SAN MARCOS 5
5
Supai japishca runata Jesús alliyachishcamanta
(Mt 8.28-34; Lc 8.26-39)
1Paicuna chai cuchata ña chimbashpaca, Gerasa llactamanmi chayarcacuna. 2Canoamanta Jesús llucshincami, supai japishca runaca panteonmanta shamushpa, Jesustaca tupagrirca. 3Chai runaca panteonllapimi causac carca. Paitaca cadenacunahuan huatacpipish, mana cazucchu carca. 4Paipac chaqui maquita cadenacunahuan huatashcatapish, tauca cutin p'itishpa shitaclla cacpimi, paitaca pi mana huatashpa chari pudirca. 5Chai runaca tutapish, punzhapish urcucunapi, panteoncunapi sinchita caparishpa, paillatac rumicunahuan chugririshpami puric carca. 6Jesusta carumanta ricushcahuanmi, chai runaca callpamushpa paipac ñaupapi cungurirca. 7Chashna cungurishpaca:
—Jahua pachapi tiyac Diospac Churi Jesús ¿imatatac nic shamunguiyari? ¡Diosmantami mañani, ñucata ama llaquichichu!— nishpa, sinchita caparirca.
8Jesusca supaita: “¡Cai runamanta llucshi!” nicucpimi, chashna caparirca. 9Shina nicpi Jesusca:
—¿Ima shutitac cangui?— nishpami, chai runataca tapurca.
Shina tapucpimi chai runaca:
—Achcacuna cashcamanta, Huaranga Huaranga shutimi cani— nirca.
10Shinallatac:
—Supaicunata ama cai llactamanta llucchishpa cachaichu— nishpami, Jesusmanca mailla mañarca.
11Chai urcu cuchullapimi, achca cuchicuna micushpa puricurca. 12Shina cacpimi chai supaicunaca:
—Ñucanchictaca chai cuchicunapi yaicuchun cachashpa cuiyari— nishpa, Jesusman mañarcacuna.
13Shina nicpi Jesusca:
—Richiclla— nirca.
Chai runamanta supaicuna llucshishpaca, cuchicunapimi yaicugrircacuna. Shina yaicucpimi, chai cuchicunaca jahua quinraimanta cuchaman singushpa, yacupi aguarishpa huañurcacuna. Chai cuchicunaca ishcai huaranga shinami carcacuna.
14Chashna tucucta ricushpami, cuchicunata michiccunaca paicuna causana pueblopipish, llactacunapipish huillangapac callparcacuna. Shina huillacpimi, ima tucushcata ricungapac tucui gentecuna shamurcacuna. 15Jesuspacman chayamushpaca, achca supaicuna japishca runa alli tucushca tiyacuctami ricurcacuna. Chai runaca churanatapish alli churarishca, alli yuyaipimi tiyacurca. Chaita ricushpami, gentecunaca mancharircacuna. 16Supai japishca runa alli tucushcatapish, cuchicuna ima tucushcatapish ricuccunaca, chai shamuc gentecunamanca tucuimi parlarcacuna. 17Chaimantami Jesustaca:
—Cai ñucanchic llactamanta rilla— nircacuna.
18Jesusca ña ringapac canoapi tiyaricpimi, supaicunata llucchishca runaca:
—Ñucatapish pushashpa riyari— nishpa, mailla mañarca.
19Shina nicpipish, Jesusca chai runataca mana pushashpa risha nircachu, ashtahuanpish:
—Cambac huasiman rishpa, Dios canta llaquishpa ima shina alliyachishcata cambac familiacunaman huillagri— nirca.
20Shina nicpi chai runa rishpaca, paita Jesús ima shina alliyachishcatapish tucuitami, Decápolis nishca chunga pueblocunapi huillashpa purirca. Shina huillacpica, tucui gentecunami cushicuihuan mana amirircacuna.
Jairopac ushita Jesús causachishcamantapish,
shuc huarmita alliyachishcamantapish
(Mt 9.18-26; Lc 8.40-56)
21Jesusca canoapi tiyarishpa, cutinllatacmi chai yacuta chimbashpa rirca. Ña chimbapi chayashpaca, Jesús cucha patapi cacpimi, achca gentecuna paipacman tandanacumurcacuna. 22Chaimanmi, israelcuna*f** tandanacuna huasipi mandaccunapuramanta Jairo runapish shamurca. Chai runa Jesusta ricushpaca, paipac ñaupapimi cungurirca. 23Shina cungurishpami:
—Ñuca ushimi ña huañugricun. Shina huañugricucpipish, can rishpa, ñuca ushi ama huañuchun paipac uma jahuapi maquita churacpica, alliyashpa causangallami— nishpa, Jesusman mailla mañarca.
