SAN LUCAS 1

Teofiloman Lucas quillcashcamanta

1Cai ñucanchic llactapi imalla tucushcacunataca, ñucanchicpuramanta achca uyaccunami callarimanta quillcasha nicurcacuna. 2Chai tucui imalla tucushcata callarimanta quiquin ñahuihuan ricushpa, alli huillaita huillashpa puriccunami, ñucanchicmanca alli yachachircacuna. 3Ñucanchic alli nishca Teofilolla, ñucapish tucui chaicunata callarimanta alli tapushpa chashnatac cashcata yachashpami, canman parlanaca alli cacpi, tucui ima tucushcataca sumacta quillcashpa yachachini. 4Canman yachachishcacunaca allita cashcata ashtahuan alli yachachun nishpami, quillcashpa cachani.

Bautizac Juan huacharinata ángel huillashcamanta

5Judea llactata jatun mandac Herodes mandacui punzhacunapimi, Zacarías curapish causarca. Chai curaca ñaupa Abías curacunapurami carca. Zacariaspac huarmica Elisabetmi carca. Paipish Aarón curapac huahua huahuami carca. 6Paicunaca cusandic huarmindictac Diospac ñaupapi alli causaccunami carca. Pipish mana imata juchanchipac, Dios mandashcacunatapish, yachachishcacunatapish tucuita alli pactachiccunami carca. 7Elisabetca huahuata charisha nishpapish, manatac charircachu. Chaimantami huahua illaclla carcacuna. Ña yuyaccunapishmi carcacuna.

8Chai punzhacunapimi, Zacarías curacunapuramanta Diosman mañana huasipi Diospacta ruhuana pactarca. 9Curacuna ruhuac cashca shinallatac, Diosman mañana huasipi ruhuangapac suerteta shitacpica, Diospaclla cac ucuman yaicushpa altarpi inciensota rupachinaca Zacariasmanmi urmarca. 10Chaimanta pai inciensota rupachicucpica, canzhapi cac tucui gentecunaca Taita Diosmanmi mañacurcacuna. 11Inciensota rupachina altar alli ladomanca, Mandac Taita Dios cachashca angelmi Zacariasman ñapish shayacuc ricurircalla. 12Chai angelta ricushpaca, Zacariasca manchaihuan imata mana nishpami, upalla saquirirca. 13Chashna mancharicucpimi, angelca cashna nirca:

—Zacarías, ama mancharichu. Can mañashcataca Taita Diosca uyashcami. Cambac huarmi Elisabetca c'ari huahuatami charigrin. Chai huahuataca Juan shutitami shutichingui. 14Pai huacharicpica, mai cushicunguimi. Shinallatac shuccunapish achcacunami cushicungacuna. 15Taita Diosca paitaca jatun ningami. Paica vinotapish, ima machachic yacucunatapish mana ubiangachu. Mamapac huicsamanta pachami, Diospac Espirituhuan canga. 16Paica achca israelcunatami,*f** paicunata Mandac Taita Diosmanta caruyashpa puricuccunata cutichimunga. 17Chashnallatac Quishpichicta ñaupashpami ringa. Ñaupa huillac Elías shina, Diospac Espirituhuan cashpami, imatapish ruhuaipaclla canga. Chashna cashpami, taitacuna huahuacunahuan p'iñanacushcatapish alli shunguta ruhuanga. Mana uyashun nic, sinchi shungu gentecunatapish alli causachun, shinallatac allita ruhuaccuna cachunmi, yuyaita cunga. Chashna ruhuacpimi, Quishpichic shamucpica, alli chasquinalla tucungacuna— nirca.

18Ángel chashna nicpi Zacariasca:

—Ñucapish, ñuca huarmipish ña yuyaccunami canchic. ¿Ima shinatac can huillashca pactanataca yachashayari?— nirca.

19Chashna nicpi, angelca cashnami nirca:

—Ñucaca Diospacta ruhuangapac, paipac ñaupapi shayacuc ángel Gabrielmi cani. Paimi canman cai alli huillaita huillachun cacharca. 20Ñuca huillashcaca pactana punzhapitacmi pactanga, ashtahuanpish canca ñuca huillashcata mana crishcamantaca, cunanca cambac huahua huacharingacamanmi, upayashpa imata mana rimai pudingui— nirca.

21Chashna rimanacungacamanca, canzhapi cac gentecunaca:

—Diospaclla cac ucupica Zacariasca, ¿ima nishpatac unaiyanyari?— nishpa, mancharinacushpa shuyacurcacuna.

22Zacarías ña canzhaman llucshishpaca, imata mana rimai pudishpami, ima tucushcataca maquihuan seña ruhuashpalla huillarca. Chashna mana rimai pudishpa, upa saquiricpimi:

—Diospaclla cac ucupimi, ¿imatachari ricushca yuyachin?— nircacuna.

