Luk 22
22
Zudas agɔl wʉ ɔn ácɛ Zisɔs
1Kɛ ɔkambɛlɛ ɔnawɔɔ, Ituŋunu iyɛ Ɛkandɛghɛ kɛɛ Ogenyi kɛɛ Ɛmʉla Ga îbii vaa. Ɔyɛla ɛnɛ kpaa ala Ɔyaŋgɛl. 2Vakʉ vɛ ɔsala Ofilikpamɛ nɛ vɛnʉl vɛ otee obe, ɔ̂liye ɔwaa wʉ váyɛva Zisɔs, kpa ɔciaa vɛnʉl. 3Satan, ɔkʉ wʉ mʉndʉ vacɔcɔ, anyɔl Zudas wʉ ɔyɛla ala Ɛskalɔt, wʉ âlɛ kpaa kɛ acɛnda likwoŋ nɛ afaalɛ. 4Saŋ amʉwa, aza-kol vakʉ vɛ ɔsala Ofilikpamɛ nɛ vɛsiya vɛ kɛ Ɛca iyɛ Ofilikpamɛ. Atɔw navo ndalɛsɛ ɔn ácɛ Zisɔs kɛ navo. 5Kasɛva vo nɔnʉn kaka, ɔgɔl ala vána ɔn ɛŋgɔl. 6Agɔl, saŋ ahee iliyena ɔwaa wʉ ɔn ácɛ Zisɔs kɛ navo kɛ ɔkambɛlɛ wʉ ɛyɛŋgɛ iyɛ ɛnʉlʉ iyɔɔ ɛ́ma-lɛ nɔnʉn ga.
Zisɔs awʉʉsʉ wʉ váya ituŋunu iyɛ Ɔyaŋgɛl
7Wʉ ituŋunu îbi, kɛ ife yɛ ɔsɔŋga ɛkamɛnɛ yɛ Ɔyaŋgɛl, 8Zisɔs atɛma Pita nɛ Zɔnɛ ala, ɔ̃za-wʉʉsʉ vɛnalɛvɛ yɛ vo váya ituŋunu ɔlʉŋgʉ. 9Ofii ɔn fɛsɛ aliye ala ɔ̃wʉʉsʉ ituŋunu. 10Avɔl navo ala, “Ikil yɛ nɛnyɔl kɛ ɔswaŋ wʉboona, náyen kɛ ɔnʉmbʉsʉ wʉ aŋgiee itu-ɛzɔl. Lʉŋwa nini ɔn kɛ itimbe iyɛ ányɔl, 11nɛ nɛ́kaŋɛ nɛ oweni wʉ itimbe anu ala, ‘Ɔkʉnʉl wasɛ ala, wʉ̃te asu oci wʉ vɛnʉl vɛ ozindi, fɛsɛ ɔn áya ɔyɛ wʉ ituŋunu nɛ vɛnʉl vɛ oyeghe nɔnʉn.’ 12Áte anu oci wʉ ɔmalɛ kɛ itimbe iyɛ kɛ ago, saŋ nɛ nɛ́wʉʉsʉ ɔmanɛmanɛ kini.”
13Ɔza-kol ɔmanɛmanɛ kɛ ndalɛsɛ Zisɔs âvɔlʉ vo. Saŋ ɔwʉʉsʉ vɛnalɛvɛ yɛ vo váya Ituŋunu iyɛ Ɔyaŋgɛl fini.
Zisɔs aya okes-anyɛ wʉfeŋ
14Wʉ ɔkalaka wʉ ɔyaa ɔyɛ wʉ ituŋunu ôbi, Zisɔs nɛ acɛnda ana ɔcaal ɔlʉŋgʉ wʉ váya. 15Zisɔs akaŋɛ navo ala, “Mɛlɛ-liye ye wʉ máya ɔyɛ wʉ ituŋunu wee nɛ anu bem-bem sɛnɛ mɛ́ya ɛcian. 16Mɛvɔlā anu mɛla, ɛmɛ máma-ya ituŋunu iyee nɛ anu ga, kaka nɛ itind ɛna ɛ́va-lɛ cɛb kɛ Ɔtʉlʉ vɛ Ofilikpamɛ.”
