Luk 20

Ebeb Abangang Ɔsa wu Jisɔs

(Mat 21:23-27; Mak 11:27-33)

1Epo yid nkeri Jisɔs ali kɔag bane wa etengebam yi nju yu Ɔsɔwɔ akwɔrag etingi nsidi. Balen ba basingag ba besingi yi bakɔag ba eben, ekpen yid yi bakonang ba mpam, aba akpɔgi we, 2Bɔ atɔ we arɔ, “Sidi sɔ, wa ɔsa wun we oli lemag nggom bifa? Nene aken we ɔsa?”

3We abɔri bɔ arɔ, “Me erɔng ting mbeb nyɔ ebeb. Sidi anyɔng me: 4Opogag mmai wu Jɔn orun wa esɔ lale ɔmɔ mine?”

5Bɔ akami yi wa erɔng eyibɔ arɔ, “Ebu sɔ etɔn sɔ erɔ, ‘Orun esɔ ɔmɔ Ɔsɔwɔ,’ we anɔngɔ obeb sɔ arɔ, ‘Ye ka nyɔ ɔkaming yi Jɔn?’ 6Ka ebu sɔ etɔ sɔ erɔ, ‘Orun ɔmɔ mine,’ bane bafa feb arobag sɔ bara, wantag yu bɔ akaming ekonekon arɔ Jɔn ale minrɔag eyammɛd yi Ɔsɔwɔ.”

7Ka bɔ abɔri arɔ, “Sɔ eji abad yi orun ɔbag.”

8Nyining Jisɔs abɔri bɔ arɔ, “Me erɔng nhɔ sidi nyɔ ebad yi ɔsa ɔma orun wu me nli lemag nggom bifa.”

Bokobi bu Baramag ba nkwɔ

(Mat 21:33-46; Mak 12:1-12)

9Nyining we ato bane osidi bokobi bufa arɔ: “Minine wud afen greb wa ekwɔ eyi, akun ekwɔ ayia ake baramag ba nkwɔ ammɔnag yi, we aloag eken wa erabaraba nten. 10Yi nten efuang ahɔsi, we afong mingban ɔmɔ baramag ba nkwɔ aka rami ebe bemei wa yi bɔ afun. Ka baramag ba nkwɔ ayin akɔ we akwud afong we atisɛm babɔ mmbɛd. 11We ahɔ fong mingban wuntad, ka wufa erɔng akwud we alang we enyi afong we atisɛm babɔ mmbɛd. 12Nyining we atisɛm ahɔ fong ɔyɔgɔ bara, ka bɔ alemi we atam we arob efi.

13“Nyining minfɔni ekwɔ arɔ, ‘Me nlemag lan? Me ting nfong mmɔn minine ama, wu anunag me, yintad bɔ ting ajegi we.’

14“Ka yi baramag ba nkwɔ arɔn we, bɔ atɔ bolom arɔ, ‘Wu fa ale minyag eko. Nungi ewoi we eli eko yi ekwɔ.’ 15Ka bɔ alɔb we ekwɔ arob efi awoi we.

“Ye nyining yi minfɔni ekwɔ alemag bɔ? 16We abag aba woi bɔ ba araming ekwɔ ayin ka ajog yi ake bantad.”

Yi bane awoging yifa, bɔ arɔ, “Ɔsɔwɔ ahɔkam!”

17Jisɔs amɔn bɔ kɔng ka abeb bɔ arɔ, “Nyining ye ele eri eyi wa yi asenging wa Botiti bu Balem ma Ɔsɔwɔ:

“ ‘Ndinda yu batɛtɛb akebing

atisɛm ale ekɔkɔb yi nju a’?

18Kpewun wu achɔn wa ndinda ayua we ting achegi bebad bebad ka wu ndinda achɔrag we ting akɔg we.”

Ebeb abangang ekerang ntɛbatɛba yu mpam

(Mat 22:15-22; Mak 12:13-17)

19Ka bakɔag ba eben yi balen ba basingag ba besingi akei nnen yu bɔ akɔrag we ebuyid, wantag yu bɔ ammai arɔ bokobi bu we asiding bole bɔbangang bɔ. Ka bɔ aren baso ma bane. 20Nyining bɔ ababag we mmɛdimmɛd, afong bane akpod we aleming ala bɔ anɔbɔnɔb. Bɔ achorag nted akɔ Jisɔs wa yi we achɔdag eruafa bɔ anungi akɔ we ake mine wu Rom wu ale ɔsa. 21Ka bakpodag ba bane bafa abeb Jisɔs arɔ, “Minkɔkɔi, sɔ eji erɔ yi we ɔchɔdag erɔng ɔkɔag ele nkeri, we chang ɔmmɔnag baso ma bane ka ɔkɔag nnen yu Ɔsɔwɔ nkeri ale ekonekon. 22Sidi sɔ, elele nkeri a arɔ sɔ etɛbag ntɛbatɛba ekerag Sisa lale ekan ke?”

