Luk 19

Sakiɔs ɔtama ntubatuba gɔmɛn

1Jisɔs kadi ɔnɔlɔ rikalɔ kɛfɨrɔ ka Jɛriko osiŋa ɔya, 2kɛkpɛna nchi odumini nwu wa yinɔ ridɨnɔ na Sakiɔs otuma. Ɔra oniretu atama ntubatuba gɔmɛn mɨnɛ ɔfaŋɔfaŋ. 3Ɔra oduga ɔchɛ oni nwu Jisɔs ɔra, gbɔ ndi okpuguru kpuguru, obi yɛ ɔchɛ mɔ rɛfɔ ndi rɛkau rɛ kɨbɛ mɔ. 4Kadi ɔtɨlɛ odulɔ ɛkparoisɔ, ɔka maŋ ra keti ka sikamɔ fɛɛ ɔya ɔchɛ Jisɔs nwu ɔra osiŋa ra kɛkpɛna achi. 5Ndi Jisɔs ɔjagɔ ra kɛkpɛna achifɛ, ɔyɛrɔ mbira mɨnɛ ɔkani mɔ na, “Sakiɔs, rɛ wɔ samana, kum ɛdɛndifa ami kɨn tumɛ ra ɛtɔ eyi.” 6Sakiɔs owulanɛ ɔrɛ, ɔwa tama Jisɔs odulɔ ra ɛtɔɛyɛn ra ɔkɨmkɨm kɛdɔmetimɔ. 7Ani fɛb mba wa chɛ bumbu wɔ jagɔ wa bɨnɛ wa mɨmana na, “Jisɔs ɔya idiwɔ ra ɛtɔa osia obia.” 8Gbɔ Sakiɔs ɔbarɔbar ɔkani Jisɔs ƆKƆKƆ na, “Dimɔ mɛ ƆKƆKƆ! Kɨn muni ifɔnɔ iyɨm kebug nyɛ rikpag, mɨnɛ abɔ njɛ oni nkaŋ, kɨn kɔrɔ mɔ ɛgbɔ ɛnaa (4).” 9Jisɔs ɔkani mɔ na, “Ɛdɛndifa, ɛnaninani ɛwɔ ra ɛtɔ nyifa, kum odumini nwufa mɨnɛ ɔra wɔna Ɛbɨraam. 10Kum Wɔna Oni ɔwɔ ɔwa dug mɨnɛ ɔnani ani mba wa bɔ lɨm ra obia.”

Rɛkanɔ abaŋa arin juu

(Mat 25:14-30)

11Ndi rɛkau reluma ratuŋ ra birɛ mbi Jisɔs ɔra ɔlama, otu bɛ rɛkanɔ mɨnɛ kum okula Jɛrusɛlɛm, mɨnɛ kum wara wa kɛra na rɛkɨm ra Ɛbɨrɔkpabi rɛnɨŋɔ wɔ ɔmɔmɛ. 12Ɔkani bɛ na: “Ɔkɨmkɨm odumini wunɛ odulɔ ɔfɨrɛtɨma kɔchɛŋɛ ɔka jɛ rɛkɨm omulɛnɛ. 13Oyinɔ arin abɛn juu (10), ɔnyɛ oniranwunɛ mbag agbuga juu (10), ɔkani bɛ na, ‘Ri chɛŋɛ karɛ ra ogbuga nwu tata nwɔ.’ ”

14“Gbɔ aniabɛn wabi fɔnɔ rɛda ramɔ, mɨnɛ wa tigɛ ani wa dulɔ kɛfɨrɔ achi wa ka kani na, ‘Rebi dugɔ odumini nwufa otumɛ ɔkɨm owul.’ ”

15Wa kɨlɔ nyɛ mɔ rɛkɨm, ɔkɨlɛ kɛfɨrɔ kɛchɛn. Kadi otigɛ wa yinɔ arin abɛn mba ɔnyɛ agbuga, wawa kɔgɛlɛ nsɔl nwu wa bosi.