17Aŋgiee ɔkɔɔ wʉ mɛsɔlʉ, atɛfa Ofilikpamɛ, saŋ akaŋɛ navo ala, “Gbaal ŋwa nini. 18Mɛvɔlā anu mɛla, máma-ŋwa mɛsɔlʉmʉ mee ga, kaka nɛ Ɔtʉlʉ vɛ Ofilikpamɛ ɔ́va.”
19Aŋgiee ɛkandɛghɛ kɛɛ ogenyi, atɛfa Ofilikpamɛ, avine ko, ana vo, akaŋɛ ala, “Ɛkandɛghɛ kiyee kɛlɛ ɛyʉlʉ ɛyamɛ iyɛ mɛna kici iyunu. Yele nini ase, sɛ nátese mɛ.”
20Wʉ ɔ̂ya kule, aŋgiee ɔkɔɔ wʉ mɛsɔlʉ, akaŋɛ navo ala, “Mɛsɔlʉmʉ mee mɛcoolu kɛ okes-anyɛ wʉtavana wʉfeŋ wʉ Ofilikpamɛ nɛ anu. Okes-anyɛ wee áhee kɛ ɔkambɛlɛ wʉ agɔmbʉ ayamɛ áwule kici iyunu. 21Kpa yene! Ɔnʉl wʉ acɛ mɛ ayaā ɔyɛ ocici namɛ. 22Ɛmɛ Wanɛ wʉ Ɔnʉlʉ mákwo kɛ ndalɛsɛ Ofilikpamɛ ɔlɛ-yeli ye ala kãlɛ. Kpa ɔnʉl wʉ ácɛ mɛ, áya ɛcian yɛboona.” 23Wʉ acɛnda ana âŋgwa asɔ, ahee ifiyena nɛ valindi ala ɔnda vo ɛnɛ áyel otu ɔmanɛ wee.
Ɔnda ɛnɛ alɛ ɔkʉ?
24Ohee ɛkpɛlana nɛ valindi ɔnʉl wʉ alɛ ɔkʉ kavo omwem. 25Zisɔs akaŋɛ navo ala, “Mɛfʉwa vɛ vatanda nɛ vakʉ vɛ ɔlɛ nɛ ɔtavɛ kɛ vɛnʉl ovovu, ɔnaā vo ɛcian cɛŋ. Kpa ɔgɔlā ite ala, ‘Vaciam vɛ vɛnʉl ovovu.’ 26Kpa anu nálɛ ɛŋga: ɔnʉl wʉ alɛ ɔkʉ kɛ anu omwem, álɛ ndalɛ otinde, nɛ ɔnʉl wʉ alɛ nɛ ɔtavɛ kɛ vɛnʉl ɔnavɛ, álɛ ndalɛ ɔnʉl wʉ ɔtʉmʉ. 27Ɔnda ɛnɛ alɛ nɛ icivili afo: wʉ acaal acaal wʉ áya ɔyɛ aka wʉ abii? Kɛlɛ wʉ acaal acaal ga? Kpa yene! Mawʉ nɛ anu kɛ ndalɛ ɔnʉl wʉ ɔtʉmʉ. 28Anu ɛnɛ nɛcoolu namɛ kɛ ɔkambɛlɛ wʉ mɛsol. 29Kɛ ndalɛsɛ Ɛziavɛ wamɛ ana mɛ ɛyana iyɛ ɔtʉlʉ, ɛmɛ kpaa mɛnaa anu ɛyana iyɔɔ. 30Asɔ náya, nɛ nɛ́ŋwa namɛ kɛ Ɔtʉlʉ vambɛvɛ, nɛ nɛ́caal kpaa kɛ ɛkɔn kɛɛ mɛfʉwa wʉ náwanda akulu ayɛ Iselel likwoŋ nɛ afaalɛ.”
