Yohane 18

Yesu yima ne ne kyeɛ

(Mateo 26:47-56; Marko 14:43-52; Luka 22:47-53)

1 # Mat 26:36; Mar 14:32; Luk 22:39; 2 Sa 15:23 Na Yesu kaa nsɛm yei nyinaa wieeɛ he, ɔne n’asuafoɔ he firii adi kotwaree Nsuo Kidron kɔɔ turo bi mu. 2#Luk 21:37 Na Yuda a oyii no maeɛ nso nim hɔ, efiri sɛ na Yesu taa hyia n’asuafoɔ he hɔ. 3Nti Yuda de asrafokuo ne awɛmfoɔ a befiri asɔfoɔ mpanyimfoɔ ne Farisifoɔ he nkyɛne baa hɔ a na bekitakita ntanii ne nkanea ne akodeɛ. 4#Yoh 19:28 Afei, Yesu a na onim nea ɔbɛto no nyinaa he, pinii anim na obisaa bɛ sɛ, “Hwane ne hoohwehwɛ no?” 5Bebuaa no sɛ, “Yesu, Nasareni he.” Yesu buaa bɛ sɛ, “Ɔyɛ me a.” Saa berɛ he na Yuda a oyii no maeɛ he ne bɛ ne gyina hɔ. 6Na Yesu ka kyerɛɛ bɛ sɛ “Ɔyɛ me a.” Na bɛpimpinii bɛ akyi na bɛhwehwee ase. 7Na obisaa bɛ bio sɛ, “Hwane ne hoohwehwɛ no?” Na bɛkaa sɛ, “Yesu, Nasareni he a.” 8Yesu buaa sɛ, “Maka akyerɛ ho sɛ ɔyɛ me a.” Nti sɛ me ne hoohwehwɛ me deɛ a, homma saa mmeema yi nkɔ! 9#Yoh 6:39; 17:12 Yei maa asɛm a bɛkaeɛ he baam sɛ, “Mamma bɛ a wode bɛ maa me he mu baako koraa anyera.” 10Na Simon Petro twee sekane twaa sɔfopanyini he akoa aso nifa. Na akoa he de Malko. 11#Mat 26:39 Yesu ka kyerɛɛ Petro sɛ, “Fa sekane he hyɛ bɔha he mu. Nti ɔnsɛ sɛ mennom kuruwa a Agya he de ama me he anaa?”

Bɛde Yesu kogyina sɔfopanyini anim

(Mateo 26:57-75; Marko 14:53-72; Luka 22:54-71)

12Afei asrafokuo he ne bɛ safohene ne Yudafoɔ awɛmfoɔ he kyee Yesu, na bɛkyekyeree no. 13Bedii kane de no kɔɔ Anas hɔ. Na Anas yɛ Kaiafa a na ɔyɛ sɔfopanyini saa afe he ase. 14#Yoh 11:49-50 Kaiafa yɛ bi a otuu Yudafoɔ he fo sɛ ɔyɛ sɛ nipa baako bewu ama mane he.

Petro yii Yesu mmaeɛ

15Na Simon Petro ne suani foforɔ bi dii Yesu akyi. Saa suani he yɛ bi a na sɔfopanyini he nim no, na ɔne Yesu kɔɔ sɔfopanyini he abane mu hɔ, 16nso Petro deɛ na ogyina aboboa he ano abɔntene hɔ. Nti suani foforɔ a na sɔfopanyini he nim no he baa abɔntene. Na ɔne baa a na ɔyɛ aboboa he ano hwɛfoɔ he kɔkasae. Na ɔde Petro baa mu. 17Na baa he bisaa Petro sɛ, “Wo nso woyɛ beema yi asuafoɔ he mu baako, ɔnte saa?” Petro kaa sɛ, “Daabi menka ho.” 18Na esiane sɛ na awɔ yam nti, na nkoa ne awɛmfoɔ he de bidie asɔ gya gyinagyina ho ɔɔto. Na Petro nso ne begyina hɔ ɔɔto gya he bi.

