Yohane 19

1Afei Pilato faa Yesu, na ɔmaa bɛbɔɔ no mmaa. 2Na asraafoɔ he de nkasɛe yɔɔ kyɛ de hyɛɛ ne ti, na bɛde ataadeɛ ngugusoɔ kɔkɔɔ bi hyɛɛ no. 3Na bɛkɔɔ so baa ne nkyɛne bɛkaa sɛ, “Yudafoɔ hene, mo oo mo!” Na bɛbobɔɔ no asotorɔ. 4Pilato kɔɔ abɔntene bio kɔka kyerɛɛ bɛ sɛ, “Hwɛ! Mede no oofiri adi abra ho na hoahu sɛ menhuu ne ho mfomsoɔ biaa.” 5Nti Yesu firii adi baeɛ a na nkasɛe kyɛ hyɛ no na ataadeɛ ngugusoɔ kɔkɔɔ bi nso hyɛ no. Pilato ka kyerɛɛ bɛ sɛ, “Beema he di!” 6Berɛ a asɔfoɔ ne awɛmfoɔ he huu Yesu he, bɛteateaam sɛ, “Bɔ no asennua mu! Bɔ no asennua mu!” Pilato ka kyerɛɛ bɛ sɛ, “Ho ankasa homfa no na hommɔ no asennua mu. Menhu mfomsoɔ biaa ne ho.” 7#Yoh 10:33; Lew 24:16 Yudafoɔ he buaa no sɛ, “Yɛwɔ mmara, na sɛnea mmara he kyerɛ he ɔsɛ sɛ owu efiri sɛ ɔyɛ ne ho sɛ Nyankopɔn Ba.” 8Afei berɛ a Pilato tee yei he, osuroo paa. 9Ɔkɔɔ n’abane mu bio, na obisaa Yesu sɛ, “Wofiri he?” Na Yesu ammua no. 10Na Pilato ka kyerɛɛ no sɛ, “Wommua me? Wonnim sɛ mewɔ tumi sɛ megyae wo anaa mebɔ wo asennua mu?” 11Yesu buaa sɛ, “Sɛ bɛamfa amfiri soro amma wo a wonnya me so tumi biaa. Ɔno nti nea oyii me maa wo he bɔne so paa.” 12Ofiri saa berɛ he Pilato kɔɔ so hwehwɛɛ kwane a ɔbɛfa so agyae Yesu, nso Yudafoɔ he teaam kaa sɛ, “Sɛ wogyae beema yi a na wonyɛ Kaesare adamfo. Nipa biaa a ɔyɛ ne ho sɛ hene he kasa tia Kaesare.” 13Na Pilato tee nsɛm yi, ɔde Yesu pie baa abɔntene na ɔtenaa atemmuo adwa so baabi a bɛfrɛ hɔ Aboɔ-nsɛeɛ, na Hebri kasa mu bɛfrɛ no Gabata. 14Saa berɛ he na bɛɛboaboa bɛ ho ama Twam he, na aabɔ bɛyɛ awia dummienu. Na ɔka kyerɛɛ Yudafoɔ he sɛ, “Hwɛ, ho hene di!” 15#Yoh 19:6 Bɛteaam sɛ, “Fa no kɔ! Fa no kɔ! Bɔ no asennua mu!” Pilato bisaa bɛ sɛ, “Memmɔ ho Hene he asennua mu?” Asɔfoɔ mpanyimfoɔ he buaa sɛ, “Yenni hene biaa ka Kaesare ho.” 16Na ɔde Yesu maa bɛ sɛ bɛnkɔ bɔ no asennua mu.

Bɛbɔɔ Yesu asennua mu

(Mateo 27:31-50; Marko 15:20-37; Luka 23:26-46)

