SAN MARCOS 2

Mana cuyuricta ruhuac ung:ui japishca runata

Jesús alliyachishcamanta

(Mt 9.1-8; Lc 5.17-26)

1Asha punzhacuna q'uipami, Jesusca cutinllatac Capernaum pueblopi cac shuc huasiman yaicurca. Jesús chai huasipi cacta yachashpami, 2achca gentecuna tandanacumurcacuna. Huasi pungu pambacunapipish, maita mana shayaripacmi tucurca. Chaipimi Jesusca quishpirinamanta alli huillaita huillarca. 3Chaimanmi mana cuyuricta ruhuac ung:ui japishca shuc runata, chuscu tucushpa chacanapi apamurcacuna. 4Chaipi achca gentecuna cashcamantami, Jesuspac cuchuman mana chayai pudircacuna. Chashna mana chayai pudishpami, huasi jahuaman*f** huichicushpa c'atata pascashpa, ungushca runataca huandumushcandic Jesuspacman uricuchircacuna. 5Tucui shunguhuan paicuna crishcata ricushpami Jesusca:

—Huahua, cambac juchacunataca ña perdonanimi— nirca.

6Mandashcacunata yachachiccunamantapish maijancunaca chaipimi carcacuna. Jesús chashna nicta uyashpaca, paicunapac shungupimi:

7—¿Ima nishpatac cai runaca chashna riman? Paica Dios tucushpami, Diosta p'iñachin. Juchacunata pipish mana perdonai pudinchu, Taita Diosllami juchacunata perdonan— nishpami yuyacurcacuna.

8Paicuna chashna yuyacucta yachashpami, Jesusca:

—¿Ima nishpatac cancunapac shungupica chashna yuyacunguichic? 9Cai ungushca runataca, ¿ima ninatac ashtahuan jahualla canga? ¿‘Cambac juchacunataca ña perdonanimi’ nina, mana cashpaca ‘jatari, canta huandumushca chacanata apashpa rilla’ ninachu ashtahuan jahualla canga?— nishpa tapurca. 10Runa Tucungapac shamushca*f** ñucaca cai pachapi juchacunata perdonaclla cashcata cancuna yachachunmi, cai runataca: 11‘Jatari, canta huandumushca chacanata apashpa, cambac huasiman rilla’ nini— nirca.

12Chashna nicpica, jatarishcahuanmi chai ungushca runaca paita huandumushca chacanata apashpa, tucui mashna ricucucpi llucshishpa rircalla. Jesús chashna ruhuacpica, tucui mashna mancharinacushpa, mana amirishpami: “Jaicapi mana ricushcatami ricunchic” nishpa, Taita Diostaca “allimari cangui” nircacuna.

Leví runata Jesús “jacu” nishcamanta

(Mt 9.9-13; Lc 5.27-32)

13Chai q'uipaca Jesusca cutin Galilea jatun cucha pataman ricpimi, achca gentecuna paipacman shamurca. Chai tucuicunamanmi Jesusca yachachirca. 14Chaimanta rishpami, Roma*f** llactaman impuestota chasquina mizapi Alfeopac churi Leví runa tiyacucta ricurca. Paita ricushpaca:

—Jacu ñucahuan— nicpimi, Levica jatarishpa, Jesusta c'atishpa rircalla.

15Chai q'uipami, Jesusca paipac yachacuccunandic Levipac huasipi micucurca. Chaipica impuestota japic tauca runacunapish, israelcuna*f** ch'icanyachishca caishuc juchayuc gentecunapish Jesushuan tandanacushpami micushpa tiyacurcacuna. Jesustaca achcacunami chaiman c'atishpa rircacuna. 16Mandashcacunata yachachiccunapish, fariseocunapish*f** Jesús chai impuestota japiccunahuan, shinallatac caishuc mana allita ruhuac gentecunahuan micucucta ricushpami, Jesuspac yachacuccunataca:

—¿Ima nishpatac cancunapac yachachicca impuestota japiccunahuanpish, ñucanchic ch'icanyachishca caishuc juchayuc gentecunahuanpish micucunyari?— nishpa tapurcacuna.

17Shina nicucta Jesús uyashpaca:

—Mana ungushcacunaca jambictaca mana mashcanchu, ashtahuanpish ungushcacunallami jambicta mashcancuna. Shinallatac ñucaca cashcata ruhuaccunataca mana c'ayac shamurcanichu, ashtahuanpish juchayuccunatami c'ayac shamurcani— nirca.

Jesús yachachishcaca mushuc cashcamanta

(Mt 9.14-17; Lc 5.33-39)

18Shuc punzhami Bautizac Juanpac yachacuccunapish, fariseocunapac*f** yachacuccunapish ayunacurcacuna. Chaita ricuccunami Jesuspacman shamushpaca:

—Bautizac Juanpac yachacuccunapish, fariseocunapac yachacuccunapish ayunacuncunami. Cambac yachacuccunaca, ¿ima nishpatac mana ayunancunayari?— nishpa tapurcacuna.

19Chashna tapucpimi Jesusca:

—Bodapi caccunaca Novio paicunahuan cacpica, ¿ayunangachu? Novio paicunahuan cacpica, ¡maitatac ayunangayari! 20Novio illaclla cana punzhacuna chayamucunmi. Chai punzhacunapimi ayunangacuna.

21Pipish mauca churanataca, mushuc pañuhuanca mana remendanchu. Chashna remendacpica, mushuc pañuca uchillayashpa, mauca churanataca ashtahuan lliquinmanmi.

22Shinallatac cunanlla ruhuashca vinotapish, caramanta ruhuashca mauca capachupica pi mana churanchu. Chashna churacpica, cunanlla ruhuashca vino mauca capachuta tucyachicpica, vinopish, capachupish tucuringami. Chaimantami cunanlla ruhuashca vinotaca, mushuc capachupi churana— nirca.

Jesuspac yachacuccuna samana punzhapi

trigo umata p'itishcamanta

(Mt 12.1-8; Lc 6.1-5)

23Samana punzhapimi,*f** Jesusca paipac yachacuccunandic trigo chagra chaupita ricurca. Chaita ricushpami, yachacuccunaca trigo umata p'iti callarircacuna. 24Chashna ruhuacucta fariseocuna*f** ricushpami Jesustaca:

—Uyai, cambac yachacuccunaca, ¿ima nishpatac mandashcapi nishca shina, samana punzhapi mana ruhuana cashcataca ruhuacuncuna?— nishpa tapurcacuna.

25Chashna nicpi Jesusca:

—Mandac David paihuan puriccunandic shuc punzha yarcaihuan cashpa, imata ruhuashcataca Dios quillcachishcapica, ¿manachu ricushcanguichic? 26Abiatar runa Israel*f** curacunata mandacui punzhacunapimi, Davidca Diosman mañana huasiman yaicushpa, Taita Diosman cushca tandacunata paihuan puriccunandic micurcacuna. Chai tandataca mandashcapi nishca shinaca, pipish mana micunallachu carca, curacunallami micuna carca— nirca.

27Chashnallatac Jesusca caitapish nircami:

—Samana punzhataca, gentecuna samarichunmi Taita Diosca churarca. Samana punzhataca gentecuna yuyarishpalla causachunca mana ruhuarcachu. 28Chaimanta Runa Tucungapac shamushca*f** ñucaca, samana punzha cacpipish mandai pudinimi— nirca.

Currently Selected:

SAN MARCOS 2: QXR96

Highlight

Copy