SAN MARCOS 14

Jesusta huañuchingapac yuyarinacushcamanta

(Mt 26.1-5; Lc 22.1-2; Jn 11.45-53)

1Levadura illac tandata micuna, pascua*f** punzha chayamungapac ishcai punzha tiyacpiracmi, curacunata mandac curacunapish, mandashcacunata yachachiccunapish:

—¿Ima shinatac pacalla Jesustaca japishpa huañuchinchic?— nishpa yuyaricurcacuna.

2Chashna yuyaricushpapish, maijancunaca:

—Gentecuna jatarishpa, ñucanchictarac imatapish ruhuanamantaca, cai fiesta punzhacunapica mana japishpa, casilla saquishunlla— nircacuna.

Jesuspac umapi mishquilla ashnacucta churashcamanta

(Mt 26.6-13; Jn 12.1-8)

3Jesusca Betania pueblopi lepra*f** ung:uimanta alliyashca Simonpac huasimanmi rirca. Jesús chaipi micushpa tiyacucpimi, shuc huarmica achca valic nardo mishquilla ashnacucta, alabastro rumimanta ruhuashca botellapi apashpa shamurca. Chai botella tapata pascashpami, mishquilla ashnacuctaca Jesuspac umapi churarca. 4Chashna churacpimi, chaipi caccunamanta maijancuna p'iñarishpaca:

—¿Ima nishpatac chai mishquilla ashnacuctaca yanga t'allinyari? 5Chaitaca quimsa pasac yalli denario*f** cullquipi c'atushpa, huacchacunaman cushpachari, alli canman carca— nishpami, chai huarmitaca sinchita rimarcacuna.

6Chashna p'iñarishpa rimacucpimi, Jesusca cashna nirca:

—¿Ima nishpatac cai huarmitaca chashna p'iñarishpa rimacunguichic? Saquichic, paica ñucamanca allitami ruhuashca. 7Mana imata charic huacchacunaca ima punzhapish mana illangachu. Paicunaman ima allita ruhuasha nishpaca ruhuanguichiclla, ashtahuanpish ñucaca cancunahuanca mana causacushallachu. 8Cai huarmica pai charicushcahuanca, pai ruhuai pudishcatami ruhuashca. Ñuca huañucpi enterrangapacmi, ñucapica ña utca cai mishquilla ashnacuctaca churashca. 9Tucui cai pachapi maipipish quishpirinamanta alli huillaita huillacushpaca, cai huarmi ñucapi mishquilla ashnacucta churashcatapish huillangacunami. Chashna huillacpica, tucui uyaccunami pai chashna ruhuashcata yuyaringacuna. Chaica chashnatacmi canga— nirca.

Jesusta Judas Iscariote japichisha nishcamanta

(Mt 26.14-16; Lc 22.3-6)

10Chai q'uipami, chunga ishcai yachacuccunapuramanta Judas Iscarioteca Jesusta japichingapac curacunata mandac curacunahuan parlanacungapac rirca. 11“Jesusta japichisha” nicta paicuna uyashpaca, cushicushpami cullquita cushun nircacuna. Chashna nishcamanta pachami, Judasca Jesusta ima shinapish japichinata mashcashpa, chai yuyailla puricurca.

Apunchic Jesús pai huañunata yuyarishpa, paipac

yachacuccunahuan micushcamanta

(Mt 26.17-29; Lc 22.7-23; Jn 13.21-30; 1 Co 11.23-26)

12Levadura illac tandata micuna fiesta callari punzhaca, pascuata*f** yuyarishpa, Diosman cushca pactalla ovejata*f** huañuchina punzhami carca. Chai punzhapimi Jesuspac yachacuccunaca:

—Pascua punzhata yuyarishpa can micuchunca, ¿maipitac allichigrichun ninguiyari?— nishpa tapurcacuna.

13Chashna nicpi paipac yachacuccunamanta ishcaita cachacushpaca, Jesusca cashnami nirca:

—Jerusalén puebloman richic. Chaiman chayashpaca, yacu puñu aparishca shuc runahuanmi tupanguichic. Chashna tupashpaca, paita c'atishpa ringuichiclla. 14Chai runa mai huasiman yaicucpica, chaipi causac huasiyuc runataca: ‘Ñucanchic Yachachicca: “¿Maijan ucupitac ñuca yachacuccunahuanca pascuata yuyarishpa micusha?” ninmi’ ninguichic. 15Cancuna chashna nicpica, chai huasiyucca ña allichishca shuc jatun ucutami altopi ricuchinga. Chai ucupi ñucanchic micungapac allichinguichic— nishpami cacharca.

