Luk 23

Pailet nɛ Helod otune Zisɔs

1Imbule yɛ vakʉ ɛnʉlʉ yɔɔ imem ɛmʉwa ɛsɛla, ɛtɛŋɛ za nɛ Zisɔs kɛ nɛ Pailet, sɛ átune ɔn. 2Ohee ɛwaana ɛkaŋɛ kɛ ito ɛnaghɛ ala, “Sɛ̂kolu ɔnʉmbʉsʉ wee sɛ awaa vɛnʉl vasɛvɛ ɛtɔ. Agɔlā ala sɛtaa ɔkpanɛvɛ kɛ nɛ mɛfʉwa wasɛ wʉboona ga. Âkaŋɛ kpaa ala, ɔn awʉ kɛ Klais, Mɛfʉwa wʉboona wudi.”

3Asɔ Pailet afii ɔn ala, “Owe nɛ wʉlɛ Mɛfʉwa wʉ vɛ Zu?”

Zisɔs agɔl nɔnʉn ala, “Aa, akɛ kɛ ndalɛsɛ wʉkaŋɛ.”

4Pailet âfiil kɛ nɛ vakʉ vɛ ɔsala Ofilikpamɛ nɛ imbule yɛ ɛnʉlʉ yɔɔ, akaŋɛ ala, “Mɛ̂yen ɛcɔcɔɔ ɛmɔnɛmɔ iyɛ ɔnʉl wee ayel ga.”

5Kpa ɔtɔw ŋgɛ-ŋgɛ ala, “Awaā vɛnʉl ɛtɔ kɛ ɔtɛlɛ wʉ atee, kɛ ɔtalɛ omwem wʉ Zudiya. Ahee kɛ ɛyaŋ iyɛ Galili kaka âva-bi fan.”

6Wʉ Pailet âŋgwa asɔ, afii kasɛ Zisɔs âsime kɛlɛ kɛ Galili. 7Ɔkambɛlɛ wʉ Pailet âcili ala Zisɔs âsime kɛlɛ kɛ Galili, kɛ ɛfanɛ iyɛ Helod alɛ itoghu, atɛma ɔn kɛ nɛ Helod, wʉ âlɛ kpaa kɛ Zelusalem kɛ ɔkambɛlɛ ɔnawɔɔ.

8Ikil yɛ Helod âyeni kɛ Zisɔs, kasɛva ɔn cɛŋ, kici yɛ alɛ-liye ye ɔwaa wʉ ɔn áyen Zisɔs. Âŋgwa vɛnalɛvɛ cɛŋ kɛ ito kɛɛ Zisɔs, aliye ala Zisɔs ãyeli akɛvɛ ayatavana, nɛ ɔn áyen. 9Helod afii ɔn vɛtɔɔmba isim, kpa Zisɔs agɔl ɔmɔnɛmɔ ga. 10Vakʉ vɛ ɔsala Ofilikpamɛ nɛ vɛnʉl vɛ otee obe, ocoolu fini ɛwaana Zisɔs akaŋɛ cɛŋ. 11Saŋ Helod nɛ vɛnʉl ɔnavɛ vɛ ɛta, ɔbia ɔn, oyel ɔn icwe. Oliŋgi ɔn ndalɛ mɛfʉwa, saŋ akɛ-tɛma ɔn kɛ nɛ Pailet. 12Helod nɛ Pailet ɔlɛ-zwaŋa ga, kpa kɛ ife ɛnayɔɔ ɔya vaciam nɛ valindi.