23Diosman mañana huasipi ima ruhuana cashca punzhacuna ña tucuricpimi, Zacariasca paipac huasiman rirca. 24Chai q'uipami, paipac huarmi Elisabetca huicsayuc tucushpa, pichca quillacunata mana maiman llucshishpa huasillapi cashpaca: 25“ ‘Mana huahuayuc tucun’ nishpa pipish ashtahuan ama rimachunmi, Taita Diosca ñucata llaquishpa, chashna ruhuashca” nishpami yuyacurca.

Jesús huacharinata ángel huillashcamanta

26Elisabet ña sucta quillata huicsayuc cacpimi, Taita Diosca ángel Gabrielta Galilea llactapi cac Nazaret puebloman cacharca. 27Chaipica, Davidpac huahua huahuapuramanta Josehuan cazarangapac ari ninacushca, María solteramanmi huillangapac rirca. 28María maipi cashcaman ángel yaicushpaca:

—Taita Dios canhuan cashcamanta cushicui, María. Canca tucui huarmicunamanta yalli, Dios alli nishcami cangui— nirca.

29Chashna nicpi, Mariaca angelta ricushpa mancharishpami:

—¿Ima nishpatac shina ninchu, imami?— nishpa yuyacurca.

30Chashna yuyacucpi angelca:

—María, ama mancharichu. Cantaca Taita Diosmi mai c'uyashpa acllashca. 31Canca huicsayuc tucushpa, shuc c'ari huahuatami charigringui. Chai huahuataca JESÚS shutitami shutichingui. 32Paica alli nishcami canga. Jahua pachapi causac Diospac Churi nishcapishmi canga. Mandac Taita Diosca paitaca paipac ñaupa taita Davidta shina, jatun mandactami ruhuanga. 33Paica ñaupa taita Jacobopac huahua huahua israelcunatami*f** huiñaita mandanga. Pai mandanaca manatac tucuringachu— nirca.

34Ángel shina nicpi Mariaca:

—¿Ima shinatac chashna cangayari? Manarac pi c'arillahuanpish canichu— nirca.

35Chashna nicpi, angelca cashnami nirca:

—Jahua pachapi causac, imatapish ruhuaclla Diospac Espiritumi, cantaca p'uyu shina llandunga. Chaimanta can charishca huahuaca, ima jucha illacmi canga. Diospac Churi nishcapishmi canga. 36Mana huahuayuc cambac familia Elisabetca, yuyac cashpapish ña sucta quillatami c'ari huahuata huicsayuc tucushca. 37Taita Diosmanca imapish ruhuaipacllami— nirca.

38Chashna nicpi Mariaca:

—Shinashpaca, can nishca shina ñucataca ruhuachunlla. Ñucaca Mandac Taita Diospacta ruhuacmi cani— nicpi, angelca paipac ñaupamanta rircallami.

Elisabetta María ricugrishcamanta

39Chai punzhacunapi Mariaca, Judea llactapi tiyac shuc pueblomanmi utca chayana yuyailla rirca. Chai puebloca urcucuna chaupipimi carca. 40Chaiman chayashpaca, Zacariaspac huasiman yaicushpami Elisabettaca:

—¿Allillachu cangui?— nirca.

41María chashna nincami, Elisabetpac huicsapica huahua cuyurirca. Shinallatac Diospac Espiritupish Elisabetpacman shamurcami. 42Chaimantami sinchihuan cashna nirca:

—Canca tucui huarmicunamanta yalli, Taita Dios alli nishcami cangui. Cambac huicsapi cac huahuapish, alli nishcami. 43¿Ñuca ima cacpitac, ñucata Mandacpac mamaca ricuc shamunguiyari? 44Can ‘allillachu cangui’ nincami, ñuca huicsapi cac huahuaca cushicuihuan cuyurirca. 45Taita Dios ima nishca pactana cashcata crishcamantami, canmanca mai cushicui— nirca.

46Chashna nicpi, Mariaca cashnami nirca:

“Ñucaca tucui shunguhuanmi Taita Diostaca

‘allimari cangui’ nicunilla.

47Ñuca almapish ñucata Quishpichic

Diosmantami cushicun.

48Ñuca Taita Diosta servic cacpimi,

imapac mana caipac cacpipish,

Taita Diosca llaquishpa acllashca.

Chaimantami cunanmanta pacha ñucataca,

tucui gentecuna ‘allimari cangui’ nicungacunalla.

49Imatapish ruhuaclla Taita Diosmi ñucapica,

pi mana ruhuaipaccunata ruhuashca.

Paica ima jucha illacmi.

50Taita Diosca maijanpish paita manchashpa

cazuccunataca llaquicungallami.

51Paica imatapish ruhuac

cashcahuanmi ruhuashca.

Shungupi jatun tucushcacunapac

yuyaicunatapish chingachishcami.

52Jatun mandaccunataca

paicuna mandacushcamanta anchuchishpa,

uchilla shina, imapac mana caipaccunatami

jahuaman churashca.