16Shina nicpi yachacuccuna rishpa, puebloman chayacpica, Jesús nishca shinallatacmi pactarca. Chai huasipimi, pascuata yuyarishpa micunataca allichircacuna.

17Ña tutayacucpimi, Jesusca paipac chunga ishcai yachacuccunandic chai huasiman chayarcacuna. 18Ña mizapi tiyarishpa micucushpami, Jesusca paipac yachacuccunataca:

—Cancunapuramanta ñucahuan micucuc shucmi, ñucata huañuchiccunaman japichinga. Chaica chashnatacmi canga— nirca.

19Chashna nicpica llaquirinacushpami, caishuc chaishuc Jesusmanca:

—¿Canta japichicca ñucachu cani?— nishpa tapurcacuna.

20Chashna tapucpi Jesusca:

—Chunga ishcaipuramanta ñucahuan cai platollapitac tandata jucuchishpa micucucmi, ñucataca japichinga. 21Runa Tucungapac shamushca*f** ñucataca, Dios quillcachishcapi nishca shinallatacmi huañuchingacuna. Shina cacpipish ñucata japichic runaca, ¡aij, imachari tucunga! Chai runaca mana huacharishca cashpachari, ashtahuan alli canman carca— nirca.

22Chashna micucushpami, Jesusca tandata japishpa, Taita Diosta pagui nishpa mañarca. Chai tandata chaupishpa chaupishpa, paipac yachacuccunaman cushpaca:

—Japichic, caica ñuca aichami— nirca.

23Shinallatac vino vasotapish japishpa, Taita Diosta pagui nishpa mañashpa cucpica, tucuillami chai vasomantaca ubiarcacuna. 24Chai q'uipaca Jesusca:

—Caica, achcacunata quishpichingapac jichana ñuca yahuarmi. Chaihuanmi Taita Diosca shuc mushuc ari ninacuita pactachigrin. 25Taita Dios mandacucpi mushuc vinota ubiangacaman, cai uvas vinotaca cutinca manatac ubiashachu. Chaica chashnatacmi canga— nirca.

Jesusca Pedrota “ñucata mana ricsinichu ninguimi”

nishcamanta

(Mt 26.30-35; Lc 22.31-34; Jn 13.36-38)

26Shuc cantota cantashca q'uipami, paicunaca Olivos urcuman rircacuna. 27Chaiman chayashpami Jesusca:

—Dios quillcachishcapica: ‘Michicta huañuchishami. Ña huañuchicpica, ovejacunaca caita chaitami shiguaringacuna’ ninmi. Chashna nishca shinallatacmi, cancunaca ñucata saquishpa, caita chaita ringuichic. 28Shina cacpipish Taita Dios ñucata causachicpica, cancuna manarac Galilea llactaman ricpimi risha— nirca.

29Jesús chashna nicpimi Pedroca:

—Caishuccuna canta saquishpa ricpipish, ñucaca manatac saquishachu— nirca.

30Pedro shina nicpi Jesusca:

—Cunan tutallatacmi gallo manarac ishcai cutin cantacpi, ñucataca quimsa cutin ‘mana ricsinichu’ ningui. Chaica chashnatacmi canga— nirca.

31Chashna nicpipish Pedroca:

—Canhuan pacta huañuna cacpipish, ‘mana ricsinichu’ nishpaca manatac nishachu— nirca.

Caishuc yachacuccunapish chashnallatacmi nircacuna.

Getsemaní huertapi Jesús Taita Diosman mañashcamanta

(Mt 26.36-46; Lc 22.39-46)

32Getsemaní huertamanmi, Jesusca paipac yachacuccunandic rircacuna. Chaiman chayashpaca:

—Ñuca Taita Diosman mañangacaman, cancunaca caillapi tiyacuichic— nircami.

33Chashna nishpami Jesusca Pedrota, Jacobota, Juantapish pushashpa rirca. Shina rishpami, paipac shungupi llaquihuan cashpa, mai llaquiri callarirca. 34Chaimantami Jesusca:

—Ñuca shungupica huañuna nanaihuan shinami, munai llaquiricuni. Cancunaca ama suiñushpa, caillapi chaparacunguichic— nirca.