Pailet akaŋɛ ala ɔ̃yɛva Zisɔs

13Pailet ayɛla vakʉ vɛ ɔsala Ofilikpamɛ nɛ vakʉ vedivi nɛ vɛnʉl vɛ ɔswaŋɛvɛ, 14akaŋɛ navo ala, “Nɛ̂va mɛ nɛ ɔnʉmbʉsʉ wee, anu ala awaā vɛnʉl ɛtɔ. Yene, mɛ̂fii ɔn vɛtɔɔmba ŋgɛ-ŋgɛ kɛ asi ayunu omwem. Mɛ̂yen âyel ɔmanɛmanɛ kɛɛ ɛnalɛ vimem yɛ nɛvɔl yee ga. 15Masɛ Helod kpaa âgɔl, asɔ ɛnɛ akɛlɛ-tɛma ɔn kan nɛ asu. Ɔnʉl wee âyel ɔmanɛ kɛɛ nɛ ɔ̂yɛva ɔn ga. 16Asɔ mányɛmbɛlɛ ɔn, nɛ mɛ́tɛfa ɔn.”#23:16 Voŋgwe vedivi avɛ nɛ ɔlʉndʉlʉ wee, wʉ ɔkaŋɛ ala, “17 Pailet akaŋɛ asɔ kici yɛ, akɛ kɛlɛ keŋ-keŋ kɛ iyeli ivo, wʉ ásimi ɔnʉl ɔmɔɔ kɛ ɛya, kɛ ɔkambɛlɛ wʉ ɔyaa ituŋunu iyɛ Ɔyaŋgɛl.”

18Ɛyɛŋgɛ iyɛ ɛnʉlʉ iyɔɔ ɛlʉwa nɛ ɛmʉ ɛmɔɔ ala, “Kule nɔnʉn! Simi asu kɛ Balabas!” 19(Balabas nɛ vɛnʉl vedivi ɔlɛ-nɔŋgʉ wʉ vákʉŋgʉsʉ ogenyi wʉ Loma. Ayɛva ɔnʉl. Kici yɛ asɔ, ɔwa ɔn kɛ ɛya.)

20Pailet atɔw pe navo kici yɛ âliye ala ɔn átɛfa Zisɔs. 21Kpa imbule yɛ ɛnʉlʉ yɔɔ imem, ɛsaŋ ɛlʉwana gbaŋ-gbaŋ ala, “Mand ɔn kɛ ɔkʉnʉ! Mand ɔn kɛ ɔkʉnʉ!”

22Aŋgiee kɛ ɛkambɛlɛ ɛtaalɛ iyɛ Pailet atɔw navo, afii ala, “Asɔ naa? Ɔmanɛ kacɔcɔ kɛɛ fɛna ɛnɛ ayel? Mɛ̂tii ɛcɔcɔɔ iyɛ ayel iyɛ mákaŋɛ mɛla ɔ̃yɛva ɔn ga. Asɔ mányɛmbɛlɛ ɔn, nɛ mɛ́tɛfa ɔn.”

23Kpa imbule yɛ ɛnʉlʉ yɔɔ ɛza isi kɛ ɛlʉwana gbaŋ-gbaŋ ala, ɔ̃mandɛ ɔn kɛ ɔkʉnʉ; okoo kaka ikoonavɛ ivovu ifo Pailet. 24Asɔ Pailet agɔl ala ɔn áyel ndalɛsɛ olii. 25Asimi Balabas wʉ ɔlɛ-wa kɛ ɛya kici yɛ ânɔŋgʉ nɛ vɛ Loma, saŋ ayɛva ɔnʉl. Kpa ana Zisɔs kɛ avo ayɛ vɛnʉl vɛ ɛta ala nɛ ɔ̃yɛva ɔn ndalɛsɛ imbule yɔɔ ilii.

Vɛnʉl vɛ ɛta vɛ Loma ɔmand Zisɔs

26Sɛ vɛnʉl vɛ ɛta ɔmʉwa zaa nɛ Zisɔs, okol Saimʉn ɔnʉl wʉ Sailin, wʉ asime kɛ ɔswaŋ ɔmɔ, azaa kɛ itisɔ iyɛ Zelusalem. Ɔkɔl ɔn, ɔna ɔn ɔkʉnʉ wʉ vámand Zisɔs ala ãŋgiee keŋ, nɛ álʉŋwa ɔn. 27Ɛyɛŋgɛ iyɛ ɛnʉlʉ iyɛboona ɛlʉŋwa Zisɔs, zwaŋ nɛ okevi vedivi vɛ ɔliaa ɔn nɛ isonu-kɔlʉ. 28Zisɔs afiil, akaŋɛ navo ala, “Okevi vɛ Zelusalem, x-naliaa kici ɛyamɛ ga, kpa liaa nini kɛlɛ kɛ ɛmɛnɛ iyunu ɛŋga nɛ ɔvɔnʉ vunuvu. 29Ɛyaŋgɛghɛ kɛvaā, kɛɛ vɛnʉl vákaŋɛ ala, ‘Vicowenavɛ ayɛ kɛ nɛ vɛkɛm vɛ okevi, nɛ vɔsagh vɛ ɔka-mal ga, nɛ okevi vɛ okol kɛ wanɛ wʉ ványambɛ ga.’ 30Saŋ

