Yohane 6

Nnipa Mpem Num Aduanema

(Mateo 14:13-21; Marko 6:32-44; Luka 9:13-17)

1Yeinom akyi he, Yesu kɔɔ Galilea po, nea bɛsane frɛ no Tiberia po, he agya. 2Na nnipakuo kɛseɛ kɔɔ so dii n’akyi, efiri sɛ behuu nsɛnkyerɛnne a na ɔɔyɔ ma ayarefoɔ. 3Yesu kɔɔ bepɔ he so na ɔne n’asuafoɔ he tenaa hɔ. 4#Yoh 2:13; 11:55 Nso na Yudafoɔ Twam Afahyɛ he abɛne. 5Afei Yesu maa n’ani so na ohuu sɛ nnipakuo kɛseɛ ɔɔba ne nkyɛne he, obisaa Filipo sɛ, “Hefa na yɛbɛtɔ paanoo ama nnipa yi adi?” 6Obisaa yei de sɔɔ no hwɛeɛ, efiri sɛ na ɔno ankasa nim nea ɔɔbɛyɔ. 7Filipo buaa sɛ, “Paanoo a ne boɔ bɛyɛ paani bosome nsia akatua mpo ɔnso bɛ sɛ bɛ mu biaa benya bi adi.” 8Na asuafoɔ he mu baako, Andrea, Simon Petro nua beema, ka kyerɛɛ no sɛ, 9“Abeemaa bi ya ha a ɔwɔ atokoɔ paanoo nnum ne nkyenam nketewa mmienu. Nso yei bɛyɛ nnipadɔm yi dɛ?” 10Na Yesu kaa sɛ, “Homma nnipa he ntenatena ase!” Nso na serɛ pii ya hɔ. Nti mmeema a bɛ dodoɔ bɛyɛ mpem num tenatenaa ase. 11Na Yesu faa paanoo ne nkyenam he, na ɔdaa ase he, ɔkyɛ maa bɛ a bɛtete hɔ he; saa nso ne ɔmaa bɛ nkyenam he dodoɔ a biaa hia. 12Na bɛmemeeɛ he, ɔka kyerɛɛ n’asuafoɔ he sɛ, “Hommoaboa mproprowa he ano, na bi anyera.” 13Nti bɛboaboa ano, na atokoɔ paanoo mproprowa he yɛɛ nkɛntɛne dummienu ma ma. 14#Deut 18:15 Afei nnipa he huu nsɛnkyerɛnne a Yesu yɔeɛ he, bɛkaa sɛ, “Nɔkwasɛm, diyifoɔ a ɔɔba wiase he di.”

15 # Yoh 18:36 Afei berɛ a Yesu huu sɛ bɛpɛ sɛ bɛkye no si no hene he, ɔno ankasa twee ne ho kɔɔ bepɔ he so bio.

Yesu nantee Nsuo so

(Mateo 14:22-33; Marko 6:45-52)

16Na nwunu doeɛ he, n’asuafoɔ he kɔɔ mpoano, 17na bɛforo tenaa kodoɔ bi mu sɛ beetwa po he akɔ Kapernaum. Saa berɛ he na sum ahyɛ dada, na Yesu nnya mmaa bɛ nkyɛne. 18Na mframa kɛseɛ bɔ maa po he huruiɛ. 19Afei berɛ a bɛharee bɛyɛ nkwansini nnan he, behuu sɛ Yesu nam po he so ɔɔba kodoɔ he ho, na besuroeɛ. 20Nso ɔka kyerɛɛ bɛ sɛ, “Ɔyɛ me a, honnsuro.” 21Afei deɛ na bɛpɛ sɛ ɔbɛtena kodoɔ he mu, na ankyɛre koraa ne kodoɔ he duruu asaase a bɛɛkɔ so he so.

