Elt 2

Elbake ni Etingi Etohko

1Eji efung bio bi Pentikost rehnge no, bo kpee jolo edi edi ajehng. 2Tvtv ona egburu ewahl ji nnen a nnen ji lohng go elbung kehm kehme elwahle ana nfeb nyi nnen a nnen, kehm ba rur go ekpꞌkpa jio ji bo ji no. 3Bo kehm nyehne nsol ana nlikagun ma yaame na yaame, kuumu nne awohng awohng.#2:3 Mat 3:11 4Etingi Etohko kehm ruru bo kpee go atahng. Bo kehm kehme elbungu alum ajahbe nyandiki, ana Etingi Etohko jo lim bo re bo bung.

5Jus jindiki ji lene go Jeusalem, ji lohngo go ejang njini abehng abehng ba, bo jolo anoobo ane ba Esowo jo kor bo. 6Eji ellong ane wuku ewahl jio, bo kehm kame song rur, kehm kehme bo esi kpo. Tibre nne awohng awohng jo wuku abatꞌtoono Jisos kpꞌbungu go ege ejahbe. 7Eji bo ma nyehn nkpokosi nyio, bo kehm bahbe re, “Anv, ane ba kpꞌbungu a, aneb Galili sanga?

8Jen ji wahng ka nne awohng awohng ewahre kpꞌwuku alum nyao go ege ejahbe? 9Wahr lohng go Partia, ane bandiki lohng go Midis, ane bandiki lohng go Elam, ane bandiki lohng go Mesopotemia, ane bandiki lohng go Judea, ane bandiki lohng go Kapadosa, ane bandiki lohng go Pontus, ane bandiki lohng go Esia, 10ane bandiki lohng go Frigia, ane bandiki lohng go Pamfilia, ane bandiki lohng go Ijib, ane bandiki lohng go ejang Libia ji li kohlo Sirin. Ajenne nyandiki lohng go Rom, ane bandiki Jus ji, ane bandiki ane baka baka ba, ba kpꞌlimi eljini ni Jus. 11Egom ejahre jindiki lohng go Gris, ane bandiki lohng go Arebia. E kpꞌwuku bo kpꞌbungu ajahbe enyahre bade ajꞌjoko nsol nya Esowo ma lim.”

12Esi kehm kpoko bo ane kpee, amahr fere jo bil bo. Bo kehm kehme elbungu atemtem re, “Anv, elgan nsol nyia lohngo renan?” 13Ane bandiki kehm kehme bo nyok re, “Amahm ma bo ma wo kpꞌbuumu.”#2:13 Mak 3:21

Etib bi Pita tiingi no

14Pita kehm mehle yiimi, a abatiingetib bako, ewubu a nne awohng, kehm bungu wahre wahre tong ellong ane bao re, “Juda, ejahbe ejame, a wahn ji lene go Jeusalem kpee, wuungen atung, wahn wuk ji n yahke bung. 15Ane baa ana, amahm sang bo kpꞌbuumu, ana ń kpꞌtiri. Tibre anv ebrehng nkaranka esehmwubu nyi nyi, nyi efungfu.

16“Ji ma lim a, ji ji nnyehnamahr a Joel bungu no re, 17‘Esowo re,

“ ‘Go ngare esꞌkohro afung m bahke yaange etohko ejame wohngo nne awohng awohng.

Abon ebahne bahke kehme amahr nya Esowo nyehn.

Ajangkun enyahne bahke tob jol abanyehnamahr fvfo.

Anebkul ebahne bahke jo leeme alem.

18Alokeltum ebame, aneblum, a anebkal anebkal, bo fvfo m bahke tob yaange etohko ejame wohngo bo ngare nyio.

Bo bahke jo nyehn enyehnamahr ji Esowo.

19M bahke jo lim akpokosi go elbung, a ndi.

Bahke jolo go alung, go agun, a atꞌtohk nya ma sahb tꞌtehm.

20Njul bahke fere gbo ejannge,

ebareka bahke fere siingi alung,

efung bi Jehova bahke bake.

Bahke jolo egburu efung bi Esowo bahke tibi nsahm enye.

21Owo nne awohng awohng no lꞌgboongo Jehova go ege a mbing, á bahke bele eltahre.’ ”#2:21 Rom 10:13 (Ana wo Joel bungu fel.)

22Pita kehm kpe bung re, “Israel, ejahbe ejame, wuungen atung go alum nya n kpꞌbungu. Jisos ji Nasaret wo, Esowo ka-e nsahm re á jo lim akpokosi, fere jo tib nliingi go egahne ajahbe, eji ń lꞌkahn re Esowo bi tum-e no. 23Esowo go ege elkahne wo, á toobo no re á yake Jisos ka. Wahn ba jabb-e kak abi ane go ebo. Bo kum-e lake go ekros, á kpo. 24Esowo bi nyahm-e go elkv. Á yehk-e go erem bi elkv. Tibre elkv we maam kpan.