“‘Nɛ ɔ́kaŋɛ kɛ nɛ akɔŋgʉ nɛ ɛgʉ ala,

“Sendi, cile asu.”’#23:30 Hos 10:8.

31Yene! Ikil yɛ oyel otu ɔmanɛ wee kan namɛ wʉ mɛlɛ ndalɛ ɔkʉnʉ wʉ ɔlialɛ, nɛ kálɛ la kɛ naa kɛ nɛ anu, vɛ nɛlɛ ndalɛ ɔkʉnʉ wʉyɛmana?”

32Osimi vɛnʉl vacɔcɔ ɔfaalɛ, ɔza wʉ váza-yɛva vo ɔlʉŋgʉ nɛ Zisɔs. 33Wʉ ôbi fɛ oci wʉ ɔyɛla ala Ɔhʉmbʉ, ɔmand Zisɔs kɛ ɔkʉnʉ fini. Ɔmand kpaa vɛnʉl vafaalɛ vacɔcɔ vɔɔ, ɔmɔɔ kan ayana nɛ owudi kɛ amese. 34Zisɔs aveli ala, “Ɛziavɛ wamɛ, gife vo, kici yɛ ɔmɔ acil ɛcɔcɔɔ iyɛ oyele ga.” Vɛnʉl vɛ ɛta vɛ ɔ̂mandɛ Zisɔs vɔɔ, ɔta ɛdʉ sɛ vácil ɔnʉl wʉ ákol akʉndʉ ana.

35Vɛnʉl ocoolu fini oyene, vakʉ ovovu ɔlɛ iyelena ɔn icwe. Ɔkaŋa ala, “Alɛ-walɛ vɛnʉl vedivi, ãwalɛ kie ɔmɛnɛ ɔna, ikil yɛ abe-lɛ Klais wʉ Ofilikpamɛ ɔcɔw.”

36Vɛnʉl vɛ ɛta kpaa ɔva-yel ɔn icwe, ɔna ɔn mɛsɔlʉmʉ mayaŋganamɛ. 37Saŋ ɔkaŋɛ nɔnʉn ala, “Wal ɔmɛnɛ owuwu ikil yɛ wʉbe-lɛ kɛlɛ Mɛfʉwa wʉ vɛ Zu!”

38Ɔlɛ-saŋgɛ kpaa kɛ ɔkpandɛ wʉ ɔmand fɛ ito kɛɛ ɔkʉnʉ wʉ ɔ̂mandɛ ɔn ala, “MƐFɄWA WɄ VƐ ZU ƐNƐ ALƐ WEE”.

39Ɔnʉl wʉcɔcɔ ɔmɔ wʉ ɔ̂mandɛ ɔn fini kpaa, abia Zisɔs ala, “Owe ɛnɛ wʉlɛ Klais ga? Wal ɔmɛnɛ owuwu nɛ asu.”

40Kpa ɔnʉl wʉcɔcɔ wudi wɔɔ alʉwa nɛ ɔciam ɔna ala, “Wʉciaā Ofilikpamɛ ndalɛsɛ ɔna we ɛcian gel-gel nɔnʉn ga? 41Ɔ̂na asu ɔfaalɛ ɛcian kɛ gel-gel, kici yɛ sɛ̂yel ɛcɔcɔɔ. Kpa ɔnʉmbʉsʉ wee âyel ɛcɔcɔɔ ga.”

