Génesis 31
31
Jacobpa shinadi kaaxikĩ
1Labánpa wakewawe Jacob yuitiwadiwu: “Nuku epa uduax Jacob awarawuya”, wadiwu. Naa Jacobpa tapidi. 2Labánpa ana sharawayabaitu tapidi.
3Naskake Diospa Jacob yuidi: “Mewẽ epa ikadu dasuwe mewẽ kaiwuu aduri. Na mi kai ari ẽ bewe kai”, wadi.
4Jacobpa Raquel kedabadi Líari. Na oveja kexeadu ma weawuadu. 5Jacobpa atu yuidi: “Matu epa ana ea apaudi keskawaiba. Naskaweke ea Diospa kexebis atu wadi. 6Batu raweta ma tapia. Matu epa ẽ yuduxubis. Awara ẽ axui ẽ xadibisba. 7Naskatari Labánpa ea paratiadi. Pei ea wetsa wetsawatiadi. Ewẽ Diospa ea chaka xitixubis. 8Askataba naatu yuibis: ‘Oveja turuya ẽ bia inanu naa mi yudubisuxũ naa ovejapa awẽ wake raũya ibis. Naatu shinakĩ na yuina raũya nawu mewẽ pei iki ea wabis. Naatiiwi yuinawu atũ wake raũyawu ikita’, Jacobpa atu wadi. 9Diospa yuinawu matu epa wiãta ea ina.
10Wetsatiã yuinawu ibiyaiwawe ẽ dabayabea. Dabapa uĩya oveja raũyawu tutuyawu usiyawuri chutanaiwawe. 11Ewẽ dabapa Diospa awẽ ángelpa ea kedadi: ‘Jacob’, ea waitu: ‘Ẽ dudu’, ẽ wadi. 12Naskata ángelpa ea yuiyabea: ‘Uĩkuiwe naatiiwi cabra wedewu raũyawu kedeyawu tutuyawuri cabra awĩwu chutanaiwawe. Naskata awẽ wakewu mewena itiru. Mewẽ kuka Labánpa bia paraitu ma ẽ uĩya. Naskake ẽ bia sharawai. 13Ẽ Dios Betel adu biki dukudi. Ruweki tekesebeshida widiniwuwata mi xidi aki nachiyabea ea mi parabisba. Na mi kaĩdi Canaán adu katawe’, ea ángelpa waita”, Jacobpa atu wadi.
14Naskata Raquelweta Líapa kebadiwu: “Ana nu awayaba nuku epã pexe adu. 15Awẽ wake keskara ana duku waiba. Naskataba duku yura wetsa atiru keskara duku wai. Dukuri bidibetsayabea bia yudubabis duku bia wibaxiki. 16Nuku epa awẽ awara sharawu Dios wiãita nukuna nuku wakewunari. Naskake na Dios bia yuiyabea keskawe”, Raquelweta Líapa wadiwu.
17Naskata Jacob itipinidi awẽ awĩ rawenu awẽ wakewuya atu camello mamakaya atu tsaũdi. 18Naskata Padán-aram aduxu awarawu wibixakĩ nawuya kadi Canaán adu awẽ apa Isaac ipaudi adu.
19Labánpa oveja radi wakira kaxu xateyuikadu Raquelpa apã awi awara udiwaxu ikũira waa awẽ pexe adua unedi. 20Jacobpa naskaxu Labán arameo paradi yuitaba kadi. 21Kushi awẽ awarawuya ede Éufrates pukewaĩdi bachi awẽ ade Galaad adu kadi.
22Ma peda tres ma ikadu Labán yuidiwu Jacob kaitake. 23Naskata Labánpa awẽ yurawu atu ichanawadi Jacob beewaĩxikĩ. Domingo wisti awaĩdi kai puchini bachi Galaad adu aki dukudi. 24Naa yabeta Labán arameo Epa Dios dababakĩ iskawadi: “Mi Jacob retetiwakiki”, wadi.
25Ma domingo wisti ikadu Labán Jacobki dukudi bachiwu awẽ ade Galaad. Nadu yuina wichi Jacobpa tapasdi. Labánpari nadu yuina wichi tapasdi awẽ kaiwuuweta. 26Naduxu Labánpa Jacob askawadi: “Aweskai mi iskaitame. Aweskakĩ mia paraitame. Ewẽ wake rawe na unewerãdai keskara mia waita. 27Ea yuitaba mi ichuita. Mia yuiwerãdaidu idibayana música tamborpa arpaneriwi nu bia buduxukeraita. 28Miakai ewẽ wake rawenu ewẽ chata rawe mi tabuki tsu abawerãitaba. Na mi tatiba keskarakui. 29Ẽ bitsisipaya bia chakawanu. Naskaweke ewẽ dabapa mewẽ epa awẽ Diospa ea yuiya ẽ bia aweskawayabanu. ‘Mi Jacob retetiwakiki’, ea waita. 30Ma ẽ tapia mewẽ epã pexe adu mi dasukuipai. Naskaweke aweskakĩ ẽ udiwaxu ikũira wabiswu mia weaitame”.