Zisɔs avɔl ndalɛsɛ ife Pita átɛna ɔn
31Zisɔs ayɛla Saimʉn Pita ala, “Saimʉn, tambɛlɛ! Satan#22:31 Yen Luk 22:3. âfii Ofilikpamɛ, ɔ̂na ɔn ɛyana iyɛ ácwa anu ndalɛ ilisi, nɛ áfuwe anu ndalɛ amʉmʉ, sɛ átas anu. 32Kpa mɛ̂veli kawe, Saimʉn, sɛ wákɛ-yile ɛsɛma kan namɛ ga. Nɛ kɛ ɔkambɛlɛ wʉ wʉkiil va kan namɛ, nɛ wʉ́na ɔvɔnɛŋgɔnʉ ɛsɛma yɛtavana.”
33Kpa Saimʉn Pita agɔl nɔnʉn ala, “Ɔkʉ, masɛ álɛ kɛyaghɛ, masɛ álɛ oku, mɛ̂gɔl málʉŋwa we!”
34Kpa Zisɔs akaŋɛ nɔnʉn ala, “Pita, mɛvɔlā we mɛla, wátɛna mɛ ɛkambɛlɛ ɛtaalɛ sɛnɛ ɔnʉm-ikowu átɔŋg ɛnya.”
Zisɔs ana vɛnʉl vɛ oyeghe nɔnʉn acɛ
35Zisɔs afii vo ala, “Sɛ mɛlɛ-tɛma anu wʉ nɛ̂ŋgiee onzuwu, ɛta akasɛ akɔwʉ ga asɔ, ɔmanɛ kalɛ-kwa anu?”
Ɔtɛna ala, “Cioow.”
36Saŋ akaŋɛ navo ala, “Kpa aŋgiee wee, wʉ alɛ nɛ onzuwu, nɛ ãŋgiee, wʉ alɛ nɛ ɛta, nɛ ãŋgiee. Ɔnʉl wunu wʉ aka-lɛ nɛ ɛsɔmʉ yɛ awand ɔmɛnɛ ɔna ga, nɛ ãsia okuu ɔna, nɛ ákʉnda ɛmɔɔ. 37Ɔlɛ-saŋgɛ kɛ oŋgwe wʉ Ofilikpamɛ ala, ‘Ɔlɛ-vɔlʉ zwaŋɛ ɔn nɛ vɛnʉl vacɔcɔ.’#22:37 Azaya 53:12. Mɛvɔl anu mɛla, ɔmanɛ kwɔɔ káva-lɛ cɛb keŋ-keŋ kan namɛ. Ɔmanɛmanɛ kɛɛ ɔlɛ-saŋgɛ kɛ ito kaŋgɛghɛ akɛ ye kɛ ɛvaana cɛb.”
38Vɛnʉl vɛ oyeghe nɔnʉn ɔkaŋɛ ala, “Ɔkʉ, tiye, savɛ nɛ ɛ̈sɔmʉ ɛfaalɛ.”
Akaŋɛ navo ala, “De nini asɔ.”
Zisɔs aveli kɛ Ɛkɔŋgʉ iyɛ Oliv
39Zisɔs asime za kɛ Ɛkɔŋgʉ iyɛ Oliv, ndalɛsɛ ayele ye kpem-kpem. Vɛnʉl vɛ oyeghe nɔnʉn ɔza nɔnʉn. 40Wʉ âbi kini, akaŋɛ navo ala, “Vele nini ndalɛsɛ nágba kɛ mɛsol ga.” 41Asɛɛl vo, atind kɛ isi bem, aŋgul anu ɛyaŋ, aveli ala, 42“Ɛziavɛ, ikil yɛ wʉliye, nɛ wʉ̃tɛŋɛ ɔkɔɔ wʉ ɛcianɛ wee kan namɛ. Kpa kɛlɛ sɛ mɛlii ga; yeli kɛ ndalɛsɛ kakɛma we.” 43Saŋ ɔzɛnda-gbalgbal asime kɛ ɔtalɛ-atʉlʉ, ava-na ɔn ɔtavɛ. 44Zisɔs âlɛ kɛ ɛcian yɛboona, asɔ aveli nɛ ɛsɛma ɛmɔɔ. Otulu osime ɔn kɛ ɛyʉl, kɛ ndalɛ aloŋgu ayɛ agɔmbʉ, aloŋgule kɛ ɛyaŋ.
