SAN LUCAS 6

Jesuspac yachacuccuna samana punzhapi

trigo umata p'itishcamanta

(Mt 12.1-8; Mr 2.23-28)

1Samana punzhapi*f** Jesús paipac yachacuccunahuan trigo chagra chaupita ricucpimi, paipac yachacuccunaca trigo umata p'itishpa, c'acushpa micui callarircacuna. 2Chashna ruhuacta maijan fariseocuna*f** ricushpaca:

—¿Ima nishpatac mandashcapi nishca shina, samana punzhapi mana ruhuana cashcataca ruhuacunguichic?— nishpa tapurcacuna.

3Chashna nicpimi Jesusca:

—Mandac David paihuan puriccunandic shuc punzha yarcaihuan cashpa, imata ruhuashcataca Dios quillcachishcapica, ¿manachu ricushcanguichic? 4Chashna yarcaihuan cashpaca Diosman mañana huasipi yaicushpami, Diosman cushca tandacunata paipish, paihuan puriccunapish micurcacuna. Chai tandataca mandashcacunapi nishca shinaca, pipish mana micunallachu carca, ashtahuanpish chaitaca curacunallami micuna carca— nirca.

5Shinallatac:

—Runa Tucungapac shamushca*f** ñucaca, samana punzha cacpipish mandai pudinimi— nirca.

Maqui chaquishca runata Jesús alliyachishcamanta

(Mt 12.9-14; Mr 3.1-6)

6Chai q'uipaca, samana punzhallapitacmi*f** Jesusca israelcuna*f** tandanacuna huasiman yaicushpa yachachicurca. Chai ucupica, alli lado maqui chaquishca shuc runami tiyacurca. 7Mandashcacunata yachachiccunapish, shinallatac fariseocunapish:*f** “¿Chai runata samana punzhapica alliyachinchu, imami?” nishpami, Jesustaca juchanchingaraicu chaparacurcacuna. 8Ashtahuanpish Jesusca paicuna chashna yuyacucta yachashpami, maqui chaquishca runataca:

—Jatari. Tucui caipi caccunapac chaupipi shayari— nicpi, chai runaca shayarircallami.

9Jesusca paita juchanchishun nicuccunataca:

—Cancunataca caillata tapusha: Mandashcacunapi nishca shinaca samana punzhapica, ¿imata ruhuanatac alli canga? ¿Allita ruhuanachu, mana cashpaca, mana allita ruhuanachu alli canga? ¿Huañuimanta quishpichinachu alli canga? Mana cashpaca, ¿causaita quichunachu alli canga?— nishpa tapurca.

10Chashna nishpaca, tucui chaipi caccunata ricushpami, chai runataca:

—Maquita chutai— nicpi, chai runaca chutarca.

Chashna chutacpica, maquica alli tucurcallami. 11Chashna alli tucucpipish, juchanchishun nicuccunaca munai p'iñarishpami: “Jesustaca, ¿imatatac ruhuashun?” nishpa yuyarinacurcacuna.

Chunga ishcai yachacuccunata Jesús acllashcamanta

(Mt 10.1-4; Mr 3.13-19)

12Chai punzhacunapimi Jesusca Taita Diosman mañangapac urcuman rirca. Chaipica tucui tutami Taita Diosman mañarca. 13Ña punzhayamucpimi, paipac yachacuccunata c'ayashpa, chunga ishcaicunata acllarca. Chai acllashcacunatami Jesusca: “Ñucamanta huillangapac acllashcacunami canguichic” nirca. 14Chai acllashcacunaca shucca Simonmi carca. Paillatatacmi Pedro shutita Jesusca shutichirca. Simonpac huauqui Andrespish carcami. Shinallatac Jacobo, Juan, Felipe, Bartolomepish carcami. 15Chashnallatac Mateo, Tomás, Alfeopac churi Jacobo, Simón Celote*f** nishca runapish carcami. 16Jacobopac huauqui Judaspish, shinallatac Judas Iscariotepish carcami. Q'uipamanca paimi Jesustaca huañuchiccunaman japichirca.

