɛkpar atal. Ɔji nyɛl ba nɔ bǝtomɛ ɛtak, ɛtak gbɔgɔm teb rɛ ashi nɔbɔnɔbɔ. 49Wɔ nɛ awɔngawɔngɔ nɔ wogo alom ɛnyamɛ kǝlim naji fomo nɔ ale na nlolom nɔ kono ɛtak gɛ ɛjɛ gɔ ndi ayongayongo kǝ shɛrɛ nab, na yɛl ba nɔ bǝrom ɛtak junu gbɔ tutu rangɛ.”

Currently Selected:

Luk 6: NBP

Highlight

Copy