16Nwu kɛrɨŋɛtɨma ɔwɔ ɔwa kani mɔ na, “Ɔkɔretu, mbag agbuga aba wa si agbuga juu (10) wa kɨla ra mba anyɛ mɛ.”

17Ɔkɨm nwɛn ɔkani mɔ na, “Ɛgafɨla, bɨrika orin! Kum asi raikpɛ ra egbigbɛd, nye wu nsɨm rɛkɨm ra ɔfɨrɔ juu (10).”

18“Orin nwuka ɔwɔ ɔwa kani na, ‘Ɔkɔretu, mbag agbuga aba osi agbuga atan (5) ɔkɨla ra mba anyɛ mɛ.’

19“Ɔkɨm nwɛn ofini mɔ na, ‘Awu timɔ rɛkɨm ra ɔfɨrɔ ɛtan (5).’

20“Orin nwuka omulɛnɛ ra retu ra mbag agbuga kɔŋŋ mba wanyɛ mɔ, ɔwa kani na, ‘Ɔkɔretu, chɛ agbuga aba, nfɨlɔ bɛ ra sad ka ɛbɔwɛ. 21Ɛrau esii mɛ ra wu ebiebi, kum awu ara oni nwu ɔjanijani, nwu otima bumbu abɔ ɔbɛn kikɛ, mɨnɛ otua ra kumka abɔ obi kpaŋɔ.’

22“Ɔkɨm nwɛn ofini mɔ na, ‘Awu kebia ka orin! Kɨn kɨbi kɛlam kechi ra remu kama redi! Agbɛra na ami oni nwu ɔjanijani, nwu otima ra kumka obi lɔɔ, mɨnɛ otua ra kumka obi kpaŋɔ. 23Igbɛ abi taa aka rɔ ogbuga owum ra ɛtɔ nyi wa wula agbuga, fɛɛ nla mbo mulɛnɛ ntama bɛ ra nsɔl?’

24“Ɔkɨm nwɛn ɔkani ani mba wa barɔ afɛ na, ‘Ritama mɔ agbuga aba, rinyɛ ɔchɛmɔ nwu ɔfɔnɔ mbag agbuga juu.’

25“Wa lamɔ na, ‘Ɔkɔretu, ɔrɨŋɛtɨma ɔfɔn mbag agbuga juu (10)!’

26“Ɔkɨm awu ofini bɛ na, ‘Nkani wun, oniranwunɛ nwu ɔfɔnɔfɔn, kɨn wa kɨla mɔ esii. Gbɔ oni nwu abɔ obifɔnɔ, tum egbigbɛd nyi ɔfɔnɔ kɨn wa tama mɔ ayɛ. 27Gbɔ anianjɨŋ abam mba wa bi dugɔ mɛ ntumɛ ɔkɨm ɔbɛ, ri wɔ ra bɛ, riwa wu bɛ nfa ɛkparoisɔ ɛyɨm.’ ”

Jisɔs ɔnɔlɔ Jɛrusɛlɛm kɛmaka ɔkɨm

(Mat 21:1-11; Mak 11:1-11; Jɔn 12:12-19)

