SAN MARCOS 6
6
Nazaret pueblopi Jesusta mana crishcamanta
(Mt 13.53-58; Lc 4.16-30)
1Jesús chaimanta rishpaca, paipac yachacuccunandicmi pai huiñashca llactaman cutimurca. 2Chaipica samana punzha*f** chayamucpimi, israelcuna*f** tandanacuna huasipi yachachi callarirca. Jesús yachachicucta tucui uyaccunaca mancharishpami, paicunapura cashna nishpa parlanacurcacuna:
—Cai runaca, ¿maipitac cai tucuitaca yachacurcayari? Cashna sumac yachaitapish, pi mana ruhuaipaccunata ruhuanatapish, ¿maijanshi paimanca yachachirca? 3Cai runaca Mariapac huahua carpinterollami. Jacobopac, Josepac, Judaspac, Simonpacpish huauquimi can. Paipac panicunapish, cai llactallapitacmi ñucanchichuan causan— nircacuna. Shina nishpami, Jesús yachachishcataca mana crircacuna.
4Chaimantami Jesusca paicunataca:
—Diosmanta huillactaca maipipish allimi chasquincuna. Ashtahuanpish quiquin llactapi causaccunami, quiquin familiamanta pacha callarishpa, mana uyashun nincuna— nirca.
5Chaimantami chai pueblopica, pi mana ruhuaipaccunataca mana ruhuarca. Maijan ungushcacunallatami, paicunapac uma jahuapi maquita churashpa alliyachirca. 6Jesusca chai gentecuna mana cricpimi, mai llaquirishpa, chai muyundic llactacunallapi yachachishpa puricurca.
Jesús paipac yachacuccunata huillachun cachashcamanta
(Mt 10.5-15; Lc 9.1-6)
7Chai q'uipami Jesusca paipac chunga ishcai yachacuccunata c'ayashpa, paicunataca supaicunata llucchicllacunata ruhuashpa, ishcai ishcaita cacharca. 8Paicunata cachacushpaca:
—Tauna caspillata aisashpa ringuichic. Ñanpi imata micunatapish, cullquitapish ama apanguichicchu. 9Ushutata churarishpapish, ama yanandic churanataca apanguichicchu— nirca.
10Jesusca caitapish nircami:
—Cancuna mai huasiman chayashpaca, shuc llactaman ringacaman chai huasillapi causacunguichiclla. 11Maijan llactapi cashpapish cancunata mana chasquishpa, cancuna huillashcata mana uyashun nicpica, llucshishpa ringuichiclla. Chai llactapi causaccuna llaquita apana cashcata ricuchingapacca, cancunapac chaquipi c'atirishca allpatapish chaspishpa shitashpa ringuichic#6.11 Shinallatac maijan quillcacunaca: “Taita Dios taripana punzhapica chai llactapi causaccunata Sodoma pueblopi, Gomorra pueblopi causashca millai gentecunata yallimi llaquichishca canga. Chaica chashnatacmi” nishpami yapachincuna.s— nirca.
12Jesús chashna nicpi yachacuccuna rishpaca:
—Juchayuc cashcamanta llaquirishpa, Diosman cutirichic— nishpami, gentecunamanca huillarcacuna.
13Shinallatac supai japishca gentecunamantapish, achcacunamantami supaicunata llucchishpa cacharcacuna. Shinallatac achca ungushcacunatapish, aceiteta umapi churashpa alliyachircacunami.
Bautizac Juan huañushcamanta
(Mt 14.1-12; Lc 9.7-9)
14Jesús imata ruhuashpa puricuctaca, tucui gentecunami maipipish parlanacurcacuna. Shina parlanacucta llactata mandac Herodes uyashpami:
—Bautizac Juanmi huañushcacunapuramanta causarimushca canga. Shina cashpami, paica pi mana ruhuaipaccunata ruhuacunga— nirca.
15Ashtahuanpish maijancunaca:
—Diosmanta ñaupa huillac Eliasmi canga— nircacuna.
Shuccunaca:
—Diosmanta ñaupa huillaccunapuramanta maijan shucmi canga— nircacuna.
16Shina parlanacucta Herodes uyashpaca:
—Chai runaca Juanmi canga. Paitaca ñucami cungata p'itishpa, huañuchichun mandarcani. Chai runami huañushcacunapuramanta causarimushca canga— nirca.
