SAN JUAN 6

Jesús pichca huaranga yalli gentecunaman carashcamanta

(Mt 14.13-21; Mr 6.30-44; Lc 9.10-17)

1Jesusca chai q'uipaca Galilea jatun cucha chimbanicmanmi rirca. Chai cuchallatacmi Tiberias shutipish can. 2Pi mana ruhuaipaccunata ruhuashpa ungushcacunatapish alliyachishcata ricushpami, achca gentecuna paita c'atishpa rircacuna. 3Shina cacpimi Jesusca paipac yachacuccunandic urcuman rishpa, chaipi tiyarirca. 4Israelcunapac pascua*f** fiestaca ñami chayarca. 5Jesusca achca gentecuna c'aticucta ricushpami Felipetaca:

—Cai tucui gentecunaman carangapacca, ¿maipitac micunata randishun?— nirca.

6Chaitaca Felipe ima nicta uyangaraicullami, chashnaca nirca, ashtahuanpish Jesusca imata ruhuana cashcataca ña yacharcami. 7Shina nicpi Felipeca:

—Ishcai pasac denario*f** cullquihuan randishca tandapish, shinachari asha ashalla carangapacllapish mana pactangachu— nirca.

8Chaimantami Simón Pedropac huauqui caishuc yachacuc Andresca:

9—Caipimi shuc huambra pichca cebada tandata, shinallatac ishcai pescadotapish charicun. Caillaca cai tucui gentecunamanca, ¿imatac pactangayari?— nirca.

10Shina nicpi Jesusca:

—Gentecunata tiyarichun nichic— nicpi tiyachircacunami. Chaipi tiyariccunaca c'aricunallami pichca huaranga shina carca. Chai pambapica achca q'uihuami tiyarca. 11Jesusca chai tandata japishpa, Taita Diosta pagui nishpaca, yachacuccunamanmi chaipi caccunaman carachun curca. Pescadota japishpapish, chashnallatacmi ruhuarca. Chashna ruhuacpica, mana nictami micurcacuna. 12Gentecuna mana nicta micushca q'uipami, Jesusca paipac yachacuccunataca:

—Ama yangamanta cachun, tucui puchushcacunata tandachichic— nirca.

13Paicuna tandachishpaca, chunga ishcai taza jundatami chai pichca cebada tandamanta puchushcataca tandachirca. 14Jesús chai shina pi mana ruhuaipacta ruhuacta gentecuna ricushpaca:

—Cai runaca cai pachaman shamuna cashca Diosmanta huillactacmi— nircacuna.

15Jesusca gentecuna paicunata mandachun pushagricushcata yachashpami, cutinllatac urcupi pailla cangapac rirca.

Jesús yacu jahuata purishcamanta

(Mt 14.22-27; Mr 6.45-52)

16Ña tutayamucucpica, cutinllatacmi Jesuspac yachacuccunaca yacu cuchaman shamurcacuna. 17Chaipimi canoaman huichicushpa, Capernaum puebloman ringapac cuchata chimbai callarircacuna. Paicuna chashna ricucpica, ñami tutayarca. Jesusca manarac paicunapacman urcumanta cutimurcachu. 18Chaipimi, cucha yacuca yallimana huairahuan yallita cuyuri callarirca. 19Ña shuc pichca huaranga metro shina caruta ricushpami, yachacuccunaca Jesús yacu jahuata purishpa, paicunapacman cuchuyacucta ricurcacuna. Chaita ricushpami, munai mancharircacuna. 20Shina mancharicucpimi Jesusca:

—Ama mancharichicchu, ñucami cani— nirca.

21Shina nicpimi, yachacuccunaca cushicushpa canoaman huichicuchircacuna. Chashna huichicuchincami, paicuna maiman ricushcamanca ña chayarcacunalla.

Gentecuna Jesusta mashcashcamanta

22Cayandic punzhaca chai yacu patapi saquiric gentecunaca chaipi cac shuclla canoapi yachacuccuna ricpica, Jesusca mana chai canoapi rishcatami yachac chayarcacuna. 23Chashnacpica, Tiberias pueblomanta canoacuna shamushpaca, chai yacu patamanmi chayarca. Chai cuchullapimi Jesusca Taita Diosta pagui nishpa, tandata carashca carca. 24Jesuspish, paipac yachacuccunapish mana chaipi cacta ricushpami, gentecunaca chaiman chayac canoacunapi huichicushpa, Capernaum pueblopi Jesusta mashcangapac rircacuna.