45Wʉ âveli kule, amʉwa ɛsɛla, akiil za kɛ nɛ vɛnʉl vɛ oyeghe nɔnʉn. Akol vo ɔyavanavɛ kici yɛ ɛyʉlʉ ikwo vo kaka, zwaŋ nɛ isonu-kɔlʉ. 46Saŋ Zisɔs afii vo ala, “Ini nɛyava? Mʉwa nini ɛsɛla, nɛ nɛ́veli, ndalɛsɛ nágba kɛ mɛsol ga.”
Ɔkɔl Zisɔs
47Wʉ âlɛ tɔ kɛ ɛtɔwana, ɛyɛŋgɛ iyɛ ɛnʉlʉ ɛva. Zudas, wʉ alɛ ɔnʉl ɔmɔɔ kɛ acɛnda likwoŋ nɛ afaalɛ, agba vo isighi. Ava kpʉmbɛlaŋ kɛ nɛ Zisɔs, asɔmbʉlʉ ɔn ɔnanɛghɛ ndalɛsɛ ɔtɛfa ɔkʉnʉl kɛ iyeli ivo. 48Kpa Zisɔs afii ɔn ala, “Zudas, kɛ ase ɛnɛ wácɛ Wanɛ wʉ Ɔnʉlʉ kɛ ɛsɔmbʉlana ɔn ɔnanɛghɛ?”
49Wʉ vɛnʉl vɛ oyeghe nɛ Zisɔs ôyeni ɔmanɛ kɛɛ kayel, ofii ɔn ala, “Ɔkʉ, sɛ̃gbeli vo nɛ ɛ̈sɔmʉ ɛyasɛ?” 50Saŋ ɔnʉl vo ɔmɔɔ agbel kes ɔnʉl wʉ ɔtʉmʉ wʉ Itoghu kɛɛ Vakʉ vɛ Ɔsala Ofilikpamɛ ɔtʉŋʉghʉ kɛɛ ayana.
51Kpa Zisɔs akaŋɛ navo ala, “De nini, x-nama-yele asɔ ga.” Saŋ apel ɔtʉŋʉghʉ kɛɛ ɔnʉl ɔnawɔɔ, akʉs ɔn.
52Zisɔs akaŋɛ nɛ vakʉ vɛ ɔsala Ofilikpamɛ nɛ vɛsiya vɛ kɛ Ɛca iyɛ Ofilikpamɛ nɛ vakʉ vɛ ɔva ɛkɔlana ɔn ala, “Nɛ̂tes anu ala mawʉ kɛlɛ oyi wʉ aŋgiee vitumuvu? Kɛlɛ asɔ ɛnɛ nɛva nɛ ɛ̈sɔmʉ nɛ imbili iyɛ ɛtɛ, wʉ náva-kɔl mɛ? 53Ife ɛmɔnɛmɔ mɛ̂lɛ nɛ anu kɛ Ɛca iyɛ Ofilikpamɛ, kpa nɛkan ɛkɔlana mɛ ga. Kpa nákɔl mɛ aŋgiee, kɛ ɔkalaka owunu nɛ ɔtavɛ vɛ kɛ ife.”
Pita atɛna Zisɔs
54Saŋ ɔkɔl Zisɔs, ɔmʉwa nɔnʉn kɛ itimbe iyɛ Itoghu kɛɛ Vakʉ vɛ Ɔsala Ofilikpamɛ. Pita alʉŋwa za vo kan azime, kpa alɛ ɛlɛmb. 55Vɛnʉl vedivi ɔwa ogusu kɛ atɛŋatɛŋɛ wʉ ɔswaŋɛ, ɔcaal ocici, ɔlɛ kɛ itiina. Pita kpaa ava-caal fini navo. 56Wanɛ okeyi ɔmɔ wʉ ɔtʉmʉ ayen sɛ Pita acaal fɛ ɛfan iyɛ ogusu. Ayen kɛ ɔn zoŋgeŋ, akaŋɛ ala, “Ɔnʉl wee alɛ-lɛ nɛ Zisɔs.”