17Herodías huarmi nishcata uyashpami, Herodesca cadenahuan huatashpa Juantaca carcelpi churachishca carca. Herodías huarmica Herodespac huauqui Felipepac huarmimi carca. Herodesca chai huarmihuanmi apanacushpa causacurca. 18Juanca Herodestaca:
—Mandashcapi nishca shinaca, cambac huauquipac huarmita quiquin huarmita shina apashpa causanaca, mana allichu— nishcami carca.
19Chai Herodías huarmica Juanta mana ricunachishpa, huañuchisha nicushpapish mana huañuchi pudircachu. 20Juantaca cashcata ruhuac, Diospaclla causactami Herodesca yacharca. Chaimantami paita manchashpa, mana imata ruhuachishpa alli charirca. Imata ruhuanata yuyacushpapish, Juan huillacpica, cushilla uyacllami carca.
21Herodes huacharishca huata pactacpimi, fiestata ruhuacurca. Chai jatun micuimanmi Herodesca chai llactata mandaccunatapish, soldadocunata mandaccunatapish, Galilea llactata pushaccunatapish c'ayarca. Chai punzhami huarmi Herodiasca pai munacushcata pactachirca. 22Chaipica Herodiaspac huahua solterami chai c'ayashca gentecuna micucuc ucuman yaicushpa, bailai callarirca. Chashna bailacta ricushpami, Herodesca paihuan micucuccunandic cushicurca. Chaimantami mandac Herodesca chai solterataca:
—Can imata munashpapish mañailla. Can imata nicpipish, cushallami. 23Mana llullanichu, Diosmantami nini: Can mañacpica, ñuca mandacushcamanta chaupi llactatapish cushallami— nirca.
24Shina nicpimi:
—¿Imatatac mañasha?— nishpa, paipac mamaman tapungapac llucshirca.
Shina tapucpica paipac mamaca:
—Bautizac Juanpac umata mañaiyari— nirca.
25Shina nicpi, mandac Herodespacman chai soltera callpashpa rishpaca:
—Cunanllatac Bautizac Juanpac umata shuc platopi cui— nirca.
26Shina nishpa mañacpimi, mandac Herodesca mai llaquirirca. Ashtahuanpish: “Imata mañacpipish cushallami” nishpa, Diospac shutipi tucuipac ñaupapi nishcamantaca, “mana cushachu” ninataca mana nisha nircachu. 27Chaimantami mandac Herodesca Juanpac umata p'itishpa apamuchun, shuc soldadota cacharca. 28Shina nicpica, soldadoca carcelman rishpami, Juanpac umata p'itishpa, platopi apamushpa, chai solteraman curca. Paica paipac mamamanmi curca.
29Juanta huañuchishcata yachashpami, paipac yachacuccuna shamushpaca, cuerpota enterrangapac apashpa rircacuna.
Pichca huaranga yalli gentecunaman Jesús carashcamanta
(Mt 14.13-21; Lc 9.10-17; Jn 6.1-14)
30Chai q'uipami, Jesús huillachun cachashca alli huillaita huillaccuna cutimushpaca, yachachishcatapish, tucui imalla ruhuashcatapish Jesusman parlarcacuna. 31Jesús chaipi cacpimi, achca gentecuna rin, cutin puricurcacuna. Chaimantami ima shina micunallatapish mana pudishpa, Jesusca paipac yachacuccunallata:
—Jacuchic, ñucanchiclla pi mana ricuipacpi samarishun— nirca.
32Shina nishpami, paicunalla canoapi tiyarishpa cuchata chimbashpa, pi mana causana pambaman rircacuna. 33Paicuna ricuctaca achcacunami ricurcacuna, shinallatac Jesustapish ricsircacunami. Chaimantami tucui pueblocunamanta chaquillahuan callpashpa, paicunata mishashpa chaiman chayarcacuna. 34Canoamanta Jesús llucshishpaca, achca gentecunatami ricurca. Paicuna michic illac ovejacuna shina cacta ricushpami, Jesusca mai llaquirishpa, paicunaman tucui layata yachachi callarirca. 35Ña tutayamucpimi, Jesuspac yachacuccuna paipacman cuchuyashpaca:
—Ñami tutayamun. Caipica pipish mana causanchu. 36Cai gentecunaca micunatapish mana charincunachu. Paicunataca asha huasicuna tiyac, chai muyundic llactacunapi imallatapish randishpa micuchun cachaiyari— nircacuna.