Jesusca: “Causaita cuc tandami cani” nishcamanta

25Chai gentecuna ña yacu cuchata chimbashpa Jesushuan tupashpaca:

—Yachachic, ¿ima horastac caimanca shamurcangui?— nishpami tapurcacuna.

26Shina tapucpi, Jesusca cashnami nirca:

—Cancunaca pi mana ruhuaipaccunata ruhuashcamantaca mana mashcacunguichicchu, ashtahuanpish mana nicta micushcallamantami mashcacunguichic. Chaica chashnatacmi can. 27Cancunaca ama chingariclla micunata mashcaichicchu. Chaica chingaringallami, ashtahuanpish mana chingaric micunata mashcaichic. Chai micunami huiñai causaitaca cun. Chai micunataca Runa Tucungapac shamushca*f** ñucallami cusha. Chaita cuchunmi Taita Diosca ñucataca cacharca— nirca.

28Shina nicpi paicunaca:

—Taita Dios ruhuachun nishcata ruhuangapacca, ¿imatatac ruhuana canchic?— nircacuna.

29Shina nicpi Jesusca:

—Ñucata pai cachashca cashcata crichunmi, Taita Diosca munan— nirca.

30Shina nicpi paicunaca:

—Ñucanchic ricushpa canta crichunca, pi mana ruhuaipacta ruhuashpa ricuchinguiyari. 31Ñucanchic ñaupa taitacunaca maná shuti tandatami shitashca pambapi micurcacuna. Dios quillcachishcapica: ‘Jahua pachamanta Dios cushca tandatami micurcacuna’ ninmi— nircacuna.

32Shina nicpi Jesusca:

—Jahua pachamanta tandataca mana Moiseschu curca, ashtahuanpish ñuca Taitami cancunamanca jahua pachamantatac cac tandata cun. Chaica chashnatacmi can. 33Taita Dios cushca tandaca jahua pachamanta shamucmi. Chai tandami cai pachapi causaccunamanca huiñai causaitaca cun— nirca.

34Shina nicpi, paicuna mañashpaca:

—Shinashpaca, chai tandallata punzhanta caraiyari, amito— nircacuna.

35Shina nicpi, Jesusca cashnami nirca:

—Ñucami huiñai causaita cuc chai tandaca cani. Maijanpish ñucapacman shamucca manatac yarcachingachu. Shinallatac maijanpish ñucata cricca manatac yacunachingachu. 36Ñacaman nishca shinallatacmi nini: Cancunaca ñucata ricushpapish, mana cringuichicchu. 37Ñuca Taita ñucaman cushcacunallami ñucapacmanca shamun. Chai shina shamuccunataca manatac cutichishpa cachashachu. 38Ñuca jahua pachamanta shamushpaca, mana ñuca munashcata ruhuangapac shamurcanichu, ashtahuanpish ñucata cachac Taita munashcata ruhuangapacmi shamurcani. 39Ñucata cachac Taitaca tucui ñucaman cushcacunata shucllatapish mana chingachishpa, tucuri punzhapi causachichunmi munan. 40Ñuca Taitaca paipac Churita maijanpish ricushpa crishpaca, huiñai causaita charichunmi munan. Chaicunataca ñucami tucuri punzhapi causachisha— nirca.

41Jesusca “jahua pachamanta shamushca tandami ñucaca cani” nicta uyashpami, israelcunaca*f** p'iñarishpa, rimari callarircacuna. 42Shina p'iñarishpaca:

—¿Caica manachu Josepac churi Jesus? Paipac taita mamatapish ñucanchicca ricsinchicmi. ¿Ima shinatac paica ‘jahua pachamantami shamurcani’ ninyari?— ninacurcacuna.

43Chaimantami Jesusca cashna nirca:

—Ama cancunapuralla rimanacuichicchu. 44Ñucata cachac Taita ñucapacman mana pushamucpica, pi mana shamunmanchu. Chai shamuccunataca tucuri punzhapi causachishami. 45Ñaupa huillaccuna quillcashcapica: ‘Taita Diosmi tucui gentecunaman yachachinga’ ninmi. Chashna cashcamantami, maijanpish Taita Dios ima nishcata uyashpa paimanta yachacucca, ñucapacman shamunga.