Paanoo a ofiri Soro baeɛ

22Adeɛ kyeeɛ he, nnipakuo a na begyina po he agya he huu sɛ kodoɔ biaa nni hɔ gye sɛ baako a n’asuafoɔ he kɔɔ mu he, nso Yesu ne bɛ ankɔ kodoɔ he mu, na n’asuafoɔ he nkoaa ne bɛkɔeɛ. 23#Yoh 6:11 Na afei akodoɔ firi Tiberia baa baabi a Awurade daa ase, na bedii paanoo he. 24Na nnipakuo he huu sɛ Yesu ne n’asuafoɔ he mu biaa nni hɔ he, bɛkɔtenatenaa kodoɔ nketewa mu baa Kapernaum bɛhwehwɛɛ Yesu. 25Na berɛ a behuu no po he agya he, bebisaa no sɛ, “Kyerɛkyerɛfoɔ, mmɛ berɛ ne wobaa ha?” 26Yesu buaa bɛ sɛ, “Nɔkwasɛm a ɔyam ne sɛ, ɔnyɛ nsɛnkyerɛnne a hohuiɛ nti ne hoohwehwɛ me, na mmom paanoo a hodi meeɛ he nti a. 27#Yoh 4:14; 5:36 Honnyɔ aduane a ɔsɛe ho adwuma, na mmom honyɔ aduane a ɔtena hɔ de kɔ daa nkwam a Nipa Ba he de bɛma ho he ho adwuma, efiri sɛ, ɔno ne Agya Nyankopɔn ankasa de ne nsɔano agye no atom.” 28Nti bebisaa no sɛ, “Ɛɛne ne ɔsɛ sɛ yɛ yɔ na yɛayɔ Nyankopɔn nnwuma?” 29Yesu buaa bɛ sɛ, “Nyankopɔn adwuma ne sɛ hobɛgye nea ɔsomaa no he adi.” 30#Yoh 2:18 Nti bebisaa no sɛ, “Abɛ nsɛnkyerɛnne ne wobɛyɔ na yɛagye wo adi? Mmɛ adwuma ne wooyɔ? 31#Eks 16:13-14; Dwom 78:24 Yɛ nananom dii mana serɛ he so sɛnea bɛatwerɛ he, ‘Ɔmaa bɛ paanoo a ofiri soro ma bediiɛ.’ ” 32#Yoh 6:49 Na Yesu ka kyerɛɛ bɛ sɛ, “Meeka akyerɛ ho nɔkorem paa sɛ, ɔnyɛ Mose ne maa ho paanoo a ofiri soro he, na mmom m’Agya ne maa ho paanoo kann a ofiri soro he. 33Na Nyankopɔn paanoo ne nea osiane firi soro ba na ɔma wiase nkwa he.” 34Bɛka kyerɛɛ no sɛ, “Owura, ma yɛ paanoo he bi da biaa.”

35 # Yoh 6:48; 4:14; 7:37 Yesu ka kyerɛɛ bɛ sɛ, “Mene nkwa paanoo he. Nea ɔba menkyɛne he kɔm ɔnne no da, na nea ɔgye me di he, sukɔm ɔnne no da. 36#Yoh 6:26; 6:29 Nso maka akyerɛ ho sɛ, hoahu me nso honnye nni. 37#Yoh 17:6-8; Mat 11:28 Bibiaa a Agya he de bɛma me he bɛba me nkyɛne, na nea ɔba me nkyɛne he, mempam no da, 38#Yoh 4:34 efiri sɛ mefiri soro ne aba sɛ hobɛyɔ nea ɔsomaa me he apɛdeɛ, na ɔnyɛ m’ankasa me deɛ. 39#Yoh 10:28-29; 17:12 Nea ɔsomaa me he apɛdeɛ ne sɛ memma nea ɔde ama me he mu biaa nyera, na mmom sɛ menyane no da a odi akyi he. 40#Yoh 5:29; 11:24 Na m’Agya apɛdeɛ ne sɛ biaa a ohu Ba he na ɔgye no di he benya daa nkwa, na menyane no da a odi akyi he.”

41Afei Yudafoɔ he firi aseɛ nwiinwii sɛ waka sɛ, “Mene paanoo a osiane firii soro he.” 42#Luk 4:22 Na bɛkaa sɛ, “Ɔnyɛ yei ne Yesu, Yosef ba, nea yenim ne papa ne ne maame he? Ɔyɛɛ dɛ ne afei deɛ ɔdɛ, ‘Mene paanoo a osiane firii soro he’?” 43Yesu buaa bɛ sɛ, “Honwiinwii ho mu. 44#Yoh 6:65; Yes 54:13; Yer 31:33-34 Biaa ntumi mma me nkyɛne gye sɛ Agya a ɔsomaa me he twe no ba; na menyane no nna odi akyire he. 45Bɛatwerɛ ya adiyifoɔ he mu sɛ, ‘Nyankopɔn bɛkyerɛkyerɛ bɛ nyinaa.’ Biaa a wate bibi afiri Agya he nkyɛne na wasua he ne ba me nkyɛne. 46#Yoh 1:18 Biaa nhuu Agya he, gye sɛ nea ofiri Nyankopɔn hɔ he; ɔno ne wahu Agya he. 47#Yoh 3:16 Meeka akyerɛ ho nɔkorem sɛ, biaa a ɔgye di he benya daa nkwa. 48#Yoh 6:35 Mene nkwa paanoo he. 49#Yoh 6:31-32; 1 Ko 10:3; 10:5 Ho nananom dii mana serɛ he so, na bewuwuiɛ. 50Yei ne paanoo a osiane firi soro he, sɛ biaa nni na wanwu. 51#Heb 10:5; 10:10 Mene paanoo a nkwa yam a mesiane firi soro baeɛ he, sɛ bi di paanoo yi bi a, ɔbɛtena ase daa. Na paanoo a mede bɛma wiase nkwa he ne me honam.”