Sɔfopanyini he totoo Yesu Ano

19Na afei sɔfopanyini he bisaa Yesu asɛm faa n’asuafoɔ ne ne nkyerɛkyerɛ ho. 20#Yoh 7:14; 7:26 Yesu buaa sɛ, “Me deɛ makasa akyerɛ wiase badwam; mekyerɛkyerɛɛ hyia adane ne asɔredane mu daa, baabi a Yudafoɔ nyinaa hyia he. Menkaa bibiaa kokoam. 21Mmɛ nti ne wobisa me? Bisa bɛ a bɛtee nea meka kyerɛɛ bɛ he; benim nea mekaeɛ.” 22Na ɔkaa yei he, awɛmfoɔ he mu baako a na ogyina hɔ bɔɔ Yesu asom, kaa sɛ “Nti, sɛnea wobuaa sɔfopanyini di?” 23Yesu buaa sɛ, “Sɛ maaka asɛmmɔne a, di bɔne he ho adanseɛ, na sɛ nea mekaeɛ he yɛ a, ɛɛne nti ne wobɔ me?” 24Na Anas maa bɛkyekyeree Yesu de no kɔmaa sɔfopanyini Kaiafa.

Petro yii Yesu mmaa bio

25Saa berɛ yi na Simon Petro gyina hɔ ɔɔto gya. Bebisaa no sɛ, “Wo nso woyɛ beema yi asuafoɔ he mu baako, ɔnte saa?” Ɔsanee sɛ, “Daabi menka ho.” 26Na sɔfopanyini he akoa a Petro twaa n’aso he busuani kaa sɛ, “Manhu wo ne no turom hɔ?” 27Petro sanee bio sɛ ɔnte saa, na amonom hɔaa akokɔ bɔneeɛ.

Bɛde Yesu kogyinaa Pilato anim

(Mateo 27:2, 11-30; Marko 15:1-19; Luka 23:1-25)

28Na bɛde Yesu firii Kaiafa hɔ kɔɔ amrado Pilato abane mu. Na ɔyɛ anɔpatutuutu. Na Yudafoɔ he ankasa ankɔ amrado abane he mu sɛnea ɔbɛyɛ a bengu bɛ ho fi na bɛatumi adi Twam he bi. 29Nti Pilato kɔɔ bɛ nkyɛne abɔntene bisaa bɛ sɛ, “Mmɛ soboɔ ne hode ɔɔbɔ saa beema yi?” 30Bɛkaa sɛ, “Sɛ beema yi nyɛ nipa bɔnefoɔ a, nka yɛamfa no ammrɛ wo.” 31#Yoh 19:6-7 Pilato ka kyerɛɛ bɛ sɛ, “Ho ankasa homfa no nkobu no atɛne sɛnea ho mmara teɛ.” Yudafoɔ he buaa sɛ, “Mmara mma yɛ kwane mma yenku biaa.” 32#Yoh 12:32-33; Mat 20:19 (Yei maa asɛm a Yesu ka faa wuo korɔ a na oobewu he ho he baa mu.) 33Nti Pilato kɔɔ amrado abane he mu hɔ bio, na ɔfrɛɛ Yesu bisaa no sɛ, “Wo ne Yudafoɔ hene he?” 34Yesu buaa sɛ, “W’ankasa na woabɔ wo tim ɔɔka yei anaa nipa bi ne kaa me ho asɛm kyerɛɛ wo?” 35Pilato buaa sɛ, “Menyɛ Yudani, anaa meyɛ bi? Wo ankasa wo manfoɔ ne asɔfoɔ mpanyimfoɔ he ne de wo ahyɛ me nsa. Mmɛ adeɛ ne woayɔ?” 36Yesu buaa sɛ, “M’ahennie mfiri wiase yi mu. Sɛ nka ofiri wiase yi mu a, nka m’asomfoɔ bɛko na bɛamfa me anhyɛ Yudafoɔ he nsa. Nso m’ahennie mfiri ha.” 37#1 Ti 6:13 Pilato bisaa no sɛ, “Nti woyɛ hene?” Yesu buaa sɛ, “Wone wooka sɛ meyɛ hene. Me deɛ yei nti ne bɛwoo me, na mebaa wiase sɛ meebedi nɔkorɛ he ho adanseɛ. Biaa a ofiri nɔkorɛ he tie me nne.” 38Pilato bisaa no sɛ, “Ɛɛne ne nɔkorɛ?”

Bebuaa Yesu Kumfɔ

Ɔkaa yei wieeɛ he, ɔsane firi kɔɔ Yudafoɔ he hɔ kɔka kyerɛɛ bɛ sɛ, “Mennhuu mfomsoɔ biaa ne ho. 39Nso howɔ amanneɛ bi sɛ, sɛ Twam duru a megyae nipa baako ma ho. Nti hopɛ sɛ megyae Yudafoɔ hene he ma ho anaa?” 40Bɛteaam kaa sɛ, “Ɔnyɛ yie, na mmom Baraba!” Na Baraba yɛ dwotwafoɔ.

Currently Selected:

Yohane 18: BBTP

Highlight

Copy