SAN MATEO 25

Chunga solteracunamanta chimbapurashpa Jesús parlashcamanta

1Chai punzhapica jahua pacha Taita Dios mandacucca, chunga solteracuna cazarac noviohuan tupangapac michata japichishpa, llucshic shinami canga. 2Chai chunga solteracunamantaca, pichcacunaca allichirishca, alli yuyaiyucmi carcacuna. Cutin pichcacunaca mana allichirishca, mana alli yuyaiyucchu carcacuna. 3Chai mana alli yuyaiyuccunaca michata apashpapish, aceite tucuricpi cutin churangapacca mana aparcacunachu. 4Ashtahuanpish caishuc pichca alli yuyaiyuccunaca, michatapish shinallatac aceite tucuricpi churangapacpish aparcacunami.

5Novio mana utca shamucpica, chai chunga solteracunaca suiñui aticpimi suiñurcacuna. 6Chashna suiñucucpimi, chaupi tuta shinataca: ‘¡Ñami novio shamun, tupangapac llucshichic!’ nishpa, caparishca uyarirca. 7Chashna caparicta uyashpami, chunga solteracunaca jatarishpa, michata allichi callarircacuna. 8Shina allichicushpami, chai mana alli yuyaiyuc solteracunaca chai alli yuyaiyuc solteracunataca: ‘Ñucanchic michacunaca ñami huañugrin. Asha aceiteta caraichic’ nircacuna. 9Shina nicpi chai alli yuyaiyuc solteracunaca: ‘Cancunaman caracpica, ñucanchicmanpish, cancunamanpish tucuringami. Chaimanta c'atuccunapacman rishpa, cancunallatac randigrichic’ nircacuna.

10Shina chai pichca solteracuna randingapac ricpica, ñapish novioca chayamurcallami. Chashna chayamucpica, pichca allichirishcacunaca noviohuan boda huasiman yaicucpica, punguta huichcarcacunami. 11Ña punguta huichcashca q'uipami, caishuc pichca solteracuna chayamushpaca: ‘Amito, punguta pascai’ nishpa c'ayarcacuna. 12Chashna c'ayacpimi, ucumanta novioca: ‘Cancunataca mana ricsinichu’ nirca. 13Chai shinallatac Runa Tucungapac shamushca*f** ñuca ima punzha, ima horas cutimunata mana yachashcamantaca, alli yuyaihuan chaparacuichic.

Chunga cullquimanta Jesús chimbapurashpa parlashcamanta

(Lc 19.11-27)

14Shinallatac jahua pacha Taita Dios mandacucca, shuc amo caru llactaman ringapac paipac serviccunata c'ayashpa, paipac cullquita mirachichun saquic shinami. 15Shina saquishpaca, paicuna ima shina ruhuaipacta ricushpami, shucmanca pichca talento*f** cullquita, shucmanca ishcai talento cullquita, shucmanca shuc talento cullquita cushpa rirca. 16Chai pichca talento cullquita japic runaca, chai japishca cullquihuanca randishpa c'atushpami, pichca talento cullquihuan mirachirca. 17Chai ishcai talento cullquita japic runapish, chai shinallatacmi mirachirca. 18Ashtahuanpish amo saquishca shuc talento cullquita japic runaca, allpata jutcushpami pambashpa churarca.

19Tauca huatacuna q'uipa chai amo cutimushpaca, paipac serviccuna mashna cullquita mirachishcatami tapurca. 20Chashna tapucpi, chai pichca talento cullquita japic runa chayashpaca: ‘Amito, caipimi can saquishca pichca talento cullquitaca, pichca talento cullquihuan mirachircani’ nirca. 21Chashna nicpi amoca: ‘Canca allitami ruhuashcangui. Ñucapacta alli yuyaihuan, allita ruhuacmi cangui. Ashallapipish allita ruhuashcamantaca, achcatami canmanca mingasha. Cunanca ñucahuan cushicungapac ucuman yaicui’ nirca.

22Ishcai talento cullquita japic runa q'uipata chayashpapish: ‘Amito, caipimi can saquishca ishcai talento cullquitaca, ishcai talento cullquihuan mirachircani’ nirca. 23Chashna nicpi amoca: ‘Canca allitami ruhuashcangui. Ñucapacta alli yuyaihuan, allita ruhuacmi cangui. Ashallapipish allita ruhuashcamantaca, achcatami canmanca cusha. Cunanca ñucahuan cushicungapac ucuman yaicui’ nirca.