25“Tibre Devid bꞌbung bada ne re,

“ ‘Ngare anyehng anyehng n jo nyehne Jehova bad bad a name.

Á li go egame eboblum,

eji nnene lꞌki-m ma nyeenge.

26Owo wahng ka eltim jo yeb-m,

n kehme ase yim.

Afi n kpo na,

ekunukpu ejame li re, Esowo bahke tiki lim ka-m.

27Tibre a nehm yake etohko ejame sa go ndi,

go ellong akvne.

A nehm taame re mbarebara Mmon ewa bol.

28A ma-m tib mbang nyi li rehng go elkpin.

Eji a bahke jolo a name, a bahke jo ka-m eyebatahng.’

(Ana wo Devid bungu fel.)”

29Pita kehm kpe bung re, “Abonanee, n kpꞌbungu gbul gbul gbuul re, Devid nso ejahre kpꞌkpo mahne mahne, bo kpa-e kak. Elahm ebe bia, kpeke li tete sik anv. 30Tib eji á jolo nnyehnamahr Esowo, á jo kꞌkahn ji Esowo nyame tong-e re, ‘Mmon ewa wo bahke jehke go ega eti etul.’ 31Á nyehne amahr bade elnyahme ni Mesaya re, ‘Esowo we yakem, á sa woomo go ellong akvne, ekv eje bol.’

32“Jisos jꞌnehm o wo, Esowo lohk-e nyahme go elkv. Wahr kpee ba li atianse enye, tibre wahr nyꞌnyehn nsol nyio kpee. 33Bo mehl-e, song jehke go eboblum Esowo bi ka-e Etingi Etohko ana á nyame no tong-e, ji ji á ma yaange wohng-r, jꞌnehm ji ń kpꞌnyehne a, fere jo wuk.

34“Jol yefono Devid tohkem je na go ejahbetul Esowo. Á bungu na bung re,

“ ‘Jehova bungu tong ntul ewame re,

Ji a, egame ejang eboblum,

35tete n lim anebekv eba etikunakpade eja.’

36“N kpꞌsebe re wahn anebe Israel kpee, wahn sahb kꞌkahn re, Jisos jꞌnehm ji ń kum-e go ekros, Esowo m-e rod lim ntul, fere rod-e lim Kraist.”

37Eji bo wuku ana, ala kehm teele bo. Bo kehm bahbe Pita, a abatiingetib bako re, “Abonanee, anv, e bahke limi renan?”

38Pita kehm tongo bo re, “Gboon ndon go egahne abiafem, wahn ane kpee, wahn fere bel ewohngalahb go mbing nyi Jisos Kraist, eji ń lꞌbel eltahmeka go egahne abiafem, Esowo fere yar-n ka Etingi Etohko. 39Enyam bia li ka wahn, a abon ebahne, a ajahbe nya li fee, a nne awohng awohng no Jehova bahk-e lungu tv elne.”

40Pita bungu na bung bung bung, jo tong bo, fere jo kak bo erehke re, “Nobo re wahn for go erem bi bahke gboko tub abi ane baa ba li anv.”

41Ane bao ba wuku alum enye fere taame, bo ba bele ewohngalahb. Bo jolo ejum ane atahltahl nkpel esehma ane atahl awubu (3,000), ba Esowo budu no efung bio.

42Bo jo kake esi re bo kahn eltibi ni abatiingetib Jisos jo tib bo, fere jo kono edi ajehng, jo bakke ebred, fere jo kak ero.

Eljini ni aneb Esowo

43Abatiingetib Jisos jo limi akpokosi gbalee, fere jo tib nliingi. Owo wahnge nne awohng awohng jo fahl. 44Ane ba taame no soro asi, jo kono edi ajehng. Nne awohng lꞌbel ejum, fere jo jol ka bo ane kpee. 45Bo jo gungu nsol ebo, fere jo baange akpohko, jo ka nne awohng awohng ana nsol m-e lehng.

46Efung abehng abehng bo jo song wane go etahk Esowo, fere jo bakke ebred go bo a ntahk, jo li nsol ebo go eyebatahng, 47fere jo tehk Esowo. Bo jo koro nne awohng awohng.

Esowo jo kpe kpele na ane efung abehng abehng go ellong abatꞌtoono Jisos, ba jo bel eltahre.

Currently Selected:

Elt 2: EKA-011

Highlight

Copy