Nti bɛfaa Yesu kɔeɛ 17berɛ a na ɔno ankasa so n’asennua. Ofirii adi kɔɔ baabi a bɛfrɛ hɔ Tikankuro (anaa Golgota Hebri kasa mu). 18Hɔ ne bɛbɔɔ ɔne nnipa mmienu asennua mu. Na nnipa mmienu he mu baako ya Yesu nifa ne baako nso ya ne benkum. 19Pilato twerɛɛ asɛm bi bɔɔ asennua he atifi. Ɔtwerɛɛ sɛ, “Yesu Nasareni, Yudafoɔ hene he.” 20Yudafoɔ bebree kane saa ntwerɛeɛ yi efiri sɛ na baabi a bɛbɔɔ Yesu asennua he bɛne kuro he. Bɛtwerɛɛ asɛm yi Hebri ne Roma ne Hela kasa mu. 21Na Yuda asɔfo mpanyimfoɔ he ka kyerɛɛ Pilato sɛ, “Ntwerɛ sɛ, ‘Yudafoɔ hene,’ na mmom twerɛ sɛ ‘Saa beema yi dɛ, mene Yudafoɔ hene.’ ” 22Pilato kaa sɛ, “Nea matwerɛ he na matwerɛ.” 23Na asraafoɔ he bɔɔ Yesu asennua mu wieeɛ he, bɛfaa n’ataadeɛ ngugusoɔ he kyɛɛ mu nnan maa sraani biaa nyaa baako, ɔne n’ataadeɛ nhyɛaseɛ. Nso na ataadeɛ nhyɛaseɛ he nni mpameeɛ, bɛnwene firi soro besii fam. 24#Dwom 22:18 Nti bɛkeka kyerɛɛ bɛ ho bɛ ho sɛ, “Hommma yɛ ntete mu, na mmom yɛntwe so ntonto nhwɛ nea ɔbɛyɛ ne deɛ.” Na yei ma twerɛ he baa mu sɛ, “Bɛkyekyɛɛ me ngusoɔ mu faeɛ, na bɛ twee m’ataadeɛ nso so ntonto.” 25Na yei ne nea asraafoɔ he yɔeɛ. Saa berɛ heaa na Yesu maame, ne maame nua baa, Maria a ɔyɛ Klopa yerɛ ne Maria Magdalene gyina Yesu asennua he ho. 26#Yoh 13:23 Na Yesu huu ne maame ne suani a ɔdɔ no he sɛ ogyina ne maame nkyɛne he, ɔka kyerɛɛ ne maame sɛ, “Baa, hwɛ, wo ba beema di.” 27Afei ɔka kyerɛɛ suani he sɛ, “Hwɛ, wo nso wo maame di.” Na efiri saa berɛ he suani he de Maria kɔɔ ɔno ankasa ne fie. 28#Yoh 13:3; 18:4; Dwom 22:15 Yei akyi a Yesu huu sɛ woanya awie nnoɔma nyinaa he (sɛnea ɔbɛyɛ na twerɛ he aba mu nti), ɔkaa sɛ, “Sukɔm de me.” 29#Dwom 69:21 Na adeɛ bi si hɔ a nsa kekakeka ahyɛ no ma. Nti bɛde nsa he bi hyɛɛ sapɔ ma de hyɛɛ dua so de kaa n’ano. 30Na Yesu gyee nsa he, ɔkaa sɛ, “Mawie!” Osii ne ti ase, na ogyaam.

Bɛde pea wɔɔ Yesu mfe

31 # Deut 21:23 Na saa da he yɛ ahosiesie da. Na sɛnea ɔbɛyɛ a homeda he beduru na amu he nsɛne asennua he so nti, Yudafoɔ he bɛsrɛɛ Pilato sɛ ɔmma bemmubu bɛ a bɛabɔ bɛ asennua he nane mu, na benyi amu he mfiri hɔ. 32Na asraafoɔ he ba bebubuu nipa a odi kane ne nea ɔka ho he nane mu. 33Na beduruu Yesu nkyɛne a behuu sɛ wawu dada he, bɛammubu ne nane mu. 34Na asraafoɔ he mu baako de pea wɔɔ ne mfe, na mogyaa ne nsuo firii mu baeɛ amonom hɔaa. 35(Na nea ohuiɛ he adi adanseɛ yi sɛnea ɔbɛyɛ a wo nso wobɛgye adi. N’adanseɛ he yɛ nɔkorɛ, na onim sɛ nea ɔɔka he yɛ nɔkorɛ.) 36#Eks 12:46 Yei siiɛ sɛ ɔbɛyɛ na twerɛsɛm he aba mu sɛ, “Bemmmu ne dompe biaa mu,” 37#Sak 12:10; Adi 1:7 Na bio twerɛsɛm foforɔ dɛ, “Bɛbɛhwɛ nea bɛde pea awɔ no he.”

Yesu amu sie

(Mateo 27:57-61; Marko 15:42-47; Luka 23:50-55)

38Na yeinom akyi he, Yosef a ofiri Arimatea a ɔyɛ Yesu suani nso Yudafoɔ ho hu nti, na ɔyɛ no kokoam he, bɛsrɛɛ Pilato sɛ ɔmma no mfa Yesu amu he nkɔ; na Pilato maa ne kwane na ɔbɛfa kɔeɛ. 39#Yoh 3:2; Mat 2:11 Nikodemo a dabi ɔbaa Yesu nkyɛne anadwo he nso baeɛ, na ɔde korobo ne pɛprɛ mfrafrae a mu duru bɛyɛ nkariboɔ ha baeɛ. 40Afei bɛfaa Yesu amu he, na bɛde nwera a aduhwam yam kyekyere ne ho, sɛnea Yudafoɔ sie bɛ amu he. 41Na turo bi ya baabi a bɛbɔɔ no asennua mu he, na nna bi ya turom hɔ a ɔyɛ foforɔ a bensie biaa mu da. 42Na hɔ ne Yudafoɔ ahosiesie da he nti, bɛde Yesu kɔtoeɛ, efiri sɛ saa nna he a na bɛde boɔ ayɔ he na na ɔbɛne.

Currently Selected:

Yohane 19: BBTP

Highlight

Copy