37Shina nicpi Jesusca:
—Cancunallatac micunataca caraichic— nirca.
Shina nicpimi:
—¿Ishcai pasac denario*f** cullquihuanchu tandata randimugrichun ningui, imatacyari?— nishpa, paipac yachacuccunaca tapurcacuna.
38Shina tapucpica:
—Cancunaca, ¿mashna tandatatac charinguichic? Richic, ricumugrichic— nishpa, Jesusca paicunata cacharca.
Paicuna cutimushpaca:
—Pichca tanda, ishcai pescadollatami charishcanchic— nircacunami.
39Shina nicpi Jesusca:
—Chai gentecunata chai q'uihua pambacunapi asha asha raquirinacushpa tiyarichun nigrichic— nishpami, yachacuccunata mandarca.
40Chashna mandacpimi, tucui chaipi caccunaca maipica pasac, maipica pichca chunga tiyarircacuna. 41Chai q'uipami Jesusca pichca tandata, ishcai pescadota japirca. Shina japishpami, jahua pachata huichailla ricushpa, Taita Diosta pagui nishpa mañarca. Chai pichca tandata, ishcai pescadotaca chaupishpa chaupishpami, gentecunaman carachun paipac yachacuccunaman curca. 42Shina caracpimi, gentecunaca mana nicta micurcacuna. 43Paicuna puchuchishca micunataca chunga ishcai taza jundatami tandatapish, shinallatac pescadotapish yachacuccunaca tandarcacuna. 44Chai micuccunaca, c'aricunallami pichca huaranga carca.
Jesús yacu jahuata purishcamanta
(Mt 14.22-27; Jn 6.16-21)
45Chai q'uipaca, Jesusca paipac yachacuccunata canoapi huichicuchishpa, Betsaida puebloman cuchata chimbachun ñaupachishpa cachashpami, tucui gentecunataca “caya minchacaman” nirca. 46Chai q'uipami, Taita Diosman mañangapac Jesusca urcuman rirca. 47Ña tutayamucucpimi, paipac yachacuccunaca chaupi cuchata canoapi ricurcacuna. Jesusca paillami urcupi saquirirca. 48Paipac yachacuccunaca yalli huaira ñaupamanta jarcacpimi, canoata mana utca purichi pudircacuna. Chaitaca urcumantami Jesusca ricurca. Ña punzhayamucucpimi, Jesusca yacu jahuata shamushpa, paicunapac cuchuta ñaupashpa rigrircalla.
49Chashna yacuta puricucta ricushpami, “¡ayami canga!” yuyashpa, sinchita caparircacuna. 50Chaitaca tucui paipac yachacuccunami ricurca. Chaimantami munai mancharircacuna. Ashtahuanpish Jesusca paicunata rimashpaca:
—¡Upallaichic, ñucami cani! ¡Ama mancharichicchu!— nirca.
51Paipac yachacuccuna ricuc canoapi Jesús huichicucpica, huairapish casilla tucurcallami. Chai shina tucucpicarin ashtahuanmi mancharircacuna. 52Paicunaca tandata mirachishpa carashcatapish manarac yuyaipi charishpami, chashna mancharircacuna. Paicunapac yuyaica amsapirac shinami carca.
Genesaret llactapi achca ungushcacunata Jesús alliyachishcamanta
(Mt 14.34-36)
53Ña cuchata chimba ladoman chimbashpaca, Genesaret llactaman chayashpami, chai cucha patapi canoataca huatarcacuna. 54Chai canoamanta llucshincami, gentecunaca Jesusta ricsircacuna. 55Shina ricsishpami, chai muyundic llactacunapi huillangapac callparcacuna. Shina huillacpimi, Jesús maipi cacta uyashpaca, ungushcacunata huandushpa apamui callarircacuna. 56Maijan puebloman, maijan llactaman, maijan huasicunaman Jesús chayacpipish, pai chayana ñancunapimi ungushcacunataca churarcacuna. Shina churacpica, chai ungushcacunaca:
—Cambac churana puntallapipish tuparichun saquiyari— nishpa mañarcacuna.
Jesuspac churanapi tupariccunaca, tucuimi alliyarcacuna.
Currently Selected:
SAN MARCOS 6: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