42Saŋ akaŋɛ ala, “Ɔkʉ Zisɔs, tesi mɛ ɔkambɛlɛ wʉ wʉ́hee Ɔtʉlʉ vumbuvu.”

43Zisɔs agɔl nɔnʉn ala, “Mɛvɔlā we kacɛb mɛla, ɛnya wee wálɛ namɛ kɛ ɔtalɛ-atʉlʉ, kɛ oci wʉsɛɛ nɛ Ofilikpamɛ.”

Zisɔs akwo

44Kalɛ kɛ ɛyaŋgɛ atɛŋatɛŋɛ, ife iyinde ɔtalɛ omwem kaka ɛkalaka ɛtaalɛ. 45Ɛyaŋgɛ ɛ̂ma-yama ga, ɛkʉndʉ yɛ ɛlɛ fɛ ɔfɛla wʉ kɛ Oci Wʉciaana Ɛyʉlʉ kɛ Ɛca ɛpav apavɛ afaalɛ. 46Zisɔs akoo gbaŋ ala, “Ɛziavɛ wamɛ, mɛ̂na mʉndʉ wamɛ kɛ avo ayuwu.” Ikil yɛ âvɔlʉ asɔ, akes ɛsɛma.

47Ikil yɛ ɔkʉnʉl wʉ vɛnʉl vɛ ɛta âyeni ɔmanɛmanɛ kɛɛ âyeli, ana Ofilikpamɛ icivili. Akaŋɛ ala, “Kacɛb, ɔnʉl wee âbe-lɛ kɛlɛ ɔnʉl wʉgel-gel.” 48Wʉ vɛnʉl omwem vɛ ɔ̂va iyenena ndalɛsɛ ɔmand ɔn, otii ɔmanɛ kɛɛ âyeli, ɔta avo kɛ ito, ɔmʉwa kul kɛ atimbe. 49Kpa vɛnʉl omwem vɛ ôcili ɔn, zwaŋ nɛ okevi vɛ ɔlɛ-hee ɛlʉŋwana ɔn tɛla kɛ Galili, ocoolu ɛlɛmb, oyene vɛnalɛvɛ yee.

Zosef âyi Zisɔs

50Ɔnʉl ɔmɔ âlɛ fini wʉ âgɔla ite ala Zosef. Âlɛ kɛ ɔnʉl wʉsɛɛ wʉ ayele akaŋɛ gel-gel. Âlɛ kɛ imbule yɛ vakʉ yɔɔ, 51kpa agɔl vɛnalɛvɛ yɛ ôyeli nɛ Zisɔs ga. Âsime kɛ ɔswaŋ wʉ Alɛmatɛya, kɛ ɔtalɛ wʉ Zudiya. Âkʉla Ɔtʉlʉ vɛ Ofilikpamɛ. 52Wʉ Zisɔs âkwo, Zosef aza kɛ nɛ Pailet, akɔl uno nɔnʉn ala, ana ɔn ɛkʉmʉ iyɛ Zisɔs, nɛ ɔn áza-yi. 53Pailet agɔl. Asɔ Zosef aŋgiee sile nɛnɛnɛ, alimbe kɛ otuwulu, aza-wa kɛ ikund iyɛ ôtime kɛ ɔvasɛ. Ɔmɔ ayi man ɔnʉl kini ga. 54Kalɛ kɛ ife yɛ vɛnʉl vɛ Zu ɔwʉʉsa, sɛ váhee ife ivo yɛyeŋena kɛ ayeŋi.

55Okevi vɛ ɔ̂lʉŋwa Zisɔs kɛ Galili, ɔlʉŋwa Zosef, ɔza-yen ikundu iyɛ ɔ̂talɛ ɛkʉmʉ iyɛ Zisɔs kini. 56Saŋ okiil za kɛ ɔswaŋ, ɔwʉʉsʉ iyili iyɛ iyuŋgwe sɛva iyɛ váyis kɛ ɛkʉmʉ ɛna.

Kɛ ife yɛyeŋena, oyeŋ ndalɛsɛ obe wʉ Mosis avɔl.

Currently Selected:

Luk 23: Iceve-Maci

Highlight

Copy