57Kpa Pita atɛna ala, “Wanɛ okeyi, mɛ̂cil ɔn ga.”
58Kayel sigh, ɔnʉl wudi ayen ɔn, akaŋɛ ala, “Owe kpaa kɛlɛ ɔnʉl ovo.”
Pita atɛna nɔnʉn ala, “Cioow! Kɛ ɛmɛ ga.”
59Wʉ ɔkalaka ôwo masɛ ɔmɔɔ, ɔnʉl wudi akɛ-kaŋɛ pe ala, “Kacɛb ɔnʉl wee âlɛ nɔnʉn, kici yɛ awʉ kpaa kɛlɛ ɔnʉl wʉ Galili.”
60Kpa Pita akaŋɛ ala, “Ɔnʉl owe, mɛ̂cil ɔmanɛ kɛɛ wʉtɔwa kwɔɔ ga.” Ndalɛsɛ âlɛ tɔ kɛ ɛtɔwana, ɔnʉm-ikowu atɔŋg. 61Ɔkʉ Zisɔs afiil, ayen Pita zoŋgeŋ. Saŋ Pita ates amʉ ayɛ Ɔkʉ alɛ-kaŋɛ nɔnʉn ala, “Wátɛna mɛ ɛnya ɛkambɛlɛ ɛtaalɛ, sɛnɛ ɔnʉm-ikowu átɔŋg.” 62Saŋ Pita asime kɛ ɔswaŋ, aza-lia, kakɔl ɛyʉl.
Oyel Zisɔs icwe
63Vɛnʉl vɛ Zisɔs âlɛ kɛ ikowu ivo, ohee iyelena ɔn icwe, nɛ ɛnyɛmbɛlana ɔn. 64Wʉ ɔ̂kɔndʉ ɔn ɛkʉndʉ asi, ofiye ɔn ala, “Taghɛ asu ɔnʉl wʉ anɛsa we!” 65Ɔtɔw kpaa vɛnalɛvɛ yedivi yɛcɔcɔ nɛ yɛyelenavɛ icwe cɛŋ.
Zisɔs kɛ isi kɛɛ vakʉ vɛ otune
66Wʉ ɔsʉ ɔ̂wʉʉ, imbule yɛ vakʉ ɛnʉlʉ, zwaŋ nɛ vakʉ vɛ ɔsala Ofilikpamɛ, nɛ vɛnʉl vɛ otee obe, ɔzwaŋ iti. Ɔva nɛ Zisɔs kɛ isi ivoghu, ndalɛsɛ vátune ɔn. 67Saŋ ɔkaŋɛ nɔnʉn ala, “Ikil yɛ owe nɛ wʉlɛ Klais, nɛ wʉ̃vɔlʉ asu.”
Zisɔs agɔl navo ala, “Ikil yɛ mɛvɔl anu, kpa nɛ nɛ́gɔl ga. 68Masɛ mɛfii anu, kpa nɛ nɛ́gɔl ga. 69Kpa hee aŋgiee za kɛ isi, ɛmɛ Wanɛ wʉ Ɔnʉlʉ, mácaal nɛ ɛkwavɛ kɛ ovo kɛɛ ayana kɛɛ Ofilikpamɛ wʉ oyel ɔmanɛmanɛ.”
70Saŋ vo omwem ofii ɔn ala, “Asɔ wawʉ kɛlɛ wanɛ wʉ Ofilikpamɛ?”
Akaŋɛ navo ala, “Akɛ kɛlɛ ndalɛsɛ nɛkaŋɛ.”
71Saŋ ɔkaŋɛ ala, “Ini sɛkɛ-liye pee akɛvɛ? Asu ɛŋga kpaa sɛ̂ŋgwa sɛ avɔl kɛ uno ɔna.”
Currently Selected:
Luk 22: Iceve-Maci
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
