Genesis 3
3
1Fu ala den meti di MASRA Gado ben meki, a sneki ben de a wan di ben lai triki moro ala trawan. A sneki taigi a uma taki: “A mus de so taki Gado taigi unu taki un no mus nyan fu no wan fu den bon ini a dyari.” 2A uma piki a sneki taki: “Wi kan nyan den froktu fu ala bon ini a dyari. 3Ma Gado taigi wi taki wi no mus nyan den froktu fu a bon di tnapu na mindri fu a dyari. A ben taki: ‘Un no mus nyan den èn un no mus fasi den, noso un o dede.’ ” 4A sneki taigi a uma taki: “Yu no sa dede kwet'kweti. 5Ma Gado sabi taki a dei di yu nyan fu en yu ai o opo. Yu o kon de leki Gado srefi.#3:5 Un kan puru a pisi disi so tu: Yu o de leki den gado. Yu o sabi san na bun èn san na ogri.”
6Dan a uma si taki den froktu fu a bon ben bun fu nyan èn taki den ben moi fu si. Den ben e gi yu lostu fu yu nyan den, fu yu ben kan kon sabi sani. So a uma teki fu den froktu fu a bon dan a nyan. A gi en man, di ben de drape nanga en, dan a dati nyan tu. 7Ne den ai opo èn den kon si taki den ben de nanga sososkin. So den frekti wiwiri fu a figabon kon na wan fu tapu den syenpresi.
8Ma mofoneti di a netiwinti bigin wai, den yere fa MASRA Gado e waka ini a dyari. Dan a man nanga en uma gwe go kibri gi MASRA Gado mindri den bon fu a dyari. 9Ne MASRA Gado kari a man. A taki: “Pe yu de?” 10A man piki taki: “Di mi yere fa yu e waka ini a dyari, mi ben frede fu di mi de nanga sososkin. Dat' meki mi go kibri.” 11Dan Gado aksi en taki: “Suma taigi yu taki yu de nanga sososkin? Na nyan yu nyan froktu fu a bon fu san mi ben warskow yu taki yu no mus nyan fu en?” 12Ne a man piki baka taki: “Na a uma di yu gi mi meki mi nyan fu den froktu.” 13Dan MASRA Gado aksi a uma taki: “Fu sanede yu du dati?” A uma piki taki: “Na a sneki kori mi meki mi nyan.”
14Ne MASRA Gado taigi a sneki taki:
“Fu di yu du dati,
Mi e fluku yu
na mindri fu ala den meti di sma man kweki,
nanga na mindri fu ala den krasi meti.
Tapu yu bere yu sa kroipi
èn yu sa nyan doti,
solanga yu e libi.
15Mi sa meki taki yu nanga a uma tron feyanti.
Disi sa de so tu nanga den bakapikin#3:15 A Hebrewtongo taki: a siri. fu yu
nanga di fu a uma.
Den sa masi yu ede,
èn yu sa beti den baka-iri.”
16Dan Masra Gado taigi a uma taki:
“Mi sa meki a ten te yu de nanga bere wan tranga ten gi yu.
Nanga hebi skin-ati yu sa meki pikin.
Yu sa tan angri fu de nanga yu masra,
èn a sa basi yu.”
17Masra Gado taigi a man taki:
“Yu arki yu uma
èn yu nyan fu a bon
fu san mi ben warskow yu taki yu no mus nyan fu en.
Dat' meki mi e fluku a gron fu yu ede.
Yu heri libi langa
yu sa wroko tranga,
fu a gron kan gi nyanyan.
18Makagrasi nanga krasiwiwiri a sa gi
èn yu sa nyan san a gron e gi.
19Yu o abi fu sweti
fu kan kon na yu deibrede,
te leki yu dede èn go ini a gron baka,
bika na doti fu a gron Mi ben teki meki yu.
Fu kleidoti yu ben meki
èn kleidoti yu sa tron baka.”
20A man kari en uma Eva,#3:20 A wortu di puru dyaso nanga Eva wani taki libi noso de na libi tu. fu di na en na mama fu ala libisma. 21Dan MASRA Gado meki krosi fu meti buba gi a man nanga en uma dan A weri en gi den.
22Dan MASRA Gado taki: “Luku, libisma kon de leki wi now. A kon sabi san na bun nanga ogri. No meki a langa en anu now tu fu teki froktu nyan fu a bon di e gi libi fu têgo. Noso a o libi fu têgo.” 23Ne MASRA Gado seni en gwe fu a dyari fu Eden fu go wroko a gron, bika nanga doti fu a gron a ben meki. 24A yagi den gwe dan A poti den kerub na a oostsei fu a dyari fu Eden. Den kerub ben tnapu drape nanga wan deigri na den mindri, di ben e koti faya èn di ben e go fu a wan sei na a tra sei, fu tapu a pasi di e go na a bon di e gi a libi fu têgo.
Currently Selected:
Genesis 3: SB16
Highlight
Share
Copy
Want to have your highlights saved across all your devices? Sign up or sign in
Tekst © Surinaams Bijbelgenootschap 2016
