Luqaasi 12

Pappahanassa kapa sekaatta

Maati 10:26-27

1Sitiiyyi, samayta a kuma lekayta mina co ollopa xore ka lekumaasso qaran xaate'e oli tuukni ka olqara yeyyetanni. Yesuusi ka turan qattishe ka tamaarewwaadi asse kida paayye “Haddaya Feresaata pappahanassase xaaysho kapa isi tooytaada #Maati 16:6; Maari 8:15 2Wa qara dekame panamaysho hasni in co, umma wa juutame upnaatamaaysho hasni in co. #Maari 4:22; Luqa 8:17 3Semmalla wa tukkanta kara haasawattene, la'aytoppa'e dakaadan; wa tika a dufamte kela napahatoppa hushushaytan olli leltene, laka'e sookan ka tikeeyye tula qara salisaman.”

Ayno fuureeta akka parpaaccisnito

Maati 10:28-31

4“Ishina ana jaalannati in kiini, a so'a ikanna ka kuli paata we takkan nefo koda ettaninni in kinnini in fuuran. 5Ma xoori ayno fuureeta akkima ishin parpaaccisnitto in ishina lela, Waaqase oto ishsho kammaayye, apittase libbini in kinnini oppopa kateeta hupna ukkumeeta qapo fuura. Aa, in ishina kiini, isha patta fuura.

6“Purraya ken santima qeennincane? ishootta oppaayye xoori takka nefo fuula Waaqa tura in teymamme. 7Xaayshin desa nyirfa a mattaayshina kuli dikame; semmalla in fuuran ishina purraya lekaya qara qaptaneey.”

Qoota kiristoosi desa makkumeeta

Maati 10:32-33; 12:32; 10:9-20

8Kamma desaaw Yesuusi ikide, “In ishina kiini nama fuula orra tura ana maakkummo, inna nama nefoow, fuula erkampattowwa Waaqa tura'e asseew ishi maakkumaneew. 9Nama fuula orra tura ana marmannoow, anti nefo fuula erkampattowwa Waaqa tura asseewwen isha marmadaaw.

10“Nama inna a nama qara afa otitta haasawanno, ishin dapaytaadi i'ishi diisama nama hapura qulqulloota qara afa otitta haasawanno xoori, ishi in dapaytaadi ishi in diisamo. #Maati 12:32; Maari 3:29

11“Oto orra, tikkasene a qinseeta a orra Yihuta kelopa ishin qeennooyye ka saarra isho, ukkumampaya turopa firteeta ishin dehannooyye, in qaapan ka in kidane, ‘Maanan mina oorinna ka atta hasawanna?’ #Maati 10:19-20; Maari 13:11; Luqa 21:14-15 12Wa haasawatta ishin parpaaccisnitta, sitiiyyi Hapura Qulqulloota'e ishina' lelaay.”

Eepuma a teyantoolaytaseti

13Samaytoppaayye nama takka ka Yesuusi kide, “Kollissampayto! Kodayteeta a aappinno ino lehaanda daashe quda akka ana qootto'e, innaanno' lele.”

14Yesuusi xoori i'ishi oorshe ka kide, “Ati namo, akkan otantaayshin oppa faratampayta koddo ka lehaanda ishina qooto'e, ayno ana shuume?” 15Ka se kammaayye orra piisa kide, “Caatta nama teyantaadi a koopte kapanneey, tooytaada ka qurqummuma kapa sekaada.”

16Se kammaayye Yesuusi pahanoosene ishootta' lele ka kide, “teyantoolayta takka a dulaadi a kuttaati unta isha palayshe ca. 17Ikka oppa dikanni ka kiini, ‘Poran oppopa untose piisa kalsado an qapooy maanan koda? 18Ka kide assen koda; kootarraayyo piisan alle poota ka, kootarra a kukutta a pila qupa. Ka untiyyo isho qapnaayyo piisa ollopa oorsha ka karopa kalsada. 19Ka issi kida, tin teyanta a kutta a parra lekaya ke kayto qaptaay; oori nessado ka xayxaysado ka dame ka ikke! Ka xasoodo’ 20Waaqa xoori i'ishi kide, ‘Atti eepo, awwe halkeesseti tootaay, kuli teyantose a ollopa tuulatte piisa a ayno koddita?’

