Lukas 20

Den aksi Yesus pe A feni a makti

Mat 21:23-27; Mrk 11:27-33

1Yesus ben e gi sma leri na ini a tempel, èn A ben e ferteri den a bun nyunsu. Wan fu den dei dati den prenspari priester, den sabiman fu Gado wèt nanga den fesiman fu a folku, kon na En. 2Den aksi En taki: “Taigi unu, pe Yu feni a leti fu du den sani san Yu e du? Suma gi Yu a makti fu du den sani disi?” 3A piki den taki: “Mi wani aksi un wan sani tu. Un taigi Mi: 4Suma ben gi Yohanes a makti fu dopu sma? Gado noso libisma?” 5Dan den man taki a tori nanga makandra. Den taki: “Efu un taki: ‘Na Gado,’ dan A o aksi unu: ‘Fu sanede un no ben bribi en dan?’ 6Ma efu un taki: ‘Na libisma,’ dan a heri folku o ston un kiri. Bika den e bribi taki Yohanes ben de wan profeiti.” 7So den piki taki: “Wi no sabi suma gi en a makti.” 8Ne Yesus taigi den taki: “We, dan Mi srefi no o taigi unu pe Mi feni a leti fu du den sani san Mi e du.”

A agersitori fu a man di yuru wan droifidyari gi sma

Mat 21:33-46; Mrk 12:1-12

9Dan Yesus ferteri a folku wan agersitori. A taki: “Wan man ben prani droifibon na ini en gron. A yuru a droifidyari gi tra sma, dan a gwe wan heri pisten na wan tra kondre. #Yes 5:1 10Di a ten doro fu piki den droifi, a seni wan knekti go na den man di yuru a droifidyari, fu den gi en den droifi san en masra ben mus kisi. Ma den man fon en, dan den seni en gwe nanga soso anu. 11Dan a man di abi a droifidyari seni wan tra knekti go, ma den man fon a knekti disi tu. Den gi en syen, dan den seni en gwe nanga soso anu. 12Dan a man seni ete wan knekti go, a di fu dri. Ma den man gi a knekti disi mankeri, dan den srepi en puru ini a droifidyari. 13Dan a man di abi a droifidyari aksi ensrefi taki: ‘San mi mus du now? We, mi o seni a manpikin fu mi go, di mi lobi. Den no sa du den sani dati nanga en.’ 14Ma di den man di ben yuru a gron si a manpikin, den taigi makandra taki: ‘Na a boi disi o kisi a gron te en p'pa dede. Kon meki un kiri en, dan unu o kisi a gron.’ 15So den srepi a manpikin go na dorosei fu a droifidyari, dan den kiri en.” Dan Yesus aksi den sma taki: “San un e prakseri taki a man di abi a droifidyari o du nanga den man? 16Mi e taigi unu: A o kon kiri den man di ben yuru a droifidyari, dan a o yuru en gi tra sma.” Di den sma yere a sani disi, den taki: “Disi no musu psa, kwet'kweti!” 17Ma Yesus luku den, dan A taki: “A skrifi taki: ‘A ston di den mesreman feni taki no bun, na a srefi ston dati tron a moro prenspari ston fu a heri oso. San a sani disi wani taki?’ ” #Psa 118:22 18Dan Yesus taki moro fara: “Ala sma di fadon tapu a ston disi, o broko ala den bonyo. Èn efu a ston disi fadon na tapu wan sma, a o masi en tron wan doni.” 19Den sabiman fu Gado wèt nanga den prenspari priester ben kon ferstan taki na gi den A koti wan odo nanga a agersitori disi. Dat' meki den ben wani grabu En a srefi yuru dati, ma den ben frede a folku.