53Yarcaihuan caccunamanca,

allicunatami achcata carashca.

Chayuccunataca, chushac maquitami

cutichishpa cachashca.

54Llaquinata mana cungarishpami,

paipacta ruhuac israelcunamanca*f**

allicunata cushpa ayudashca.

55Chai allicunataca

ñucanchic ñaupa taita Abrahammanpish,

paipac huahua huahuacunamanpish

huiñaicaman ruhuasha

nishca shinallatacmi pactachishca” nirca.

56Mariaca Elisabetpac huasipica quimsa quilla shinata cashpami, paipac huasiman cutirca.

Bautizac Juan huacharishcamanta

57Elisabet sajuarina punzha ña pactacpica, c'ari huahuatami charirca. 58Chaita yachashpaca, paipac cuchullapi causaccunapish, paipac familiacunapish ricungapacmi rircacuna. Paicunaca Taita Dios paita llaquishpa allita ruhuashcamantami, Elisabethuanca cushicurcacuna. 59Ña pusac punzha tucucpica, chai huahuata circuncisionta*f** ruhuachingapacmi rircacuna. Chashnami, taitapac shuti Zacariasllatatac shutichishun nircacuna. 60Shina nicucpipish Elisabetca:

—Mana chai shutichu canga, Juan shutimi canga— nirca.

61Chashna nicpica:

—¿Ima nishpatac chashna shutichisha ninguiyari? Cancunapurapica, Juan shutica mana tiyanchu— nircacuna.

62Chaimantami taitata maquihuan señallapi tapushpa: “Canca, ¿ima shutita churasha ningui?” nircacuna. 63Shina tapucpi, taita Zacariasca uchilla tablata mañashpa: “Juan shutimi canga” nishpa quillcacpica, tucui chaipi caccunami mancharishpa, mana amirircacuna. 64Chashna quillcancami, c'allu huatarishcamanta cachariricpi, Zacariasca Taita Diosta “allimari cangui” nircalla. 65Chashna tucucpica, tucui cuchullapi causaccunapish munaimi mancharircacuna. Chashna tucushcataca gentecuna parlanacucpica, Judea llacta urcucunapi causaccunapish tucuimi yachac chayarcacuna. 66Tucui chaita uyaccunami shungupi huacaichishpa:

—Cai huahua jatunyashpaca, ¿ima layashi canga?— nishpa tapunacurcacuna.

Chai huahuataca Taita Diosmi paipac maquipi huacaichicushca.

Chai huahua ima shina canata Zacarías huillashcamanta

67Juanpac taita Zacariasca Diospac Espíritu yuyaita cucpimi, Dios ima nishcata huillashpa cashna nirca:

68“Ñucanchic israelcunata*f**

Mandac Taita Diosca allimari.

Paimi pai acllashcacunata

quishpichingapacca shamushca.

69Diospacta ruhuac Davidpac

huahua huahuapuramantami,

imatapish ruhuaclla Quishpichicta

ñucanchicmanca cushca.

70Paimanta huillac,

paipaclla causac huillaccunamanmi,

puntamanca huillachishca carca.

71Paicuna huillashca shinallatac,

ñucanchictaca tucui p'iñashpa

mana ricunachiccunapac maquimantami,

Taita Diosca quishpichinga.

72Ñaupa taitacunata llaquishpa,

paipac sumac ari nishcataca

mana cungarishpa pactachicungallami.

73Pai Diosllatacmi

ñucanchic ñaupa taita Abrahammanca:

‘Cai mana llullashpa ari nishcataca

pactachicushallami’ nishca carca.

74Pai nishca shinallatac,

ñucanchicca imata mana manchashpa,

paipacta ruhuac cachunmi,

ñucanchicta p'iñaccunapac maquimanta cacharichinga.

75Shinallatac tucui ñucanchic causaipi

paipac ñaupapi allillata ruhuashpa,

mana juchallishpa causachunmi,

chashna cacharichinga.

76Ñuca huahualla,

canca jahua pachapi causac Taita Dios

ima nishcata huillacmi cangui.

Canmi Quishpichic purina ñanta

allichic shina, ñaupashpa ringui.

77Can rishpaca,

pai acllashca gentecuna

juchacunata ruhuashcamanta perdonashca cachunmi,

quishpirinamantaca yachachingui.

78Ñucanchic Taita Diosca

c'uyashpa llaquishcamantami,

tutamanta inti achicyamucuc shina,

quishpirinata jahua pachamanta cachanga.

79Huañuna manchaihuan

amsapi causaccunata achicyachingami.

Ñucanchictaca sumac causai

ñanta pushangami” nirca.

80Chai huahua ña huiñashca q'uipaca, Taita Diosmanta ashtahuan yachacushpami, israelcunaman huillana punzhacuna pactangacaman shitashca pambacunapi causarca.

Currently Selected:

SAN LUCAS 1: QXR96

Highlight

Copy