Salamo 55
55
SALAMO Vavaky ny olona voafitaky ny sakaizany
1 Tao amin’ny tahirin-kiran’ny filohan’antoko-mpihira. Hampiarahina amin’ny valiha. Tononkalo fananarana nataon’i Davida.
2Andriamanitra ô, mba henoy ny fivavako,
ary aza idifiana ny tarainako.
3Aoka aho ho tandrinao sy hovalianao
fa mivezi-poana amin-tsento sy toloko,
4noho ny fahavaloko mihiaka
sy ny olon-dratsy mampahory ahy;
eny, hasomparana no atorany amiko,
sady tezerany sy ankahalainy aho.
5Mangorohoro ato anatiko ny foko;
fanahiana ny ho faty no mamely ahy.
6Voan’ny tahotra sy tebiteby aho
ary koa heniky ny horohoro.
7Hoy aho hoe: «Raha izay, hono aho,
no mba ary elatra toa voromahailala
hisidinako hitady izay hitoerako,
8dia handositra lavitra aho
ka honina any an-taniefitra!
Fiatoana
9Ho dodona hamonjy fialofana aho,
tsy ho tratry ny tafiotra sy ny oram-baratra.»
10Akorontano, Tompo ô, ny fikasan’ireo mpanohitra ahy;
asaritaho ny teny ifanaovany#55.10 Ampit Gen 11.11-9..
Ady sy an-keriny no hitako ao an-tanàna
11sy manodidina ny màndany andro aman’alina;
heloka sy fampahoriana no ao anivon-tanàna
12tsy ialam-pitaka sy kolikoly ny lalambeny.
13Raha fahavalo no mamingavinga ahy,
ho niaretako ihany;
raha mpankahala no mirehareha hamely ahy,
ho niafenako fotsiny.
14Saingy ianao iray tarika amiko,
tapaka, namana sy sakaiza!
15Izany isika nifanao teny mamy sy niara-dia,
fony nankao an-tranon’Andriamanitra!
16Aoka ireo mpanohitra ahy ho faty tampoka;
aoka hidina velona any an-toeran’ny maty izy,
fa toe-dratsy no ao amin’ny fonenany,
hevi-dratsy no ao anatin’ny fony!
17Izaho kosa miantso an’Andriamanitra
ka Izy TOMPO mihitsy no hamonjy ahy.
18Na hariva na maraina na antoandro
no anaovako sento sy toloko,
dia ho henony hatrany aho.
19Hohatoniny akaiky aho ka hafahany;
eny, hotsoahiny soa aman-tsara aho
amin’ny ady am-parimbona atao ahy.
20Hihaino anie Andriamanitra ka hampietry an’ireo,
satria Izy no Mpanjaka hatrizay hatrizay!
Fiatoana
Tsy mety miova toetra ireo olon-dratsy ireo
sady tsy matahotra an’Andriamanitra.
21Ny olona nihavanany, aninjirany tanana;
ny fifanekena nataony, ivadihany.
22Malemy noho ny hero-dronono ny firesany,
kanjo ady no mameno ny fony;
malefaka noho ny diloilo ny teniny,
kanjo toy ny sabatra vonon-kamely.
23Apetraho amin’ny TOMPO ny fiahianao,
fa Izy no hanohana anao;
na oviana na oviana ny olo-marina
tsy havelany hangozohozo.
24Ianao, Andriamanitra ô, hampidina ao am-pasana
ny olona mpandatsa-dra sy mpamitaka,
na tsy mbola misasaka aza ny androm-piainany.
Fa izaho kosa dia hatoky Anao hatrany.
Currently Selected:
Salamo 55: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