31Jacobpa Labán kebadi: “Ẽ shinachakaita ea seteyana mewẽ wake rawe ea mia netewatiru raikax. 32Na biwĩ udiwaxu mi ikũira waa yura wetsã bia wiãke wichixu naa dai. Da yurawawe uĩyaiwudu wedawe ẽ bia awa weaitamaiki. Na mewenawu wutawe”. Naskaweke Jacobpa tapidiba Raquelpa Labánpa awi udiwaxu ikũira waa wiãitake.
33Naskata Jacobpa yuina wichi tapas adu Labán ikikaĩdi wedai kai. Naskatari Jacobweta yudubis rawe atũ yuina wichi tapas mera wedadi. Líapa awẽ yuina wichi tapas meraduax tseketa Raquelna merari ikidi. 34Raquelpa wita camello tsauti wiata awẽ yuina wichi tapas mera ikikaita Labánpa awara udiwaxu ikũira wabis tsauti nunamari wata aki tsaudi. Labánpa wedawikĩ wichidiba.
35Naskata Raquelpa apa yuidi: “Epa sidapaiyabawe. Ẽ widitiruba ẽ ibi”. Na awi udiwaxu ikũira wabis wedawikĩ wichidiba. 36Jacobpa Labán sidakĩ askawadi: “Ẽ awa chaka waitame. Aweskakĩ mia chiruwerãitame. 37Ewẽ awarawu ma mia wedawikĩ adua mewẽ awa mi wichiaba. Nuku kaiwuwawe uĩnuwu xawakawi tsekawe nawawe duku yuinuwu. 38Veinte wari ẽ beweta yudubis mewẽ ovejane wake wisti kaĩ dabisba. Naskatari mewẽ oveja kede meradua ẽ bia piãbisba. 39Basharunu reteweke ẽ bia pei inabis. Naskatari yabeta iyabai pedata mewẽ yuinawu bia weduxuke mia ea pei ñukabis. 40Pedata ẽ wari xada beepaudi yabetari batsinapaudi. Ẽ uxa sharapaudiba. 41Veinte wari mewẽ pexe adu ẽ ibis. Naskata mewẽ wake raweuxũ catorce wari ẽ bia yuduxubis. Mewẽ yuinauxuri ẽ seis wari yudubis. Ewẽ yuduxu ‘Ẽ bia inanu’, ea mia wawiaxu ea mia inabisba mia wetsa wetsawatiadi. 42Ewẽ xuta Abraham awẽ Dios ewe iyabake naskata ewẽ epa Isaac awẽ Dios yabake awaya ẽ kakeradaba. Naskake ẽ shinachakayaitu Dios ea uĩyaidu mia chakawanuba”, Jacobpa Labán wadi.
Jacobweta Labán shinadiwu
43Naskata Labánpa Jacob kebadi: “Da awĩwu rawe ewẽ wake rawe da wakewu ewẽ wawawu ovejawuri ewena da mi uĩyaiwu ewenawu. Naskaweke ẽ aweskatiruba. 44Naskake dukuraweta nu shinanu”, Labánpa Jacob wadi.
45Naskata Jacobpa ruwe widiniwuwaxu na naniti keskara dibadi. 46Naskata awẽ kaiwuu atu yuidi: “Ruwe ichawakawe”, atu wadi. Naatiiwixu nadu wisti wuruwadiwu. Naa ruwewu wuruwaduxu pidiwu. 47Nadu Labánpa awẽ tsaima adekĩ Jegar Sadutá, wadi. Jacobpari awẽ tsaima adekĩ Galaad, wadi.
48Naskake Labánpa yuidi: “Da ruwewu wuruidaduxu atu uĩbapakedaka dukuraweta nu shinake”. 49Naskatari Labánpa awẽ tsaima: Mispá, wadi. “Nu uĩnanayabawiyaitu Epa Dios duku kexea. Bia kexeta ea kexea”, Labánpa Jacob wadi. 50Labánpa Jacob yuidi: “Awĩwu wetsa wita askayabai ewẽ wake rawe mi chakawaitu bia tsuã uĩyabawiyaitu Dios wistichi bia uĩxiwi”.
51Awiana Labánpa Jacob yuikĩ iskawadi: 52“Da ruwe wuruidaduxu dukuraweta nu shinai mewẽ bai auri ẽ katiruba mirikai ewẽ bai auri ma utiruba nu chakanatiru. 53Mewẽ xuta Abraham awẽ Dios ewẽ xutari Nahor awẽ Diosnari naatu duku uĩyaidu dukuraweta nu shinai”. Naskata Jacobpa yuikuidi Epa Dios apa Isaacpa ikũira wapaudiuxũ. 54Naskata bachi arixu Jacobpa yuina retexu awẽ kaiwuu kedadi pii wenuwu. Ma pikata nadu uxadiwu.
55Ma uxashita Labán widinakawata awẽ chata rana atu tsu ata awẽ wake rawe tsu adi. Atu yuisharata awẽ bai adu dasudi.
Currently Selected:
Génesis 31: mtsB
Highlight
Share
Copy
Want to have your highlights saved across all your devices? Sign up or sign in