52Na afei Yudafoɔ he firi aseɛ kasakasaa bɛ mu sɛ, “Ɔbɛyɛ dɛ na saa beema yi de ne honam ama yɛ adi?” 53Nti Yesu ka kyerɛɛ bɛ sɛ, “Meeka akyerɛ ho nɔkorem sɛ, sɛ hoanni Nipa Ba he honam na hoannom ne mogyaa a, honnya nkwa ya ho mu. 54Bɛ a bedi me honam na bɛnom me mogyaa he wɔ daa nkwa, na menyane bɛ nna odi akyire he, 55efiri sɛ me honam yɛ aduane ampa na me mogyaa yɛ anonneɛ ampa. 56#Yoh 15:4; 1 Yoh 3:24 Bɛ a bedi me honam na bɛnom me mogyaa tena me mu, na me nso metena bɛ mu. 57Sɛnea Agya a ɔte ase he somaa me he, na Agya he nti mete ase he, saa ara nso ne nea odi me honam he, me nti ɔbɛtena ase. 58Yei ne paanoo a osiane firii soro baeɛ a ɔnte sɛ nea ho nananom diiɛ na bewuiɛ he; nea odi paanoo yi bɛtena ase daa.” 59Ɔkaa saa nsɛm yi berɛ a na ɔɔkyerɛkyerɛ Kapernaum hyiadane mu.

Daa Nkwa Nsɛm

60Nti berɛ a n’asuafoɔ he mu bebree tee yei he, bɛkaa sɛ, “Asɛm yi ano ɔdene, hwane ne betumi agye?” 61Nso esiane sɛ na Yesu nim sɛ n’asuafoɔ he nwiinwii yei ho nti, obisaa bɛ sɛ, “Yei to ho sintidua anaa? 62#3:13 Na afei, sɛ hohu Nipa Ba he sɛ ɔɔkɔ soro, baabi a na ɔya kane he nso ɛ? 63#2 Ko 3:6 Honhom ne ma nkwa; honam deɛ nka hwee koraa. Nsɛm a maka akyerɛ ho yi yɛ honhom ne nkwa. 64#Yoh 13:11 Nso ho mu binom nnye nni.” Na ofiri mfitiaseɛ he na Yesu nnim bɛ a bɛnnye nni ne nea obeyi no ama he. 65#Yoh 6:44 Na ɔkaa sɛ, “Yei nti ne meka kyerɛ ho sɛ biaa ntumi mma me nkyɛne gye sɛ Agya he ama no kwane.” 66Yei nti n’asuafoɔ he bebree sane kɔɔ bɛ akyi, na bɛne no annante bio. 67Nti Yesu bisaa dummienu he sɛ, “Ho nso hopɛ sɛ ho kɔ anaa?” 68#Yoh 6:63 Simon Petro buaa sɛ, “Awurade, hwane nkyɛne ne yɛbɛkɔ? Wo nkoaa ne wowɔ daa nkwa nsɛm. 69#Yoh 1:50; 11:27; Mat 16:16 Na yɛagye adi, na yɛahu sɛ wone Kronkronni a wofiri Nyankopɔn hɔ he.” 70Yesu buaa bɛ sɛ, “Nyɛ mene maayi ho nnipa dummienu yi? Nso ho mu baako yɛ bronsam.” 71Na ɔɔka Yuda Iskariot, Simon ba he ho asɛm. Ewom sɛ na ɔyɛ dummienu he mu baako deɛ, nso na oobeyi Yesu ama.

Currently Selected:

Yohane 6: BBTP

Highlight

Copy