Salamo 76
76
SALAMO Natsahatr’Andriamanitra tao Tsiôna ny ady
1 Tao amin’ny tahirin-kiran’ny filohan’antoko-mpihira. Hampiarahina amin’ny valiha. Salamo nataon’i Asafa. Tononkira.
2Fantatra eo amin’i Joda Andriamanitra;
lehibe eo amin’i Israely ny lazany.
3Ao Salema#76.3 Salema: anaran’i Jerosalema nohafohezina; jereo Gen 14.18. ny trano itoerany
ary ao Tsiôna ny fonenany.
4Tao no namotehany ny fitaovam-piadiana,
dia ny tsipîka manelatra sy ny ampinga ary ny sabatra.
Fiatoana
5Andriamanitra ô, mahatahotra Ianao,
avo manerinerina noho ny tendrombohitra fahagola#76.5 Ampit Gen 49.26; Deot 33.15; Hab 3.6..
6Voaroba mbamin’ny miaramila mahery fo,
satria renoky ny torimaso ireo;
ankona tsy nahahetsika avokoa
ireny lehilahy matanjaka ireny#76.6 Ampit 2 Mp 19.35..
7Ry Andriamanitr’i Jakôba ô, nandrahona Ianao
ka nitsatoka teo ny soavaly sy ny mpitaingina azy.
8Eny, mahatahotra tokoa Ianao!
Ka iza no hahajanona eo anoloanao,
rehefa mipoaka ny fahatezeranao?
9Avy any an-danitra no amoahanao didim-pitsarana;
Andriamanitra ô, raiki-tahotra ny tany ka mangina,
10fony Ianao nitsangana hilaza ny fanapahan-kevitrao
hamonjy ny malahelo rehetra eto amin’ny tany.
Fiatoana
11Na dia ny fahatezeran’i Edôma aza
dia hanjary fiderana Anao;
ary ny olona sisa tavela any Hamata
dia hataonao manaiky Anao.
12Manaova voady amin’ny TOMPO Andriamanitrareo,
ary efao aminy izany;
ianareo firenen-drehetra manodidina,
mitondrà fanatitra
ho an’ilay Andriamanitra mahatahotra;
13fa Izy no mampiato ny reharehan’ireo andriana
sady mampahatahotra an’ireo mpanjakan’ny tany.
Currently Selected:
Salamo 76: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