21“Nama piisse qara teyantaaw ollopa tuulanno ka Waaqa kapaayye teekolayta kodde asseew kodda.”

Amanteeta Waaqa qara Xaayatta

Maati 6:25-34

22Sekkamma Yesuusi itamaarewwaadi kide, “In ishina kiini, ‘Caattayshina'e, maanan damma; ka dakintaayshina'e, maanan uwwisanna?’ In kidan ka kallaatayshin oppa in rakkadan. 23Caatta damta qara iqapa, dakinta nefo ka ohaata qara qaptaay. 24Intoonno qurrupaya tooyyaay! Ishootta aylaannincaan, umma feranincan; umma pora a kara unta kalsanaane taaki kotaarra in qapan. Waaqa ka ishootta daminni. Ishina xampira qaraayye a kuttati a qaptane? 25Ishin oppaayye ayno paata qaapeetan paraadi qara kuyyaata takka padaawatta ettaninni? 26Ka kuli oto sede shakka nefo kodeeta ishinan kamteeyye, maana'e wa pila malla qaapnittan?

27“Pisa akkima pisno tooya. Yaala in qapo; umma fuuttota shippanni in co, ma xoori, Selemooni mikka ulfeenose xaadi piisanne, ohaata takka a pisoose mina siramte in uwwisanne. #nuqu a 1ta 10:4-7; otoo a 2ta 9:3-6 28Ka kuli Waaqa, oto jabbaase a lakoppa awwe akkaanno opan ka parri apittoppopa kannaan, asse sirro ka uwwinnooyye, ishina amanteeta ishina qajteeti, desa, atta in jaalinnin ka ishina in uwwinnin?

29“Semalla, ‘Maanan damma ka maana ikkina?’ In kidan ka in qaapan. 30Orra Waaqa amanni in kinnin a piita qara co kuli, sene akkatta'e pora qaapniiyyi. Ishina xoori wossen piisa akka ishin parpaaccisnaan Aappaase xaayshin a moonta i'upaay, 31se kapaayye mankisteetase a Waaqa fada, Wossen piisa ishina qara padawamaay.”

Piita qara teyanta ollopa tuulatta akka parpaaccisni in kinnin

Maati 6:19-21

32“Ishina kaffadayyooyye! Ishina akka a xelloota shashakka, mina kodde in fuuran. Aappaase xaayshina a moonta mankisteeta ishina daassata heennaadeey, 33wa qaptane piisa kata ka teekolaya qoota ka qarateetase kerini in kinnin harmisada ka mankisteeta moontatiiyi, porase a oppaayye kera kayyini in kinnin, itteeta ka dammi in kinnin kaaja ka pirami in kinnini oppa xaayada. 34Pora oppa kaajaassin caan, karittaayshin kuli eyyeew caadaay.”

Orxaya japaanna

35Kamma desa Yesuusi ikide, “Surraappa hiddada ka kuyyaata piisa, koda harmisada. Ipsaassin nefo a opaya quda' tawen. #Maati 25:1-13 36Ka sedenne orxaya, a Poqallaasso tika hemittati kallo asanna pahanaada. Ishootta, a isi qara in upnin maliiyyi, kati poqallaasso kalaayye ka xarroppa kooko'innaayye, irra qara isha tura pana'e a harmisade. #Maari 13:34-36 37Orxayoosen a ishootta isi qara in upnini mali poqallaasso ishootta qara kala ka ishootta a harmisade akka, oo atta kalataysamen! Anti dukaatannen ishina kiini, poqallaasso mehadda pursada ka ishootta kutiisha; ka ishootta damta deddehaysha. 38Oto poqallaasso olli qootta halkeettati, taakki lukkala iyyaappaayye kalan ka ishootta impase ka harmisade akkaneeyye, orxayoosen a eeppisame! 39Ma sede upnaadaaw, nama takka kati saateta a oppa kera de'o upa kiiteeyye, akka kera tikaadi pooto'e tura diinni in heenne. #Maati 24:43-44 40Inna a nama saateta a ishina isi qara a upnini oppa'e de'aney, semmalla harmisada ka asada.”

Pahana orxayta a paxaara ka a neeqati

Maati 24:45-51

41Peetiroosi ka Yesuusi kaassade ka kide, “Poqallaay, hela ino patta'em, mon orra piisa'e pahanoosen haasawanni?”

