Tononkiran'i Salômôna 4
4
1Tsara tarehy ianao, rahavako;
eny, tsara tarehy ianao!
Mahafinaritra toa voromahailala
ny masonao anatin’ny voalinao;
ny volon-dohanao dia toy ny andian’osy
midina ny tendrombohitra Gilehada.
2Ny nifinao dia fotsy toa andian’ondrivavy
izay efa voahety sy avy nampandroana;
samy manana rahavavy kambana ireo,
ka tsy misy izay tsy tahaka izany.
3Toa ribà mena ny molotrao;
ary mahafatifaty ny vavanao.
Menamena toa hasin’ampongabendanitra
ireo takolakao anatin’ny voalinao.
4Ny vozonao dia toy ny tilikambon’i Davida#4.4a Ny tilikambon’i Davida dia tsy voalaza n’aiza n’aiza.,
izay naorina hiendrika boribory;
ampinga arivo#4.4b Ampinga arivo: ny ravaky ny tilikambo dia fampitahana ihany hilazana ny fehivozona voaravaka karazam-bola izay niambozonan’ilay zazavavy, ampitahao Lk 15.8-10. no mihantona eo,
dia ny ampingan’ireo maherifo.
5Ny nononao roa dia hoatra zana-gazela,
dia gazela kambana vao natera-dreniny
ka mirao-bilona eny anivon’ny lisy.
6Amin’ny takariva mangatsiatsiaka,
rehefa hilentika ny masoandro,
dia tapa-kevitra aho ny handeha
ho etỳ an-tendrombohitrao mandraraka miora
sy ho etỳ an-kavoanao mamerovero zava-manitra#4.6 Ampitahao 2.17 sy nta..
7Tsara avokoa ny bikanao, rahavako;
eny, tsara tsy misy tomika ianao.
8Andao hiaraka amiko, ry fofombadiko;
ialao i Libano ka andao hiaraka amiko.
Hidina avy eny an-tampon’i Amanà ianao,
ary hidina avy eny Senira#4.8 Amanà: iray amin’ireo tendron’ny havoana mitomandavan’i Antilibano. –Senira: anarana tranain’ny tendrombohitra Hermôna na ampahany anankiray aminy (1 Tan 5.23). sy Hermôna.
Andosiro ireny fa toeram-pieren’ny liona
sy tendrombohitra fiafenan’ny leôparda.
9Mambabo ny foko ianao, ry havako fofombadiko;
mambabo ny foko ny indray mipimasonao
ary na dia ny rojo anankiray eny am-bozonao aza.
10Mamy tokoa ny safosafonao,
ry havako fofombadiko;
fy tokoa ny safosafonao,
eny, fy mihoatra noho ny divay;
ary ny ilomanitrao dia mahasintona ahy
mihoatra noho ny zava-manitra hafa rehetra.
11Ny molotrao, ry fofombadiko,
dia toa mitsonika hamamiana
avy amin’ny vonin-javamaniry.
Mamy toa ronono aman-tantely ny teninao;
ary ny hanitr’ireo akanjonao
dia toy ny an’ireo hazo any Libano.
12Zaridaina mifefy tsara hidy ianao,
ry havako fofombadiko;
zaridaina mifefy tsara hidy ianao
sady loharano voaisy tombokase.
13Ianao toa sahan’ampongabendanitra
izay misy voany matsiro;
samy mamerovero ao koa
ny kôfera sy ny narda,
14ny narda sy ny safràna,
ny veromanitra sy ny kanelina
mbamin’ny hazo manitra rehetra;
mandraradrara-pofona eo koa ny miora
sy ny aloesy ary ny menaka manitra rehetra.
15Loharano ao an-jaridaina ianao,
dia fantsakana miboiboika ranovelona
izay mikoriana avy any Libano.
(Ravehivavy)
16Mifohaza, ry rivotra avy any avaratra;
ary avia, ry rivotra avy any atsimo.
Mitsofa ao an-jaridainako ianareo,
dia handraraka ny zava-manitra eo aminy.
Aoka ny malalako hankatỳ an-jaridainany
ka hihinana ireo voankazony matsiro.
(Ralehilahy)
Currently Selected:
Tononkiran'i Salômôna 4: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