35Shina nishpaca, Jesusca ashata chainicman rishpami, pambapi tuparicta cumurishpa, Taita Diosman mañashpaca:

—Ima shinamanta cai llaquita mana apaipac cacpica, cunan ñucamanta anchuchi. 36Ñuca Taitalla, canmanca imapish ruhuaipacllami. Cai jayac ubiana shina llaquita ñuca mana apana cacpica, jarcaiyari. Shina cacpipish ama ñuca munashcata ruhuaichu, ashtahuanpish can munashcata ruhuai— nishpami mañarca.

37Jesús shina mañashpa paicunapacman cutimushpaca, suiñucucpimi tuparirca. Chaimantami Pedrotaca cashna nirca:

—Simón, ¿suiñucunguillachu? ¿Ashallatapish manachu riccharishca cai pudircangui? 38Cancunata imapish mana allita ruhuana yuyaicuna ama japichunca, riccharishpa Taita Diosman mañacuichic. Cancunapac shungu mañana yuyaita charicpipish, cancunapac cuerpoca shaicunllami— nirca.

39Jesusca cutin rishpaca, puntaman mañashca shinallatacmi Taita Diosman mañarca. 40Chashna mañashpa cutimushpaca, paipac yachacuccunataca cutin suiñucucpimi tuparirca. Paicunaca suiñuihuan huañucushpami, ñahuitapish mana pascai pudirca. Chaimantami imata mana nircacuna.

41Jesusca cai cutinhuanca ña quimsa cutin cutimushpami, paicunataca:

—¿Cancunaca samashpa suiñucunguichicllachu? Ña jatarichic, Runa Tucungapac shamushca*f** ñucataca, juchayuc runacunapac maquipi japichina horasca ña pactamushcami. 42Jatarishpa jacuchic, ñucata japichicca ñami chayamucun— nirca.

Jesusta japishcamanta

(Mt 26.47-56; Lc 22.47-53; Jn 18.2-11)

43Chashna nicucpiracmi, chunga ishcai yachacuccunapuramanta Judasca Jesuspacman tauca runacunahuan shamurca. Chai runacunaca Israel*f** curacunata mandac curacunapish, mandashcacunata yachachiccunapish, cunac yuyaccunapish cachacpimi, espadacunahuan, caspicunahuan Jesusta japingapac shamurcacuna. 44Jesusta japichingapac shamucuc Judasca:

—Maijantami ñuca muchani, chaita japishpa alli charirashpa apanguichic— nishpami, paihuan shamuccunamanca yachachishca carca.

45Jesuspacman Judas ña cuchuyashpaca:

—Yachachic, ¿allillachu cangui?— nishpami mucharca.

46Chashna muchacpimi, Jesusta japingapac shamushca runacunaca huaicashpa japircacuna. 47Ashtahuanpish Jesushuan caccunapuramanta shucca espadata llucchishpami, curacunata jatun mandac curapac servictaca huactashpa, rinrita p'itirca. 48Shina cacpimi, paita japingapac shamushca runacunata Jesusca:

—¿Ñucataca shuhuata shinachu japingapac cancunaca espadacunahuan, caspicunahuan shamunguichic? 49Punzhantami cancunallahuantac Diosman mañana huasipica yachachicurcani. Chaipi yachachicucpipish, ñucataca mana japircanguichicchu. Ashtahuanpish Dios quillcachishcapi nishca pactachunmi, cancunaca cashna japingapac shamushcanguichic— nirca.

50Chaipimi Jesuspac yachacuccunaca paillata saquishpa, tucui miticushpa rircacuna.

Shuc moso miticushpa callpashcamanta

51Jesusta apacucpica, shuc mosopish pañuhuan pillurishcami c'aticurca. Paitapish japircacunami. 52Chashna japicpica, pillurishca pañuta chaipi shitashpami, lluchulla atishpa callparca.

Mandaccunapuralla tandanacushcapacman Jesusta apashcamanta

(Mt 26.57-68; Lc 22.54-55; Jn 18.12-14,19-24)

53Jesusta japishpaca, curacunata jatun mandac curapacmanmi aparcacuna. Chaipica tucui curacunata mandac curacunapish, cunac yuyaccunapish, mandashcacunata yachachiccunapish tandanacushcami tiyacurcacuna. 54Pedroca caru carullatami c'atishpa, curacunata jatun mandac curapac huasi pungu pambacaman rirca. Chaiman yaicushpaca, Diosman mañana huasita cuidaccunahuanmi ninapi mashashpa tiyacurca.

