Mat 20
20
Elgan ni li bade ane ba bo lake bo egbe
1“Etul bi Esowo li ana nfono egbe no tahme no efungfu atv atv, song lak ane egbe eje.#20:1 Mat 9:37 2Eji á ma lam are ane bao re á bahke kake bo nne awohng awohng nsiring elon elon efung, owo á kehm tubu bo tv go ege egbe re bo song lim eltum.
3“Eji ma rehng nkaranka esehmwubu, á kehm jeke are, song nyehn ane bamongo yim no mbol mbol, kil ejumjum lim. 4Owo á kehm tongo bo re, ‘Wahn tob songen go egame egbe, wahn song lim eltum. M bahk-n kpiki nob nob ana bo kpo kono elkpiki.’
5“Owo bo kehm tahme.
“Nfono egbe noo kehm kpe je ngare efin, fere kpe je go nkaranka era nyi elgung, tob lim ano jang jang. 6Eji ma rehng nkaranka elon nyi elgung, á kehm kpe je, song nyehn ane bako yim no mbol mbol, kil ejumjum lim. Owo á kehm tongo bo re, ‘Jen ji wahnge ń yim na yim ana efung kohro kohro, ń kil ejumjum lim?’
7“Owo bo kehm-e faange re, ‘Nnene limm, no ma-r lak eltum.’
“Á kehm tongo bo re, ‘Tob songen fvfo go egame egbe, wahn song lim eltum. M bahk-n kpiki nob nob ana bo kpo kono elkpiki.’
8“Eji elgung ba no, nfono egbe noo kehm tongo ntubesi a nlokeltum ewe re, ‘Lung aneb eltum ebame, bo ba, wo kpi bo. Gbo mbang bom goji ane ba n gohro ko bo ba, wo kehm gohro kpi ane ba n gbo mbang ko bo.’
9“Ane ba bomo eltum nkaranka elon nyi elgung kehm bake, ba ko nsiring elon elon. 10Owo ane ba, á gbo mbang lak bo kehm bake. Bo jo tiri re, bo bahke koko akpohko sehnge ane bao. Bo fvfo tob ko nsiring elon elon. 11Eji bo ma ko ano, owo bo kehm kehme elmemme tob nfono egbe noo re, 12‘Ane baa ba a gohro ko bo ba, bo limi eltum awa anyehng nya nya, wobkpi bo jang jang ana a kpi-r no, wahr ji ma nyehn erem go nfuba njul nyia efung kohro kohro.’
13“Owo nfono egbe kehm faange nne awohng re, ‘Mbi, wa n nehmem na. Nsiring elon sang wuku e lame area? 14Ko akpohko enya, wo song a nya! Anv, lꞌkor-m re me n ka ane ba gohro ba ekahlenjahm ana n ka-a no, 15anv, akpohko enyame sang n kpꞌkoko lim ana kor-m noa? Anv, a kpꞌmemme tib eji m ma wehr aboa?’ ”#20:15 Rom 9:16
16Jisos kehm gohro bung re, “Akahlenjahm bahke gboko mbang, agbokombang fere kahle njahm.#20:16 Rom 11:25-26 Ane gbalee ba bo ma lung bo, wo, abon amohk ane ntiil ba bo ma jak.”#20:16 Rom 10:21
Ana Jisos gohro bung bade elkv ene
(Mak 10:32-34; Luk 18:31-34)
17Eji Jisos jo tahm go Jeusalem, ngare nyi bo li go mbang, á kehm koko abatꞌtoono ebe, ewubu ane abal, tahm a bo go nkpohko anyehng, song tong bo re, 18“Nyehnen, anv, e kpꞌtahme go Jeusalem. Mmon no nne, bo bahk-e yake, kak atubesi abalimajom, a atꞌtibi ba atahm go ebo. Bo bahke lame elam ji bo bahk-e wulu, 19fere yak-e, kak ane baka baka go ebo, ba bahk-e nyoko, fere dv-e, kum-e go ekros. Lꞌkang nfung era, á nyahme go elkv.”
Ejum ji nnyehn Bab Jon gboongo no
(Mak 10:35-45)
20Nkal a Sibidi kehm koko abon ebe Jon, a Jems, ba a bo goji Jisos, kehm ba gong go ege alata, kehm-e gboongo re, á lub lim ejum ka-e.
21Jisos kehm-e bahbe re, “Jen ji a kpꞌsebe me?”
Á kehm-e faange re, “Ka abon ebame baa na abal nsahm, eji noko lꞌji go ega ejang eboblum, noko go ega ejang ebobkal ngare nyi a ma jol ntul.”
22Owo Jisos kehm faange re, “Ń nehme kahn ji ń kpꞌbꞌbahb. Anv, ḿ bahke ma wo go nkob nyi n yahke ba elwoka?”#20:22 Mat 26:39; Luk 12:50
Bo kehm-e faange re, “Ee, e bahke ma wo.”#20:22 Luk 22:33
23Jisos kehm tongo bo re, “Etingitingi, ḿ bahke lohko wo go egama nkob.#20:23 Elt 12:2; Ell 1:9 Me, nsahm n kpimm, nyi m bahke yehke ane, noko ji go egame ejang eboblum, noko ji go egame ejang ebobkal. Adi nyao li ka ane ba wahnge Nsoo toobo bum.”
24Abatꞌtoono bako na ewubu wuku kan ano, atahng kehm rake bo tob Jon, a Jems.
25Owo Jisos kehm lungu bo tv elne, kehm bungu re, “Ń kpꞌkahne re, atubesi ba njini nyia kpi nsahm nyi bo kpo fili ane. Ajꞌjok ane kpo tob fili ane. 26Wahn, kana jo lim ano go egahne ellong. Nne awohng awohng ewahne no lꞌseb re á jol njꞌjoka nne, á bahke jolo na nlokeltum ewahne. 27Nne awohng awohng ewahne no lꞌseb re á jol ntubesi, á bahke fere jol na nlokeltum ewahne, 28ana Mmon no nne ki ba re bo lok-e, á ba re á ba loko, fere ka elkpin ene, fak ane gbalee yake.”#20:28 Fil 2:7-8; 1 Tim 2:6
Ana Jisos limi awakamahr abal, bo nyehn
(Mak 10:46-52; Luk 18:35-43)
29Eji bo jo tahm go Jeriko asongo, ellong ane gbalee kehm tahme toono Jisos.
30Awakamahr na abal ji o nkpe a mbang. Eji bo wuku re, Jisos kpꞌbake elsehnge, bo kehm kehme elrabe re, “Mmon no Devid, nong, wahr fil-a ndon!”
31Ellong ane bao kehm sahde bo re bo rahke ewok. Bo jo kpe nyennge na rabe re, “Mmon no Devid, nong, wahr fil-a ndon, nsoo!”
32Jisos kehm yiimi, lung bo re bo ba. Á kehm bahbe bo re, “Ń kpꞌsebe re me n lim jen ka-n?”
33Owo bo kehm-e faange re, “Nsoo, lub lenng-r amahr enyahre!”
34Owo Jisos ndon kehm-e fili. Á kehm song kooro bo abo go amahr, bo kehm soro nyehn tvtv, soro tahm toon-e.
Currently Selected:
Mat 20: EKA-011
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