42Poqalla Yesuusi ka ishi oorshe ka kide, “Ka kuliyya akka tikaadi qanqannissa ishi muksho'e, ka kiseetoppa orxayaadi damta daasho'e, ilattaytase a mukissampayta amaname, a aappa tika isha shuumade ayno? 43Oto poqallaadi pora opa aaneeyye kalooyye ka akka isha ajaje qara'e, isha a kodaadi koono akkooyye, orxaytose oo atta eeppisame! 44Dukaatannen ishina kiini, aappa tika qapnaadi piisa qara'e orxaytose shuuma 45Ma xoori orxayse kati dikada ka kida, ‘Poqallaayyo tapo in kalo ijaraay,’ Ka dameeta ka ikkeeta ka maashshootta ka orxayaasene a diira isho a iskatta oppa qida paayyaayye, 46poqallaadi a isha isi qara in upniniiyyi kuyyaata isha in dikannin ka saateta oppa isha matte in qapnini oppa'e isha qara de'a ka ishoppa quura ka kitaadi nefo orra Waaqa amanni in kinnin qudopa reexxa.

47“Orxayta, koda a poqallaadi isha qara faano upo, ka in harmisannin taaki ajaja poqallaadi in koonin; a kuttati'i qatta'ama. 48Ma xoori, a koda poqallaadi isha qara faano in upnin ka ishin dape, shakkayteeta'ew qatta'ama. Nama a kutta ishi daasamte qaraayye a kutta'e fadammi; nama a tara kutta teyyade qaraayye asseew a kutta asatammi.”

We piisa diisheeta ka Yesuusi kamma anta

Maati 10:34-36

49Kamma desa Yesuusi ikide, “Tin anti piita qara apitta qaptissa'en de'e. Katin irra qara ana qapanniiyyi attan heena! 50Ma xoori rakkoota dikke neeqa a ana qara kayto ca. Umma haka rakkoose ana qara kaynitto ka dikkannitto kara'e, akatan qaapni!#Maari 10:38 51Hela, an piita qara nakayta qeeda de'e ishina pahata? Ha waan ishin de'e, olkela orra qooteeta diisheey, nakaytan. 52Amma desa nama keni a toola takka kara co lakki olliqqita. sessa ka lakki qara xa'an; lakki ka sessa qara xa'an.

53“Aappa innaadi qara'e xa'a, inna ka aappaaysho qara xa'aneew; aayya enentaadi qara'e xaata, enenta ka aayyaasso qara xaataaw; haantota inna, aayya opa inna qara'e xaata; aayya opa inna ka, haantota innaadi qara xaataaw; ka oli kela pasan.” #Mikki 7:6

Qoota etaati desa upnaatta

Maati 16:2-3

54Kammadesa Yesuusi isamaytaseti kideewwe, “Oto qinda dumaatatin #12:54 piita Isira'eelitiiyyi oto qinda dumaatatin oraarta qa'oyye roopni. oraarta qaytooyye akka akkitaneeyye, ennowe kiinittane, ‘awwe iroopa,’ Ikka keeto roopni. 55otoon qinda tupattatin puppinittooyye, ikkiinittane ‘awwe i'awda,’ ikka keeto awdini.

56“Ishina pappahanassampaayay, piita qara isho moonta quda tooyetanne wa kodda i'upnaannittan; ka kuli wa xeltase a amma oppa koddina maana'e a upnaanni a kinnin?”

Qoota paarkaala olli kaleetati desa

Maati 5:25-26

57Kamma'ew Yesuusi ikide, “Ka kuli maana'e ishina wa likkeetoppa ca a upnaanni a kinnin ka a murri a kinnin? 58Oto paarkaalaatti ke xasasaneeyye ka tika taanynya opa ke dehaysannaaneeyye, a poroppa kittaneeyyeew, paarkaalaatti olli araarama' japaado; a taakiti isha taanynya turopa ke tita; taanynya ka turaayye, hidampayta turopa ke tuukka; hidampayta ka tika hida kelopa ke kalsha. 59In ke kiini, haka xoraatti isi qara pirto ka daasso maliiyyi, tikase a hida kela a sookto.”

Currently Selected:

Luqaasi 12: MaQu

Highlight

Copy