55Curacunata mandac curacunapish, mandaccunapura tandanacushcacunapish Jesusta huañuchingapacmi, llullashpa huillaccunata c'ayachircacuna. Chashna cashpapish ima mana allita ruhuashcataca mana tarircacunachu. 56Achca runacuna Jesusmanta llullashpa huillashpapish, mana chai shinallatacca huillarcacunachu. 57Cutin maijancunaca jatarishpa, Jesustaca:

58—‘Diosman mañangapac runacuna ruhuashcalla cai huasitaca urmachishpa, quimsa punzhapica shuctac mana runacuna ruhuashca huasita shayachishallami’ nictami uyarcanchic— nishpami llullarcacuna.

59Chashna nishpapish, mana chai shinallatacca huillarcacunachu. 60Chaimantami curacunata jatun mandac curaca tucuipac chaupimanta jatarishpa:

—Cai tucuita nicucpipish, ¿manachu imata ningui?— nishpa, Jesusman tapurca.

61Chashna tapucpipish, Jesusca imata mana nishpa upalla carcallami. Chaimanta chai curacunata jatun mandac curaca Jesustaca:

—¿Canca sumac Diospac Churi Quishpichic Cristochu cangui?— nishpa, cutin tapurca.

62Chashna tapucpi Jesusca:

—Ari, chaimi cani. Runa Tucungapac*f** shamushca ñucataca, imatapish ruhuaclla Taita Diospac alli maquiman tiyacuctapish, p'uyupi jahua pachamanta shamucuctapish ricunguichicmi— nirca.

63Shina nicpica, curacunata jatun mandac curaca munai p'iñarishpami, paipac churanata lliquishpa, cashna nirca:

—¡Paita juchanchingapacca, piman ña mana ashtahuan tapunachu canchic! 64Pai Dios tucushpa, chashna nishpa Diosta p'iñachicushcataca cancunallatac ña uyashcanguichicmi. Paillatac chashna nishcamantaca, ¿imatatac ninguichic?— nishpa, chaipi caccunaman tapurca.

Shina tapucpica:

—¡Pai chashna rimashcamantaca, huañunami can!— nircacunami.

65Chashna nishpami, maijancunaca Jesusta t'ucai callarircacuna. Shinallatac ñahuita lienso pañuhuan huatashpami huactarcacuna. Chaimantaca:

—¡Maijantac canta huactanchic, huillai!— nircacunami.

Diosman mañana huasita cuidaccunapish, shinallatacmi Jesustaca ñahuipi huactarcacuna.

Pedroca Jesusta “mana ricsinichu” nishcamanta

(Mt 26.69-75; Lc 22.56-62; Jn 18.15-18,25-29)

66Pedroca ucu pungu pambapimi tiyacurca. Chaimanmi curacunata jatun mandac curata servic huarmicunapuramanta shuc huarmimi shamurca. 67Chai huarmimi Pedro ninapi mashashpa tiyacucta alli alli ricushpaca:

—Canpish Nazaret pueblomanta Jesushuan puricmi carcangui— nirca.

68Shina nicpi Pedroca:

—Paitaca mana ricsinichu. Imatatacpishchari nicungui, mana yachanichu— nirca.

Chashna nishpa chai huasi canzha punguman llucshicpica, ñapish galloca cantarcallami. 69Chai servic huarmillatacmi cutin Pedrota ricushpaca:

—Cai runaca paicunapurami— nishpa, caishuccunaman huillai callarirca.

70Shina nicpipish, Pedroca cutinmi:

—Cai runataca mana ricsinichu— nirca.

Chai q'uipallami, chaipi caccunaca cutin Pedrotaca:

—Galilea llactallamantatac cashcamantaca, canpish chaipurallatacmi cangui— nircacuna.

71Paicuna chashna nicpi Pedroca:

—¡Taita Diospac shutipimi nini, pimantatacpishchari rimacunguichic, chai runataca manatac ricsinichu!— nirca.

72Pai chashna nicucpica, cutinllatac galloca cantarcallami. Chai horasmi Pedroca Jesús puntaman: “Manarac gallo ishcai cutin cantacpimi, quimsa cutin ‘mana ricsinichu’ ningui” nishcataca yuyarirca. Pedroca chaita yuyarishpami, munai llaquirishpa huacarca.

Currently Selected:

SAN MARCOS 14: QXR96

Highlight

Copy