Achca gentecunaman Jesús yachachishcamanta

(Mt 4.23-25)

17Jesusca paipac yachacuccunahuan chai urcumanta shamushpaca, shuc pambamanmi chayamurca. Chai pambamanmi paipac yachacuccunapish, shinallatac Judea llactamantapish, Jerusalén pueblomantapish, mama cucha cuchulla Tiro llactamantapish, Sidón llactamantapish achca gentecuna Jesús yachachishcata uyangapac, shinallatac ung:uicunamanta alliyana munaihuanpish shamushca carcacuna. 18Chai shamuccunapuramanta maijancunaca supaicuna japishca cashcamantami llaquihuan carcacuna. Paicunataca Jesusca alliyachircami. 19Ima ung:uihuan caccunatapish alliyachiclla cashcata yachashpami, tucui gentecuna Jesuspi tuparina yuyailla carcacuna.

Huacaccunaca cushilla, cushicuccunaca llaquilla cana cashcamanta

(Mt 5.1-12)

20Chai q'uipami Jesusca paipac yachacuccunata ricushpa, cashna nirca: “¡Cushicuichic, huacchacuna! Jahua pacha Taita Dios mandacucca cancunapacmi.

21¡Cunan yarcaihuan caccunaca cushicuichic! Taita Dios cancunamanca mana nicta carangami. ¡Cunan cancuna huacaccunaca cushicuichic! Taita Dios cushichicpica, asinguichicmi.

22Runa Tucungapac shamushca*f** ñucata c'aticushcamanta pipish p'iñacpi, llucchishpa cachacpi, c'amicpi, ima millaita rimacpipish, ¡cushicuichic! 23Cancunata chashna llaquichicpipish, ¡cushicuichiclla! Taita Diosca jahua pachapica, cancuna japina cashcataca achcatami cunga. Diosmanta ñaupa huillaccunatapish, chai gentecunapac ñaupa taitacunaca chashnallatacmi llaquichic carcacuna.

24¡Aij, cancuna cunan punzha charishcallahuan cushicuccunalla, ñami cancunaca cushicushcanguichic! 25¡Aij, cancuna cunan mana nicta micushpa causaccunalla, shuc punzhaca yarcaihuan imachari tucunguichic! ¡Aij, cancuna cunan cushicushpa asiccunalla, shuc punzhaca achca llaquihuanmi huacanguichic! 26¡Aij, tucui gentecunapac ñaupapi alli nishcacunalla, imachari tucunguichic! Chai gentecunapac ñaupa taitacunapish, llullashpa huillaccunataca chashnallatacmi alli nircacuna.

P'iñaccunata c'uyana cashcamanta

(Mt 5.38-48; 7.12)

27Shina cacpipish cunan caipi ñucata uyaccunataca cashnami nini: Cancunata p'iñaccunata c'uyanami canguichic. Shinallatac mana ricunachiccunamanpish allita ruhuanami canguichic. 28Cancunata llaqui tucuchun niccunamanpish, Taita Dios allicunata cuchun ninami canguichic. Shinallatac c'amiccunamantapish Taita Diosman mañanami canguichic. 29Maijanpish canta shuc lado jazhapi huactacpica, caishuc ladopipish huactachun saquinguilla. Shinallatac maijanpish cambac jahualla churanata quichucpica, ucu churanatapish apachun saquinguilla. 30Maijan imata mañacpipish, cunguilla. Shinallatac maijan canmanta imata quichucpipish, upalla saquinguilla. 31Ima shinami shuccuna cancunaman allita ruhuachun ninguichic, shinallatac cancunapish shuccunamanca allita ruhuaichic.

32Cancunata c'uyaccunallata c'uyashpaca, ima allita mana ruhuanguichicchu. Diosta mana cazucccunapish paicunata c'uyaccunataca c'uyancunallatacmi. 33Allita ruhuaccunallata c'uyashpaca, ima allita mana ruhuanguichicchu. Diosta mana cazuccunapish chashnaca ruhuancunallatacmi. 34Imatapish cutichingallami yuyashpa, imatapish mañachishpaca, ima allita ruhuanguichicchu. Diosta mana cazuccunapish chashnaca mañachinacuncunallami. 35Ashtahuanpish cancunaca p'iñaccunata c'uyashpami, allita ruhuana canguichic. Imata mañachishpaca, chaimanta imata japinataca mana yuyanachu canguichic. Chashna ruhuashpami, cancunaca allicunata japinguichic. Jahua pachapi causac Taita Diospac huahuacunapish canguichicmi. Taita Diosca mana paita pagui niccunatapish, millaicunatapish llaquinmi. 36Chashnallatac cancunapac Taita Dios ima shinami llaquin, chai shinallatac cancunapish shuccunata llaquiccuna caichic.