24Shina nicpimi, Jesusca chai runapac huasiman rirca. Shina ricucpica, achca gentecuna ñitirinacushpami, Jesushuan pacta rircacuna. 25Chai riccunapurapica, chunga ishcai huatata yahuar cacharirishpa ungushca causac huarmipish ricurcami. 26Chai huarmica chashna nanaihuan causacushpami, jambiccunapacman puricuclla carca. Shina jambiricushpallami, ima charishcatapish tucui tucuchirca. Ima jambipish mana alliyachicpimi, ashtahuan ashtahuan anchayashpa c'aticurca. 27Chai huarmica Jesús imalla ruhuacushcata uyashpami, gentecunapac chaupita rishpa, Jesuspac churanapica huashamanta tuparirca. 28Paica: “Jesuspac churanapi tuparishpaca, ña jambirishallami” yuyashpami tuparirca. 29Ña Jesuspac churanapi tuparicpica, yahuar shamunaca jarcarircallami. Shina jarcaricpimi, chai huarmica: “Ñami alli tucuni” nishpa yuyacurca. 30Shina alli tucucpi Jesusca: “Ñuca alliyachiclla cashcahuanca, ñami maijantachari alliyachini” nirishpami, huashaiman tigrarirca. Chashna tigrarishpaca:
—¿Maijantac ñuca churanapi tuparinchu, imami?— nishpami, chai tucui gentecunamanca tapurca.
31Shina tapucpimi, paipac yachacuccunaca:
—¿Manachu cai tucui gentecuna ñitirinacushpa, c'atishpa shamucuctaca ricungui? ¿Chaita ricushca jahuachu ‘¿pitac ñucapi tuparin?’ nishpa tapungui?— nircacuna.
32Ashtahuanpish maijan paipi tuparishcata yachangapacmi, Jesusca muyundicta ricuracurca. 33Chashna ricucucpimi, chai alliyac huarmica manchaihuan chucchushpa, Jesuspac ñaupapi cungurishpa, ima shina cashcataca tucuita huillarca. 34Shina huillacpimi Jesusca:
—Huahua, can crishcamantaca ñami alli tucushcangui. Cunanca cushicushpa rilla. Cambac ung:uimantaca jambirishcanguimi— nirca.
35Jesús shina nicucllapitacmi, mandac Jairopac huasimanta shuc runacuna shamushpa Jairotaca:
—Yachachictaca, ¿imapactac yanga p'iñachicungui? Cambac ushica ñami huañun— nishpa huillarcacuna.
36Shina nicta uyashpapish, Jesusca tandanacuna huasipi mandac runataca:
—Ama mancharichu. Ñuca alliyachinata crilla— nirca.
37Jesusca chai gentecunata mana pushashpa, Pedrota, Jacobota, chai Jacobopac huauqui Juanllata pushashpami, 38chai mandac runapac huasiman chayarca. Chaipimi gentecuna achcata caparinacushpa, huacanacucushcata ricurca. 39Ña Jesús huasi ucuman yaicushpaca:
—¿Ima nishpatac cancunaca caparishpa huacanacucunguichic? Huambraca mana huañushcachu, suiñucunllami— nirca.
40Jesús shina nicta gentecuna uyashpaca, asircacunami. Chaimantami Jesusca chai huasi ucumanta tucui gentecunata canzhaman llucchishpa cacharca. Chai huambrapac taita mamata, chai quimsa yachacuccunallata pushashpami, chai huambra siricuc ucumanca yaicurca. 41Ña chai huañushca huambrapacman chayashpaca, maquita japishpami:
—Talita, cumi— nirca. Chashna nishpaca: “Huambra, cantami jatari nini” nisha ninmi.
42Jatari nicpica, chai chunga ishcai huatata charic huambraca jatarishpa, puri callarircallami. Shina puricucta ricushpami, gentecunaca munai mancharircacuna. 43Jesusca:
—Paita causachishcataca, pacta piman huillanguichicman— nishpami mandarca. Chai q'uipaca:
—Cai huambraman micunata caraichic— nircami.
Currently Selected:
SAN MARCOS 5: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