23Ka Jisɔs ate bewag ebibɔ ka atɔ bɔ arɔ, 24“Tɔngi me anyɔng okpoga wu Rom#20:24 okpoga wu Rom ayenag wu arɔ dinari. Dinari yud ale yu akpeag mine wa erom yi epo yid. Boso yi mpi yu nene ale wa ɔmɔ?”

Bɔ abɔri arɔ, “Bu Sisa.”

25Ka we atɔ bɔ arɔ, “Nyining ke anyɔng Sisa bi ele bi Sisa, ka ke anyɔng Ɔsɔwɔ bi bele bi Ɔsɔwɔ.”

26Bɔ amaning akɔ we wa bi we achɔding afa wa boso bu bane, wantagi ebɔri eyi, beke beman bɔ ka bɔ afoi banyɔ.

Ebeb abangang enyimag wa Eko

(Mat 22:23-33; Mak 12:18-27)

27Nyining ebe bane ba Sadusi, ba ali tangag arɔ da bane achag anyimag ebu ala kwɔ, aban ɔmɔ Jisɔs yi ebeb. 28Bɔ arɔ, “Minkɔkɔi, Mosis asenging wa eben yifa ake sɔ arɔ ebu minine ala sɔd minkani ka akwɔ achai minkai ka mmɔn agwen, ninyen asɔdag minkai ekud awua agwe mbɔn alang ninyen wu akwɔ. 29Fafa efɔning mbɔn banyen ba banine banebara. Mindanen asɔd minkani ka aba king akwɔ mbɔn chang. 30Wu nbɔgabɔga 31ka nyining ɔyɔngɔ bara asɔd we, ka ebem ayia yid bɔ banebara akwɔ agwen mbɔn. 32Wa nkurikuri, minkani erɔng akwɔ. 33Nyining wa epo yi enyimang, we akɛmag minkai wu nene yi bɔ beri benebera bafa asɔding we?”

34Jisɔs abɔri bɔ arɔ, “Bane ba nggon yufa asɔdag erɔng akerag bɔ ebai. 35Ka bɔ ba arɔn arɔ bɔ akɔning yi akɛmag erɔng wa ndu yi boso yi wa enyimag wa eko bɔ ahɔsɔd erɔng ahɔke wa ebai, 36ka bɔ akɔngɔ kwɔ; bɔ akɛmag ala bakamag ba befong bi Ɔsɔwɔ. Bɔ ale mbɔn ba Ɔsɔwɔ, wantag yu bɔ enyimag wa eko. 37Ka kpe Mosis atɔngi jai arɔ bakoko ba akwɔn anyimi. Yi asenging abangang eyegag ekanakwɔ, mpi yu we ayening Minfɔni ale ‘Ɔsɔwɔ wu Ebraham, Ɔsɔwɔ wu Aisik yi Ɔsɔwɔ wu Jekɔb.’ 38We chang Ɔsɔwɔ wu bakoko, ka ale Ɔsɔwɔ wu mbed, ka ɔmɔ wu feb ale mbed.”

39Nyining ebe bakɔag ba eben akpei alem arɔ, “Minkɔkɔi, we ɔchɔd gɔgi!” 40Ka bɔ ahɔ kan ahɔbeb we bebeb bintad.

Ebeb abangang Krais

(Mat 22:41-46; Mak 12:35-37)

41Nyining Jisɔs abeb bɔ arɔ, “Ye ka atɔ arɔ Krais ale mmɔn wu Debid? 42Kpe Debid minfɔni atɔn wa botiti bu Bebɛn bi bakag arɔ,

“ ‘Minfɔni atɔn Minfɔni ama:

“Kɛmi wa obolom ɔma

43tata me nlem bane ba ojing agwa

esigag bako yi bako anwa.” ’

44Debid ayening we ‘Minfɔni.’ Ka elemag lan we atisɛm akɛmi mmɔn owu?”

Lesigi Abangang Bakɔag ba eben

(Mat 23:1-36; Mak 12:38-40)

45Yi bane feb ali tamag baroi, Jisɔs atɔ ba anyedag we arɔ, 46“Kodi anyɔng beke ebina yi bɔ bakɔag ba eben. Bɔ akeag aken yi berabaraba bi bewuri echobag bɔ bane akobag bɔ yi ejeg wa bekpen bi efɛn, ka erɔng betɛm bi boged wa boju bu efugi bu bane ba Ju akeag bekpen bi ejeg wa befɔg. 47Bɔ apɔag bakai ba nkud afɔdag boju obubɔ, ka bɔ asoag berabaraba bi bɔsɔm atɔngi arɔ bɔ aji Ɔsɔwɔ. Banine bafa baseni amibɔ ting ati gbɔg.”

Currently Selected:

Luk 20: NBB

Highlight

Copy