24Shinallatac shuc talento cullquita japic runa chayashpaca: ‘Can amoca manapish cushpa chasquiclla, manapish tarpushpa tandachiclla, p'iña cashcata yachashpami, 25manchaihuan can saquishca cullquitaca allpata allashpa, pambashpa huacaichircani. Caica cambac cullqui’ nirca. 26Shina nicpi chai amoca: ‘¡Canca mana alli ñucapacta ruhuac, millai shinallatac q'uilla runami cangui! Ñuca manapish tarpushpa tandachic, manapish imata cushpa chasquic cashcataca yachashcanguimi. 27Shina cashcamantaca, ¿ima nishpatac cullquitaca bancollapipish mana churarcangui? Ñuca cutimushpaca, bancopi churashca cullquitaca mirashca cullquindicmi japiman carcani’ nirca. 28Chai q'uipaca chaipi caccunataca: ‘Chai cullquita quichushpa, chai chunga cullquita charic runaman cuichic. 29Achcata charicmanmi, ashtahuan cushca canga. Chashna cucpica, ashtahuanmi charinga. Cutin mana charicmantaca, ashalla charishcatapish quichushcami canga. 30Cai mana valic runataca, canzhaman llucchishpa purapi shitaichic. Chaipica huacaihuanmi quiru caniringa’ nirca.

Cai pachapi causaccunata taripana cashcamanta

31Runa Tucungapac shamushca*f** ñuca mandangapac cutimushpaca, sumaimana cashcahuan achicyachishpa, tucui angelcunandicmi shamusha. Chashna cutimushpaca, jatun sumaimana tiyarinapimi tiyarisha. 32Chashna tiyaricpica, tucui llactacunapi causaccunami ñucapac ñaupaman tandaringacuna. Ña tandaricpica, caishucmanta chaishucmanta shuc michic ovejacunata chivocunamanta ch'icanyachic shinami ch'icanyachisha. 33Chashna ch'icanyachishpaca, ovejacunataca ñuca alli maquimanmi churasha. Shinallatac chivocunataca, ñuca lluqui maquimanmi churasha. 34Ñuca alli maqui ladoman caccunataca: ‘Ñuca Taita alli nishcacuna, ñucahuan pacta mandangapac shamuichic, japinguichic. Cai mandanataca Diosmi cai pachata ruhuashca punzhamanta pacha, cancunaman cungapac allichishpa charicushca. 35Cancunami ñuca yarcaihuan cacpipish, cararcanguichic. Yacunayaihuan cacpipish, ubiachircanguichic. Maipi samarinata mana charicpipish, pozachircanguichic. 36Churana illac cacpipish, churachircanguichic. Ungushca cacpipish, carcelpi cacpipish, ricuc shamurcanguichic’ nishami. 37Shina nicpica, cashcata ruhuaccunaca: ‘Apunchic Jesús, ¿maipitac yarcaihuan cacpi cararcanchic, yacunayaihuan cacpi ubiachircanchic? 38¿Maipitac mana samarinata charicpi pozachircanchic, churana illaclla cacpi churanata curcanchic? 39¿Maipitac ungushca cacpi, mana cashpaca carcelpi cacpi ricuc shamurcanchic?’ ningacunami. 40Shina nicpi ñucaca: ‘Tucui caicunata cai yangalla shina ñuca huauquicunaman ruhuashpaca, ñuca quiquinmanmi ruhuarcanguichic. Chaica chashnatacmi’ nishami.

41Chai q'uipami ñucaca lluqui ladoman caccunataca: ‘Caimanta anchurichic, Taita Dios mana allichu canguichic nishcacuna. Diabloman, shinallatac paipacta ruhuac angelcunaman allichishca, mana huañuc ninamanmi shitashca cana canguichic. 42Cancunaca ñuca yarcaihuan cacpipish, mana cararcanguichicchu. Yacunayaihuan cacpipish, mana ubiachircanguichicchu. 43Samarinata maipi mana charicpipish, mana pozachircanguichicchu. Churana illac cacpipish, mana churachircanguichicchu. Ungushca cacpipish, carcelpi cacpipish, mana ricuc shamurcanguichicchu’ nishami. 44Chashna nicpi paicunaca: ‘Apunchic Jesús, ¿maipitac can yarcaihuan cacpi, yacunayaihuan cacpi, samarinata mana charicpi, churana illac cacpi, ungushca cacpi, carcelpi cacpi, imalla illashcataca mana curcanchic?’ ningacunami. 45Shina nicpica ñucaca: ‘Tucui caicunata cai yangalla shinacunaman mana ruhuashpaca, ñucamanmi mana ruhuarcanguichic. Chaica chashnatacmi’ nishami. 46Chashnacunaca, huiñaita jatun llaquimanmi shitashca canga. Ashtahuanpish cashcata ruhuaccunaca, huiñai causaitami japinga— nirca.

Currently Selected:

SAN MATEO 25: QXR96

Highlight

Copy