46Taita Diostaca pipish mana ricushcachu, ashtahuanpish Taita Diospacmanta shamushca ñucallami ricurcani. 47Maijanpish ñucata cricca, huiñai causaita charinmi. Chaica chashnatacmi can. 48Ñucami huiñai causaita cuc tandaca cani. 49Cancunapac ñaupa taitacunaca shitashca pambapimi maná shuti tandataca micurcacuna. Shina micushpapish huañurcacunami. 50Ashtahuanpish caimi jahua pachamanta shamushca tandaca. Maijanpish cai tandata micucca mana huañungachu. 51Ñucami jahua pachamanta shamushca, huiñai causaita cuc tandaca cani. Maijanpish cai tandata micucca, huiñaita causangami. Cai tandaca ñuca quiquin aichami. Chaitaca cai pachapi causaccuna huiñai causaita charichunmi cusha— nirca.

52Chaimantami israelcuna caishuc chaishuc rimanacushpaca:

—Paipac quiquin aichataca, ¿ima shinatac carangayari?— ninacurcacuna.

53Shina nicpimi Jesusca cashna nirca:

—Runa Tucungapac shamushca ñuca aichata cancuna mana micushpa, ñuca yahuarta mana ubiashpaca, causaitaca mana charinguichicchu. Chaica chashnatacmi can. 54Maijanpish ñuca aichata micucca ñuca yahuarta ubiacca, huiñai causaita charinmi. Shinallatac ñucaca tucuri punzhapica causachishami. 55Chaimanta ñuca aichatapish micunatacmi, ñuca yahuartapish ubianatacmi can. 56Maijanpish ñuca aichata micucca ñuca yahuarta ubiacca, shuc shinallami ñucahuanca causan. Shinallatac ñucapish shuc shinallami paihuanca causani. 57Ñucata cachac Taitaca causaiyucmi. Chaimantami ñucaca paimanta causani. Chai shinallatacmi ñuca aichata micucca, ñucamanta causanga. 58Ñucaca jahua pachamanta shamushca tandamantami rimacuni. Cai tandaca mana cancunapac ñaupa taitacuna micushca maná shuti tanda shinallachu. Paicunaca chai tandata micushpapish huañurcacunami. Maijanpish cai tandata micucca, huiñai causaitami charinga— nirca.

59Jesusca caicunatami Capernaum pueblopi tiyac israelcuna tandanacuna huasipica yachachirca.

Jesús rimashcaca huiñai causaita cuc cashcamanta

60Jesús chashna yachachishcata tauca paita c'aticcuna uyashpaca:

—Maita mana caipaccunatami yachachin. ¿Pitac caitaca chasquingayari?— ninacurcacuna.

61Paicuna chashna ninacucta Jesús uyashpami, cashna nishpa tapurca:

—¿Cai ñuca nishcaca llaquichinchu, imatacyari? 62Shina cashpaca, Runa Tucungapac shamushca*f** ñuca puntaman maipi cashcallamantac ricta ricushpaca, ¿imashi tucunguichicman? 63Diospac Espiritumi causaitaca cun. Gentecunallamantaca mana causaica tiyanchu. Tucui ñuca nishcacunaca, causaita cuc Diospac Espiritumantami. 64Shina cacpipish cancunapuramanta maijancunaca mana cringuichicchu— nirca.

Jesusca puntaman maijanlla paita mana crishcatapish, maijan japichigricushcatapish ña yachashpami, chashnaca nirca. 65Shina cashcamantami Jesusca:

—‘Ñuca Taita mana pushamucpica, pi mana ñucapacmanca shamungachu’ nishpaca, ñami yachachircani— nirca.

66Chaimanta pachami Jesusta c'aticcunaca paita c'atinata saquishpa, taucacuna mana paihuanca purircacuna. 67Chaimantami Jesusca chunga ishcai yachacuccunataca:

—¿Cancunapish shitashpa rishun ninguichicchu?— nishpa tapurca.

68Shina nicpi, Simón Pedroca:

—Apunchic Jesús, ¿pipacmanta rishunyari? Cambac rimashca shimicunaca, huiñai causaita cuc shimicunami. 69Ñucanchicca cantaca ña crishcanchicmi. Shinallatac canca Dios cachashca Jucha Illac cashcatapish yachanchicmi— nirca.

70Shina nicpi Jesusca:

—¿Manachu chunga ishcai yachacuccunata cancunataca acllarcani? Shina cacpipish cancunapuramanta shucca diablohuanmi— nirca.

71Chashna nishpaca, Simón Iscariotepac churi Judasmantami Jesusca nicurca. Paica chunga ishcai yachacuccunapuramantami carca. Paimi q'uipataca Jesustaca japichirca.

Currently Selected:

SAN JUAN 6: QXR96

Highlight

Copy