28Ndi Jisɔs ɔkɨlɔ kani bɛ birɛ mbi fɛb, ɔlɛnɛ ɔya Jɛrusɛlɛm. 29Ndi okula Bɛdfeg akɨla Bɛtani, ra kekul nchi wa yinɔ Olif, otigɛ atɔramɔ afaa ɛkparoisɔ na, 30“Ri dɔŋ ra kɛfɨrɔ achi ɛkparoisɔ ewun, rinɨŋɔ nɔ chɛ, kɨn ri chɛ wɔna nyanya nwu wa kɨnɛ afɛ, oni tum wunɛ obɨri nɔmɔ ofirɔ. Rita mɔ riwɔ ra mɔ nfa. 31Oniranwunɛ nwu ɔbɨbo wun na, ‘Kɛra nnan rita mɔ?’ Ri kani mɔ na, ‘ƆKƆKƆ ɔfɔnɔ bumbu ɔnɨŋosi ra mɔ.’ ” 32Mba otigɛ, waka chɛ wɔna nyanya nwɛn irigirigɔ kɛmanchi ɔkani bɛ. 33Ndi wa taa wɔna nyanya nwɛn, ɔkɔkɔ ɔbɨbɔ bɛ na, “Kɛra nnan ri taa mɔ?” 34Wa fini na, “ƆKƆKƆ ɔfɔnɔ bumbu ɔnɨŋosi ra mɔ.” 35Wa timɔ mɔ wawa nyi Jisɔs, wa tɛlɛ ibɔwɛ ibɛ ekpirɨmɔ a wɔna nyanya nwɛn, wa tamɔ Jisɔs otumetumɛ mbira. 36Ndi Jisɔs ofira ɔya, ani wa tɛla ibɔwɛ ra ɛtɨma ɛkparoisɔ ɛyɛn ɔsalɔ osiŋɔ. 37Okɨlo kula ɛtɨma nyi ɛya ntɔla Kekul ka Olif, rɛkau ra atɔramɔ ndɨmdɨm rɛta kɔna ra akɨmkɨm ramu rejua Ɛbɨrɔkpabi ra agbadɨm a birɛ kɛbɛkpa mbi wa chɛ na:

38“Ɛmɔlɛmɔlɛ ɛfɔnɔ ɔkɨm nwu ɔwɔŋa ra ridɨnɔ ra Ɛbɨrɔkpabi ƆKƆKƆ!”

“Kumkafuɛɛ ra kayu arigɛ reju ra ɛkpa mbirambira!”

39Farɛsi adudu ra rɛkau wa kani Jisɔs na, “Ɔkɔgakɔga, tɛmakɛsɨb nyɛ atɔrawu mba!” 40Ofini bɛ na, “Nkani wun, wa bɔ kɨbɛ kama, rata kɨn ra kɔnɔ ra kɛkpɛna kɛbɛ.” 41Ndi Jisɔs obo kula, mɨnɛ ɔchɛ kɛfɨrɔ ka Jɛrusɛlɛm, ɔsɔ ɔbaŋa chɛ, 42ɔkana na, “Asɨna kɨn agbɛra ɛdɛndifa bumbu wɔ nɨŋɔ nye wu kumkafuɛɛ, nla agbɛra bumbu anɨŋo si! Gbɔ wa dɨb bɛ na ani chɛ. 43Kɛgbɔ kɛtawɔ nchi anianjɨŋ aba wa nɨŋo tu kɛban wa fira wu. 44Kɨn wa binɛ wu fɛb, wa wulɔ aniaba rikalɔ ridi, kɨn wa binɛ itɔ arigɛ okpuŋ itɔ owun fɛb. Kum abi chɛŋa kɛgbɔ ka ɛnaninani a Ɛbɨrɔkpabi.”

Jisɔs rikalɔ ra ɛtɔa Ɛbɨrɔkpabi

(Mat 21:12-17; Mak 11:15-19; Jɔn 2:13-22)

45Kadi Jisɔs ɔnɔlɔ rikalɔ Ɛtɔa Ɛbɨrɔkpabi, ɔka bɨnɛ oyima ani mba wara wa kula birɛ na wa jagɔ. 46Ɔkani bɛ na, Kɛlam kɛ Ɛbɨrɔkpabi kɛ kani na, “Ɛtɔ Ɛyɨm ɛra ɛtɔa nyɔm#19:46 Aisaya 56:7, gbɔ risi yɛ ɛtɔ nyi ani kayɨb wa tugala nɛ#19:46 Jɛrimaya 7:11.” 47Jisɔs ɔra ɔkɔga reyi randinɛ ra Ɛtɔa Ɛbɨrɔkpabi. Gbɔ ɔkɨm asia kɔya, akɔga ibina akɨla akɔratu kɛfɨrɔ wara wa buma wa wulɔ mɔ. 48Gbɔ wa bi chɛ kɛmanchi wa nɨŋɔ yɛ, kum ani fɛb wara wa luma ratuŋ ebiebi ra kɛlam nchi ɔra ɔkɔga.

Currently Selected:

Luk 19: Olulumo-Ikom

Highlight

Copy