A tori fu a lantimoni

Mat 22:15-22; Mrk 12:13-17

20Dan so den seti luru gi Yesus. Den seni sma fu go luku efu Yesus ben o taki wan sani san no fiti, fu den kan gi En abra na ini anu fu a granman. Den man disi ben mus du leki den na sma di e libi leki fa Gado wani. 21Dan den man taigi Yesus taki: “Meister, un sabi taki den sani san Yu e taki, nanga san Yu e leri, na tru sani. Yu no e wroko nanga fesi, ma Yu e leri unu a pasi fu Gado leki fa a de. 22Ma un wani aksi Yu wan sani: A fiti fu pai lantimoni na a grankownu fu den Romeinisma, efu a no fiti?” 23Ma Yesus si taki na fasi den ben wani fasi En. Dat' meki A taigi den taki: 24“Kon meki Mi si wan moni. Suma fesi nanga suma nen de na en tapu?” Den piki En taki: “A di fu a grankownu.” 25Ne Yesus piki den taki: “Dan un gi a grankownu san na fu en, èn un gi Gado san na fu Gado.” 26So den man no ben man kisi Yesus fu A taki wan sani san no bun, fu a folku yere. Dan den hori den mofo, bika den ben ferwondru fu a fasi fa A piki den.

Yesus nanga den Saduseiman

Mat 22:23-33; Mrk 12:18-27

27Wantu Saduseiman kon na Yesus fu aksi En wan sani. Den man disi no ben e bribi taki dedesma o kon na libi baka. #Bosk 23:8 28Den taki: “Meister, Moses ben skrifi taki efu wan man di abi wan brada trow, èn a dede sondro fu a kisi pikin, dan en brada mus trow nanga a uma fu meki pikin gi en brada di dede. #Deu 25:5-6 29Now seibi brada ben de. A fosi wan trow, ma a dede sondro fu libi pikin na baka. 30Dan a brada di waka na en baka trow nanga a uma, 31dan a di fu dri, te leki ala den seibi brada ben trow nanga en. Ma den alamala dede sondro fu kisi pikin. 32Te fu kba, a uma srefi kon dede.” 33Dan den aksi Yesus taki: “Te den dedesma o kon na libi baka, sortu wan fu den brada sa abi a uma disi leki en trow-uma? Bika ala seibi man ben trow nanga en.” 34Yesus piki den taki: “Den sma fu a ten disi e trow nanga makandra. 35Ma den sma di Gado feni warti fu opo baka na dede, èn libi ini a ten di e kon, no o trow nanga makandra. 36Den no o dede moro, bika den o de leki den engel. Den o de pikin fu Gado, fu di den kon na libi baka. 37Moses srefi sori krinkrin tak' dedesma o kon baka na libi. Ini a tori fu a pikin bon di ben teki faya sondro fu bron, Moses kari Gado: a Gado fu Abraham, Isak, nanga Yakob. #Eks 3:6 38Ini Gado ai, den sma dati e libi. So un e si taki Gado a no Gado fu dedesma, ma fu sma di e libi.” 39Dan wantu fu den sabiman fu Gado wèt taigi Yesus taki: “Meister, Yu piki bun.” 40Èn den no ben prefuru moro fu aksi En wan sani.

Suma na a Mesias?

Mat 22:41-46; Mrk 12:35-37

41Dan Yesus aksi den sma taki: “Fa den sma kan taki tak' a Mesias na wan bakapikin fu kownu David? 42Bika David srefi skrifi ini wan fu den Psalm taki: ‘Masra Gado taigi mi Masra taki: Kon sidon na Mi let'anu sei, #Psa 110:1 43te leki Mi meki den feyanti fu Yu tron Yu futubangi.’ 44We, efu David kari a Mesias en Masra, dan fa A kan de en bakapikin dan?”

Yesus warskow den sma di e teki leri fu En

Mat 23:5-14; Mrk 12:38-40

45A ten di a heri folku ben e arki san A e taki, Yesus taigi den sma di e teki leri fu En taki: 46“Un mus luku bun nanga den sabiman fu Gado wèt. Den lobi fu weri langa krosi e koiri, èn den lobi te sma e gi den lespeki odi na wowoyo. Den lobi fu sidon na den moro bun presi ini den kerki, èn den wani sidon na den moro prenspari presi te den go nyan na sma oso. 47Den e puru den oso na a anu fu den uma di masra dede kba, dan den e begi langabere begi fu sma denki taki den bun. Dat' meki a strafu fu den o moro hebi.”

Currently Selected:

Lukas 20: SB16

Highlight

Copy