Mat 15

Eltibi ni anebkul jo tib

(Mak 7:1-13)

1Atꞌtibi ba atahm, a egom Farisi jindiki kehm lohngo go Jeusalem ba goji Jisos, ba bahbe re, 2“Jen ji wahnge abatꞌtoono eba kpꞌdaange atahm nya babnsoo, tib eji bo kil jo ru abo, kehm jo li nsol?”#15:2 Luk 11:38

3Owo á kehm faange bo re, “Jen ji wahnge ń kpo daange atahm Esowo, fere kpꞌtoono eljini nꞌnahne? 4Tibre Esowo jehke ntahm re, ‘Jo kak nso, a nne!’ Nyehko kpe li re, ‘Nne no lꞌsu nde, afi jolo nnyehn, bo bahk-e wulu.’ 5Wahn kpo tib re, ‘Nne no lꞌbel ejum ji á jol kake nde ebo, afi jolo nnyehn, á lꞌfere bung re, Ejum jia li ka Esowo, kpeem li ka-e re, á kpe kak nde, a nnyehn.’#15:5 1 Tim 5:8 6Eji ń kpo tib ana wo wahnge ḿ ma range ntahm nyi Esowo, fere kpꞌtoono eljini nꞌnahne. 7Wahn aneb alum abal abal ba! Aisaya lohko nyehn enyehnamahr ji nno bada nahne, eji á bungu re,

8“ ‘Ane baa kpo kak-m go nnyo a nnyo.

Ntim ebo n wobem.

9Bo kp-m kake mbol mbol,

eji bo kpꞌtibi atahm nya ane baka baka jehke no,

nya ki li nya Esowo.’ ”

Nsol nyi kpo lim eltim nne, kꞌjol saang

(Mak 7:14-23)

10Jisos kehm lungu ellong ane tv elne, kehm tongo bo re, “Wuungen atung, wahn kahn! 11Ejum ji kpo yel nne go nnyo sang kpo lim eltim nne kꞌkpe jol saang.#15:11 1 Kor 8:8 Jio ji kpo lohng na go ege a nnyo, ji ji kpo lim eltim nne re kꞌkpe jol saang.”#15:11 Jems 3:6

12Abatꞌtoono ebe kehm bake go ege, ba tong-e re, “Anv, a kpꞌkahne re, alum nya wuku a bungu no sꞌsab Bab Farisia?”

13Owo á kehm faange re, “Eti ajehng ajehng ji Nsoo no li go ero ki bahm, bo bahke mehle na tub go. 14Yaken na yake bo go! Bo li awakamahr atubesi! Nwakamahr lꞌseb re á tib ntem nwakamahr mbang, bo ane abal abal bahke gboko na, yel go elbing.”#15:14 Rom 2:17-24

15Owo Pita kehm-e tongo re, “Tong-r ana elgan nia lohngo no!”

16Jisos kehm faange re, “Wahn fvfo, ń nehme tob kahna? 17Ń nehme kahn re, ejum ajehng ajehng ji lꞌyel nne go nnyo kpo sehng go ala, lohng go ngubjinga? 18Nsol nyi kpo lohng nne go nnyo kpo lohng-e go eltim. Nsol nyio nyi kpo lim nne, kꞌkpe jol saang. 19Tibre go eltim nne wo ebi ntir kpo lohng, a ewulane, erehbe alimi, anebkal akono, ejv avohko, ntianse efahnge, a afahnge akiimi lake ane. 20Nsol nyia ana nyi kpo lim nne, kꞌkpe jol saang. Re nne li nsol kꞌru abo, we nehm ma lim á kꞌkpe jol saang.”

Nnenkal no taame no

(Mak 7:24-30)

21Jisos kehm tahme edi jio, song rehng go ejang bi Taya, a Saidon.

22Nnenkal a Kenan awohng no lohng ejahbe jio kehm bake go ege, ba rabe gboong-e re, “Nsoo, mmon no Devid, nong, me n fil-a ndon! Mmon ewame, ebi etohko wob-e go atahng, kp-e gbiingi sehng.”

23Jisos we tikem faange.

Abatꞌtoono ebe kehm bake go ege, ba gboong-e re, “Tong-e á song. Tibre á kpꞌrabe tob-r sehng.”

24Owo Jisos kehm faange re, “Bo tum-m tv go ejoro bio bi Israel bi ma tan bi bi.”#15:24 Mat 10:6

25Owo nnenkal noo kehm ba gbo go ege alata, kehm bungu re, “Nsoo, kak-m ebo!”

26Owo Jisos kehm faange re, “Nobem re nne rod nsol alehke nyi abon, ka ebv.”

27Nnenkal noo kehm taame re, “Ee nsoo, jol ebv kpo kpiimi akahb elang nya kpo fooro ekpꞌkuru nde ebo gbo.”

28Owo Jisos kehm-e faange re, “Nnenkal, eltaame ena kpꞌgbale gbalee.#15:28 Luk 11:5-8; 18:2-8 Nong, lohko jol ana a kpꞌsebe.”

Ngare nyꞌnehm ona nyi mmon ewe noo no nkal nobo eyam bio.

Ana Jisos limi ane gbalee, bo nob

29Jisos kehm tahme edi jio, song rehng go eto jio ji Galili, kehm wahre go ewong, song ji. 30Ellong ane gbalee kehm koko aneb ayam ba a bo goji Jisos. Bandiki jolo abanne, bandiki agboodo, bandiki awakamahr, bandiki akamme. Ane bako gbalee ba jo yame ayam nyandikandiki. Bo jo ba bumu aneb ayam bao go alata nya Jisos. Á jo lim bo, bo nob. 31Jo kpo ane esi sehng, eji bo nyehne akamme kpꞌbungu, fere nyehn agboodo ma nob, fere nyehn abanne kpꞌjene, awakamahr fere jo nyehn. Bo kehm kehme Esowo bio bi Israel ellub ka.#15:31 Luk 7:16-22

Ana Jisos kpe le ellong ane nehko (4,000)

(Mak 8:1-10)

32Jisos kehm lungu abatꞌtoono ebe tv elne, kehm tongo bo re, “Ane baa ma-m fili ndon. Tibre nfung era nyi a, nyi bo ma kang a name. Anv, bo kpeem kpi ejum alehke ajehng ajehng. N nehme seb re me n yake bo, bo song njal njal. Fundiki bo bahke gboko awo go mbang.”

33Owo abatꞌtoono Jisos kehm-e bahbe re, “Gan wo e bahke tingi nsol alehke elka emahng nia, kehm leke ellong ane ana nia?”

34Owo Jisos kehm bahbe bo re, “Abon abred abik ń kpi no?”

Bo kehm-e faange re, “E kpi abon abred na asehma, kunu abon nsahre abik abik.”

35Jisos kehm tongo ellong ane bao re, bo ji go ndi. 36Á kehm rodo abon abred bao na asehma, a nsahre nyio, kehm kake Esowo saam, bakke, ka abatꞌtoono ebe, abatꞌtoono ebe kehm koko, song bak ane. 37Bo li ane kpee wohngo. Abatꞌtoono ebe kehm taare bo erik ji sa no, ruru ejeere na ebsehma. 38Aneblum ba li nsol nyio jolo ane atahltahl nkpel ewubu (4,000). Jol anebkal, a abonse, bo fangem.

39Jisos kehm yaame ane bao re bo song kehnge, kehm yele egbang, song rehng go egbuk jehko ji Magadan.

Currently Selected:

Mat 15: EKA-011

Highlight

Copy