Shuccunata mana juchanchina cashcamanta

(Mt 7.1-5)

37Ama shuccunata mana alli nishpa juchanchichicchu. Shina mana juchanchicpimi, Taita Diospish cancunataca mana juchanchinga. Pitapish llaquiman cachangapacca ama juchanchichicchu. Shina mana juchanchicpimi, Taita Diospish cancunataca juchanchishpa, jatun llaquiman mana cachanga. Imatapish mana allita ruhuashcataca perdonanami canguichic. Chashna ruhuacpimi, Taita Diospish cancunapac juchacunataca perdonanga. 38Imatapish shuccunamanca cunami canguichic. Chashna ruhuacpica, Taita Diospish cancunamanca cungami. Paica alli ricushpami, jatun coshtalpi alli cuyuchishpa, jundachishpa t'alliricucta shina cunga. Caishuccunaman ima shinami cunguichic, chashnallatacmi cancunamanpish cunga” nirca.

39Jesusca yuyaita japina cai parlocunatapish parlarcami: “Ñahui mana ricuc runaca caishuc mana ricuc runataca, ¿ima shinatac pushangayari? ¿Manachu ishcaitac mai jutcupi urmanmancuna? 40Shinallatac yachacucca yachachictaca mana ashtahuan yalli yachacchu. Shina cashpapish tucuita alli yachacushpaca, paita yachachic shinallatacmi tucunga.

41¿Ima nishpatac canca mana quiquin ñahuipi tiyacuc caspita ricushpa, shucpac ñahuipi tiyacuc ucshatarac ricunguiyari? 42Cambac ñahuipi caspi tiyacucta manarac ricushpaca, ¿ima shinatac cambac huauquitaca: ‘Shuyai, cambac ñahuipi tiyacuc ucshata llucchisha’ ninguiyari? Mishqui shimi, jayac shungu, cambac ñahuipi tiyacuc caspitarac llucchi. Chashna llucchishpami, ña alli ricushpa, cambac huauquipac ñahuipi tiyacuc ucshataca llucchingui.

“Yuraca ima yura cashpapish p'ucushpami ricuchin” nishcamanta

(Mt 7.17-20; 12.34-35)

43Alli yuraca mana allitaca mana p'ucunchu. Shinallatac mana alli yurapish allitaca mana p'ucunchu. 44Yuraca ima yura cashpapish p'ucushpami ricuchin. Higoca casha yurapica mana p'ucunchu. Shinallatac uvaspish chini yurapica mana p'ucunchu. 45Shinallatac alli runaca paipac shungupi alli yuyaicunata charishcamantami, allicunallata riman. Chashnallatac mana alli runaca paipac shungupi millai yuyai junda cashpami, mana allicunata riman. Tucui imata shimi rimashcaca, shungupi ima tiyashcatami ricuchin.

Ishcai huasichiccunamanta Jesús chimbapurashpa parlashcamanta

(Mt 7.24-27)

46Manapish ñuca mandashcata pactachicushpaca, ¿ima nishpatac ñucataca ‘Apunchic Jesús, Apunchic Jesús’ nicunguichicyari? 47Maijanpish ñucapacman shamushpa, ñuca ima nishcata uyashpa pactachictaca ima shina cashcatami nigrini: 48Paica ucuta allashpa, sinchi rumi allpapi huasita ruhuac runa shinami. Chashna alli ruhuashca huasipi achca yacu shamushpa huactarishpapish, callarimanta ucuta allashpa, jatun rumi jahuapi alli ruhuashca cashcamantaca, mana cuyuchi pudinchu. 49Maijanpish ñuca ima nishcata uyashpapish mana pactachicca, shuc runa paipac huasita mana ucuta allashpa, c'abia allpapi ruhuac shinami. Chashna ruhuashca huasitaca achca yacu shamushpa huactarishpaca, tucui urmachinllami” nirca.

Currently Selected:

SAN LUCAS 6: QXR96

Highlight

Copy